Itiyin Nich Kwikepish yom Wakad Kwijik

1. Mutapu ik watutangay Yehova, ni mulong wak?

YEHOVA watutanga mu mutapu ushimwokishena. Tukwet mutapu wa kutong, wa kwilej yom yisu, ni kuman mutapu wa kuyisadin. Mulong wak watutanga mwamu? Chisu tumusadidina, Yehova ukatin anch tukwata mipak ya manang yimedina pa ronganyin rakin.​—Jsw. 2:1-5; Rom 12:1.

2. (a) Yom ik tuswirikedina kwijik piur pa ayinetu? (Yob. 37:23, 24) (Tal kand chipich.) (b) Mulong wak chid cha usey kud etu kwijik anch tukwetap kuswir kwa kwijik yom yawonsu?

² Yehova watutanga ni mutapu wa kwilej yom, pakwez kud yom yivud twakad kwijik. (Tang Yobu 37:23, 24.) Shinshikin chilakej cha Yobu. Yehova wamwipula Yobu yipul yivud yamukwasha kuman anch kwading yom yivud yakaday kwijik. Chinech chamukwasha Yobu kwikepish ni kuswimp mutapu wend wa kutong. (Yob. 42:3-6) Niyetu tukutwish kutaninamu anch twitiyin anch twijap yom yawonsu. Kwikepish mud kwinoku kukutukwash kwikal ni kashinsh anch Yehova ukutujingunin yom tuswirikedina chakin kamu mulong wa kukwat mipak yiwamp.​—Jsw. 2:6.

3. Yom ik tukwisambina mu mutu wa mulong winou?

³ Mu mutu wa mulong winou tukwisambin yom twakad kwijik ni yikokujol tukutwisha kurish nich mulong tuyijap. Tukuman kand mulong wak chid cha usey kud etu kulik kwijik yom yimwing. Yom yiney tukwisambina yikukasikesh kashinsh ketu anch Yehova, “Mwin ronganyin rawonsu,” ukat kutulej yom tuswirikedina chakin kamu kwijik.​—Yob. 37:16.

TWIJAP CHISU CHIKUSHIKA DISUDEN

4. Kukwatijan ni Mateu 24:36, yom ik yimwing twakad kwijik?

⁴ Tang Mateu 24:36. Twijap chisu chikushika disuden da mangand minam. Ap Yesu, padingay pa divu, kadingap kija “dichuku ni chisu.”a Mu kusut kwa chisu wayileja atwimbuy end anch Yehova ndiy ukweta usu wa kutond chisu chikushikena yinship yimwing. (Mid. 1:6, 7) Yehova watenchikin kal chisu chikushikena disuden da mangand minam, pakwez tukutwishap kamu kujingunin chisu ik chikushikena yom yiney.

5. Kulik kwijik chisu chikwez disuden kukutwish kwikal ni usu ik pad etu?

⁵ Kukwatijan ni yom yalonday Yesu, twijap kamu kulep kwa chisu tufanyidina kuchingel djat ni pakushikina disuden. Mud chibudikin, tukutwish kuziy, pakampwil anch twachingedin kal dichuku da Yehova mu mivu yivud. Ap kand chikutwish kutukasiken kujijaman anch atusip kud antu a mu dijuku detu ap antu akwau. (2 Pi. 3:3, 4) Chitwishikin kutong anch, ang twad twij dichuku dikweza disuden, chikutwish kutuswapel kushimpish muchim ni kujijaman anch atusip.

6. Mulong wak chid cha usey kud etu kulik kwijik chisu chikwez disuden?

⁶ Kusutin kulik kutulej chisu chikwez disuden, Yehova utwinkishin mutapu wa kumekesh anch tumusadidin mulong tumukatin ni tumuchingejidin. Tukatin kumusadin Yehova kadap ching kushik pakwezina disuden, pakwez tukatin kumusadin chikupu. Pa ndond pa kushinshikin pa chisu chikweza “dichuku da Yehova,” chid cha usey kushinshikin pa yom yikuwanyisha dichuku dined. Anch twasal mwamu tukumusejin Yehova nakash, tukumuchingejin, ni tukusal usu wawonsu mulong wa kumusangaresh.​—2 Pi. 3:11, 12.

