‘Tondany Ayinen Nany Ukukatanya Kusadil’

1. Yom ik tufanyidina kusal chakwel twikala ni musangar wakin, ni mulong wak? (Isay 48:17, 18)

TATUKWETU uda mwiur utukatin nakash, ni ukatin tusanger mwom katat ni mu machuku ma kurutu. (Mul. 3:12, 13) Watutanga ni ukaliweny ushimwokishena, pakwez katwinkishap ukaliweny wa kwiyikel ayinetu ap wa kwitekin mbil piur pa kuwap ni kuyip. (Mul. 8:9; Jer. 10:23) Wij anch chakwel twikala ni musangar wakin, tufanyidin kumusadin ni kushakam kukwatijan ni mbil jend.​—Tang Isay 48:17, 18.

2. Yom ik yikatinay Satan anch twitiyija, ni yom ik yasalay Yehova mulong wa kwakul ku makasu mend?

² Satan ukatin twitiy anch tukutwish kwetu kwikal ni musangar pakad ukwash wa Yehova, ap tukutwish kwetu kwiyikel ayinetu. (Dis. 3:4, 5) Mulong wa kumekesh anch Satan ud mukamakasu, Yehova walika chakwel antu iyikel bil ayinau mu chisu kanang. Chiswapel kwau kuman anch winyikel wa antu ukangeny. Pakwez, Bibil wisambidin piur pa amakundj ni amband avud ading ni musangar mulong amusadina Yehova. Yesu Kristu wading muntu wa kusambish pakach pa antu inay. Cha kusambish el tumanany mulong wak watonday kumusadin Yehova. Cha kaad, tukushinshikin mulong wak tufanyidin kumwifukwil Tatukwetu Yehova. Cha kasatu, tukushinshikin mayingishin mamwing matubachika kutond kumusadin Yehova.

MULONG WAK YESU WATONDA KUMUSADIN YEHOVA

3. Yom ik yakimbay Satan kumwinkish Yesu, ni mupak ik wakwatay Yesu?

³ Padingay pa divu, Yesu wakwata mupak piur pa muntu wafanyinay kwifukwil. Chisu chikemp kupwa kwa kumubatish Yesu, Satan wamuleja kumwinkish mant mawonsu ma pa divu anch wamwifukwil kapamp kamwing kwau. Yesu wamwakula anch: “Dokal pinap, Satan! Mulong afundin anch: ‘Ufanyidin kumwifukwil ching kusu Yehova Nzamb wey ni ndiy kusu ufanyidina kusadin mudimu utumbila.’” (Mat. 4:8-10) Mulong wak Yesu wakwata mupak winou? Shinshikin mayingishin mamwing.

4-5. Mayingishin ik mamwing mamubachika Yesu kumusadin Yehova?

⁴ Diyingishin da kusambish damubachika Yesu kumusadin Yehova, rid rukat—Yesu wading umukatin Tatukwend nakash. (Yoh. 14:31) Chikwau kand, Yesu wamusadina Yehova mulong wading wij anch wawiy mupak uwamp. (Yoh. 8:28, 29; Kuj. 4:11) Wading wij anch Yehova ndiy musul wa mwom, wa kuchingejin ni mwin kupan kwa kwikatin. (Kus. 33:4; 36:9; Jak. 1:17) Yehova wamulejang Yesu uyakin ni wamwinkisha kand yom yawonsu yadingay nich. (Yoh. 1:14) Pakwez Satan ndiy waletisha rufu. Ud kand mukamakasu, mwin ris ni choy. (Yoh. 8:44) Mulong wading wij yom yiney, Yesu kakatap kumwimburij Satan mulong wa kumubwambwil Yehova.​—Fil. 2:5-8.

⁵ Diyingishin dikwau damubachika Yesu kumusadin Yehova, chid mulong wading wij kand yibudikin yafanyina kwikalaku mulong wa mudimu wend ushinshamena. (Heb. 12:2) Wading wij anch kusutin kushal ushinshamena, wafanyina kutumbish dijin da Tatukwend ni kupwish kand rufu ni mayej yaletishay Satan.

YEHOVA NDIY UWANYIDINA KWIFUKWIL

6-7. Mulong wak antu avud kakatap kumusadin Yehova, pakwez mulong wak etu tufanyidin kumwifukwil ching ndiy?

