LECȚIA 54
Con si hai so cherel „o sclavo fidelo hai prevăzătorii”?
O Isus si o șăro la congregațiaco creștino. (Efeseni 5:23) Aghies, sar Rege ando cerii, o Isus conducil pesche discipolen pa i phuv prin „o sclavo fidelo hai prevăzătorii”. (Citisaren Matei 24:45.) O Isus si codo cai mechlea cado „sclavo” hai dea-les o drepto te lel decizii. Cu sea cadala, o sclavo trebul te așunel le Cristosostar hai te slujil le phralenghe le Cristososche. Con si codo sclavo? Sar lel sama vo amendar?
1. Con si „o sclavo fidelo hai prevăzătorii”?
O Iehova sea o timpo folosisardea iech manuș sau iech țâno grupo manușengo caște sicavel pesche poporosche so te cherel. (Maleahi 2:7; Evrei 1:1) Pala soste mulea o Isus, le apostoli hai le phure anda o Ierusalimo line sama ca le buchia andai congregația creștino te jian mișto. (Faptele 15:2) Sa cadea, vi aghies, si iech țâno grupo phurengo cai bușiol o Corpo de Guvernare le Martorengo le Iehovasche. Von den haben spiritualo hai len sama te avel cărdi i lucrarea de predicare. Cado grupo si „o sclavo fidelo hai prevăzătorii, saves [o Isus] șiutea-les opral le slujitori”. (Matei 24:45a) Sea le jene anda o Corpo de Guvernare sile creștini machle spiritoia sfânto. Pala so va merena cade pi phuv, von va jiana ando cerii pașa o Cristos, ande lesco Regato.
2. So si o haben spiritualo cai del-les amenghe o sclavo fidelo?
O Isus phendea că o sclavo fidelo avelas „te del [le creștinen] haben co timpo potrivime”. (Matei 24:45b) O haben spiritualo si o sicaimos anda o Cuvânto le Devlesco. Cadea sar o haben cai has-les ajutil-ame te avas zurale hai sasteveste, sa cadea vi o haben spiritualo del-ame o zuralimos te așias loialo le Iehovasche hai te cheras i buchi cai dea-la amenghe o Isus. (1 Timotei 4:6) Amen primisaras cado haben spiritualo prin le întruniri, le congresea, tha vi prin le lila, le revistea hai le materialea video cai ajutin-ame te hachiaras so camel o Iehova hai te zuriaras amaro amalimos leia.
HACHIAR MAI MIȘTO
Va avela te diches sostar si amen nevoia catar „o sclavo fidelo hai prevăzătorii”, cai si o Corpo de Guvernare.
O Corpo de Guvernare del le Martoren pa sea i phuv haben spiritualo, phenel lenghe so te cheren hai ajutil-le
3. O poporo le Iehovasco trebul te avel organizime
Tela o vast le Isusosco, o Corpo de Guvernare lel sama ca le Martori le Iehovasche te cheren mișto penghi buchi. Sa cadea, o Isus lea sama ca vi le dintune creștini te cheren mișto penghi buchi. Dichen o MATERIALO VIDEO.
Citisaren 1 Corinteni 14:33, 40 hai pala codoia den duma:
Sar sicaven cadal versetea că o Iehova camel ca lesche Martori te aven organizime?
4. O sclavo fidelo lel sama ca i predicarea te avel mișto cărdi
I predicarea sas i mai importanto buchi cai le dintune creștini cărde-la. Citisaren Faptele 8:14, 25 hai pala codoia den duma:
Con lea sama te avel cărdi mișto i predicarea ando iechto secolo?
So cărde o Petru hai o Ioan cana le coaver apostoli sicade lenghe so te cheren?
Anda o Corpo de Guvernare, i predicarea si i mai importanto buchi, cadea că lel sama te avel mișto cărdi. Dichen o MATERIALO VIDEO.
O Isus sicadea chichi de importanto si i lucrarea de predicare. Citisaren Marcu 13:10 hai pala codoia den duma:
Sostar si cadea de importanto anda o Corpo de Guvernare i predicarea?
Sostar trebul ca „o sclavo fidelo hai prevăzătorii” te lel sama ca i predicarea te avel mișto cărdi pe sea i phuv?
5. O sclavo fidelo sicavel-ame sar te așunas le Devlestar
O Corpo de Guvernare sicavel le creștinen pa sea i phuv sar te așunen le Devlestar. Catar jianel vo sar te cherel cadaia? Ita sar cărdea o corpo de guvernare anda o iechto secolo. Citisaren Faptele 15:1, 2 hai pala codoia den duma:
So nehachiarimata sas mașcar le creștini anda o iechto secolo?
Castar mangle ajutorii o Pavel, o Barnaba hai aver, caște lașiaren o nehachiarimos?
Citisaren Faptele 15:12-18, 23-29 hai pala codoia den duma:
Sar rodea o corpo de guvernare anda o iechto secolo o ajutorii le Devlesco angla te lel iech decizia? (Dich le versetea 12, 15 hai 28.)
Citisaren Faptele 15:30, 31 hai 16:4, 5 hai pala codoia den duma:
So cărde le dintune creștini cana o corpo de guvernare phendea lenghe so manghel lendar o Del?
So miștimata dea-le o Iehova anda codoia că așunde lestar?
Citisaren 2 Timotei 3:16 hai Iacov 1:5 hai pala codoia den duma:
Angla te lel decizii cai rodel aghies ajutorii o Corpo de Guvernare?
UNII MANUȘA PHENEN: „Dacă așunes catar o Corpo de Guvernare, așunes numai catar niște manușa”.
Sostar pachias că o Corpo de Guvernare si tela o vast le Isusosco?
SO SICHILEAM
O Corpo de Guvernare si „o sclavo fidelo hai prevăzătorii” mechlo le Cristosostar. Vo del haben spiritualo hai sicavel le creștinen pa sea i phuv sar te așunen le Devlestar.
So dichleam
Con mechlea „o sclavo fidelo hai prevăzătorii”?
Sar lel sama amendar o Corpo de Guvernare?
Pachias că o Corpo de Guvernare si „o sclavo fidelo hai prevăzătorii”?
RODE MAI BUT
Va avela te diches sar si organizime o Corpo de Guvernare caște cherel peschi buchi.
„So si o Corpo de Guvernare le Martorengo le Iehovasche?” (Articolo pa amaro site-o)
Va avela te diches so cărdea o Corpo de Guvernare caște del-ame haben spiritualo demno pachiamasco.
Sar dichen le phrala anda o Corpo de Guvernare i buchi cai dea-la lenghe o Isus?
Sar sicaven amare întruniri hai congresea că o Corpo de Guvernare si tela o vast le Iehovasco?