7. Yom ik twija?

⁷ Chid cha usey kud etu kushinshikin pa yom twija. Chilakej, twij anch machuku ma nsuden masambisha mu muvu wa 1914. Kusutin Bibil, Yehova watwinkisha uprofet umekeshina anch machuku ma nsuden masambisha mu muvu wa 1914. Walejana kand yom yivud piur pa mutapu wafanyina kwikal mangand kusambish muvu winiwa. Mud chibudikin, tukwet kashinsh anch “dichuku dijim dia [Yehova] didi piswimp.” (Sof. 1:14) Twij kand mudimu ukatinay Yehova anch tusal, charumburik anch kulejan “rusang ruwamp ra Want” kud antu avud. (Mat. 24:14) Uruu winou aulejen mu jingand piswimp 240 ni mu mazu 1 000 ni kusut. Tukwetap kuswir kwa kwijik “dichuku ni chisu” mulong wa kwikal ni mushiku mu mudimu winou.

TWIJAP MUTAPU UKUSALAY YEHOVA

8. Mazu “yisalijok yawonsu ya Nzamb” misambidin yom ik? (Mulej 11:5)

⁸ Chisu chawonsu tukutwishap kamu kwijik “yisalijok yawonsu ya Nzamb.” (Tang Mulej 11:5.) Mazu minam misambidin yom yisadinay Yehova ap yom yitiyinay anch yisadik mulong wa kuwanyish rusot rend. Tukutwishap kamu kwijik nawamp mulong wak witiyinay Yehova anch chom kampand chisadik ap mutapu ukusalay mulong wa kutukwash. (Ks. 37:5) Chikasiken kwijik chom chinech mud mutapu chikasikening kand kwijik mutapu upaminay mwan mwinvumu mwa makwend, chom chakadau kal in siyans kutesh nawamp.

9. Mulong twijap mutapu ukusalay Yehova mulong wa kutukwash, yikokujol ik tukutwisha kurish nich?

⁹ Kulik kwijik mutapu ukutukwashay Yehova kukutwish kutukangesh kukwat mipak yimwing. Tukutwish kwidjidjek kupipej mwom wetu ap kubuukin kwi ndond kuda maswir nakash ma in kulejan a Want mulong wa kutanduril mudimu wetu wa kulejan. Ni anch tuwanyishinap mipak yetu ya mu spiritu, tutaninap yibudikin yiwamp mulong wa usu tusadina mu mudimu wakulejan, ap turishin ni yikokujol mu proje wa dirijek, tukutwish kwiyipul anch chakin kamu Nzamb utukwashin.

10. Kulik kwijik mutapu ukusalay Yehova mulong wa kutukwash kukutukwash kukudish mikadil ik ya usey?

¹⁰ Kulik kwijik mutapu ukusalay Yehova mulong wa kutukwash kukutwish kutukwash kukudish mikadil ya usey mud kwikepish ni kwijik mimbu yetu. Kukutukwash kujingunin anch yisal ya Yehova ni mutapu wend wa kusal yom yid ya piur nakash kusutamu yetwetu. (Is. 55:8, 9) Kukutukwash kand kwilej kumuchingejin Yehova nakash, ni kashinsh kawonsu anch ukutukwash kutwish yom yawonsu tusadina. Anch twatan yibudikin yiwamp mu mudimu wa kulejan ap mu proje wa dirijek, tukat kumutumbish Yehova. (Ks. 127:1; 1 Ko. 3:7) Anch yom yisadikinap mu mutapu twading tuchingejidina, tufanyidinap kutong anch Yehova watwomb kal nyim. (Is. 26:12) Tufanyidin kusal yitutwishina kusal ku mutambu wetu, yikwau twamulikin Yehova. Tukwet kashinsh anch ukutwinkish umutakel tuswirikedina, ap anch kakusalap mwamu mu chilay, mud mwasalangay yisu yimwing pakur.​—Mid 16:6-10.

