Pușlean-tume?

Sostar ando purano Israelo pochinelas-pe anda i bori?

ANDEL ghiesa biblico, i familia la șeiorrachi primilas o pochinimos anda i bori cana le dui familii hachiarenas-pe ca le tărne te len-pe. Cado pochinimos daștilas te avel vareso cuci, animalea sau love. Poiechdata, cado sas pochindo prin buchi, cadea sar cărdea vi o Iacob, cai cărdea buchi anda o dad la Rahelaco efta bărșa. (Gen. 29:17, 18, 20) Sostar sas cărdo cado obiceio?

Iech biblisto, Carol Meyers, phendea: „O pochinimos anda i bori daștilas te avel dino caște pachiarel-pe o fapto că i familia hasarelas i buchi cai cherelas-la i șei ando miștimos la familiaco hai cai sas zurales importanto andal familii cai cherenas buchi i phuv”. O pochinimos anda i bori daștilas vi te cherel ca le dui familii te aven mai chidine prin o phanghlimos la căsătoriaco. Cadea von daștinas te ajutin-pe cana nachenas prin pharimata. Mai but, o pochinimos anda i bori sicavelas că iech jiuvli sas-li logodime hai că de atunci laco rrom avelas te lel sama pe late, na laco dad.

O pochinimos anda i bori ci cherelas anda i rromni iech buchi cai daștilas te chinel-pe sau te bichinel-pe. Ando lil Ancient Israel – Its Life and Institutions phenel-pe: „O fapto că trebulas te den-pe love sau te cherel-pe buchi anda i bori falas-pe că, mașcar le evrei, iech șei cai sas dini andi căsătoria sas-li bichindi. Tha [o pochinimos anda i bori] ci sas o prețo anda i șei, tha iech pochinimos anda o hasarimos la familiaco”.

O obiceio te del-pe iech pochinimos anda iech bori încărel-pe vi aghies ande chichiva thema. Cana le dada creștini manghen iech pochinimos anda iech bori, von va camena ‘te aven prinjiande savore manușendar că mechen pendar’ hai ci va manghena prea but. (Filip. 4:5; 1 Cor. 10:32, 33) Cadaia sicavel anda lende că ci ‘iubin le love’, sau că ci sile hașvale. (2 Tim. 3:2) Cadea, o jamutro ci va trebula te mechel pe aver data i căsătoria ji cana va chidela le love anda o pochinimos zurales baro anda i bori. Mai but, dacă silo pioniero ci va simțola-pe oblighime te mechel pesco pionierato caște cherel buchi mai but hai te chidel le love anda o pochinimos zurales baro anda i bori.

Ande chichiva thema, o pochinimos anda i bori silo stabilime prin i legea. Le dada creștini trebun te încăren cadal legi. Sostar? Anda codoia că o Cuvânto le Devlesco manghel catar le creștini ‘te aven supuso ca la autorități mai bare’ hai te încăren le legi cai ci sile contra le Devlesche legi. (Rom. 13:1; Fap. 5:29)