Mulong wak Tukwet Kuswir kwa Kwikal ni Ruchingej?

YOM yakimba kwikal mutapu ik ku mutambu wa Daniel, nsand wading ukweta mayej ma kanser twisambinang mu mutu wa mulong wasambelang, anch wadandamena kulam ruchingej rend? Ov, wafanyina kuyerik? Ov, ing nkach udiaku ni nlel unou? Ap antu akweta kamu ruchingej rikash kakutwishap kwakul anch mwaning ku yipul yiney. Ni pinap pad dilejan dia usey nakash: Chifanyidinap kwau kutek ruchingej mu yom yin yawonsu. Ruchingej ridiap mwon wa mayej mawonsu.

Pamwipulau ku chisaj cha jinsangu cha CBS, Dokter Nathan Cherney wababesha piur pa ubaj wa kwikal ni ruchingej nakash kusutamu chipim mu kuyok antu ayedina nakash ni walonda anch: “Twamen kal amakundj amwing akat kuyiswejen akajau anch kasadinap kwau usu mulong wa kutongijok ni anch katonginap piur pa yom yiwamp.” Dokter Cherney uwejidinaku anch: “Mutapu winou wa kutong wayishikija antu kwitiyij anch muntu ukutwish kusop amwinend mutapu uyila kurutu mayej makwetay, ni anch wakangany, akat kutong anch katwishinap kwend kumasop. Mutapu winou wa kutong utentaminap.”

Mu win yakin, antu akweta mayej makutwisha kuyishikij ku rufu akat kurish nakash, ni kura njit jiziyishena kamu. Chakin kamu akatish nau kakatap kusot kuyipandakeshin kuswan kwau mu kuyifish nich. Chad mwamu tufanyidin kwetu kulond anch ruchingej rikwetap usey?

Bwat kamu. Chilakej, pa ndond pa kwok kapamp kamwing mayej ap kukimb mitapu ya kulepish mwom wa muyej, Dokter Cherney ukat kusal usu wa kukepish kuswan kwend ni kusal anch asangera mashakamin pachidiay mwom. Ndiy ni adokter akwau akat kwitiyij mu mitapu ya kwok yikata kumukwash muyej kwikal nich musangar, ap anch ukwet mayej makash nakash. Kud uman umekeshina anch ruchingej rikutwish kusal yivud kusutamu yiney.

Usey wa Ruchingej

Dokter W. Gifford-Jones, ukata kufund jinsangu ja chimwingang, walonda anch: “Ruchingej ud mwon wa usu nakash.” Washinshikina yibudikin ya kukimbijol kushalijan kwasalau piur pa usey wa kuyikwash mu manangu antu akweta mayej makad mwon. Chamekana anch ukwash winou ukat kuyikasikesh antu kwikal ni ruchingej ni chitongijok chiwamp. Kukimbijol kumwing kwasalau mu muvu wa 1989 kwamekesha anch antu akwashiningau mutapu winou akat kulab pa kufa, ap anch kukimbijol kwa katat kand kal kuleta uman wa chom chinech. Pakwez, kukimbijol kumekeshin anch ayej akatau kukwash mu manangu kakatap kuziy nakash ni akat kwov kusansan pakemp kusutamu akadiau kukwash.

Shinshikin kukimbijol kukwau kwisambidina yibudikin ya kwikal ni ruchingej ap kuburiburen kud antu akweta mayej ma mijir ya rudung. Ashinshikina chikurukina amakundj 1 300 ni kusut mulong wa kuman anch akwet ruchingej ap bwat piur pa mutapu umenau mwom. Kupwa kwa mivu dikum, amana anch amakundj 12 pa pa chitot ading akwet mayej mamwing ma mijir ya rudung. Pakach pau, ading aburedina ruchingej ayisutamu akwau tupamp twaad. Laura Kubzansky, mulej-nkwash ni mwin kwilej yisalijok ya antu wa ku Shikol ya Chimwingang ya Harvard walonda anch: “Uman uvud ulejena anch kwikal nich ‘yitongijok yiwamp’ kud kwa usey mulong wa ukash wa mujimbu wadingap kamu wakin​—pakwez dined did pakach pa malejan makusambish mapanina kashinsh ka chom chinech mu kwok mayej ma rudung.”

Kukimbijol kukwau kulejen niyau anch ayej akata kuman anch mayej mau mapandaken nakash kakatap kuyerik swa kupwa kwa kuyibaril kusutamu ayej akweta chitongijok chiwamp. Ni chimeken anch antu akweta chitongijok chiwamp akat kusalaku mivu yivud. Dilejan dimwing diamekesha usu ukweta yitongijok yiwamp ni yiyimp piur pa amapal. Payilejau amapal jinsangu jimekeshina anch upal ukat kuletang manangu ni ronganyin, amapal endang nich usu nakash. Mijimbu yau yikala mud ya antu iyijidisha mwi mbing 12!

