“Tungany Ayinen pa Ritiy Ren Ritumbila Nakash”

1, 2. Ov, mudimu ik wa rutung tusadininga ni mulong wak kuusal nawamp kuding kwa usey nakash?

TONG bil anch sadin mudimu wa rutung nich muchim umwing. Kwasutin machuku mavud usadininga mudimu winou. Watanijadin ni yikokujol yivud, pakwez mudimu winou ukuletidining yiyukish yivud. Chiwija anch, anch wasal mudimu winou ukez kutan yiyukish nlel ni mu machuku ma kurutu, ukwitiyap ap pakemp kuudiul ap kuulik. Ov, mulong wak? Mulong witungining amwiney.

² Kambuy Jud wisambidin piur pa mudimu wa kutung twitungininga ayinetu. Mu maverse mayilejinay in Kristu chakwel ‘ilama mu ayinau rukat ra Nzamb,’ ulejen kand mutapu ufanyidinau kwilam palondinay anch: “Tungany ayinen pa ritiy ren ritumbila.” (Jud 20, 21, TMK) Ov, mitapu ik yimwing tukutwisha kusadil mulong wa kwitung ayinetu chakwel tukasikesha ritiy retu ra kwilam mu rukat ra Nzamb? El amboku tushinshikinany mitapu yisatu yifanyidina kutukwash kutung ritiy retu.

TUKASIKESHANY RITIY RETU MU YANY YITENTAMINA YA YEHOVA

3-5. (a) Ov, Satan usotining ey umana yijil ya Yehova mutapu ik? (b) Ov, mutapu ik tufanyidina kuman yijil ya Nzamb, ni yom ik yitusadidininga yijil yiney anch twayiman mu mutapu uwamp? Let chilakej.

³ Chakusambish, tuswiridin kukasikesh ritiy retu mu chijil cha Nzamb. Chawiy, wilejin mu mukand winou yany yivud ya Nzamb yisambidina piur pa yom yiwamp ni yiyimp. Ov, mutapu ik uyimeninga? Satan usotining ey uyimana anch yikasiken ni yikukangeshining kutan musangar ap yikumeshining mar. Chitongijok chend chinech chawiy chamudimbay nich Ev mu chir cha Eden ni uchidimbining nich antu nlel unou. (Disambishil 3:1-6) Ov, ukutwish kukudimb kand ni yeyey? Mutapu wey wa kuman yom wawiy ukutwisha kumushikij Satan ku kukudimb ap bwat.

⁴ Chilakej, wendidin pa ndond kampand yirijekinau nawamp, pakwez, chisu ukushika pa ndond yikwau, ukutan jinsambu jifungin njil chakwel antu akwau kangal asut. Anch watal ushad, ukuman yom yikwau yiwamp nakash. Kapamp kamwing, ukutwish kuman jinsambu jinej mudi jikukangeshin yom yikwau yiwamp nakash. Pakwez, anch watal nawamp win kamu, ukuman ntambu uyil ni kuzomb antu a kukwat. Katat ukujingunin anch jinsambu jinej jikuchidijin ku ubaj. Ov, kudiaku nnam wa chidiany ukimbininga kukukwat? Dizu dia Nzamb ditukasikeshin anch: “Ilamany ayinen, babalany! Mukankuny nen, Sakudimban ukat kuzomb mudi ntambu wonyina ukata kukimb nany ukudiay.”​—1 Pita 5:8.

⁵ Satan udi mudi nnam wa chidiany. Mulong Yehova kasotinap Satan atukwata etu, chawiy, ndiy ututekidin yany ya kutuchidij chakwel tulika kuwil mu “mipit yend.” (Efes 6:11) Chawiy, yisu yivud tushinshikidininga pa yijil ya Nzamb, tufanyidin kuman mutapu yitumekeshininga rukat ritukatinay Tatukwetu wa mwiur. Anch twasal mwamu, yijil yiney yikutulam ni yikez kutuletin musangar. Kambuy Jakobu wafunda anch: ‘Muntu mwawonsu ukata kwonganyin yijil yiwanyidina yikata kupan want ipau anch wadandamen kusal mwamu, muntu mwinou Nzamb ukez kumuyukish ku yom yawonsu yikezay kusal.’​—Jakobu 1:25.

