MUTU WA MULONG WA KWILEJ WA 15
MUMINY 30 Tatukwam, Nzamb Wam ni Murund Nam
Chid Chiwamp kud etu ‘Kusej Piswimp ni Nzamb’!
‘Kudi am chidi chiwamp kamu kusej piswimp ni Nzamb.’—KUS. 73:28.
MU WISWIMP
Tukuman mutapu tukutwisha kusej piswimp ni Yehova ni yiyukish tukutwisha kutaninamu.
1-2. (a) Usu ik tufanyidina kusal mulong wa kwikal mu urund wa piswimp ni muntu? (b) Yom ik tukwileja mu mutu wa mulong winou?
OV, UKWET murund wa piswimp? Mutapu ik washikena kwikal murunend? Pamwing ap wasutisha nend chisu ni washikena kwijik yikokujol yirishinay nich, yom yikatinay ni yikisinay. Wajingunina anch ukwet mikadil yiwamp ukutwisha niyey kwimburij. Ni washikena kumukat muruney.
2 Chitin chisu ni usu mulong wa kwikal mu urund wa piswimp ni muntu. Chid kand mwamu anch tukimbin kwikal mu urund wa piswimp ni Yehova Nzamb. Mutu wa mulong winou ukwisambin mutapu tukutwisha kwikal mu urund wa piswimp ni Nzamb ni yiyukish tukutaninamu. Cha kusambish, shinshikin mulong wak chid cha usey kumusejin Murunetu mujim ni muwamp nakash, Yehova.
3. Mulong wak chid cha usey kutongijokin pa uwamp tukutwisha kutaninamu anch twamusejin Yehova piswimp?
3 Pakad kwidjidjek ukwet kashinsh anch kumusejin Yehova chid chom chiwamp. Pakwez kutongijokin mu chilik ik tukutwisha kutaninamu anch twamusejin Yehova piswimp, kukutukwash kudandamen kusal mwamu. (Kus. 63:7-9) Chilakej, twij anch chid cha usey kuda yakuda yisikena, kwiyijidish ku mujimbu, kuna mem mavud, ni kwikal ni chaku cha kupim. Cha ushon, antu avud kakatap kushinshikin yom yiney ni akat kuduul ukash wa mujimbu wau. Pakwez anch twatongijokin pa uwamp tukata kwikal nich kusutin kwikal ni yaku yiney yiwamp mu mwom, chikutuswapel kuyilam. Chilik chimwing kand, twij anch kumusejin Yehova kud kuwamp, pakwez kutongijokin pa yiyukish yidokila ku kusal mwamu chikutwish kutubachik kudandamen kumusejin nakash Murunetu.—Kus. 119:27-30.
4. Mud mulejenau mu Kuseng 73:28, yovil ik yamekeshay nfund a Kuseng?
4 Tang Kuseng 73:28. Muntu wafunda Kuseng 73a wading mwin Levi watondau mud mwin kuwang mu tempel wa Yehova. Chimeken anch wading wamwifukwidin kal Yehova nich kushinshaman mu mivu yivud. Pakwez amwinend wading uchikwet kuswir kwa kuvurik ni kuyivurish antu akwau anch, ‘chid kamu chiwamp kusej piswimp ni Nzamb.’ Mulong wak chid cha usey kumwijik Yehova nawamp ni kwikal mu urund uwamp ni ndiy?
‘KUSEJ PISWIMP NI NZAMB’ KUKAT KULET MUSANGAR
5. (a) Mulong wak kumusejin Yehova piswimp kukat kutuletin musangar? (b) Kukwatijan ni Jinswir 2:6-16, manang makatay Yehova kutwinkish makat kutukwash nchik ni kutuchidij?
5 Anch twasej piswimp ni Yehova, tukwikal ni musangar nakash. (Kus. 65:5) Kud mayingishin mavud makusala anch twikal ni musangar. Chilakej, tukat kutaninamu nakash anch twasadin yiyul ya manang yida mu Dizu dend, Bibil. Manang minam makat kutuchidij ku yibachikin yiyimp ni kutuchidij kand ku yaku yiyimp. (Tang Jinswir 2:6-16.) Chawiy Bibil ulondin anch: “Wayuk kwend muntu ukata kutan manangu, ni muntu ukata kutambul ronganyin.”—Jnsw. 3:13.
