DILEJAN 15
Ov, Mulong Wak Ufanyidina Kudandamen Kwilej Yom Yivud Piur pa Yehova?
1. Ov, mutapu ik ukeza kwikal kudandamen kwey kwilej Bibil kwa usey?
Chakin kamu, mafundish minam ma dishin ma mu Bibil makez kukasikesh rukat rey kudiay Yehova. Rukat riner niswiridin kurikudish chisu ni chisu. (1 Pita 2:2) Ruchingej rey mulong wa mwom wa chikupu rimedin pa kudandamen kwey kwa kumushejin Nzamb piswimp kusutil ku kwilej Dizu diend.—Tang Yohan 17:3; Jud 21.
Chiuyila ni kukul mu ronganyin ra Nzamb, ritiy rey rikez kwikal rikash. Ritiy rikez kukukwash chakwel umusangaresha Nzamb. (Hebereu 11:1, 6) Rikez kukubachik kukarumun muchim ni kuswimp mashakamin mey ma mwom uswiridina.—Tang Midimu 3:19.
2. Ov, mutapu ik ukutwishau antu akwau kutaninamu mu ronganyin rey ra Nzamb?
Ukutwish kwikal mu uruund wa piswimp ni Yehova
Chakin, ukez kusot kulejan kudi antu akwau yom yiwilejina—etwawonsu tusangaredining kulejan rusangu ruwamp. Piudandamedina kwilej Bibil, ukez kwilej mutapu wa kusadin Bibil, mutapu wa kurumburil ritiy rey mudiay Yehova kusutil ku rusangu ruwamp.—Tang Rom 10:13-15.
Antu avud asambishining kulejan rusangu ruwamp kudi arund ap anamakwau a kumujimbu. Ikal mwin kusadil jinkeu. Pa ndond pa kuyilond anch relijon wau udi wa makasu, yileja piur pa kushilamu kwa Nzamb. Chikwau, vurik anch yisu yivud antu ashinshikidining nakash pa yisal yey yiwamp kupandakanamu yom yiulondininga.—Tang 2 Timote 2:24, 25.
3. Ov, urund ik wa piswimp ni Nzamb ukutwisha kusanger?
Kwilej Dizu dia Nzamb kukez kukukwash kukul muspiritu. Kupwa, ukez kwikal mu urund wa piswimp wa pakampwil nenday Yehova. Ukutwish chakin kamu kwikal ku mutambu wend mudi chid cha dijuku diend.—Tang 2 Korint 6:18.
4. Ov, mutapu ik ukutwisha kudandamen kuya kurutu?
Ukutwish kuya kurutu muspiritu kusutil ku kudandamen kwilej Dizu dia Nzamb. (Hebereu 5:13, 14) Mwita umwing wa Atuman a Yehova chakwel wileja nend Bibil ku kusadil buku Chom Ik Chakin Kamu Chifundishinay Bibil? Chiwilejina yom yivud mu Dizu dia Nzamb, mwom wey ukez kupandakan nakash.—Tang Kuseng 1:1-3; 73:27, 28.
Rusangu ruwamp ridiokil kudiay Yehova, Nzamb wa musangar. Ukutwish kumushejin ndiy piswimp kusutil ku kuyishejil antu end. (Hebereu 10:24, 25) Ku kudandamen kusal usu wey wa kumusangaresh Yehova, ukimbining kuwanyish yitinau mulong wa mwom wakin—mwom wa chikupu. Kumushejin Nzamb piswimp chidi chakin kamu chom cha usey chiukutwisha kusal.—Tang 1 Timote 1:11; 6:19.