Chid Chiwamp kud etu Kusejijadin Piswimp Umwing ni Mukwau!

1-2. Chom ik chida cha usey kud Yehova, ni yom ik yikatinay anch tusal?

MUTAPU tuyisadina antu akwau uding wa usey nakash kud Yehova. Yesu wafundisha anch tufanyidin kuyikat amutej netu mud mutapu twikatina etu ayinetu. (Mat. 22:37-39) Chinech chitin kusal yom yiwamp ap kud antu akad kumusadin Yehova. Anch twasal mwamu, twimburijin chilakej cha Yehova Nzamb ukata “kubudish muten wend mulong wa antu ayimp ni awamp, ni ukata kunakish ruval kud antu atentamina ni akad kutentam.”​—Mat. 5:45.

² Ap anch Yehova uyikatin antu awonsu, pakwez uyikatining pa kampwil antu akata kusal yom yiwamp. (Yoh. 14:21) Ukatin anch tumwimburij. Chawiy utukasikeshin ‘kuyikat nakash’ akadivar nau anambaz netu ni kuyimekeshin “rukat rakin.” (1 Pita 4:8; Rom 12:10) Rukat mud riner rifanaken ni yovil tukweting piur pa mwanamakwetu tukatina ap murund wa piswimp nakash.

3. Yom ik tufanyidina kuvurik piur pa rukat?

³ Rukat rid mud mutond uda mu rupang, chawiy chitin kuridish chakwel ripam. Kambuy Paul wayiyula in Kristu anch: “Dandamenany kukatijan muntu ni mukwau mudi akadivar.” (Heb. 13:1) Yehova ukatin anch tudandamen kukudish rukat retu mulong wa antu akwau. Mu mutu wa mulong winou tukuman mulong wak tufanyidin kuyisejin nakash ambay netu in Kristu ni mutapu tukutwisha kudandamen kusal mwamu.

YOM YIFANYIDINA KUTUBACHIK KUSEJIJADIN NAKASH UMWING NI MUKWAU

4. Mud mulejenau mu Kuseng 133:1, mutapu ik tukutwisha kudandamen kukwat nich usey uumwing wa ukadivar uda pakach petu? (Tal kand yipich.)

⁴ Tang Kuseng 133:1. Twitiyijin yom yalonday nfund a Kuseng pafunday anch kwikal mu urund wakin nau antu amukatina Yehova kud ‘kuwamp’ ni ‘kusangareshin.’ Pakwez mud mutapu ukutwishay muntu kukangany kuman mutond upandakena kujimb ukatay kuman dichuku dawonsu, niyetu tukutwish kukangany kuman kuwap kwa uumwing wa win Kristu wetu. Tukat kuyiman akadivar nau anambaz netu yisu yivud, ni pamwing ap tupamp tuvud pa rubing. Mutapu ik tukutwisha kumekesh anch tudandamedin kuyikwat nich usey? Tukukudish rukat tukweta kud akadivar nau anambaz netu anch twatongijokin pa usey ukwetay muntu mwawonsu mu chikumangen ni kud etu.

5. Rukat retu ra ukadivar rikweting usu ik padau antu akwau?

⁵ Antu amwing akata kukumangan netu kapamp ka kusambish akat kushimwok nakash pakatau kuman rukat tukata kumekeshijadin umwing ni mukwau. Kusutin rukat riner, akutwish kuman anch ajingunin kal uyakin. Yesu walonda anch: “Anch niyen wakatijanany mwamu, chawiy antu awonsu akez [kwijik] anch, en udiany in kwilejam.” (Yoh. 13:35) Shinshikin chilakej cha Chaithra, changadim wading ku iniversite, wilejang nau Atuman a Yehova. Witiya diladikij da kuya ku chitentam cha rejon. Kupwa kwa kuya dichuku da kusambish, wamuleja muntu wamufundishang Bibil anch: “Kand kal ambwikatangap kud anvajam. Pakwez ku chitentam chen, ambwikatang tupamp 52 mu dichuku dimwing kwau! Namanang rukat ra Yehova kusutin dijuku dend da mu spiritu. Nikatin niyam kwikal mu dijuku dined.” Chaithra wadandamena kwilej ni kuswimp mu mwom wend, ni amubatishin mu muvu wa 2024. Chakin kamu, anch antu asu aman yisal yetu yiwamp, kuwejinaku ni rukat tukweta umwing ni mukwau, akat kukwat mupak wa kumusadin Yehova.​—Mat. 5:16.