6. Yom yamushadishina nfund a Kuseng musangar?
6 Chakin kamu, ap arunend a Yehova akat kunengananang yisu yimwing. Muntu wafunda Kuseng 73 washadisha musangar wend pashinshikinay nakash pa yitongijok yikata kuziyishan. Wasambisha kutong anch antu akad kumusadin Nzamb akwet mashakamin mawamp ap anch kaziyidinap kwau kwi mbil ja Nzamb; chamusala nayimp nakash ni wayovila ris. Watonga nayimp anch antu ayimp, akweta chisum, ading adandamedin kwikal ni dipit ni kamanangap kwau mar. (Kus. 73:3-7, 12) Nfund a Kuseng warumbangana mu manang mu chilik cha kwiyipul anch usu wading usadinay mulong wa kumwifukwil Yehova wading kamu wa usey. Walonda nich ushon anch: “Ov, komb nalama kwam muchim wam zwang chamwamu? Ov, komb nilama kwam wakad chitil chamwamu?”—Kus. 73:13.
7. Anch twov ushon yom ik tukutwisha kusal? (Tal kand chipich cha pa chibur.)
7 Ap anch nfund a Kuseng wova ushon, wasala chom kanang mulong wa kuswimp. ‘Wandama mu chikumbu cha Nzamb,’ mwinimwa Yehova wamukwasha kuswimp mutapu wend wa kutong. (Kus. 73:17-19) Niyetu anch twovil ushon, Yehova Murunetu wijing nawamp. Anch twamulembil chakwel atutakela ni anch twitiy ukwash udokila mu Dizu dend ni chikumangen, ukat kutwinkish usu mulong wa kudandamen kumusadin ap anch twovil ushon. Ap anch twiyakamish chipandakena, Yehova ukutwongoj ni kutukasikesh.—Kus. 94:19.b
Mwin Levi wafunda Kuseng 73, wiminy mwi ‘ndond yitumbila yijim ya Nzamb’ (Tal paragraf wa 7)
‘KUSEJ PISWIMP NI NZAMB’ KUKAT KUTUKWASH KWIKAL NI MWOM UWAMP NI RUCHINGEJ
8. Kumusejin Nzamb piswimp kud kuwamp mu mitapu ik yikwau ya usey?
8 Kumusejin Nzamb piswimp kud kuwamp mu mitapu yikwau yaad ya usey. Cha kusambish, tukutwish kwikal ni mwom uwamp anch twikal ni urund uwamp ni Nzamb. Cha kaad, kukat kutwinkish ruchingej rikash piur pa machuku ma kurutu. (Jer. 29:11) El tushinshikinany yom yiney yaad.
9. Kumusejin Yehova kutukwashin mutapu ik kwikal ni mwom wa musangar?
9 Kumusejin Yehova piswimp kukat kutukwash kwikal ni mwom uwamp. Antu avud nlel kitiyinap anch Nzamb udaku, chawiy kijap mulong wak udau antu pa divu ni itiyijin anch antu awonsu akusheshik. Pakwez, kudokal twasambishina kwilej Dizu da Nzamb, tukwet kashinsh anch “Nzamb udiaku, ndiy ukat kufutan kuwap kudi antu awonsu akata kumusurab.” (Heb. 11:6) Ap nlel, tukwet mwom wa musangar mulong tukat kusal yom yatutanginau—kumwifukwil Tatukwetu Yehova.—Kuv. 10:12, 13.
10. Yom ik yilejenau mu Kuseng 37:29 yiyitadina antu amuchingejidina Yehova?
10 Antu avud kakwetap kamu ruchingej rakin mulong wa machuku ma kurutu. Yom yichingejidinau kwau kud kusal mudimu, kwatan, kulil an ni kurijek machuku mau ma upal. Kijap kwau yom yakaninay kal Nzamb mulong wa machuku ma kurutu. Pakwez, atushalapol a Yehova atekin ruchingej rau muday ndiy. (Kus. 25:3-5; 1 Tim. 6:17) Tumuchingejidin Nzamb wetu ni Murunetu. Ni tukwet kashinsh anch ukuwanyish yom yashilayamu. Tuchingejin yom yivud nakash mu machuku ma kurutu, pakampwil kumwifukwil Nzamb chikupu mu Paradis.—Tang Kuseng 37:29.
