Mukand wa Yud
1 Yud, musuk wa Yesu Kristu, pakwez mwanamakwend a Yakobu, kud atazukau akatinau kud Nzamb Tatuku ni alaminau mulong wa Yesu Kristu:
2 El riy, chisambu ni rukat yipandakan kud en.
3 Akatish nam, ap anch nasadin usu wawonsu wa kukufundinany piur pa dipandish tukwetanya etu awonsu, namanang anch chid cha usey kukufundinany mulong wa kukukasikeshany kura njit jikash mulong wa ritiy rapanau kud atumbila kapamp kamwing rawonsu. 4 Diyingishin dam did anch antu amwing atondau kudokal pakur mu Mifund mulong wa kuyirumburish isidin kal pakach pen. Ad amakundj akad kumulimish Nzamb, akwatina ranaken rijim ra Nzamb wetu mud diyingishin da kwikal nich mwikadil uyimp ni wa mukomu,* ni amwitunina Mwant wetu ni Nsalejetu umwing kusu, Yesu Kristu.
5 Ap anch wijany nawamp kamu yom yiney yawonsu, nikimbin kukuvurishany anch Yehova,* kupwa kwa kuyipandish antu kusutin kuyibudish mwi ngand ya Idjibit, wayijipa alika kumekesh ritiy. 6 Ni angel alika kulam ndond yau ya kusambish, pakwez asha ndond yau yiyiwanyidina kushakam, wayilamidin kal ku moj ya chikupu mu mididim yikurikina mulong wa kuyirumburish pa dichuku dijim. 7 Chilik chimwing kand, Sodom ni Gomor ni misumb yadinga piswimp yipana mu yisal ya masandj* yitakanena ni yipana mu kusangaresh maku ma mujimbu mu mutapu uyimp, ayileja kadimu ka kasu ka chikupu ka dipup da dirumburish; kwawiy kuyitekinau kurutu kwetu mud chilakej cha kutubabesh nich.
8 Ap mwamu, amakundj inay niyau akat kwipan mu yilat, kwijondish mujimbu, kupipej ulabu, ni kulond nayimp piur pa in uyaj. 9 Pakwez papwitamijanay Mikayel mukurump wa angel nend Djabul ni kutadikijan piur pa mujimbu wa Moses, kapakishap kumurumburish nich mazu ma masaal, pakwez wamwela anch: “El Yehova* akukand.” 10 Pakwez antu inay akat kulond nayimp piur pa yom yawonsu yakadau chakin kwov kurumburik. Ni kusutin kusal yom yawonsu yovilau kurumburik nich manang ma winnam mud annam akad manang, akat kudandamen kwiyipish ayinau.
11 Kajikwau, mulong alondwil kal njil ya Kayin ni ipupwidin kal mwi njil yiyimp yapumbukinay Balam mulong wa difut, ni asheshikin kal mulong wa mazu mayibachikina antu kubwambwil mud ma Kore. 12 Antu inay ad mayal majingamina kwinshin kwa mem ku misambu yen ya rukat pakatau kuda nen pamwing, atufung akata kwidish ayinau pakad wom; madj makad kunak ruval maperilau oku ni oku kud rinkind; mitond yakad kusong mabuj pa chirung chau,* yafila kal tupamp twaad* ni yavumbwilau kal; 13 ad mambek ma usu ma karung matupwila mafuril ma usany wau; atutumbu akad njil yilondwilau, alamidinau chikupu mididim yikurikina nakash.
14 Mwaning, Enok, muntu wa sambwad* kudokal ku Adam, niyend walejana uprofet piur pau palonday anch: “Talany! Yehova* wezin ni tutikit* twa atumbila end 15 mulong wa kuyirumburish antu awonsu, ni kuyifish nich antu awonsu akad kumulimish Nzamb piur pa yisal yau yawonsu yiyimp yasalau mu mutapu wakad kutentam, ni piur pa yom yawonsu yitapena ku muchim yalondau kud akayitil akad kumulimish Nzamb piur pend.”
16 Antu inay ad in kunyinyit, in kwinanol piur pa yom yiyishikedina mu mwom, ipanining mu kusangaresh maku mau ayinau, ni tun twau tukat kwibaz kusut chipim, oku akat kuyibabek akwau* mulong wa kutanyinamu ayinau.
17 Pakwez en, akatish, vurikany yom yalondau pakur* atwimbuy a Nsalejetu Yesu Kristu, 18 akulejanganya anch: “Mu chisu cha kwinsuden kukez kikal in kusipan, akwipana mu kusangaresh maku mau ma yom yiyimp.” 19 Inay awiy antu akata kuletish kwaurok, antu akweta yaku ya winnam,* akad kwikal ni mwikadil wa mu spiritu.* 20 Pakwez en, akatish, ikasikeshinany pa ritiy ren ritumbila nakash, ni lembilany nich spiritu utumbila, 21 chakwel ushalany mu rukat ra Nzamb, pauchingedinanya riy ra Nsalejetu Yesu Kristu ritwadina ku mwom wa chikupu. 22 Chikwau kand, dandamenany kuyovil riy antu amwing idjidjekina; 23 yipandishany kusutin kuyidosh mu kasu. Pakwez dandamenany kuyovil antu akwau riy, salany mwamu nich wom, oku ukisinany djat ni disun dikweta chidik cha chitil.*
24 Chad kuday ndiy ukutwisha kukukwashany kulik kwipwakal ni kushal akad kapad kurutu kwa uyaj wend* nich musangar ujim, 25 kuday Nzamb umwing kusu Mupandish wetu kusutin Yesu Kristu Nsalejetu, kwikala uyaj, kujimb, dikand, ni ulabu kudosh chikupu ni katat djat chikupu ni chikupu. Amen.