Pușlean-tume?
Sostar sas mișto andel iacha le Iehovasche ca le israeliți te anen sar jertfa dui feluri ciriclea?
PALA i Legea, cadichi le turturele, hai vi le porumbei daștinas te aven andine sar jertfa le Iehovasche. Ande le legi cai den duma andal jertfe, cadal dui ciriclea sile șiute ande iech than sea o timpo. Cana le israeliți ci daștinas te anen sar jertfa turturele, daștinas te anen porumbei ande lengo than. (Lev. 1:14; 12:8; 14:30) Sostar sas lași cadai buchi? Iech motivo si că ci arachenas-pe turturele sea o timpo. Sostar?
Turturea
Le turturele si ciriclea cai train ando Israelo andel șiona cana si tachimos. Ando șion octombria, von tiliaren caring le thema mai tate hai aven parpale ando Israelo cana avel o pașmilai. (Cânt. 2:11, 12; Ier. 8:7) Cadea că, anda le israeliți anda puraimata sas pharo te anen sar jertfa turturele cana sas ivend.
Porumbelo
Tha le porumbei o mai butivar ci jian ande aver thana mai tate, cadea că von daștinas te aven arachle ando Israelo sea o bărș. Mai but, le manușa bariarenas-le pașa o chăr. (Dich vi o Ioan 2:14, 16.) O lil Bible Plants and Animals, sicavel: „ande sea le foruria hai gava anda Palestina, arachenas-pe porumbei bariarde le manușendar. Ande fiesavo chăr sas cărdi iech hâv ando zido cai beșenas le ciriclea”. (Dich vi o Isaia 60:8.)
Porumbelo ande iech hâv cărdi ando zido
Cadea o Iehova sicadea iubirea hai că ci ajucărelas prea but le manușendar cana phendea că daștinas te anen sar jertfa le ciriclea cai arachenas-pe ando Israelo sea o bărș.