Referințea anda o Caieto anda i întrunirea „Amari viața sar creștini hai i predicarea”
© 2023 Watch Tower Bible and Tract Society of Pennsylvania
6-12 NOIEMBRIA
SUMNACAI ANDA O LIL LE DEVLESCO | IOV 13, 14
„Cana o zuralo murș merel, mai daștil vo te trail pale?”
w99 15/10-M 3 ¶1-3
Rodas te traisaras mai but
CHIAR cana cadal dumes sas-le scriime acana 3 500 bărșa, vi aghies le mai but manușa pachian că i viața si harni hai pherdi ducha. Niciechdata le manușa ci dichle mișto o fapto că o tărnimos nachel sigo hai pala codoia phurion hai meren. Anda codoia, de but bărșa le manușa den penghi zor te cheren vareso caște daștin te train mai but.
Andel ghiesa le Iovosche, le egipteni pachiaie că dacă han le animalenghe testiculea va avena pale tărne. Andel purane ghiesa but alchimiști pachiaie că daștin te cheren vareso caște cheren i viața mai lungo. Von pachiaie că o sumnacai cărdo le manușendar va dela-le iech viața bi merimasco hai că dacă han andal sumnacune ciare va avena te train mai but. Le filozofi chinezo andal purane ghiesa pachiaie că daștin te cheren le manușen te na mai meren niciechdata dacă paruven le reacții chimico anda o corpo le manușengo prin meditarea, prin exerciții anda phurdimos hai prin so han.
O exploratoro spaniolo Juan Ponce de León silo prinjiando anda codoia că rodelas i haing le tărnimaschi. Ande lesco lil cai bușiolas Hermippus Redivivus iech medico ca traisardea ando secolo 18 phendea că, ando pașmilai, mai but bare șeia te aven phandade ande iech țâni camera hai lengo phurdimos te avel chidino andel glaje. Von pachiaie că cado purdimos daștilas te avel folosime anda aver manușa caște cheren lenghi viața mai lungo. Niciech anda cadal metodea ci sas lași.
w15 15/4-M 32 ¶1, 2
Daștil iech cașt șindo te del pale ranica?
IECH măslino bango hai pherdo nodurea ci fal-pe că si cadea de șucar sar iech baro cedro anda o Libano. Cu sea cadala, le măslini daștin te așen jiuvinde vi cana ci jial lenghe mișto. Phenel-pe că chichiva măslini train 1 000 bărș. Anda codoia că lesche rădăcini barion zurales andi phuv, o măslino daștil te del pale ranica vi pala so sas-lo șindo. Chichi timpo le rădăcini ci șuchion, o măslino va dela pale ranica.
O Iov pachiaia anda sea o ilo că dacă avelas te merel, daștilas te trail pale. (Iov 14:13-15) O Iov dea duma anda iech cașt, daștil-pe iech măslino, caște sicavel că pachiaia că o Del daștil te anel-les pale viațate. Vo phendea: „Că vi anda iech cașt si speranța. Dacă silo șindo, va dela pale ranica”. Chiar cana ci sas-lo chinghiardo but timpo, cana del o brâșând o butuco șuco ieche măslinosco daștil te avel pale viațate hai te del ranica sar iech nevo cașt. (Iov 14:7-9)
w11 1/3-M 22 ¶5
„Va avela tuche doro”
Anda so phendea o Iov, sichioas chichi de bari si i iubirea le Iehovaschi. O Del dichel lașe iachența le manușen cai mechen-pe ande lesche vasta, caște paruvel-le hai te cherel buchi ande lende ji cana arăsăn te aven cuci ande lesche iacha, cadea sar cărdea o Iov. (Isaia 64:8) O Iehova dichel zurales cuci lesche slujitoren loialo. Si lesche „doro” codolendar cai sas lesche închinători loialo hai acana soven ando merimos. Iech manuș sicado phendea că o cuvânto ebraico „doro” „sicavel o mai mișto so si ando ilo codolesco cai camel zurales but te dichel varecas”. Da, o Iehova na numai că anel pesche amintea catar lesche închinători, tha vi camel te anel-le pale viațate.
Cuci bara anda o lil le Devlesco
it-1-E 191
Uciar
Butivar o uciar sicavel vareso cai ci si importanto hai nici cuci. Sar exemplo, o Avraam phendea le Iehovasche: „Me som phuv hai uciar”. (Ge 18:27; dich vi Is 44:20; Iov 30:19.) Vi o Iov phendea că le dumes codolenghe cai sicade-pe amala neciace sas-le sar niște „proverbea anda uciar”. (Iov 13:12)
13-19 NOIEMBRIA
SUMNACAI ANDA O LIL LE DEVLESCO | IOV 15-17
„O Elifaz sicavel so te na cheras cana varecon silo perado”
w05 15/9-M 26 ¶4, 5
Te duriaras amendar i gândirea nasul!
