Musadila Yehova, Pikil Satan

Etu awonsu tufanyidin kutond. Ap tukusadil Yehova ap tukusadil Satan ni ademon end. Tukutwishap kusadil awonsu pamwing. Mutapu lel chidia cha manangu kusadil Yehova!

Yehova Udi Muwamp

Mud mutwamananga kal, ademon akat kusanger kumeshan mar ni kuyidimb antu. Yehova kadap mwamu. Ukatin antu mud tatuku mukatinay aanend. Ndiy udi Mwin-kupan wa “chipan chawonsu chiwamp ni chom chin chawonsu chiwanyidina.” (Yakob 1:17) Kakatap kuyikish aanantu yom yawonsu yiwamp, ap anch yidi ya usey ukash kud amwinend.—Efesus 2:4-7.

Tongijokin yom yasalau pansh kuday Yesu, Mwan a Nzamb. Wasala atumam alonda, ni amputames amana. Wayerila atubankat ni ayibid. Wopata ademon ni kuyeril mitapu yawonsu ya mayej. Yesu, kusutin usu wa Nzamb, walangwisha kand afu kuchirikin mwom.—Mateu 9:32-35; 15:30, 31; Luka 7:11-15.

Chinyim nich kulond makasu atushadisha, Nzamb ulondiling pichuku-pichuku uyakin. Kakat kumudimbap muntu ap umwing.—Kuchind 23:19, NW.

Ipuk Yisalijok Yijondila

Mud ntand waj mukwatiningay rungej mu waj wend, mamiliyon ma antu ayikwatining kud yitiyin yakad dishin ni makasu ma. Akat kuyov afu wom. Akat kuyov ademon wom. Akat kwinan mulong wa riyind, yilat, yilay, ni nkau. Ayikasidin ku yitiyij ni yinshankuru yin dishin dia makasu ma Djabul Satan. Atushalapol a Nzamb kakwatikinap mu mupit wa chom ap chimwing cha yom yiney.

Yehova umupandiken Satan dikand kulemp nakash. Ang wamusadin Yehova, ndiy ukukulam kudau ademon. (Jakob 4:7) Mon kiyikutwishap kukutwil. Chilikej, mu Nigeria, alaj asatu a usu nakash asala mpung ya kujip Kaman umwing wa Yehova walika kudiokal mu musumb. Chisu mon piyakanganya, umwing wa pakach pau wakwachika nich wom ukash, ni waya kud Kaman, ni kumwit ranaken.

Ang ademon akat kukuzengol, ukutwish kutazuk Yehova a dijin diend ni ndiy ukukulam. (Jinswir 18:10) Pakwez mulong weyey kwikal ni dilam dia Nzamb, ufanyidin kudjibwil kulemp chom ni chom chitadina ritiyin aspiritu ni kwifukwil ademon. In kwifukwil a Nzamb a mu Efesus wa pasak mwamu mwasalau. Akumangeja mabuku mau mawonsu ma maji ni kumosh shitit. (Midimu 19:19, 20) Atushalapol a Nzamb nlel afanyidin kusal mutapu umwing. Djibul amwiney ya yom ya maji, jinkau, moj ya “kwilam,” mon, mabuku ma maji, ni chom chin chawonsu chitadina yisalijok ya ritiyin aspiritu.

Ijiyil Kwifukwil Kwakin

Ang usotin kumusangaresh Nzamb, kiufanyidinap kusu kuchin kwifukwil kwa makasu ni kwimik kusal yom yiyimp. Ufanyidin pichuku pichuku kwijidil kwifukwil kwishitwila. Bibil ulejen yom yitinau kusal:

Ambatan nau Atuman’a Yehova

Satan nau ademon akwet antu panap pansh akata kufundish ni kwijidil yom yiyimp. Pakwez Yehova ni yend ukwet antu’end. Adi Atuman’a Yehova. (Isay 43:10, NW) Adiaku amiliyon musamban a Atuman kunyingumuk divu diawonsu. Mwawonsu wawu akat kupim yawonsu yikutwishau kusal yom yiwamp, ni kufundish antu uyakin. Mwi ngand jivud, ukutwish kusankanijan nau ku Chot cha Want chau, kwinoku akukwak ni chirungil.

Mudimu wawu udi wa kukwash akwau amusadil Nzamb. Akez kwilej ney Baibel ku chikumbu chey, kukukwash kwijik mutapu wa kumwifukwil Yehova mwi njil yoninikina. Kiukufutinap. Atuman akwet musangar wa kufundish uyakin mulong ayikatin antu ni Yehova Nzamb.