7. Le legi le Regatosche le Devlesche sile but mai lașe sar le legi le manușenghe

Le guvernea le manușenghe den legi cai, dacă le manușa len-pe pala lende, cadala daștin te ferin-le hai te anen lenghe miștimata. Vi le Regatos le Devlesco siles legi cai le manușa trebun te încăren-le. Citisaren 1 Corinteni 6:9-11 hai pala codoia den duma:

• Sar pachias că va avela i lumea cana sea le manușa va încărena le legi le Devlesche?a

• Pachias că si normalo ca o Iehova te manghel le manușendar cai train tela lesco Regato te încăren cadal legi? Sostar?

• Catar jianas că le manușa cai ci încăren cadal legi daștin te paruven-pe? (Dich o verseto 11.)

But manușa sile lajiavune te den duma anda sexo. Cu sea cadala, i Biblia del duma anda le relații sexualo directo hai pherdi respecto. So phenel i Biblia anda le relații sexualo anel amenghe miștimata, anda codoia că avel catar o Iehova, cai cărdea-ame. Vo jianel so si o mai mișto anda amende. Vo sicavel-ame so te cheras caște avas lașe ande lesche iacha hai caște bucurisaras-ame viațatar anda sea o timpo.

1. Sar dichel o Iehova le relații sexualo?

Le relații sexualo sile iech daro catar o Iehova anda iech murș hai iech jiuvli căsătorime. Cado daro catar o Del ci si numai ca o rrom hai i rromni te cheren șiave, si vi ca von te sicaven penghi iubirea iech caring aver hai te bucurin-pe iech averestar. O Cuvânto le Devlesco phenel: „Bucurisar-tu la rromniaia che tărnimaschi”. (Proverbe 5:18, 19) O Iehova ajucărel codolendar căsătorime te na soven aver varecaia avreal penghe rromeia sau penga rromniaia; aver varesar phendo te na cheren curvia. (Citisaren Evrei 13:4.)

2. So si i imoralitatea sexualo?

I Biblia phenel că „le manușa imorali . . . ci va moștenina o Regato le Develesco”. (1 Corinteni 6:9, 10) Codola cai scriisarde i Biblia andi șib grecisco șiute o cuvânto porneía code cai aghies citisaras imoralitatea sexualo. Cado cuvânto însemnol 1) relații sexualoa mașcar le jene cai ci sile căsătorime, 2) i homosexualitatea, cai si relații sexualo mașcar dui murșa sau mașcar dui jiuvlea sau 3) relații sexualo mașcar le manușa hai animalea. Cana ‘încăras-ame parpale catar i imoralitatea sexualo’, bucurisaras o ilo le Iehovasco hai si amen but miștimata. (1 Tesaloniceni 4:3)

HACHIAR MAI MIȘTO

3. Naș catar i imoralitatea sexualo

O Iosif sas iech murș loialo cai dea sea peschi zor te așel ujo moralo cana iech jiuvli camlea te sovel leia. Citisaren Geneza 39:1-12 hai pala codoia den duma:

• Sostar nașlea o Iosif? (Dich o verseto 9.)

• Pachias că sas mișto so cărdea o Iosif? Sostar?

MATERIALO VIDEO: Nașen catar i imoralitatea (5:06)

O Iehova camel ca savore te nașas catar i imoralitatea sexualo. Citisaren 1 Corinteni 6:18 hai pala codoia den duma:

• Sar daștil varecon te arăsăl te cherel imoralitatea sexualo?

• Tu sar daștis te nașes catar i imoralitatea?

4. Daștis te na meches-tu țârdino te cheres imoralitatea

MATERIALO VIDEO: Te citisaras i Biblia caște na mechas-ame țârdine te cheras imoralitatea (3:02)

• So cărdea o phral anda o materialo video cana dea peschi sama că lesche gânduri hai lesco phiraimos daștinas te cheren-les te na mai avel loialo pesca rromniache?

Vi anda le creștini loialo si phares poiechdata te încăren uje penghe gânduri. So daștis te cheres caște na meches ca chi goghi te așel ca le buchia imoralo? Citisaren Filipeni 4:8 hai pala codoia den duma:

• Ca so buchia trebul te gândisaras-ame?

• Sar daștil te ajutil-ame i citirea la Bibliachi hai o fapto te cheras buchi sea o timpo anda o Iehova, te na mechas-ame țârdine ando păcato?