De fiesavi data cana dea duma, o Elifaz phendea că o Iehova manghel cadea de but le manușendar, că oriso cheren lesche slujitori ci si mișto anda leste. „Ita! Les nai-les pachiamos ande lesche slujitori hai arachel doș vi ande pesche îngeri”, phendea o Elifaz le Iovosche. (Iov 4:18) O Elifaz mai phendea anda o Del: „Vo ci pachial-pe ande lesche sfinți hai nici chiar le ceruri ci sile uje ande lesche iacha.” (Iov 15:15) Pala codoia pușlea: „Duchal Codoles o Mai Zuralo că san orta?” (Iov 22:3) Vi o Bildad pachiaia cadaia hai phendea: „Nici chiar o șionoto ci strălucil hai nici le cerhaia ci sile uje ande lesche iacha!” (Iov 25:5)
Trebul te las sama te na mechas-ame athade catar cado modo gândimasco nasul. Anda codoia, că vo daștilas te cherel-ame te pachias că o Del manghel prea but amendar hai cadai buchi va avela te șiol ando pericolo amaro amalimos le Iehovaia. Mai but, dacă gândisaras cadea, so va avela te cheras cana va avela te avas ortosarde? Ando than te camel pherdo umilința te avel ortosardo, amaro ilo daștilas „te holiarel-pe contra o Iehova” hai te arăsas te na mai dichas le Devles lașe iachența. (Proverbe 19:3) So but avelas te rimosarel-pe amaro amalimos le Iehovaia!
w15 15/2-M 9 ¶16
Te avas cadea sar o Isus, umilo hai pherde iubirea
16 Amare dumes te aven pherde iubirea. Amari bari iubirea caring aver cherel-ame ‘te das duma șucar codolența perade’. (1 Tes. 5:14) So daisaras te phenas caște zuriaras-le? Daisaras te cheras-le te simțosaren-pe mai mișto cana phenas lenghe chichi but duchal-ame lendar hai că camas te las sama lendar. Cana așaras-le anda ilo, ajutisaras-le te hachiaren so lașe buchia cheren. Daisaras te anas lenghe andi goghi că, anda codoia că o Iehova țârdea-le caring pesco Șiavo, von sile cuci ande lesche iacha. (Ioan 6:44) Daisaras te phenas lenghe că o Iehova lel sama pesche slujitorendar savengo „ilo silo duchado” hai „sile perade”. (Ps. 34:18) Amare lașe dumes daștin te sastiaren o ilo codolengo perade. (Prov. 16:24)
Cuci bara anda o lil le Devlesco
w06 15/3-M 14 ¶11
Idei importanto anda o lil Iov
7:9, 10; 10:21; 16:22 – Sicaven cadal versetea că o Iov ci pachiaia ando jiuvindimos? Cade o Iov del duma anda so ajucărdea-pe te avel leia. So camlea vo te phenel? Daștil-pe că o Iov camlea te phenel că dacă avelas te merel, niciech anda codola cai așen jiuvinde ci mai avenas te dichen-les. Sau daștil-pe că camlea te phenel că chonic ci daștil te risarel-pe papale corcoro anda o Mormânto. Lesco pachiamos ando jiuvindimos, cai va avela ando viitorii, sicavel-pe ando Iov 14:13-15.
20-26 NOIEMBRIA
SUMNACAI ANDA O LIL LE DEVLESCO | IOV 18, 19
„Na mech niciechdata de iech rig che phralen creștino”
w90 1/9-E 22 ¶20
Cames te cheres vi mai but?
20 Le phure trebun te hachiaren că cana iech phral cai mai anglal sas-lo phuro sau slujitoro auxiliaro hai hasarel cado privilegio, daștil te avel perado chiar cana vo alosardea cadai buchi. Dacă vo ci silo excluso hai le phure dichen că silo perado, von trebun te len sama pe leste po plano spiritualo, pherde iubirea. (1 Tesaloniceni 5:14) Von trebun te ajutin-les te hachiarel că si nevoia lestar andi congregația. Chiar cana vo trebul te avel ortosardo, ci trebul te nachel but timpo ji cana cadale phrales umilo hai recunoscătorii te avel-les pale privilegii andi congregația.