⁶ Antu avud nlel kamusadidinap Yehova mulong kijap kwau mikadil yend yipandakena kuwap ni yom yawonsu yayisadidinay kal. Wawiy kand mutapu wadingau antu afundishay kambuy Paul ku Aten.​—Mid. 17:19, 20, 30, 34.

⁷ Paul wayirumburila antu a ku Aten anch Nzamb wa uyakin ‘ndiy amwinend ukata kuyinkish antu awonsu mwom, mupim ni yom yawonsu.’ Wawejinaku kand anch: ‘Kusutin ndiy tukwet mwom, tukat kwinyikesh, ni tudaku.’ Nzamb ndiy Sakatang, ni ‘kusutin muntu umwing, wasala michid yawonsu ya antu,’ chawiy tufanyidin kumwifukwil.​—Mid. 17:25, 26, 28.

8. Yehova kakez kasalap chom ik? Rumburil.

⁸ Mulong Yehova ud Sakatang wetu ni mwin mangand, wafanyina kwend kuyishindin antu kumusadin ku usu. Pakwez, kakezap kusal mwamu. Dichuku dawonsu ukat kusal yom yivud yimekeshina anch udaku ni umukatin muntu ni muntu panrend. Ukatin anch antu avud ikal arunend chikupu. (1 Tim. 2:3, 4) Kupwa, Yehova watufumbin kal chakwel tuyifundisha antu akwau piur pa rutong rend ni yom yiwamp yikusalay mulong wa antu. (Mat. 10:11-13; 28:19, 20) Watwinkishin kal chikumangen, ndond tukata kumwifukwil ndiy ni kutambul ukwash udokila kud amakurump akweta rukat.​—Mid. 20:28.

9. Mutapu ik ukatay Yehova kumekesh rukat rend kud antu awonsu?

⁹ Yehova ukat kumekesh rukat rend kusutin kupan yom yiwamp ap kud antu akad kwau kumwitiyij. Shinshikin yom ey: kudosh pakur, antu avud akwatin kal mupak wa kwitondinap ayinau yom yida yiwamp ni yiyimp. Chikalap nchik mwamu, Yehova wayinkishin kal yom yida ya usey mulong wa kwikal ni mwom ni kuusanger kand. (Mat. 5:44, 45; Mid. 14:16, 17) Mulong wendendiy, antu akutwish kwikal ni arund, majuku mayikatina, kulil an ni kusanger mwom. (Kus. 127:3; Mul. 2:24) Yom tukata kuman yimekeshin anch Tatukwetu wa mwiur uyikatin antu nakash. (Kub. 34:6) El katat tuvurikany mayingishin matubachika kutond kumusadin Yehova, ni tuman mutapu ukatay kuyiyukish antu awonsu akata kumwifukwil.

MAYINGISHIN MATUBACHIKA KUTOND KUMUSADIN YEHOVA

10. a) Diyingishin ik da kusambish ditubachikina kumusadin Yehova? (Mateu 22:37) b) Mutapu ik watanidinamu kal kusutin kushimpish muchim kwa Yehova? (Kuseng 103:13, 14)

¹⁰ Mud Yesu, niyetu tukat kumusadin Yehova, cha kusambish mulong tumukatin nakash. (Tang Mateu 22:37.) Anch twilej piur pa mikadil yend tukat kwiyov anch tud kamu nend piswimp. Chilakej, shinshikin mutapu ukatay Yehova kutushimpishin muchim. Chisu chamubwambwilau kud in Isarel, wayilembina chakwel “alika yaku ya kusal yitil.” (Jer. 18:11) Yehova ukat kuvurik anch tud kwetu rufunfut. (Tang Kuseng 103:13, 14.) Anch watongijokin mutapu wakushimpishinay Yehova muchim, ov, ukwetap mayingishin ma kumwifukwil chikupu?