6. Ov, wisu mutapu upandakena kuwap wa kukasikesh ritiy mu yany yitentamina ya Nzamb ni mbil jend? Let chilakej.

⁶ Tukasikeshining ritiy retu mudiay Nzamb Mwin kututekin yijil chisu tuyisadidininga. Chilakej, mu “chijil cha Kristu.” Muding kand chany cha kuyifundish antu akwau ‘yom yawonsu yalejanay.’ (Galatia 6:2; Mateu 28:19, 20) In Kristu asadidining kand chany cha Nzamb cha kukumangan nau in Kristu akwau mulong wa kumwifukwil ni kukasikeshan ku michim. (Hebereu 10:24, 25) Yany ya Nzamb yitukasikeshin kand etu tumulembilang Yehova machuku mawonsu, yisu yivud kusutil mu muchim. (Mateu 6:5-8; 1 Tesalonik 5:17) Anch twasadin yany yiney tukuman mutapu yikutukwasha. Kusal mwamu kukutuletin musangar ni mazang yitukutwishap kutan pa ndond yikwau pa mangand minam mayimp. Piushinshikidininga piur pa yiyukish yiwatanina mu kusadil yany ya Nzamb, ov, ritiy rey mu yany yiney riyilap ni kukul?

7, 8. Ov, mutapu ik Dizu dia Nzamb dilondina nich kashinsh kudi antu iyipwilinga anch akutwish kudandamen kuziyil ku yany yitentamina mu kupwa kwa mivu?

⁷ Yisu yimwing, antu amwing akutwish kuman anch chikutwish kuyikasiken kudandamen kusadil yany ya Yehova. Oviling wom wa kusal chom kanang chiyimp. Anch niyey utongin mwamu, vurik mazu minam malondila anch: “Yam [Yehova, NWT] Nzamb wen, nikata kukukwashany, ni kukulejany njil yiufanyidinanya kuya. Anch en wadiany in kutesh malejan mam, ing yiyukish yam yelang kwikal kudi en mudi wit wakad kuumang mem! Kupandakan kwelang kwikal kudi en mudi mambek makata kwezang ku chikum cha karung.” (Isay 48:17, 18) Ov, watongijokap kal mutapu utukasikeshininga mazu minam?

⁸ Yehova utuvurishin anch tutanining yiyukish ayinetu chisu tukata kumuziyil. Ndiy watushilamu yiyukish yaad anch twasal mwamu. Chakusambish, chisambu chetu chikwikal mudi kawit​—ukweta mem mavud matalel ni madandamedina kusut. Chakaad, kutentam kwetu kukez kwikal mudi mambek ma karung. Anch wiman ku chikumu cha kawit mujim ukuman anch mambek makupwangap, madandamedin kutut. Wij anch mambek makudandamen kutut ku chikumu mu yitot ni yitot ya mivu. Chawiy Yehova chilondinay anch kutentam kwey kukez kwikal mudi mambek, kukezap kupwa. Anch wasal usu wa kwikal ni ritiy mudiay ndiy, ndiy kakwezap kwitiyij ap pakemp chakwel ukanganya! (Tang Kuseng 55:22.) Ov, kushilamu kwinoku kutushidinayimu Yehova kukasikeshinap ritiy rey mudiay ni kukubachikinap kuziyil ku yany yend yitentamina?

“TUYANY KURUTU KUSHIK KU UKURUMP “

9, 10. (a) Ov, mulong wak kukul ridi rutongijok ramushena ra in Kristu? (b) Ov, mutapu ik mashakamin ma muspiritu matuletidininga musangar?

⁹ Chom chakaad tufanyidina kusal mu mudimu wetu wa kutung achimekeshin mu mazu mapepilau am malondina anch: “Tuyany kurutu kushik ku ukurump.” (Hebereu 6:1) Mwin Kristu ufanyidin kwitekin rutong ra kuya ku ukurump wamushena chakwel ikala ukasikena mu ritiy. Nlel unou, yikasiken kwikal awanyidina, pakwez muntu mwin mwawonsu ufanyidin kwikal mwin Kristu ukudila. Chikwau, in Kristu atanining musangar chisu chiyilingau kurutu mu mudimu wa Yehova. Ov, mulong wak?

