Kujingunin Chisend cha Kristu Mu Ditenchik dia Nzamb

“PAKUSAMBISH Nzamb watanga diur ni divu,” ni yom yawonsu yatangay yading “yiwamp kamu.” (Dis. 1:1, 31) Yehova wamutanga muntu nich ruchingej ruwamp ra machuku ma kurutu. Pakwez, wintombwij wa mu Eden washadisha mu kachisu kakemp kusu mwikadil wa chisambu wa muchid wa an a antu. Chikalap nchik mwamu, chitongijok cha Yehova piur pa divu ni mulong wa antu chikarumukinap. Nzamb walejana anch kukez kwikal dipandish dia an aziyidila a Adam. Kukez kwikal kuchirish kand kwa difukwil diakin, ni Nzamb ukez kuyishesh antu ayimp pamwing ni yisal yau yawonsu yiyimp. (Dis. 3:15) Yom yikez kwikal kand “yiwamp kamu.” Yehova ukez kusal yom yiney kusutil Mwanend, Yesu Kristu. (1 Yoh. 3:8) Chawiy lel, chidi cha usey anch tujingunin chisend cha Kristu mu ditenchik dia Nzamb.—Mid. 4:12; Fil. 2:9, 11.

CHISEND CHA KRISTU

² Anch twatongin piur pa chisend cha Kristu mu ditenchik dia Nzamb, tukujingunin anch ukwet yisend yikwau yivud. Yesu usadil mudi Mupandish wa antu, mudi mwin Kupesh Mujim, mudi Mutu wa chikumangen cha win Kristu, ni katat udi Mwant wa Want wa Nzamb. Kutongijokin pa yisend yiney kukat kuwejin musangar wetu piur pa ditenchik dia Nzamb ni kukat kukudish rukat retu pantaliken nend Kristu Yesu. Bibil urumburil yisend yiney kushalijan.

³ Padingay Kristu ni kusal mudimu wend panap pansh, chamekana patok anch kuchakwish antu in kuziyil ni Nzamb kukez kuwanyin kusutil Yesu. (Yoh. 14:6) Mulong udi Mupandish wa antu, Yesu wipana amwinend kwikal difut mulong wa antu avud. (Mat. 20:28) Komb Yesu wasala yivud kusutamu kwau ching kwikal chilakej chiwamp cha kusal rusot ra Nzamb. Yesu ndiy usadidinau kudi Yehova mulong wa kuwanyish chitongijok chend piur pa antu. Chidi ching kusutil ndiy kwawiy tukutambwila dilau dia Nzamb. (Mid. 5:31; 2 Kor. 5:18, 19) Rufu ra kwipan ra Yesu ni kuvumbuk kwend yasala anch chikala chiswapela kudi antu aziyidila kutan yiyukish ya chikupu mwishin mwa umutakel wa Want wa mwiur wa Nzamb.

⁴ Mulong udi mwin Kupesh Mujim, Yesu ukutwish “kutwovil riy mulong wa kuziy kwetu” ni kuchakwish mulong wa yitil ya in kwilejend ipanina kal adia panap pa divu. Kambuy Paul warumburila anch: “Etu kitukwetap Mwin Kupesh mujim wakad kutwovil riy mulong wa kuziy kwetu. Pakwez Mwin Kupesh wetu mujim amwoza mitapu yawonsu mudi mukat kutwozau etu, pakwez ndiy kasalap kwend chitil.” Kupwa kand Paul wayikasikesha antu atekina ritiy rau mudiay Yesu Kristu chakwel ataninamu nakash mu ditenchik dined mulong wa kuchakwish ni Nzamb, ni walonda anch: “Tusejany nich ruchingej ku ditand dia Nzamb, kwawiy kudia ranaken. Kwinikwa kwawiy kukutwovilau riy ni kutwanaken mulong wa kutukwash pa chisu chitukweta kuswir.”—Heb. 4:14-16; 1 Yoh. 2:2.