11. Mutapu ik tukata kutaninamu anch twamusejin Nzamb, ni mutapu ik ukatay niyend kwiyov?
11 Kumusejin Nzamb piswimp kud kuwamp kud etu mu mitapu yikwau yivud. Chilakej, Yehova washilamu kulikishin yitil ya antu akata kukarumuk ni kumusejin piswimp. (Isay 1:18) Mud chibudikin, tukatap kudandamen kwifish nich mulong wa yitil twasala pakur. (Kus. 32:1-5) Ni tukwet musangar wa kumusangaresh Yehova. (Jnsw. 23:15) Chakin kamu, kud kand yom yikwau tukata kusanger mulong tukwet urund uwamp ni Yehova. Chad, mutapu ik tukutwisha kudandamen kumusejin Nzamb nakash?
MUTAPU WA KUDANDAMEN ‘KUSEJ PISWIMP NI NZAMB’
12. Yom ik wasadina kal mulong wa kusej piswimp nakash ni Nzamb?
12 Anch ud mwin Kristu wabatishinau kal, chid chakin anch wamusejidin kal Yehova mu chilik kanang. Wilejin kal uyakin uvud piur pa Yehova Nzamb ni Yesu Kristu, wakarumukin kal ku yitil yey ya pakur, watekin kal ritiy muday Nzamb, ni wasadin kal usu wa kusal yom kukwatijan ni rusot rend. Pakwez mulong wa kusej piswimp nakash ni Nzamb, tufanyidin kudandamen kusal yom yiney.—Kol. 2:6.
13. Yom ik yisatu yikutwisha kutukwash kudandamen kumusejin Yehova?
13 Yom ik yikutwisha kutukwash kudandamen kusej piswimp nakash ni Yehova? (1) Tufanyidin kudandamen kutang ni kwilej Bibil. Pitusadina mwamu, tufanyidinap kwetu kusu kwimen pa yom ya pa dishin piur pa Nzamb. Pakwez, tufanyidin kwikasikesh kutesh nawamp mutapu utonginay Nzamb ni yom yikatinay anch tusala, ni kwikal ni mashakamin mamusangareshina. (Efes 5:15-17) (2) Tufanyidin kukasikesh ritiy retu kusutin kutongin pa uman umekeshina anch Yehova utukatin. (3) Tufanyidin kudandamen kukis yom yakad kumusangaresh Yehova ni kulik kwikal mu urund nau antu akad kusal yom mud yiney.—Kus. 1:1; 101:3.
14. Kukwatijan ni yom yilondinau mu 1 Korint 10:31, yom ik yimwing tufanyidina kusal dichuku dawonsu mu mwom wetu mulong wa kumusangaresh Yehova? (Tal kand yipich.)
14 Tang 1 Korint 10:31. Chid cha usey kudandamen kusal yom yimusangareshina Yehova. Chinech chitin kusal yom yivud kusutamu yom tukata kusal ku yikumangan ni mu mudimu wa kulejan. Mu yisal yiwamp yikata kumusangaresh Yehova mud kand yom tukata kusal dichuku dawonsu mu mwom wetu. Chilakej, tukat kumusangaresh Yehova anch twamekesh win kashinsh mu yom yawonsu ni kuyinkishap antu akwau yom tukweta. (2 Kor. 8:21; 9:7) Ukatin kand anch tukwata chipan cha mwom nich usey nakash. Tukat kumusejin Sakatang wa mwom piswimp kusutin kwikal ni yaku yisikena piur pa kuda, kuna ni kubangin ukash wetu wa mujimbu ni mu mitapu yikwau yisikena. Anch Yehova waman usu tusadina mulong wa kumusangaresh, ap mu yom yimekena mud yikemp, ukat kutukat chipandakena.—Luka 16:10.
Kwendish nawamp, kwibangin ayinetu kusutin kwiyijidish ku mujimbu, kuda yakuda yiwamp ni kuyinkishap antu akwau yom tukweta, yid pakach pa mitapu yimwing tukutwisha kumusangaresh Yehova (Tal paragraf wa 14)
15. Yehova ukatin anch tuyisadina antu akwau mutapu ik?
15 Yehova ukat kumekesh kuwap kwend kud antu atentamina ni akad kutentam. (Mat. 5:45) Ukatin anch niyetu tusala mwamu kud antu akwau. Chilakej, tufanyidinap kwikal “in matungu, ap in matend, pakwez [twikal] in kudimuk, ni in kumekesh kwitudish kwakin kudi antu awonsu.” (Tit. 3:2) Ni chitongijok chinech mu manang, tukatap kuyipipej antu akad kumwifukwil Yehova. (2 Tim. 2:23-25) Tukat kumusejin Yehova piswimp kusutin kuyisadin antu akwau yom yiwamp.