6. Kuyisejin akadivar nau anambaz netu piswimp kukutwish kutuking mutapu ik?

⁶ Kuyisejin akadivar nau anambaz netu piswimp kukutwish kutuking. Paul wayileja ambay nend in Kristu anch: “Kasikeshijanany muntu ni mukwau pichuku pichuku . . . chakwel kangal muntu umwing wa pakach pen ukudimbau ku chitil, chad wachinchikish muchim wend.” (Heb. 3:13) Anch twaziy nakash ni mend metu masiribuk madokal mwi njil yitentamina, Yehova ukutwish kumubachik mbay netu mwin Kristu kutukwash kukwatijan ni maswir metu. (Kus. 73:2, 17, 23) Ukwash mud winou ud kamu wa usey kud etu.

7. Kukwatijan ik kuda pakach pa rukat ni uumwing? (Kolosay 3:13, 14)

⁷ Tud mu chisak cha antu akata kusal usu nakash wa kumekeshijadin rukat umwing ni mukwau, chawiy tukat kutaninamu yiyukish yivud. (1 Yoh. 4:11) Chilakej, rukat rikat kutubachik kudandamen ‘kuduulijan umwing ni mukwau’ anch aturumbukin, ni anch twasal mwamu tukat kukasikesh uumwing wetu wa win Kristu. (Tang Kolosay 3:13, 14; Efes 4:2-6) Chawiy tukat kusanger urund uwamp nakash ku yikumangan yetu, chom twakad kutan mu chisak ap chimwing pa mangand minam.

TULIMISHIJANANY UMWING NI MUKWAU

8. Mutapu ik ukatay Yehova kutukwash kwikal mu umwing ni akadivar nau anambaz netu?

⁸ Uumwing wa pa mangand mawonsu tusangaredina chid chilay. Yehova ndiy usadina chom chinech ap anch tud antu akad kuwanyin. (1 Kor. 12:25) Bibil ulondin anch “akulejinany kal kudi Nzamb mutapu wa kukatijan muntu ni mukwau.” (1 Tes. 4:9) Chinech chirumburikin anch, kusutin Bibil, Yehova ukat kutulej yom tufanyidina kamu kusal mulong wa kusejijadin piswimp umwing ni mukwau. Tukutwish kwikal “[alejinau] kudi Nzamb” kusutin kushinshikin mafundish mend ni kumasadin. (Heb. 4:12; Jak. 1:25) Yiney yawiy kamu yom yikatau Atuman a Yehova kwikasikesh kusal.

9. Yom ik twilejina mu Rom 12:9-13 piur pa kulimishijan umwing ni mukwau?

⁹ Dizu da Nzamb ditufundishin ik piur pa kusejijadin piswimp umwing ni mukwau? Shinshikin yom yalonday Paul pa mulong winou yifundinay mu Rom 12:9-13. (Tang.) Mud mutapu wamana kal, ulondin anch: “Chifanyidin kukasikesh kulimishijan amwing ni akwau.” Chirumburikin ik? Chirumburikin anch tufanyidin kukwat mupak wa kuyimekeshin antu akwau “rukat rakin” kusutin kuyilikishin, kuyak, kuyinkishaku yom tukweta, ap kuyisadin yom yikwau kand. (Efes 4:32) Ufanyidinap kuchingel anch mukadivar ap nambaz asambelaku kukusejin piswimp. Ukutwish kwikal “wa kusambish” kusal mwamu. Ni ukuman kuwanyin kwa mazu ma Yesu, malondina anch: “Chiyukish cha mwin kupan chipandakenamu cha mwin kutambul.”​—Mid. 20:35.