¹⁰ Mwin Kristu ukudila udi muntu wa muspiritu. Ndiy umening yom mudi muyimeningay Yehova. (Yohan 4:23) Paul wafunda anch: “ukata kusal mudi mudia rusot ra wuntu, ukat kutongijok ching kusu ku yom yikatilau kudi wuntu. Pakwez muntu mwawonsu ukata kusal mudi mudia rusot ra [m]wiku [u]tumbila, ukat kutongijok ching kusu ku yom yikatilau kudi [m]wiku [u]tumbila.” (Rom 8:5) Muntu ulondwila yom ya kumujimbu utanining musangar ukemp mulong ndiy udandamedin kukimb ching yom yend amwinend, kameningap kulemp ni usotining kwikal mpich. Muntu ulondwilinga kusal yom ya muspiritu ukweting musangar uvud mulong ndiy mes mend mading ching kudiay Yehova, “Nzamb muwamp” ap wa musangar. (1 Timote 1:11) Mwin Kristu ukudila usotining kumusangaresh Yehova ni pa yisu yidiay ni yikokujol. Ov, mulong wak? Yikokujol yitukwashining kwijik mutapu udiay Satan mwin makasu, yikasikeshining kushinshaman kwetu retu ni yitukwashining kumusangaresh Tatukwetu wa mwiur.​—Jinswir 27:11; tang Jakobu 1:2, 3.

11, 12. (a) Ov, chom ik chalonday Paul piur pa ‘manangu’ ma mwin Kristu ni chom ik chirumburikina dizu “kwiyijidish”? (b) Ov, chom ik tufanyidina kusal ni mujimbu wetu chakwel wikala ukasikena?

¹¹ Chakwel twikala in Kristu akasikena ni akudila muspiritu, tufanyidin kwiyijidish. Tushinshikinany amboku verse winou: “Yakudia ya amakurump akat kuyidia kudi antu akudila kal, akata kwauril kuwap ni kuyip mulong ijidin kal kusal mwamu tupamp tuvud.” (Hebereu 5:14) Pisambinay Paul piur pa “kwiyijidish,” ndiy wasadila dizu dia Grek diadingau antu ni kulond nakash mwingand ya Grèce, mu masengan ma kwijidish mujimbu mu chitot cha mivu ya kusambish. Tushinshikinany katat yitinau mu kwiyijidish mudi kwinoku.

¹² Chisu twavadika, mujimbu wetu kiwadingap wijidina ni kusal yom kanang. Chilakej, mwan mukemp uvadinau kijap kunyikesh makas mend ap mend yend mutambu win wawonsu usotinay bwat. Chawiy, mwan winou udjibwil makas ushad ni ushad, pamwingap ukutwish kwibul mbat. Pakwez, pakemp pakemp, mujimbu wend ukwijidin. Ndiy ukusambish kushakam, kushet, kwend ni kukink mau.a Ov, chom ik tukutwisha kulond piur pa mwin masengan ma kwiyijidish mujimbu? Patumumeninga ukat kukarumuk mu rinkind ap usadin yom yikwau yishimokishena ni yisangareshina antu, tulondining anch muntu mwinou wijidishin mujimbu wend nawamp. Pakwez, kasadiningap masengan minam pa chipatu, wiyijidishining nakash. Bibil ulondin anch kukasikesh kwa mujimbu ap kuwiyijidish kukweting “usey ku chom chimwing.” Musangar mud ik tukweta mu kwijidij yitongijok yetu ya muspiritu!​—1 Timote 4:8.

13. Ov, mutapu ik tukutwisha kwijidish manangu metu?

¹³ Mu buku winou, twisambidinamu yom yivud yikeza kukukwash kuman mutapu wa kwijidish manangu mey chakwel ushala mwin Kristu ukudila ni ushinshamena mudiay Yehova. Kurutu kwa kukwat mupak ap wa mutapu ik, tongin bil pa yilondina yany ya Nzamb ni lembil kand. Anch ukimbin kukwat mupak, wikalapu wa mutapu ik, iyipula anch: ‘Ov, yany ik ya mu Bibil yisambidina piur pa mulong wam ou? Ov, mutapu ik nikutwisha kuyisadin? Ov, chom ik chikutwisha kumusangaresh Tatukwam wa mwiur?’ (Tang Jinswir 3:5, 6; Jakobu 1:5.) Chisu chawonsu ushinshikidininga chilondina Bibil piur kurutu kwa kukwat mupak, wijidishining manangu mey ku kujingunin chidia chiwamp ni chidia chiyimp. Kwiyijidish kwinoku kukukwash chakwel wikala mwin Kristu wakin ni uyila kurutu.