11. Yom ik twija yikutwisha kutukwash?

¹¹ Tongijokin pa uman tukweta anch Yehova uding chisu chawonsu mwin rukat, utentamina, ni mwin manang. Twij anch ukwatin nich usey nakash yom tusadina mulong wendendiy ni mulong wa ambay netu in Kristu. Twij kand anch Yehova ukat kuyiyukish antu awonsu amushinshamedina.​—Heb. 11:6.

TWIJAP YOM YIKUTWISHA KUSHIKEN DAMASHIK

12. Kukwatijan ni Yakobu 4:13, 14, kashinsh ik twakad kwikal nich?

¹² Tang Yakobu 4:13, 14. Uyakin ud anch twijap kamu mutapu ukwikala mwom wetu damashik. Mu mangand minam, “chisu cha mar” chikat kutushiken etu awonsu. (Mul. 9:11) Mud chibudikin, chikutwish kutukasiken kwijik anch tukuwanyish yom tutenchikina, ap kwijik anch tukwikal ni mwom mulong wa kuyisal.

13. Kulik kwijik yom yikusadina machuku ma kurutu kukutwish kwikal ni usu ik pad etu?

¹³ Chikutwish kutukasiken kujijaman mulong twijap kamu yom yikusadika mu machuku ma kurutu. Mutapu ik? Anch twiyakamish nakash piur pa yom yikushikena, tukutwish kushadish musangar wetu. Mwom wetu ukutwish kuswimp ap yom yiyimp yikutwish kutushiken pakad kuchingejin ni chinech chikusal anch twiyova kamu nayimp. Anch yom twada tuchingejina yalik kuwanyin, tukutwish kuziy ni kunenganan.​—Jsw. 13:12.

14. Yom ik yikutwisha kutuletin musangar wakin? (Tal kand yipich.)

¹⁴ Anch twajijamen yikokujol, tukutwish kumekesh anch chikalap nchik yom yikushikena, tumusadin Yehova mulong tumukatin, kadap mulong wa mayingishin ma choy. Nsang jida mu Bibil jimekeshin anch tukutwishap kumuchingejin Yehova chakwel atuchidij ku yinship yawonsu yiyimp ni anch kakatap kusambel kutenchik kurutu yom yikutushikena mu mwom. Wij anch tukutwish kwikal ni musangar ap anch twijap yom yin yawonsu yikushikena mu machuku ma kurutu. Pakwez tukutwish kwikal ni musangar anch twadandamen kukimb umutakel wend ni kuulondul mu mwom wetu. (Yer. 10:23) Anch twakimb ukwash wend chisu tukwatina mipak, chid mud tulondin anch: “Anch Yehova wakatish, tukudandamen kwikal aom, ni tukusal chom kampand ap kanang.”​—Yak. 4:15.

15. Yom ik twija piur pa machuku ma kurutu?

¹⁵ Twijap chom chikushikena dichuku din dawonsu, pakwez twij anch Yehova watukanin kal mwom wa chikupu—chikala kushakam pa divu ap mwiur. Twij anch kakutwishap kudimban ni kwikil chom chikutwisha kumukangesh kuwanyish kushilamu kwend. (Tit. 1:2) Ching kusu ndiy ukutwisha “kulejan yom yikeza kamekan kurutu.” Yom yawonsu yalonday pakur yasadika, ni yom yawonsu yalondinay kal mulong wa machuku ma kurutu yikusadik kand. (Is. 46:10) Twij nich kashinsh kawonsu anch kwikil yom yikutwisha kumukangesh Yehova kutukat. (Rom 8:35-39) Ukutwinkish manang, rongoj, ni usu ukutwisha kutukwash kujijamen yom yin yawonsu yikutwisha kutushiken. Tukutwish kwikal nich kashinsh anch Yehova ukutukwash ni kutuyukish.​—Yer. 17:7, 8.