Cuci bara anda o lil le Devlesco
w94 1/10-M 32
Iech lași duma daștil te del zuralimos
Cana le Iovos sas-les nevoia te avel zuriardo, o Elifaz hai lesche amala ci dine duma șucar leia. Von phende că o Iov silo duchado anda codoia că cărdea iech baro păcato. (Iov 4:8) The Interpreter’s Bible phenel: „Sea so trebulas le Iovos sas ca le manușa te aven sea le ileia pașa leste. Tha, so vo primisardea, sas-le dumes «ciace» phende andel religii cai ci camelas te așunel-le hai prin save ci sas lesche phendo chanci importanto po plano moralo.” O Iov sas-lo cadea de duchado cana așundea sar denas duma leia o Elifaz hai lesche amala, că dea cingar: „Ji cana va avela te duchaven mânro ghi hai te phagheren mânro ilo tumare dumența?” – Iov 19:2
Ci trebul te phenas niciechdata dumes nelașe cai te cheren ieche slujitoros le Devlesco te rovel cana nachel prin iech bari duch. (Dich vi o verseto anda Deuteronomo 24:15.) Iech proverbo biblico phenel: „So phenes daștil te feril-tu sau te mudarel-tu; cadea că, trebul te aves gata te primis so anen tuche che dumes”. – Proverbe 18:21, Today’s English Version.
27 NOIEMBRIA – 3 DECEMBRIA
SUMNACAI ANDA O LIL LE DEVLESCO | IOV 20, 21
„Codola orta daștil-pe te na aven barvale”
w07 1/8-M 29 ¶12
San „barvalo andel iacha le Devlesche?”
12 Cadea sar phenel o Isus, si iech diferența mașcar o fapto te avas barvale andel iacha le Devlesche hai te chidas barvalimata materialo. Cadea că o Isus phendea că i mai importanto buchi andi amari viața ci trebul te aven le barvalimata sau te încăras prea but ca le buchia cai si amen tha, te folosisaras le buchia cai si amen caște zuriaras amaro amalimos le Iehovaia. Cana cheras cadaia, va avela te avas mai barvale andel iacha le Devlesche. Sostar? Anda codoia că vo va dela amen but miștimata. I Biblia phenel amenghe: „I binecuvântarea le Iehovaschi si barvalimos hai vo ci șiol late niciech duch”. – Proverbe 10:22.
Cuci bara anda o lil le Devlesco
w95 1/1-M 9 ¶19
Victorioși contra o Satan hai lesche buchia
19 O Iov, o slujitoro le Devlesco, trebulas te marel-pe contra ‘le gânduri cai daravenas-les’, hai cai o Satan phendea-le lesche prin o Elifaz hai o Țofar. (Iov 4:13-18; 20:2, 3) Anda codoia că simțosardea-pe zurales nasul, o Iov arăslea te phenel buchia bi goghiaco anda le daraimata cai duchavenas leschi goghi. (Iov 6:2-4; 30:15, 16) O Elihu așundea atento so phendea o Iov hai ajutisardea-les te dichel le buchia cadea sar o Iehova, ande iech modo goghiaver. Vi aghies, le phure cai hachiaren le phralen, len sama codolendar perade bi te șion pe lende aver „pharimata”. Cadea sar o Elihu, von așunen-le pherde răbdarea hai machen-le le uleiosa cai sastiarel, anda o Cuvânto le Devlesco. (Iov 33:1-3, 7; Iacov 5:13-15) Cadea că, oricon silo duchado catar le buchia cai sile ciace sau sile numai ande leschi goghi, sau silo darado catar le sune sau viziuni, cadea sar sas-lo o Iov, daștil te arachel mângâierea andi congregația prin i Biblia. – Iov 7:14; Iacov 4:7.
4-10 DECEMBRIA
SUMNACAI ANDA O LIL LE DEVLESCO | IOV 22-24
„Daștil o manuș te ajutil varesar le Devles?”
w05 15/9-M 27 ¶1-3
Te duriaras amendar i gândirea nasul!
Cana le manușa phenen că o Del manghel prea but amendar, pachian vi că ande lesche iacha von sile chanci. Cana del duma i trinto data, o Elifaz șiol o pușimos: „Daștil o manuș te ajutil varesar le Devles?” (Iov 22:2) O Elifaz phendea că, o manuș silo de ivea angla o Del. Sa cadea vi o Bildad phendea: „Sar daștilas o manuș cai merel te avel orta angla o Del sau sar daștilas codo cai avel anda i jiuvli, te avel nedoșalo?” (Iov 25:4) Daștil-pe că von gândisarenas-pe: sar sas tromai le Iovos, iech manuș cai merel, te pachial că silo orta andel iacha le Devlesche?
Aghies, chichiva manușa sile perade anda codoia că pachian că sile de ivea. O modo sar sas-le bariarde, le pharimata la viațache sau i ura etnico hai rasialo, cărdea-le te pachian cadal buchia. Tha vi o Satan hai lesche benga sile bucurime cana daștin te phagheren varecasco ilo. Cana daștin te athaven ieche manușes te pachial că chanci anda so cherel ci si lașio andel iacha le Devlesche, codo manuș arăsăl sigo perado. Pala iech timpo, vo daștil te duriarel-pe catar o jiuvindo Del. – Evrei 2:1; 3:12.
