Anen închinarea le Iehovasche sar familia

Cadea sar sichilean anda cadai broșura, andi Biblia si principii cai va ajutina tut hai chia familia. O Iehova camel te aves fericime. Vo phenel, că dacă va avela te șios po iechto than i închinarea andini lesche, ‘sea cadal buchia va avena tumenghe șiute opral’ (Matei 6:33). Vo camel ciaces te avel chio amal. Anda codoia, cher vi tu sea so daștis caște zuriares chio amalimos le Devleia. Cado si o mai baro privilegio cai daștil te avel varecas (Matei 22:37, 38).

1 ZURIAR CHIO AMALIMOS LE IEHOVAIA

SO PHENEL I BIBLIA: „Me va avava tumenghe dad, hai tume va avena manghe șiave hai șeia, phenel o Iehova.” (2 Corinteni 6:18) O Del camel te aves lesco lașio amal. Iech modalitatea caște cheres cadai buchi si i rugăciunea. O Iehova invitil-tu te ‘rughisares-tu sea o timpo’ (1 Tesaloniceni 5:17). Vo camel but, te des lesche duma anda che mai garade gândurea, tha vi anda che pharimata (Filipeni 4:6). Cana rughisares-tu ande iech than chia familiaia, von va dichena chichi de ciacio si o Del anda tute.

Na-i destul numai te des duma le Devleia, trebul vi te ascultis so phenel vo. Daștis te cheres cadaia cana studiisares lesco Cuvânto hai le publicații biblico (Psalmo 1:1, 2). Gândisar-tu but soste sichios (Psalmo 77:11, 12). O fapto te ascultis le Devlestar însemnol vi te aves ande iech modo regulato ca le întruniri creștino (Psalmo 122:1-4).

Iech aver modalitatea prin savi daștis te zuriares chi prietenia le Iehovaia si te des duma avrenghe anda leste. Cana va chereia mai but cadai buchi, va avela te simțos-tu mai pașe lestar (Matei 28:19, 20).

SO DAȘTIS TE CHERES:

• Cher tuche timpo ande fiesavo ghies te citis andai Biblia hai te rughisares-tu.

• Sar familia, șion po iechto than le buchia spiritualo, na le destinderi hai le divertismentea.

2 CHEREN ANDAI ÎNCHINAREA ANDI FAMILIA IECH OCAZIA TE BUCURIN TUME

SO PHENEL I BIBLIA: „Pașon le Devlestar, hai vo va pașiola tumendar!” (Iacov 4:8) Si mișto te cheren tumenghe iech planificarea andai închinarea andi familiaa hai te încăren-tume latar (Geneza 18:19). Tha cadaia na-i destul. O Del trebul te cherel partea anda tumari viața de fiesavo ghies. Ajutisares chia familia te zuriarel peschi prietenia le Devleia cana des duma anda leste „cana san chăre hai cana phires po drom, cana șios-tu te soves hai cana uștes” (Deuteronomo 6:6, 7). Av sar o Iosua, savo phendea: „Me hai mânro chăr va avela te slujisaras le Iehovasche!” (Iosua 24:15).

SO DAȘTIS TE CHERES:

• Si foarte importanto te avel tume iech programo caște studiin i Biblia hai te încăren tume lestar. Cana studiin, trebul te încăren conto catar le necesități fiesavesco andai familia.