5. Si amen miștimata cana cheras so manghel amendar o Iehova

MATERIALO VIDEO: Iech tărno bi goghiaco (9:31)

• Sar arăslea cado tărno te mechel-pe țârdino ando păcato? (Dich Proverbe 7:8, 9.)

• Cadea sar sicaven le Proverbe 7:23, 26, i imoralitatea sexualo anel bare ducha. So pharimata duriaras amendar cana așias uje moralo?

• Sar ajutil-ame o fapto te așias uje moralo te bucurisaras-ame viațatar anda sea o timpo?

Chichiva manușa pachian că so phenel i Biblia anda i homosexualitatea ci sicavel lașimos. Tha o Iehova si o Del la iubireaco hai vo camel ca savore te bucurisaras-ame viațatar anda sea o timpo. Anda codoia, trebul te cheras so manghel vo amendar. Citisaren 1 Corinteni 6:9-11 hai pala codoia den duma:

• Andel iacha le Devlesche numai le camnimata homosexualo sile nasul sau vi aver vareso?

Caște avas mișto dichle le Devlestar, savore trebul te cheras paruimata. Tha meritil te das sea amari zor? Citisaren Psalmo 19:8, 11 hai pala codoia den duma:

• Pachias că so manghel amendar o Iehova si prea pharo sau si ande amaro miștimos? Sostar pachias cadaia?

SO SICHILEAM

Le relații sexualo sile iech daro catar o Iehova anda iech rrom hai iech rromni căsătorime, caște bucurin-pe iech averestar.

So dichleam

• So si i imoralitatea sexualo?

• So ajutil-ame te nașas catar i imoralitatea sexualo?

• So miștimata si amen cana traisaras cadea sar manghel amendar o Iehova?

RODE MAI BUT

Va avela te diches sostar camel o Del te căsătorin-pe iech murș hai iech jiuvli cai camen te beșen ande iech than.

„So phenel i Biblia anda iech murș hai iech jiuvli cai beșen ande iech than bi te aven căsătorime?” (Articolo pa amaro site-o)

Va avela te hachiares că, prin so phenel i Biblia anda i homosexualitatea, ci sicavel că trebul te urâsaras codolen homosexuali.

„Si i homosexualitatea vareso nasul?” (Articolo pa amaro site-o)

Va avela te diches că so phenel o Del anda le relații sexualo, feril-ame.

„Si o sexo oralo chiar sexo?” (Articolo pa amaro site-o)

Andai relatarea „Phirade-pe șucar manța” va avela te diches so cărdea ieche murșes cai sas-lo homosexualo, te paruvel pesco phiraimos caște avel plăcuto le Devlesche.

„I Biblia paruvel i viața le manușenghi” (O Turno de veghe, 1 aprilia 2011)

Chiar cana iubis but le Iehovas hai des chi zor te na cheres vareso cai daștil te duchavel-les, poiechdata va avela te cheres greșeli. Cu sea cadala, chichiva păcatea si mai bare sar aver păcatea. (1 Corinteni 6:9, 10) Dacă cheres iech baro păcato, na bâstăr că o Iehova dichel-tu cuci vi mai dur hai camel te iertil-tu hai te ajutil-tu.

1. So trebul te cheras ca o Iehova te iertil-ame?

Codola cai iubin le Iehovas sile zurales duchade cana den penghi sama anda o baro păcato cai cărde-les. Tha o Iehova zuriarel-le prin so phendea pesche slujitorenghe: „Chiar cana tumare păcatea sile sar o pohtan zurales lolo, va avena cărde parne sar o iv”. (Isaia 1:18) Cana sicavas căința anda sea o ilo, o Iehova iertil-ame cu sea. So si i căința? I căința si cana fal-ame pharo anda sea o ilo, ci mai cheras so si nasul hai mangas zurales le Iehovas te iertil-ame. Pala codoia, das sea amari zor te paruvas o modo sar gândisaras, te na mai cheras le buchia nasul cai îngărde-ame caring codo păcato hai te avel amen iech phiraimos ujo, cadea sar manghel amendar o Iehova. (Citisaren Isaia 55:6, 7.)