14. Ov, chom ik tufanyidina kukat nakash chakwel twikala in Kristu akudila ni chom ik tufanyidina kudimukin?

¹⁴ Ap anch twikadil kal in Kristu akudila, tufanyidin kudandamen ni kukasikesh ritiy retu. Chakwel muntu akula, ufanyidin kudia. Chawiy, Paul walonda anch: “Yakudia ya amakurump akat kuyidia kudi antu akudila kal.” Chakwel ukudisha ritiy rey, ufanyidin kwilej nakash dizu dia Nzamb. Umekeshin muudia ni manangu chisu usadidila yom wilejina, mulong Bibil ulondin anch: ‘Manangu chawiy chom cha usey.’ Chawiy lel, tuswiridin kukudish ni kukukat nakash malejan mawamp matwinkishinau kudiay Tatukwetu. (Jinswir 4:5-7; 1 Pita 2:2) Pakwez, anch muntu watambul ronganyin ra Nzamb nich manangu mend, chidiap cha usey kudiay asambisha kwitumbish. Tufanyidin kwishinshikin dichuku din diawonsu, mulong kwibaz ap kuziy kwa mutapu kanang kukutwish kutupandakan usu. Paul wafunda anch: “Ipakany ayinen, irumburishany ayinen, utalany anch ukwetany ritiy.”​—2 Korint 13:5.

15. Ov, mulong wak rukat ridi ra usey chakwel tukula muspiritu?

¹⁵ Tukutwish kupwish kutung chikumbu, pakwez tufanyidin kudandamen ni kuchilam nawamp. Chifanyidin kulam chikumbu nawamp, kuchirijek ni pamwingap kuchijimbish kand anch chitin mwamu. Ov, chom ik tuswiridina chakwel twikala in Kristu akudila pamwing ni kulam mwikadil wetu wa muspiritu? Chakusambish, tufanyidin kwikal nich rukat. Tufanyidin kudandamen kumukat Yehova ni kuyikat ambay netu akaritiy. Anch tukwetap rukat, ronganyin rawonsu tukweta ni yom yawonsu tusadininga yidi ya chamwamu, yidi kwau mudi masok makad kurumburik. (1 Korint 13:1-3) Rukat ritukwashining kwikal in Kristu akudila ni adandamena ni kukul muspiritu.

TEK MANANGU MEY PA YA KUSHILAMU YA YEHOVA

16. Ov, Satan uyibachikin antu ku ik ni chom ik Yehova chashilayimu kudi etu chakwel atukwasha?

¹⁶ El amboku tushinshikinany pa chom chikwau chipandakena usey mu mudimu wa rutung. Chakwel twikala in kwilej akin a Kristu, tufanyidin kudimukin yom yikwau tutongijokininga. Satan ndiy ntakel wa mangand minam, udi nsil mu milong ya kuyishikij antu ku kuziy ni kutong nayimp anch awiy kakwetapu kwau usey. (Efes 2:2) Yitongijok ya mutapu winou yikutwish kumusadin mwin Kristu nayimp mudi musheshikininga chikumbu chisu chivundininga mitond yach. Musangar mud ik kudi etu, Yehova watushilamu yom yamushena chakwel atukwasha.

17. Ov, mutapu ik Dizu dia Nzamb dimekeshina usey ukweta wa ruchingej retu?

¹⁷ Bibil wisambidin yom ya njit kushalijan tufanyidina kudjal chakwel turisha nend Satan pamwing ni ditenchik diend. Cha kusambish tufanyidina kudjal chidi chiful cha utad, chirumburikin anch “ruchingej ra dipandish.” (1 Tesalonik 5:8) Mu yirung ya pasak, isalay mwin mwawonsu wadinga wija nawamp anch, anch waya kwinjit wakad kudjal chiful ukufa. Chiful chin chang chadinga cha utad nich chikit. Chamukwashanga isalay chakwel yom yamwasangau ku mutu kangal yamutap. Mudi mwalamanga chiful mutu wa isalay, mwawiy kand ruchingej rikutwisha kulam manangu mey ni yitongijok yey kand.

18, 19. Ov, chilakej ik chatushilay Yesu piur pa mutapu wa kulam ruchingej ni mutapu ik tukutwisha kumwimburij?

¹⁸ Yesu ndiy chilakej cha kusambish chipandakena usey cha kulam ruchingej. Tong bil yom yajijamenay pa uchuku wa nsudiel wa mwom wend pa divu. Murund nend mukatish wamutunguna matung mulong wa nfalang. Mukwau wamutuna ni kuchip anch kamwijap. Akwau amutuna ni amuchina. Antu a mwingand yend amutuna ni ayileja amasalay a in Rom chakwel amumesha mar ni amujipa. Tukutwish kulond anch Yesu warisha nich yikokujol yitwakad etu kurish nich. Ov, chom ik chamukwasha? Hebereu 12:2 wakwil anch: “Ndiy wadandamena kamu ap anch amujipinap nchik pa mutond [wa mar], kwovap usany wa rufu ra mutapu winou, mulong wading uchingejin musangar ukumanay kurutu. Chad katat ushich ku chisak cha katatuku cha ditand dia Nzamb.” Mwaning, Yesu wachingejinang ching kusu ‘musangar wamanangay kurutu kwend.’