11. Mayingishin ik kand makwau matubachikina kutond kumusadin Tatukwetu wa mwiur?

¹¹ Tukwet kand mayingishin ma kumusadin Yehova; mulong twij anch wawiy mupak uwamp. (Mat. 4:10) Chikwau kand, twij yibudikin yiwamp yikutwisha kwikalaku anch twashal ashinshamena kud Yehova. Anch twamusadin kand Yehova nich kushinshaman, tukutumbish dijin dend ni kumekesh patok anch Satan ud mukamakasu, tukusangaresh kand muchim wa Tatukwetu. Anch twatond kumusadin Yehova nlel, tukuchingej kand kumusadin chikupu!​—Yoh. 17:3.

12-13. Yom ik twilejidina ku yom yamushikena Jane ni Pam?

¹² Chisu tuda ansand, tukutwish kwilej yom yivud mulong wa kumukat Yehova, ni rukat retu mulong wendendiy rikutwish kwikal rikash nakash. Shinshikin chilakej cha Jane ni Pama ada an a kamuntu. Jane wading ni mivu 11 ni Pam wading ni mivu 10 pasambishau kwilej Bibil. Anvaj au ayileja anch akutwish kwilej Bibil nau Atuman a Yehova ching anch itiy kand kuyangang nau ku egliz kwinsuden kwa rubing. Jane ulondin anch: “Yom yanfudishangau Atuman a Yehova mu Bibil yankwasha kwipuk kwipan mu kuna ruwand, ni kusal masandj mud mwasalangau arunam ku shikol.”

¹³ Kupwa kwa mivu yikemp, ayangadim inay ikala in kulejan. Mu kusut kwa chisu, asambisha mudimu wa uchibol oku akat kuyilam kand anvajau ading ananapina kal. Kupwa kwa kuvurik yom yayishikena, Jane ulondin anch: “Najingunina anch Yehova ukat kuyibangin arunend nich kushinshaman ni anch mud mulejenau mu 2 Timote 2:19, ‘[Yehova] uyij aend.’” Pakad kwidjidjek Yehova ukat kuyibangin antu awonsu atondina kumukat ni kumusadin!

14. Mutapu ik ukutwisha mazu metu ni yisal yetu kulondin dijin da Yehova? (Tal kand yipich.)

¹⁴ Tukatin kuyikwash antu akwau kwijik anch yom yateshau kal piur pa Nzamb yidap yakin. Shinshikin chilakej ech: Ukwet murund wa piswimp uda muwamp, mwin kupan, ni mwin kulikishin. Dichiku dimwing watesh muntu ukat kulond anch muruney ud mwin chisum ni wakad kuchingejin. Yom ik ukusala? Ukumulondin. Chilik chimwing, anch Satan pamwing ni antu awonsu amulondwila apakish kuyipish katumb ka Yehova kusutin kupalangesh makasu piur pa dijin Dend, tukat kulondin dijin da Yehova kusutin kulejan uyakin piur Pend. (Kus. 34:2; Isay 43:10) Tukat kumekesh anch tukatin kumusadin Yehova nich muchim wetu wawonsu kusutin yom tukata kulond ni kusal.

15. Mutapu ik wataninayamu kambuy Paul kusutin kuswimp yom yijim mu mwom wend? (Filip 3:7, 8)

¹⁵ Tukat kuswimp yom kanang mu mwom wetu mulong wa kumusangaresh Yehova ni kusal yom yivud mu mudimu wend. Chilakej, kambuy Paul watonda kulikap mwaz ujim wadingay nich mu relijon wa in Yuda mulong wa kumulondul Kristu ni kumusadin Yehova. (Gal. 1:14) Mud chibudikin, wikala ni yiyukish mu mwom wend ni wikala kand ni dilau da kuyikel ni Kristu mwiur. Paul kinanap mulong wa mupak wakwatay, niyetu tukez kinanap bwat.​—Tang Filip 3:7, 8.