Anda codoia că sam phure hai nasfale, ci mai daisaras te cheras cadea de but buchia. Cadea că, cana gândisaras-ame ca so cărdeam cana samas mai tărne, mai sasteveste hai sas amen mai but zuralimos, daștil te fal-ame că sea so cheras acana anda o Regato si prea țâra. Si zurales importanto te hachiaras că o Satan hai lesche benga camen te cheren-ame te pachias că o Del ci dichel cuci amari buchi! Trebul te duriaras amendar cadai gândirea.
w95 15/2-M 27 ¶6
Sichion sar daștin te nachen părdal tumare pharimata
Le trin amala le Iovosche perade-les mai dur cana phende dumes anda lengo șăro, ando than te phenen vareso cai sicavel o goghiaverimos le Devlesco. O Elifaz chiar phendea că „le Devles na-i les pachiamos ande lesche slujitori” hai că anda o Iehova ci sas importanto dacă o Iov sas orta sau nici. (Iov 4:18; 22:2, 3) Ci camas te gândisaras-ame ca iech hohaimos sar cado! Ci miril-ame o fapto că pala codoia, o Iehova ortosardea le Elifazos hai lesche amalen anda cado hohaimos. „Ci phendean o ciacimos anda mande”, phendea vo. (Iov 42:7) Tha, o mai baro hohaimos avelas te avel acana.
w03 15/4-M 14, 15 ¶10-12
Tărne cai bucurin o ilo le Iehovasco
10 Cadea sar sicavel i Biblia, o Satan phendea că o Iov ci va așela loialo le Iehovasche. Tha, mai but sar cadaia, vo phendea că niciech manuș cai slujil le Devlesche ci va așela lesche loialo, chiar nici tu. Cana dea duma anda le manușa, o Satan phendea le Iehovasche: „O manuș [na numai o Iov, tha oricon] va dela sea so siles anda peschi viața”. (Iov 2:4) Hachiares so trebul te cheres tu caște sicaves că o Satan hohavel? Cadea sar phenel-pe andel Proverbe 27:11, o Iehova phenel că daștis te cheres vareso anda leste prin savi vo daștil te phenel parpale codolesche cai prasal-les, o Satan. Gândisar-tu! O Suverano le Universosco manghel tutar te cheres vi tu vareso caște sicaves că o Satan si iech hohamno hai că vo phendea o mai baro hohaimos anda sea o timpo. So bari pachiv si amen hai so șucar buchi daisaras te cheras! Daștis te cheres so manghel tutar o Iehova? O Iov daisardea. (Iov 2:9, 10) Cadea cărdea vi o Isus hai vi but aver manușa andal timpuri purane, mașcar save sas but tărne. (Filipeni 2:8; Revelația 6:9) Vi tu daștis te aves sar von. Tha, le sama: ci daștis te na alosares nici iech rig. Prin so cheres, va avela te sicaves dacă san de i rig le Satanoschi sau le Iehovaschi. Cas va avela te alosares?
Le Iehovas fal-les tutar!
11 Fal-les ciaces le Iehovas so alosares te cheres? Ci sas ji acana destul manușa cai așile lesche loialo, ca vo te daștil te phenel parpale le Satanosche? O Beng phendea că chonic ci slujil le Iehovasche anda ilo, tha ji acana sicadea-pe că cadaia na-i ciaces. Cu sea cadala, o Iehova camel ca vi tu te aves de leschi rig ande cado baro hohaimos, anda codoia că fal-les vi tutar. O Isus phendea: „Sa cadea, mânro Dad, cai silo ando cerii, ci camel te hasardiol ci barem iech anda cadal țânorre.” – Matei 18:14.
12 Si ciaces, le Iehovas fal-les so tu alosares te cheres hai daștis te cheres-les bucurime sau nici. I Biblia sicavel că cana le manușa cheren lașe buchia, le Iehovasco ilo bariol hai cana cheren buchia nasul, lesco ilo silo duchado. Sar exemplo, cana le israeliți vazdine-pe contra lesche mai butivar, o Iehova sas-lo „duchado”. (Psalmo 78:40, 41) Angla te avel o Potopo anda le Noesche ghiesa, o Iehova „sas duchado ande pesco ilo” cana dichlea că „o nasulimos le manușengo sas baro”. (Geneza 6:5, 6) Gândisar-tu so si cadaia! Dacă alosares te cheres vareso nasul daștis te duchaves codoles cai cărdea-tu. Cadaia ci însemnol că o Del silo covlo sau că mechel-pe pala pesco ilo. Tha, vo iubil-tu hai camel chio miștimos. Cana cheres so si mișto bucuris lesco ilo. O Iehova silo fericime na numai anda codoia că daștil te phenel parpale le Satanosche, tha vi anda codoia că daștil te cărdiol chio Pochinitorii. Hai vo camel te pochinel-tu parpale. (Evrei 11:6) So lașio Dad si o Iehova Del!