10. Mutapu ik tukutwisha kwikal in mushiku mu “kulimishijan amwing ni akwau”? (Tal kand chipich.)

¹⁰ Chisangareshin kuman anch, kapamp kamwing kamu kupwa kwa kutulej kwikal a kusambish kulimishijan umwing ni mukwau, Paul utukasikeshin kwikal “in mushiku, kadap in usweral.” Muntu ukweta mushiku usadining mudimu nich kutakaman. Anch amwinkish mudimu, ukat kuusal pakad kulab. Jinswir 3:27, 28 utukasikeshin anch: “Sal kuwap kudi awiy aswiridina kuwap, anch chidi mu usu wey wa kuchisal.” Chawiy anch twamana anch muntu kampand ud mu maswir, tufanyidin kusal yawonsu tukutwisha mulong wa kumukwash. Tufanyidinap kuladikij yom ap kutong anch akumukwash kwend kud muntu mukwau.​—1 Yoh. 3:17, 18.

11. Yom ik yikutwisha kutukwash kusejijadin piswimp umwing ni mukwau?

¹¹ Mutapu ukwau tukutwisha kuyilimish antu akwau ud wa kuyilikishin kapamp kamwing anch aturumbukin. Efes 4:26 ulondin anch: “Kangal wajingany nich ujim dichuku diakabuj.” Mulong wak? Verse 27 ulondin anch kusal mwamu kukutwish “[kumushil] Sakudimban chisu.” Yehova utulejin mu Dizu dend tupamp ni tupamp anch tufanyidin kulikishijadin umwing ni mukwau. Kolosay 3:13 utukasikeshin kudandamen “kulikishijadin umwing ni mukwau.” Kuyilikishin antu akwau kurumbuk kwau ud mutapu uwamp nakash ukata kutukwash kusejijadin piswimp. Anch twayilikishin antu akwau, tukat kukwash ‘kulam uumwing wa spiritu mu chisambu chitunungina pamwing.’ (Efes 4:3) Mu wiswimp, kulikishin kukutwish kukasikesh uumwing ni chisambu.

12. Mutapu ik ukatay kutukwash Yehova kulikishin?

¹² Chid chakin anch chikutwish kutukasiken kuyilikishin antu aturumbukinang. Pakwez nich ukwash wa spiritu wa Nzamb tukutwish kusal mwamu. Kupwa kwa kutukasikesh kwikal “ni rukat rakin umwing ni mukwau” ni kwikal “in mushiku,” Bibil utulejin anch: “Bwakatany nich spiritu.” Muntu ‘ubwakatina’ ukweting mushiku nakash ni chirungul yidokila ku spiritu utumbila. Chawiy spiritu wa Nzamb ukutwish kutukwash kwikal ni rukat rakin ni kulikishijadin umwing ni mukwau kwa kwisotin. Chinech chawiy tukata kumwilembin Yehova chakwel atukwash.​—Luka 11:13.

“KANGAL KWIKAL KWAUROK PAKACH PEN”

13. Yom ik yikutwisha kuletish kwaurok pakach petu?

¹³ Mu chikumangen mud ‘antu a mitapu yawonsu,’ ni adokila ku jindond kushalijan. (1 Tim. 2:3, 4) Anch tubabelap, kushalijan kwinoku kukutwish kuletish kwaurok pakach petu, pakampwil pa mupak ukwatinay muntu ni muntu piur pa yom mud kudjal ni kwileng, kwiyokish, ap kwipuwangej. (Rom 14:4; 1 Kor. 1:10) Mulong Nzamb watufundishin kal mutapu wa kukatijan muntu ni mukwau, tufanyidin kubabal chakwel kangal twamekesh mud mipak tukwatina etu yawiy ya usey nakash.​—Fil. 2:3.