16. Dilejan ik tudoshidina ku yom yamushikena Julia? (Tal kand yipich.)

¹⁶ Anch twatek mudimu wa Yehova pa ndond ya kusambish mu mwom wetu, tukutwish kwikal ni yiyukish kusambish katat ni mu machuku ma kurutu. Shinshikin yom yamushikena Julia. Kurutu ileja uyakin, padingay changadim, Julia wading mwin kuwang ku egliz. Mwin kuwang umwing ukweta ukaliweny wasambisha kumufumb chakwel ikala mwin kuwang mujim. Pakad kulab Julia, wijikana nakash ni wawanginang ku jindond jijim kushalijan. Padingay ku shikol ya kwilej kuwang, mbay nend wa shikol umwing wasambisha kumulej piur pa Nzamb ni wamuleja anch Nzamb dijin dend ndiy Yehova. Mu chisu chikemp, Julia wasambisha kwilej tupamp tusatu pa rubing. Mu kusut kwa chisu, wakwata mupak wa kusutish chisu ni kusadin usu wend mulong wa kumusadin Yehova pa ndond pa kulondul mudimu wa kuwang. Mupak winou wadingap uswapela. Ulondin anch: “Antu avud angelang anch nakwata mupak wa usup wa kwimik kuwang mulong wa kumusadin Yehova; pakwez nakata kusadin mwom wam wawonsu mulong wa kumusadin Yehova.” Mutapu ik wiyovilay Julia nlel piur pa mupak winou wakwatay kwasut kal mivu 30? Ulondin anch “nikwet chisambu cha mu manang, ni nikwet kashinsh anch Yehova ukuwanyish maswir mam mawonsu mu machuku ma kurutu”​—Kus. 145:16.

DANDAMEN KUMUSADIN YEHOVA

17. Kulond anch tushich kwinsuden kwa mangand minam, kurumburikin ik kud antu atondina kal kumusadin Nzamb ni akad kumusadin?

¹⁷ Tushich kwinsuden kwa mangand minam. Kambuy Paul wafunda anch: “Mu kachisu kakemp, ‘kakemp kamu nakash, ndiy ukat kwez, ukushik swa, wakad kulab.’” (Heb. 10:37) Yom yiney yirumburikin ik? Cha kusambish, kwashal kal chisu chikemp mulong wa antu kutond kumusadin Yehova. (1 Kor. 7:29) Cha kaad, anch twakwatin kal mupak wa kumusadin Yehova, twij anch, ap anch tukurish ni yikokujol, yikwikal kwau ya “mu kachisu kakemp.”

18. Yehova ni Yesu akatin anch tusal yom ik?

¹⁸ Yesu wayikasikesha antu kwikal in kwilej end ni kudandamen kumulondul. (Mat. 16:24) Chawiy anch tumusadidin Yehova kwasut kal mivu yivud, kangal amboku twaziyan. Tufanyidin kusal usu mulong wa kudandamen kushakam kukwatijan ni mupak twakwata wa kumusadin. Chiswapelap kamu, pakwez tukutwish kwikal ni musangar ni yiyukish yivud anch twamusadin Yehova!​—Kus. 35:27.

19. Yom ik wilejidina ku yom yamushikena Gene?

¹⁹ Antu amwing atongining anch ang amusadin Yehova kakutwishap kusanger mwom. Anch ud nsand, ov wiyovil anch ukuburen chom kanang anch wamusadin Yehova? Gene, mukadivar umwing nsand ulondin anch: “Niyovang anch kwikal kaman wa Yehova kukwinkangesh kusanger mwom. Namanang mud ansand napama nau pamwing ading akwet musangar nakash mulong ayangang ku misambu, endang nau ayangadim ni kusengan masengan ma video, pa chisu nading am ku yikumangan ni mu mudimu wa kulejan.” Chitongijok chinech chikala ni usu ik paday Gene? Ulondin anch “nasambisha kusal yom yimwing yiyimp yasalangau ansand akwau, nisangaresha mu chisu kanang. Pakwez nadingap kamu ni musangar wakin. Nasambisha kutongijokin uyakin wa Bibil naduula kwam kwa kwisotin ni nakwata mupak wa kumusadin Yehova nich muchim wam wawonsu. Kudokal kamu pinipa, namana anch Yehova ukat kwakul kamu ku malembil mam mawonsu.”

20. Mupak ik tufanyidina kukwat?

²⁰ Nfund a Kuseng umwing wamuwangina Yehova anch: “Wayuk muntu utondilau kudi ey, ndiy kamu ukakila chakwel ashakam mu dibur diey!” (Kus. 65:5) Tukwatany amboku mupak mud wakwatay Joshua palonday anch: “Am ni chikumbu cham tukumusadil [Yehova].”​—Jos. 24:15.