Cuci bara anda o lil le Devlesco
w04 15/7-M 21, 22
Șiu tuche andi goghi te cheres buchia cai anen pachiv che Creatorosche
Te gândisaras-ame sar cărdea o Iehova o universo. Prin le dumes „sas riat hai sas teharin”, o Iehova cărdea prinjiande le perioadea anda i creația. (Geneza 1:5, 8, 13, 19, 23, 31) Cana astardea iech perioada, vo jianglea mișto so camel te cherel ande codo ghies. Cadea, o Del pherdea pesco scopo te cherel sea le buchia cai camlea-le ande codo ghies. (Revelația 4:11) O Iov phendea: „Cana vo [o Iehova] camel te cherel vareso, cherel”. (Iov 23:13) Chichi de but barilea o ilo le Iehovasco cana dichlea „sea so cărdea” hai phendea că sea le buchia „sas-le zurales lașe”! – Geneza 1:31.
Caște cheras so șiuteam ande amari goghi, trebul te camas anda sea o ilo cadaia. So va ajutila-ame te camas cadai buchi? Încă de cana la phuvea ci sas-la forma hai sas-li nanghi, o Iehova dichlea de mai anglal sar avelas te avel: iech cuci bar ando spațio cai anel lesche gloria hai pachiv. Vi amen daisaras te camas anda sea o ilo te cheras so șiuteam ande amari goghi, cana gândisaras-ame so miștimata va anela amenghe cadai buchi. Te dichas so cărdea o Tony, iech tărno de 19 bărșa. Vo ci bâstărdea niciechdata so sas ande lesco ilo cana dichlea i dintuni data iech Betelo le Martorengo le Iehovasche andai Europa de vest. De atunci, ande leschi goghi sas o pușimos: „Sar avelas te beșav hai te cherav buchi ande iech than sar cado?”. O Tony gândisardea-pe sea o timpo ca cadai buchi hai cărdea mai dur sea so daisardea caște arăsal cai camelas. So fericime sas-lo cana, pala chichiva bărșa, arăslea te cherel buchi co Betelo!
11-17 DECEMBRIA
SUMNACAI ANDA O LIL LE DEVLESCO | IOV 25-27
„Caște așias bidoșaco hai anda sea o ilo pașa o Iehova, ci trebul te avas perfecto”
it-1-M 1210 ¶4
Te așias bidoșaco hai anda sea o ilo pașa o Iehova
Iov. Daștil-pe că o Iov traisardea pala o merimos le Iosifosco hai angla le ghiesa le Moisesche. Vo sas-lo iech „manuș orta hai bidoșaco [ebr., tam], [cai] „daralas le Devlestar hai încărelas-pe dur catar so si nasul”. (Iov 1:1; dich IOV.) Cana ando cerii le îngeri chidine-pe angla o Del, o Iehova pușlea le Satanos anda o Iov. Cadaia sicavel că si iech chidino phanglimos mașcar o fapto ca o manuș te așel anda sea o ilo pașa o Iehova hai le hohaimata cai o Satan phendea-le anda o Iehova. O Satan phendea anda o Iov că slujisardea le Devlesche anda codoia că ajucărdea miștimata lestar, na anda sea o ilo. Cadea că, vo phendea că o Iov ci va așela bidoșaco hai anda sea o ilo pașa o Del, hai o Iehova mechlea-les te zumavel le Iovos. Chiar cana o Satan lea le Iovostar sea lesco barvalimos hai lesche șiaven, vo ci daisardea te cherel le Iovos te na mai așel anda sea o ilo pașa o Iehova. (Iov 1:6–2:3) Atunci o Satan hohadea că o Iov avelas gata te nachel prin orisavo pharimos numai te na hasarel peschi viața. (Iov 2:4, 5) Pala codoia, dea-les iech pharo nasfalimos, cai duchadea-les zurales but. Chiar vi le Iovoschi rromni camlea te cherel-les te mechel-pes le Iehovastar. Hai lesche amala neciace, cai phende but hohaimata anda o Iehova, doșarde-les hai phende buchia bigoghiaco anda leste. (Iov 2:6-13; 22:1, 5-11) Tha, o Iov așilea zuralo hai phendea că va așela bidoșaco hai anda sea o ilo pașa o Iehova. Vo phendea: „Ji ca o palutno phurdimos, ci va avela te mechav mânro pachiamos! Va avela te încărav zurales ca mânro ortomos hai ci va avela te mechav-les niciechdata; mânro ilo ci va avela te doșarel-ma chichi timpo va avela te traisarav.” (Iov 27:5, 6) Anda codoia că așilea anda sea o ilo pașa o Iehova, o Iov sicadea că o Dușmano le Devlesco silo iech hohamno.
w19.02-M 3 ¶3-5
Aș mai dur bidoșaco hai anda sea o ilo pașa o Iehova!