¹⁹ Ov, musangar ik wadinga kurutu kwa Yesu? Yesu wadinga wij nawamp win kamu anch anch ndiy wajijamen yikokujol, ukutumbish dijin ditumbila dia Yehova. Ndiy ukez kumekesh kamu patok anch Satan udi mwin makasu. Kikwadingap chom chikwau ap chimwing chela kumuletin Yesu musangar ujim mudi winou! Yesu wadinga wij kand anch piswimp ap kamu Yehova ukez kumuyukish nakash piur pa kushinshaman kwend ni pakuchirikay ukutanijan nend kand Tatukwend wa mwiur. Ndiy wateka ruchingej rend ku yom yiney yiwamp chikalap nchik yikokujol yikash yatanijanay nich. Niyetu tuswiridin kusal kand mwamu. Tufanyidin niyetu kuman musangar udia kurutu kwetu. Yehova umwinkishin muntu ni muntu pakach petu chisend cha kupan ukwash wa kutumbish dijin diend dijim. Tukutwish kumekesh anch Satan udi mwin makasu kusutil ku kumutond Yehova mudi Mupandish wetu ni kwilam ayinetu mu rukat ra Tatukwetu utukatininga chikalap nchik yoziu tukutwisha kurish nich.

20. Ov, chom ik chikutwisha kukukwash kulik kuziy, ni kutek ching ruchingej mu yom yashilayimu Yehova?

²⁰ Yehova kasangaredinap ching kuyifut kusu atushalapol end ashinshamena, pakwez udi tayad kusal mwamu. (Isay 30:18; tang Malakiy 3:10.) Ndiy uyinkishining yimwitiningau nich musangar wawonsu. (Kuseng 37:4) Chawiy lel, kwat mupak wa kulam ruchingej rey mu yom yikwez mu machuku ma kurutu. Pikil kulikidil ap pakemp yitongijok ya mangand minam mayimp ma Satan yikuziyisha. Anch waman anch chiyul cha mangand minam chikimbin kukwandam mu yitongijok yey, mwita Yehova nich muchim umwing chakwel utana “chisambu cha Nzamb chisutila ronganyin rawonsu.” Chisambu cha Nzamb chinech chikez kulam muchim wey ni manangu mey.​—Filip 4:6, 7.

21, 22. (a) Ov, ruchingej ik ramushena rikwetau kudi “chisak chijim” cha antu? (b) Ov, kushilamu ik kukusangareshina ey ku yakushilamu yawonsu yitushidinayimu Yehova?

²¹ Yakushilamu yatushilayimu Yehova tufanyidina kutongijokin yisangareshining nakash! Anch udi mu “chisak chijim” cha antu “adiokala mu mar makash,” tongin bil piur pa mashakamin maukwikala nich mu machuku makemp omu. (Kujingunik 7:9, 14) Pakezau kumukas Satan ni ayilembil end, ukez kwikal mu chisambu cha mivu ni minang yakad kupwang. Ov, nnany pakach petu washakatap kal dichuku dimwing ma matu zoong, kwakad yikokujol yezidina kudiay Satan ni yisal yend yiyimp? Pakwezay Satan kudiokalaku, Yesu ni antu 144 000 akeza kutakel nend mwiur akez kutukwash kukarumun divu dikala paradis! Tukez kwikal nich musangar uvud mulong mayej ni ubid yikezap kwikalaku kand, anamakwetu a kumujimbu ni arund netu afa kal akez kuvumbuk ni tukez kwikal mu mashakamin madingay Nzamb ukatin anch twikala nich. Pakeza uyimp kupwa mu mujimbu wetu, tukez kutan kand difut dijim nakash dia kutambul “want ipau wa uyaj pamwing nau an a Nzamb,”​—mudi muyimekeshinau mu Rom 8:21.

²² Yehova usotin ey wikala ni want ipau mu mutapu wakad ey kutongin. Chakwel utambula want ipau winou chifanyidin kuziyil. Ov, umenap anch chidi cha usey kudi ey kusal usu wey wawonsu katat chakwel umuziyila Yehova pichuku-pichuku? Chawiy lel, sal usu wey wawonsu udandamena kutung ritiy rey ritumbila nakash chakwel wilama mu rukat ra Nzamb chikupu ni chikupu!