14. Yom ik tufanyidina kwikasikesh kusal chisu chawonsu, ni mulong wak?

¹⁴ Tukutwish kand kukangesh kwaurok mu chikumangen kusutin kuyikasikesh antu akwau yisu yawonsu. (1 Tes. 5:11) Mu machuku ma kwinyim am, antu avud ading atalela kal ap adoshinau kal mu chikumangen achirokin. Tuyezishinaku nich musangar! (2 Kor. 2:8) Man yom yamushikena nambaz umwing wading watalela kal mu mivu 10 ni wachirika ku Chot cha Want. Walonda anch: “Muntu win mwawonsu wansipishang ni kwinginkish moy mu chikas.” (Mid. 3:19) Yisal yiney yikemp ni yiwamp yikala ni usu ik paday ndiy? Ulondin anch: “Yisal yiney yankwasha kwiyov anch Yehova wading ukat kwinkwash kwikal kand ni musangar.” Anch twikal in kuyikasikesh antu akwau, Yesu ukutusadin mulong wa kuyikwash antu ‘aziyina ni asendina yisend yilimina.’​—Mat. 11:28, 29.

15. Mutapu ik ukwau tukutwisha kukasikesh uumwing? (Tal kand chipich.)

¹⁵ Mutapu ukwau tukutwisha kukasikesh uumwing ud kusutin yom tulondina. Job 12:11 ulondin anch: “Ov, ditu kidikat kwaurilap mazu, mudi rudim chirukata kupak yakudia?” Mud mutapu ukatay mwin kwisuk muwamp kupak yakuda yend mulong wa kwikal ni kashinsh anch yitadin kurutu kwa kuyipan kud antu akwau, tufanyidin kutongijokin nawamp piur pa yom tukimbina kulond kurutu kwa kuyilond. (Kus. 141:3) Chisu chawonsu tufanyidin kwikal ni kashinsh anch mazu metu makuyikasikesh ni kuyikwash antu akwau, ni anch “antu awonsu akumatesha [akutaninamu].”​—Efes 4:29.

16. Anany pakampwil afanyidina kusadin mazu makasikeshina?

¹⁶ Pakampwil angatan ni anvaj afanyidin kwikal ni kashinsh anch mazu mau mad min kukasikeshan. (Kol. 3:19, 21; Tit. 2:4) Amakurump niyau afanyidin kwikal in kukwashan ni kukasikeshan, mulong ad atufung a chisak cha amikoku a Yehova. (Isay 32:1, 2; Gal. 6:1) Bibil utuvurishin anch: “dizu dia mu chisu chau didi diwamp.”​—Jnsw. 15:23.

TWIKALANY NI RUKAT “RAKIN RIMEKEDINA MU YISALIJOK YETU”

17. Mutapu ik tukutwisha kwikal ni kashinsh anch rukat retu mulong wa akadivar nau anambaz rid rakin?

¹⁷ Kambuy Yohan utukasikeshin kwikal ni “rukat rakin rimekedina mu yisalijok yetu yiwamp.” (1 Yoh. 3:18) Tukatin anch rukat retu mulong wa akadivar nau anambaz ridokal ku muchim. Mutapu ik tukutwisha kusal mwamu? Anch twasutish chisu chivud pamwing ni akadivar nau anambaz netu, tukusejijadin piswimp nakash, ni rukat retu mulong wa umwing ni mukwau rikwikal rikash. Chawiy kimb mitapu ya kusutish chisu pamwing ni antu akwau, chilakej ku yikumangan ni mu mudimu wa kulejan. Itekina chisu cha kuyendin antu akwau. Anch twasal mwamu, tukumekesh anch “[atulejin] kal kudi Nzamb mutapu wa kukatijan muntu ni mukwau.” (1 Tes. 4:9) Ni tukudandamen kwimenap ayinetu kuwanyin kwa mazu malondina anch: “Talany kuwap ni musangar anch akadivar abombakan ni kushakam pamwing!”​—Kus. 133:1.