3 O cuvânto „bidoșarimos” însemnol că iech slujitoro le Devlesco iubil le Iehovas, așel anda sea o ilo pașa leste hai șiol-les po iechto than ande peschi viața. Andi Biblia, o cuvânto traducime prin „bidoșarimos”, însemnol sastevesto hai castar ci lipsol chanci. Sar exemplo, i Legea manghelas catar le israeliți te anen le Iehovasche sar jertfa numai animalea sasteveste. (Lev. 22:21, 22) O poporo le Devlesco ci sas mechlo te anel sar jertfa iech animalo nasfalo cai ci sas-les iech pânro, iech can sau iech iach. O Iehova camlea ca o animalo te avel sastevesto hai castar ci lipsolas chanci. (Mal. 1:6-9) Sostar o Iehova dichel cuci vareso cai si sastevesto hai castar ci lipsol chanci? Sar exemplo, cana camas te chinas iech fructo, iech lil sau aver vareso, ci camas te avel-les hâva sau te lipsol vareso anda leste, tha camas te avel sastevesto hai castar ci lipsol chanci. Vi o Iehova camel ca amari iubirea hai loialitatea anda leste te aven sa cadea. Cadala trebun te aven bidoșale hai te na lipsol chanci anda lende.
4 Însemnol cadaia că trebul te avas perfecto caște așias bidoșaco hai anda sea o ilo pașa o Iehova? O ciacimos si că jianas că sam imperfecto hai că cheras but greșeli. Mai dur va avela te dichas dui motivea sostar ci trebul te daras. Iech: o Iehova alosarel te na dichel amare greșeli. Lesco Cuvânto phenel: „Dacă avelas te diches-tu ca le păcatea, o, Iah, con daștilas te așel ande pânrende, o, Iehova?” (Ps. 130:3) Vo jianel că sam imperfecto hai păcătoși hai iertil-ame anda sea o ilo. (Ps. 86:5) Dui: o Iehova jianel so daisaras te cheras hai ci ajucărel amendar mai but. (Citisar Psalmo 103:12-14.) Atunci so însemnol te avas sasteveste hai bidoșaco ande lesche iacha?
5 I iubirea ajutil le slujitoren le Iehovasche te așen bidoșaco hai anda sea o ilo pașa leste. Amari iubirea anda o Del, trebul te avel sastevesti, bidoșaco hai te na lipsol latar chanci, adică te das-ame cu sea lesche. Cana amari iubirea așel cadea vi cana nachas prin pharimata, sicavas că așias anda sea o ilo pașa o Iehova. (1 Cron. 28:9; Mat. 22:37) Te gândisaras-ame sar sicade că așen bidoșaco le trin Martori anda save deam duma co începuto. Ci camlea i tărni te simțosarel-pe mișto ca i școala? Camlea o tărno ca lesco colego te prasal-les? Camelas codo murș te hasarel peschi buchi? Nici. Von jianen că o Iehova ajucărel amendar te cheras so si orta hai camen te cheren leschi voia. Anda codoia că iubin le Iehovas, von gândin-pe sea o timpo leste cana alosaren so te cheren hai sicaven că așen bidoșaco hai anda sea o ilo pașa leste.
Cuci bara anda o lil le Devlesco
w16.11-M 9 ¶3
Cheras le buchia pala sar phenel i Biblia, o Cuvânto le Devlesco
3 I creația sicavel că o Iehova jianel o mai mișto te cherel sea le buchia pala iech ordinea. I Biblia phenel: „O Iehova cărdea i phuv goghiaverimaia hai jianglea sar te zuriarel le ceruri”. (Prov. 3:19) Amen prinjianas numai „le margini catar [le Devlesche] riga” hai „so așunas anda leste si numai iech glaso țâno”. (Iov 26:14) Cu sea cadala, chiar cana ci jianas prea but buchia anda le planetea, cerhaia hai galaxii, dichiol-pe claro că sea cadala sas-le cărde te aven ande iech ordinea zurales șucar. (Ps. 8:3, 4) Le galaxii sile cărde andal milioanea cerhaia cai jian iech pala aver ando spațio, ande iech ordinea. Le planetea anda amaro sistemo, risaren-pe pala o cham sar pe iech drom cai si reguli anda circulația. Si ciaces, i ordinea cai si ando universo, ajutil-ame te hachiaras că o Iehova, cai cărdea le ceruri hai i phuv goghiaverimaia, meritil te avel așardo, te avas lesche loialo hai te anas lesche închinarea. (Ps. 136:1, 5-9)
18-24 DECEMBRIA
SUMNACAI ANDA O LIL LE DEVLESCO | IOV 28, 29
„San dichlo le manușendar cadea sar sas o Iov?”