TUKUTWISHAP KAMU KWIJIK MUTAPU UTWIJAY YEHOVA NAWAMP

16. Mud mulejenau mu Kuseng 139:1-6, yom ik yijay Yehova piur petu ni mutapu ik wiyovila?

¹⁶ Tang Kuseng 139:1-6. Sakatang wetu wij anch tud kwetu rufunfut, ni wij yom yikala ni usu pa wuntu wetu ni manang metu. Ukat kudandamen kutubangin. Wij yom tulondina ni yom twada tukimbina kulond, wij kand yom tusadina ni mulong wak tuyisadina. Mwant David walonda anch Yehova udaku chisu chawonsu mulong wa kutukwash. Chitushimwokishin pa kuman anch Mukaleng Mwant wa mangand mawonsu, mwin dikand ni Sakatang wa diur ni divu, ukat kutubangin mu mutapu winou! David walonda anch: “Manang mey makwamushena mampadikenamu. Chawiy kinikutwishap kwov kurumburik.”​—Ks. 139:6.

17. Mulong wak chikutwish kutukasiken kwitiy anch Yehova utwij kamu chakin?

¹⁷ Pamwing ap mulong wa mu dijuku tudokila, yishankur yetu, ap yitiyij yetu yikur, chikutwish kutukasiken kumuman Yehova mud Tatuku wa rukat utubangidina. Ap tukutwish kutong anch Yehova kakutwishap kutwijik ap pakemp ni kwikal netu piswimp mulong wa yom yiyimp twasala pakur. Ap David niyend wiyova mutapu winou. (Ks. 38:18, 21) Ap muntu wikasikeshina kuswimp mwom wend ni kushakam kukwatijan ni mbil jitentamina ja Nzamb ukutwish kwiyipul anch: ‘Anch Nzamb wingij kamu chakin, mulong wak uchingejin anch nilikap mashakamin mansangareshina?’

18. Mutapu ik tukutaninamu anch twitiy anch Yehova utwij nawamp kusutamu mutapu twiyija ayinetu? (Tal kand yipich.)

¹⁸ Tufanyidin kwitiy anch Yehova utwij nawamp kusutamu mutapu twiyija ayinetu ni ukutwish kuman mikadil yiwamp tukweta kusutamu mutapu tuyimena ayinetu. Pakwez utukatin ap anch ukat kuman kurumbok kwetu, ni uteshining mulong wak twiyovila ni kusal yom mu mutapu kanang. (Rom 7:15) Anch twajingunin anch chisu chawonsu Yehova ukat kushinshikin mikadil yiwamp tukutwisha kwikal nich, tukutwish kwikal ni usu tuswirikedina mulong wa kumusadin nich kushinshaman ni musangar.

19. Yom ik twija nich kashinsh kawonsu piur pa Yehova?

¹⁹ Twij anch Yehova ud rukat. Ni tukutwishap kwidjidjek pa mulong winou. (1 Yh. 4:8) Twij anch yom yawonsu yitulejinay kusal ni kulik kusal chid mulong utukatin ni ukatin twikal ni mwom uwamp. Twij kand anch Yehova ukatin twikala ni mwom wa chikupu. Wapana difut mulong wa kuwanyish rutong riner. Difut ditwinkin kashinsh anch tukutwish kumusadin Yehova mu mutapu umusangareshina chikalap nchik kuburen kuwanyin kwetu. (Rom 7:24, 25) Ni twij kand anch “Nzamb ud mujim kusutamu michim yetu ni wij yom yawonsu.” (1 Yh. 3:19, 20) Yehova wij yom yawonsu piur petu, ni ukwet kashinsh anch tukutwish mu usu wetu tusadina mulong wa kusal rusot rend.

20. Yom ik yikutwisha kutukwash kwipuk kwiyakamish nakash piur pa yom twakad kwijik?

²⁰ Yehova kakatap kutujindjikin yom tuswirikedina chakin kamu kwijik. Anch twitiyin uyakin winou nich kwikepish, tukwiyakamishap mulong wa yom twakad kwijik pakwez tukushinshikin pa yom yida kamu ya usey. Anch twasal mwamu tukumekesh anch tumuchingejidin kamu Yehova, ‘ukweta usu wa kwonganyin yom yawonsu.’ (Yob. 36:4) Ap anch twijap kamu yom yawonsu nlel, tuchingedin chisu chikutufundishay Nzamb wetu Mujim yom yisu piur pend chikupu ni chikupu.​—Mul. 3:11.