TUKUTWISH KUSEJ ‘PISWIMP NI NZAMB’ AP ANCH TWARUMBUK
16. Yisu yimwing muntu wafunda Kuseng 73 wasambisha kwiyov mutapu ik?
16 Yisu yimwing tukutwish kwiyov anch tudap kamu piswimp ni Yehova mulong wa yitil twasala. Mud twisambinang kwinsambishin, chawiy kand chom chamushikena muntu wafunda Kuseng 73. Walonda anch: “Pakwez kudi am, nading piswimp ni kwipwakal, mend mam melang kusiribuk.” (Kus. 73:2, TMK.) Walonda kand anch wova “kuyip” ni wading “chisup wakad manangu” “mud nnam” kurutu kwa Yehova. (Kus. 73:21, 22) Ov, wiyova anch Yehova kamukatinap ni kakumulikishinap mulong wa yitil yend?
17. (a) Ap anch wiyova nayimp, yom ik yasalay nfund a Kuseng? (b) Dilejan ik tukutwisha kwilejin ku yom yamushikena? (Tal kand yipich.)
17 Anch nfund a Kuseng wiyova anch amulik kal kud Yehova, yovil yiney yashikena kwau mu chisu chikemp. Ap anch wiyova nayimp, wading wij anch ukwet kuswir kwa kusej piswimp ni Nzamb. Wafunda anch: “Ap anch mwamwap nchik, am nidi niyey machuku mawonsu, ey winkwatin ku chikas cham cha katatuku. Ukat kwintakel nich chiyul chey, ni kurutu ukez kangak nich kutumb.” (Kus. 73:23, 24) Niyetu tufanyidin kumwit Yehova chakwel atukasikesha anch twiyov anch ritiy retu raziy kal ap anch twaziy mulong wa kurumbuk kwetu. (Kus. 73:26; 94:18) Anch twasiribuk mu kachisu kakemp, tukutwish kumuchirikin Yehova nich kashinsh anch ‘ukutulikishin.’(Kus. 86:5) Tufanyidin kumusejin Nzamb piswimp, pakampwil anch tuziyin nakash.—Kus. 103:13, 14.
Anch twaziy mu spiritu, tufanyidin kumusejin Yehova piswimp kusutin kwipan nakash mu malembil ni kukumangan yisu yawonsu (Tal paragraf wa 17)
TUKUTWISH ‘KUSEJ PISWIMP NI NZAMB’ CHIKUPU
18. Mulong wak kwikil mwimbu pantaliken ni mutapu tukutwisha kumusejin Yehova?
18 Kwikil kwau mwimbu pantaliken ni mutapu tukutwisha kumusejin Yehova ni mutapu tukutwisha kwilej kumwijik nawamp. Bibil ulondin anch njil ja Yehova, manang mend, ni ronganyin rend “[yikasiken] kwov kurumburik.”—Rom 11:33.
19. Nfund a Kuseng utwinkishin kashinsh ik?
19 Kuseng 79:13 usambishin anch: “Etu antwey, tud amikoku a madil mey, tukez kakujikitish chikupu. Tukez kakushiman ey djat ni ku a majuku makeza kez.” Piudandamedina kumusejin piswimp niyey ukutwish kwikal ni kashinsh anch Yehova ukukuyukish chikupu, ni ukutwish kulond anch: “Nzamb ud usu wa muchim wam, ndiy rusot ram chikupu.”—Kus. 73:26.
MUMINY 32 Shal Ushinshamena Kudi Yehova!
a Antu amwing adandamedina kov ushon ap kuziy chisu chilemp akwet kuswir kwa ukwash wa dokter. Mulong wa kwijik yom yivud, tal Chinong cha Kalam, No. 1 2023.
b URUMBURIL CHIPICH cha pa Chibur: Mwin Levi wafunda Kuseng 73, wiminy mwi ‘ndond yitumbila yijim ya Nzamb.’