w02 15/5-M 22 ¶19
Sicav iech lașimos pherdo iubirea caring codola cai silen nevoia ajutorostar
19 Le relatări biblico anda save deam duma, sicaven că o lașimos pherdo iubirea trebul sicado caring codola cai ci daștin te cheren le buchia corcore hai silen nevoia ajutorostar. Le Avraamos sas-les nevoia te ajutil-les o Betuel caște na avel hasardo lesco neamo. Le Iacovos sas-les nevoia te ajutil-les o Iosif, caște avel prahome ando Canaan. Hai, caște avel-la iech șiavorro, la Naomia sas-la nevoia te ajutil-la i Rut. Nici o Avraam, nici o Iacob hai nici i Naomi, ci daisarde te cheren cadal buchia bi te ajutil-le varecon. Sa cadea, vi aghies, o lașimos pherdo iubirea trebul sicado vi mai but caring codola cai silen nevoia ajutorostar. (Proverbe 19:17) Trebul te las-ame pala o Iov, cai dichlea caring „codo ciorro cai manghelas ajutoro hai caring codo cai nai-les dad, tha vi caring codo cai nai-les chonic cai te ajutil-les hai avelas te hasardiol”. O Iov ‘bucurisardea o ilo la phivleaco’ hai ‘cărdilea iach anda coro hai pânro anda bango’. – Iov 29:12-15.
it-1 655-E ¶10
Hureaimos
Ande but pasajea andai Biblia o hureaimos silo sicado ande iech modo simbolico. Cadea sar iech hureaimos specialo sicavel anda iech manuș con silo, catar silo hai so cherel, sa cadea o hureaimos cana silo folosime andi Biblia, ande iech modo simbolico sicavel sea cadala buchia, cadea sar dichiol-pe andi ilustrarea le Isusoschi anda le abiavesco hureaimos. (Mt 22:11, 12) Andi Revelația 16:14, 15, o Rai o Isus Cristos sicavel că codo cai sovel spiritualo daștilas te hasarel pesco hureaimos cai sicavel că silo iech martoro fidelo le ciace Devlesco. Cadai buchi anelas lesche iech baro hasarimos, acana cana si pașă „o războio le bare ghiesesco le Devlesco O Mai Zuralo”.
w09 1/2-M 15 ¶3, 4
So si iech lașio anav?
Cana năștisaileam, na amen alosardeam amaro anav. Cu sea cadala, amen corcore alosaras, prin amaro phiraimos, sar camas te avas prinjiande le coaverendar. (Proverbe 20:11) Puș-tu: Dacă traisardemas andel puraimata so anav avileias te șiol manghe o Isus sau le apostoli? So anav sicavel o mai mișto so felo manuș som?
Trebul te gândisaras-ame mișto cadale pușimatande. Sostar? Anda codoia că cadea sar phendea o goghiaver rege Solomon „si mai mișto te alosares te avel-tu iech lașio anav sar te aven-tu bare barvalimata”. (Proverbe 22:1) Ciaces, si iech bari buchi te avas prinjiande pala amaro lașio phiraimos. Cana cheras amenghe iech lașio anav angla o Del, va avela-ame iech barvalimos cai va așela anda sea o timpo. O Del promitil că va avela te scriil ande iech lil de amintirea o anav sea codolengo cai daran lestar hai că va dela-le i ocazia te train anda sea o timpo. (Maleahi 3:16; Revelația 3:5; 20:12-15)
Cuci bara anda o lil le Devlesco
g00 8/7-M 11 ¶3
O zâmbeto cherel-tuche mișto!
Si importanto o zâmbeto? Anes tuche amintea cana o zâmbeto varecasco cărdea-tu te simțosares-tu mai mișto? Sau cana varecon ci sicadea tuche iech zâmbeto hai cadaia cărdea-tu te pachias că ci camel-tu pașă lestar? Si ciaces, iech zâmbeto si zurales importanto. Daștil te cherel mișto vi codolesche cai zâmbil hai vi le codolesche casche si sicado. O Iov phendea codolenghe cai sas lesche contra: „Cana sicadem lenghe iech zâmbeto, ci avilea lenghe te pachian hai o udud pa mânro mui dea-le liniștea”. (Iov 29:24) „O udud” cai sas po mui le Iovosco, daștil-pe că sicadea leschi bucuria hai fericirea.
25-31 DECEMBRIA
SUMNACAI ANDA O LIL LE DEVLESCO | IOV 30, 31
„Sar așilea ujo moralo o Iov”
w10 15/4-M 21 ¶8
Risaren tumare iacha catar le melale buchia!