2. Sar ajutil-ame o Iehova prin le phure cana cheras iech păcato?

Cana cheras iech baro păcato, o Iehova phenel amenghe ‘te acharas amende le phure la congregațiache’. (Citisaren Iacov 5:14, 15.) Cadal murșa sas-le numime prin o spirito sfânto hai von iubin le Iehovas hai lesche bacrean. Von sas-le sicade sar te ajutin-ame te avel amen pale iech amalimos chidino le Iehovaia. (Galateni 6:1)

Sar ajutin-ame le phure cana cheras iech baro păcato? Dui sau trin phure va sicavena amenghe andai Biblia sostar sas nasul so cărdeam. Mai but, von va dena-ame sfaturi hai va zuriarena-ame te na mai cheras pale o păcato. Cana varecon cherel iech baro păcato hai ci căil-pe, le phure duriaren-les andai congregația caște na peravel vi averen, hai cadea sea i congregația sili ferime.

HACHIAR MAI MIȘTO

3. Caște avas pale sasteveste spiritualo, trebul te das duma anda o păcato cai cărdeam-les

Le Iehovas duchaven-les zurales but amare păcatea, anda codoia trebul te phenas-le lesche. Citisaren Psalmo 32:1-5 hai pala codoia den duma:

• Ando than te garavas amare păcatea, sostar si ande amaro miștimos te phenas-le le Iehovasche?

MATERIALO VIDEO: „O Iehova ortosarel codoles cai iubil-les” (3:01)

• Sar ajutisarde le phure cadale phrales caște risarel-pe pale co Iehova?

Trebul te das duma anda sea o ilo le phurența. Von camen te ajutin-ame. Citisaren Iacov 5:16 hai pala codoia den duma:

• Sostar si mai ușoro le phurenghe te ajutin-ame cana phenas lenghe ciaces so cărdeam?

4. O Iehova sicavel îndurarea codolenghe cai cărde păcato

Dacă varecon cai cărdea iech baro păcato ci camel te cherel so manghel amendar o Iehova, silo duriardo andai congregația hai amen ci mai beșas lesa. Citisaren 1 Corinteni 5:6, 11 hai pala codoia den duma:

• Cadea sar iech „țâra plămădeala cherel te bariol sea o humer”, sa cadea, varecon cai cărdea iech păcato tha ci camel te paruvel-pe, daștil te cherel nasul andi congregația. Sar?

Sar sicavel o Iehova lașimos, îndurarea hai iubirea, prin o modo sar phiravel-pe codolența cai cărde iech păcato?

5. O Iehova iertil-ame cana căisaras-ame

O Isus sicadea amenghe iech exemplo cai ajutil-ame te hachiaras so si ando ilo le Iehovasco cana varecon căil-pe. Citisaren Luca 15:1-7 hai pala codoia den duma:

• Anda cadal versetea, so sichios anda o Iehova?

Citisaren Ezechiel 33:11 hai pala codoia den duma:

• So trebul te cheras caște dichiol-pe amari căința?

SO SICHILEAM

Dacă cheras iech păcato baro tha fal-ame zurales pharo hai camas anda ilo te na mai cheras cadai greșeala, o Iehova va iertila-ame.

So dichleam

• Sostar si ande amaro miștimos cana phenas amare păcatea le Iehovasche?

• So trebul te cheras ca amare păcatea te aven iertime?

• Sostar trebul te mangas ajutorii catar le phure dacă cărdeam iech baro păcato?

RODE MAI BUT

Va avela te diches sar simțosardea iech murș i îndurarea le Iehovaschi cadea sar sili sicadi ando Isaia 1:18.

Te na bâstras niciechdata că o Iehova silo îndurătorii (5:02)

Sar den penghi zor le phure, te ajutin codolen cai cărde iech baro păcato?

„Sar sicaven le phure de congregație iubirea hai îndurarea cana varecon păcătuil?” (O Turno de veghe, augustos 2024)

Va avela te diches sar sicavel-pe iubirea hai îndurarea codolenghe cai păcătuin hai ci camen te paruven pengo phiraimos.

„Sar daștin te aven ajutime codola ca sas-le duriarde andai congregația?” (O Turno de veghe, augustos 2024)

Andi relatarea „Trebulas te risarav-ma pale co Iehova”, va avela te diches sostar iech murș cai duriardea-pe catar o ciacimos, simțosardea că o Iehova țârdea-les pale peste.

„I Biblia paruvel i viața le manușenghi” (O Turno de veghe, 1 aprilia 2012)