Evanjil Wafunday Mateu

6 “Babalany mulong wa kulik kusal yom yiwamp chakwel antu akumanany; chamwamu Tatukwen uda mwiur kakukufutanyap. 2 Chawiy anch wayinkish atuzwendj yipan ya riy, kangal wimekesh mud mutapu ukat kusalau in rubabek mu ma sinagog ni mu jinjil, chakwel ayitumbisha kud antu. Chakin kamu nikulejinany, awiy atambwil kal difut dau diwanyidina. 3 Pakwez ey, anch wayinkish atuzwendj yipan ya riy, kangal chikas chey cha kamaku chijika yom yisadina chikas chey cha katatuku, 4 chawiy pan yipan yey ya riy ku ujindj. Mwamu Tatukwey ukata kutal mu ujindj ukukufut.

5 “Chikwau kand, chisu ulembilanya, kangal kuyimburij in rubabek, mulong akatining kulembil oku iminy mu ma sinagog ni pa mansang ma jinjil jijim chakwel ayiman kud antu. Chakin kamu nikulejinany, awiy atambwil kal difut dau diwanyidina. 6 Pakwez ey anch ukimbin kulembil, andam mu kapalikany key ka mukach, kupwa kwa kupat chis, mulembila Tatukwey wakad kutwish kumekan ku mes,* mwamu Tatukwey ukata kutal mu ujindj ukukufut. 7 Chisu ulembilanya, kangal kuchirokin yom yawiy yimwing yimwing mud mukat kusalau antu a michid, mulong akat kutong anch akuyitesh anch alond yom yivud. 8 Chawiy en kangal wikalany mud awiy, mulong Tatukwen wij yom uswirikedinanya kurutu kwenen kumwitay.

9 “Chawiy ufanyidinany kulembil mwamu:

“‘Tatukwetu uda mwiur, dijin dey aditumbish. 10 Want wey weza. Rusot rey risadika pansh mud mwiur. 11 Twinkisha yakuda tukweta nich kuswir nlel unou; 12 tulikishina yitil yetu mud mutapu tukata niyetu kuyilikishin antu akata kutusadin yitil. 13 Ni kangal watutwal* mu choziu, pakwez tukamunina* kud muyimp.’*

14 “Mulong anch wayilikishinany akwen kurumbuk kwau, Tatukwen wa mwiur ukukulikishinany niyen; 15 pakwez anch en walikany kuyilikishin akwen kurumbuk kwau, Tatukwen niyend kakukulikishinanyap kurumbuk kwen.

16 “Anch wajilany yakuda, kangal wamekeshany ushon mud mukat kusalau in rubabek, mulong awiy akat kufunyangesh mu mes chakwel antu ayiman anch ajilang kal yakuda. Chakin kamu nikulejinany, awiy atambwil kal difut dau diwanyidina. 17 Pakwez ey anch wajil yakuda, ipala many mu mutu wey ni owal ku mes, 18 chakwel kangal antu ijik anch wajilang kal yakuda, pakwez ching Tatukwey wakad kutwish kumekan ku mes* ndiy ukwijika. Mwamu Tatukwey ukata kutal mu ujindj ukukufut.

19 “Likany kukumangejin mapit panap pansh, pada amakej ni ankal akata kushesh ni ij akata kwandam ni kwiy. 20 Pakwez, kumangejinany mapit men mwiur, mwakad kwikal amakej ni ankal akata kushesh ni ij akata kwandam ni kwiy. 21 Mulong kuda mapit mey, kwawiy kand kukwikala muchim wey.

22 “Dis dawiy lamp wa mujimbu, chawiy, anch dis dey dishinshikidin pa chom chimwing, mu mujimbu wey wawonsu mukwikal chitokish. 23 Pakwez anch dis dey dikwet ris, mu mujimbu wey wawonsu mukwikal mididim. Anch chitokish chida mu ey chikal kamu mididim, kwawiy kulond anch mididim yiney yikurikin kamu nakash!

24 “Kwikil muntu ukutwisha kuyisadin ansalej end aad; mulong ukumukis umwing chad wamukat mukwau, ap ukulamat kud umwing chad wamuduul mukwau. Ukutwishanyap kumusadin Nzamb ni Mapit chisu chawiy chimwing.

25 “Mulong wa chom chinech nikulejinany anch: Likany kwiyakamish mulong wa mwom* yen, mulong wa yom ukudanya ap mulong wa yom ukunanya, ap mulong wa mijimbu yen ap mulong wa yom ukudjalanya. Ov, mwom* ukwetap usey nakash kusutamu yakuda, ni mujimbu ukwetap usey nakash kusutamu ya kudjal? 26 Yishinshikinany nawamp atujil, awiy kakukunangap mbut, kakwangulangap ap kakutekangap yakwangul mu tusik, pakwez Tatukwen wa mwiur ukat kuyidish. Ov, en kiukwetanyap usey kuyisutamu awiy? 27 Ov, nany wa pakach pen anch wiyakamish ukutwish kuwejinaku ku mwom wend ap kachisu kakemp? 28 Chikwau kand, mulong wak ukat kwiyakamishany mulong wa masun? Talany yom ukutwishanya kwilejin ku yisalamb ya mu masuku, yawiy yikusalangap mudimu ap yikwichiminangap masun; 29 pakwez nakulejany chakin, ap Salomon mu uyaj wend wawonsu kadjalap mud chisalamb chimwing pakach pa yisalamb yiney. 30 Chawiy anch Nzamb ukat kuriyek* masuku ma mu chir madaku nlel chad damashik amwosh kwau, ov, komb ndiy kakukudjikanyap chipandakena, en ukwetanya ritiy rikemp? 31 Chawiy kangal wiyakamishany ni kulond anch: ‘Ov, yom ik tukuda?’ ap: ‘Ov, yom ik tukuna?’ ap: ‘Ov, yom ik tukudjala?’ 32 Mulong yom yiney yawonsu yawiy yikat kusurabau antu a michid. Tatukwen wa mwiur wij anch ukwetany kuswir kwa yom yiney yawonsu.

33 “Chawiy dandamenany bil kukimb Want ni kutentam kwa Nzamb, ni yom yikwau yiney yawonsu akez kakuwejinanyay. 34 Komb kangal wiyakamishany mulong wa damashik, mulong damashik dikwikal ni yakamish yad. Dichuku ni dichuku dikwet milong yad.