8 Le ciace creștini daștin te arăsăn te mechen-pe țârdine catar i dorința le maseschi hai i dorința le iachenghi. Anda codoia, o Cuvânto le Devlesco zuriarel-ame te ortosaras-ame corcore cana das amari sama că sam țârdine catar so dichas hai so camas (1 Cor. 9:25, 27). (Citisar 1 Ioan 2:15-17.) O Iov, iech manuș orta, hachiardea o zuralo phanglimos cai si mașcar so dichas hai so camas. Vo phendea: „Cărdem iech solaharimos mânre iachența. Sar te dichav gule iachența caring iech șei bari?” (Iov 31:1) O Iov na numai că ci camlea te șiol o vast pe iech jiuvli caște sovel leia, tha nici ci mechlea ca le gânduri melale te aven ande leschi goghi. O Isus sicadea că ci trebul te meliaras amari goghi buchianța imoralo. Vo phendea: „Tha me phenav tumenghe că con încărel pesche iacha but timpo pe iech jiuvli cadea încât te camel-la, cărdea deja curvia laia ande pesco ilo.” (Mat. 5:28)
w08 1/9-M 11 ¶4
Gândisar-tu cai îngărel o drom pe savo alosares te jias
Mai anglal te cheres iech paso pe iech drom cai cames te jias, puș-tu: Caring cai îngărel? Dacă beșes iech țâra hai gândis-tu so va avela tuia dacă jias pe cado drom, cadaia daștil te ajutil-tu te na alosares iech rig nasul. O drom pe savo jian codola cai ci len sama ca so phenel o Del arăsăn te avel-len but ducha: SIDA hai aver nasfalimata cai len-pe prin le relații sexualo, jiuvlea cai așen phare bi te camen, te șion pendar le șiave cai încă nai-le cărde, amalimata rimosarde, iech conștiința neuji. O apostolo Pavel sicadea claro cai îngărel o drom codolengo imorali: von „ci va moștenina o Regato le Devlesco.” (1 Corinteni 6:9, 10)
w10 15/11 5, 6 ¶15, 16
Tărneale, mechen tumen sicade catar o Cuvânto le Devlesco?
15 Cana pachias că chi loialitatea caring o Del va avela zumadi o mai but: cana san ande iech than averența sau cana san corcoro? Gândisar-tu iech țâra. Cana san ca i școala sau ca i buchi san mai atento te les sama pe chio amalimos le Iehovaia. San gata te duriares tutar orisavo pericolo spiritualo. Tha, cana beșes liniștime hai cheres so placial-tu, ci mai san cadea de atento hai daștis te meches-tu ușoro țârdino te cheres vareso so ci placial le Iehovas.
16 Sostar trebulas te cames te așunes le Iehovastar cana san corcoro? Na băstăr că prin so cheres daștis vi te duchaves le Iehovas, tha vi te cheres ca lesco ilo te bariol. (Gen. 6:5, 6; Prov. 27:11) Cadaia si ciaces, anda codoia că, „les duchal-les” tutar. (1 Pet. 5:7) Vo camel te așunes lestar caște jial tuche mișto. (Is. 48:17, 18) Cana chichiva anda le slujitori le Iehovasche anda o Israelo ci așunenas lestar, von duchavenas-les. (Ps. 78:40, 41) Tha, o Daniel ci sas cadea. Vo sas cuci andel iacha le Iehovasche; iech îngero chiar phendea anda leste că si iech „manuș zurales cuci”. (Dan. 10:11) Sostar? Anda codoia că o Daniel așilea loialo le Devlesche na numai cana sas mașcar aver manușa, tha vi cana sas-lo corcoro. (Citisar Daniel 6:10.)
Cuci bara anda o lil le Devlesco
w05 15/11-M 11 ¶3
Sar te așunes pherdo iubirea
O Iov dea duma mai but sar deș-var angla codola trin amala. Cu sea cadala, vo phendea: „Oh! Dacă avelas varecon cai te așunel-ma!” (Iov 31:35) Sostar? Anda codoia că o modo sar von așunenas-les ci zuriardea-les. Ci duchalas-len le Iovostar hai ci camenas te hachiaren so sas ande lesco ilo. Leschi duch ci arăslea vi ande lengo ilo. Tha, ita so sfato del-ame o apostolo Petru: „Savoren te avel tumen sa codoi gândirea, te sicaven empatia, iubirea phralicani, compasiunea tandro hai umilința.” (1 Petru 3:8) Sar daisaras te sicavas empatia? Cheras cadaia cana duchal-ame le coaverestar hai das amari zor te sicavas că hachiaras so si ande lesco ilo. Avelas mișto te phenas dumes sar: „pachiav că duchadea-tu zurales but” sau „daștil-pe că simțosardean că chonic ci hachiarel so si ande chio ilo”. Sau daisaras te phenas vi amen amare dumența so phendea vo, caște sicavas că hachiardeam ciaces so phendea. Te așunas pherde iubirea, si na numai te așunas atento so phenel o manuș, tha vi te das amari zor te hachiaras so si ando ilo codolesco cai del duma.