Mulong wak chimeken anch ruchingej ni kwikal ni chitongijok chiwamp yiwapishin ukash wa mujimbu wa antu? Pamwing ap in siyans ni adokter kand kal kamu ileja nawamp manangu ni mujimbu wa muntu mulong wa kwakul nawamp ku chipul chinech. Pakwez, antu ilejina mulong winou akutwish kusadin ronganyin rau mulong wa kwovakesh nawamp. Chilakej, profeser umwing wa mijir ulondin anch: “Chiwapin kwikal nich musangar ni ruchingej. Mashakamin minam masangareshina makatap kulet kuziy mu manangu ni mujimbu ukat kukul nawamp. Chinech chid chom chikutwishay muntu amwinend kusal anch ukimbin kwikal nich ukash wa mujimbu uwamp.”

Pamwing ap chitongijok chinech chikutwish kwikal chisu kud adokter, in kwilej manangu ma antu nau in siyans, pakwez chidiap chisu kud in kwilej a Bibil. Kwasut kal mivu piswimp 3 000, Mwant mwin manangu Salomon amupepila kufund chitongijok ech: “Muchim wa musangar udi mwon uwamp, pakwez muchim wa runeng ukat kuumish mafup.” (Jinswir 17:22) Tal kwisikan kudia pinap. Verse winou kalondinap anch muchim wa musangar ukat kwok mayej min mawonsu, pakwez ulondin anch “udi mwon uwamp.”

Chawiy, chiwapin kwiyipul anch: Anch ruchingej rading mwon, ing dokter ik ukulika kuyilej ayej end kuuna? Chikwau kand, kusutamu kwau kuwapish ukash wa mujimbu, ruchingej rikwet kand usey ukwau.

Yitongijok Yiwamp ni Yiyimp Yikwet Usu pa Mwom wey

In kukimbijol amen kal anch antu akweta ruchingej akat kutaninamu mu mitapu yivud. Akat kutwish ku shikol, ku mudimu ap kand ku masengan ma kwijidish mujimbu. Chilakej, in kukimbijol amwing asala dilejan piur pa chisak cha amband akata kumatok. Antakel au alonda yom yading yitonginau piur pa usu wa amband inay mu masengan. Pa chisu chawiy chimwing, ayishinshikina nawamp amband inay mulong wa chilik cha ruchingej rikwetau. Yibudikin yading anch, chilik cha ruchingej ra amband inay chading chijim nakash kusutamu nsangu jalondau kud antakel au piur pa ukaliweny wau. Mulong wak ruchingej rading nich usu mwamu?

Atesha yom yivud nakash mu kwilej chinyim cha ruchingej​—kuburen ruchingej. Mu mivu ya 1960, in kukimbijol ajingunina nsangu jishimwokishena piur pa yaku ya annam ni ashikena ku kwikal nich chitongijok cha “kuziy mu manangu kurutu kwa chisu.” Ajingunina anch antu niyau akutwish kuman mar ma mutapu winou. Chilakej, mu kukimbijol kumwing, ateka chisak cha antu amwing pa ndond ya masok nakash ni ayileja anch akutwish kumapwish anch ashat pa mabuton kanang malondulijadina. Atwisha kwimik masok minam.

Chisak cha kaad nichawiy achileja mwamu​—pakwez kushat pa mabuton kwapwishap kwau masok. Mud mutapu ukutwisha kutongin, antu avud mu chisak chinech cha kaad asambisha kuziy. Payilejau kand kushat kapamp kakwau, kapakishap kwau kusal chom ap chimwing. Ading nich kashinsh anch kwikil kwau chom chikusalau chikutwisha kuswimp yom. Pakwez ap mu chisak chinech cha kaad, antu adinga nich ruchingej adandamena kulam yitongijok yau yiwamp.

Dokter Martin Seligman, wakwasha kusambish dilejan dined, wasala usu wa kwilej kamu nakash piur pa usu ukweta yitongijok yiwamp ni yiyimp pad antu. Washinshikina chikurikina yitongijok ya antu amena anch kakutwishap kwau mu mwom. Washikena kuman anch yitongijok yiyimp yikat kuyikangesh antu kusal yom yivud mu mwom ni yisu yimwing kakatap kusal chom ap chimwing. Seligman walonda mu wiswimp piur pa kwikal nich yitongijok yiyimp ni yibudikin yau anch: “Mivu makum matan ya kwilej yankwashin kuman anch muntu ukweta chaku cha kwitiyij anch ndiy udia musul wa milong yend, ni ukata kuman anch chom chawonsu chisadinay chikutwishap kwau kuwap, mud mukatay kwitiyij muntu ukweta yitongijon yiyimp, yom yiney yikutwish kamu kumushiken.”

Chikwau kand, yom yiney yikutwish kumekan anch yid yisu kud antu amwing nlel, pakwez yijiken kwau kud in kwilej a Bibil. Tal bil yom yilondinay jinswir ou: “Anch walengumwok pa dichuku dia yakamish, usu wey [ukukep].” (Jinswir 24:10) Inge, Bibil urumburil patok anch kuziy, pamwing ni kwikal nich yitongijok yiyimp, yikutwish kukukepishin usu wa kusal chom kanang. Chad mwamu, yom ik ukutwisha kusal mulong wa kurish nich yitongijok yiyimp ni kwikal nich yitongijok yiwamp ni ruchingej mu mwom wey?

[Chipich]

Ruchingej rikutwish kumukwash muntu nakash kamu