⁵ Yesu udi kand Mutu wa chikumangen cha win Kristu. Mudi muchadinga ku mutambu wa in kwilejend mu mivu chitot ya kusambish, chawiy chimwing kand ni nlel unou tukwetap kuswir kwa ntakel wa chiuntu. Yesu uletin umutakel kusutil spiritu utumbila ni kusutil atufung awanyidina, akweta chisend cha kupan kuchind kudi ndiy ni kudi Tatukwend wa mwiur piur pa mutapu ukatau kulam amikoku a Nzamb. (Heb. 13:17; 1 Pita 5:2, 3) Pisambidinay mu uprofet piur pa Yesu, Yehova walonda anch: ‘Talany! Namupana kal mudi kaman ku yisak ya michid, mudi ntakel ni kalal ku yisak ya michid.’ (Isay 55:4) Yesu wamekesha uman wa kashinsh wa kuwanyin kwa uprofet winou payilejay in kwilejend anch: ‘Kangal akutazukany anch antakel, mulong Ntakel wen udi umwing, Kristu.’—Mat. 23:10.

⁶ Mulong wa kumekesh chitongijok chiwamp ni rusot rend ra kutukwash, Yesu uyitazukin antu anch: ‘Ezany kudi am, en awonsu uziyinanya mulong wa yisend yikasikena ya mitapu ni mitapu, chad am nikez kukwambulany. Itwikany mpand yam, ilejinany kudi am, chad mwamu ukwiswedishany, mulong am nishimpishin muchim ni kwitudish. Mulong mpand yam yiswakel kwitwik, ni chisend cham chipipel.’ (Mat. 11:28-30) Kusutil ku kutakel milong ya chikumangen cha win Kristu nich kwikepish ni mu mutapu wa kutukasikesh, Yesu Kristu wimekesha amwinend kwikal “kafung muwamp” mu kumwimburij Tatukwend wa mwiur, Yehova Nzamb.—Yoh. 10:11; Isay 40:11.

⁷ Mu mukand wend wa kusambish kudi in Korint, Paul warumburila chisend chikwau cha Yesu Kristu, palonday anch: “Mulong chifanyidin Kristu kuyikel djat ni pakuyipandakenau akankuny awonsu kudi Nzamb ni kuyitek mwishin mwa yidjatil ya Kristu. Pakez kutekau yom yawonsu mwishin mwa kuyikel kwa Kristu, chawiy Mwan amwinend ukez kwitek mwishin mwa Nzamb, ndiy kamu wateka yom yawonsu mwishin mwa Kristu. Chad mwamu Nzamb ukez kutakel yawonsu.” (1 Kor. 15:25, 28) Yesu wading chitang cha kusambish cha Nzamb, ni kurutu eza pa divu, wading ‘mwin kusal midimu wa mushiku’ wa Nzamb. (Jinsw. 8:22-31) Chisu chamutumau Yesu kudi Nzamb pa divu, ndiy wasala rusot ra Nzamb chisu chawonsu. Wajijamana ku yoziu yijim ni wafa ushinshamena kudi Tatukwend. (Yoh. 4:34; 15:10) Mulong Yesu washinshamana kudi Nzamb djat ni ku rufu, Nzamb wamuvumbula mulong wa kuya mwiur ni kumwinkish mbil ya kwikal Mwant wa Want wa mwiur. (Mid. 2:32-36) Mulong udi Mwant, Kristu Yesu ukwet mudimu ujim umwinkishinau kudi Nzamb wa kutakel tutikit ni tutikit twa yitang ya mu spiritu yikweta usu nakash mulong wa kudiosh winyikel wa antu ni kudiosh uyimp wawonsu pa divu. (Jinsw. 2:21, 22; 2 Tes. 1:6-9; Kuj. 19:11-21; 20:1-3) Kupwa Want wa Nzamb wa mwiur utakedinay Kristu wawiy kusu ukeza kuyikel pa divu diawonsu.—Kuj. 11:15.

CHIRUMBURIKINA KUJINGUNIN CHISEND CHEND

⁸ Yesu Kristu, Chilakej chetu, udi uwanyidina. Amwinkisha chisend cha kutubangin. Mulong wa kutaninamu mu kubangin kwa rukat ni kudimukina, tufanyidin kushal ashinshamena kudi Yehova ni kwend pamwing ni dirijek diend diyila kurutu.

⁹ In kwilej a Yesu a mu mivu chitot ya kusambish ajingunina nawamp chisend cha Kristu mu ditenchik dia Nzamb. Amekesha mwamu pa kusal pamwing mu uumwing mwishin mwa ulabu wa Kristu ni aziyila ayinau ku umutakel waletay kusutil spiritu utumbila. (Mid. 15:12-21) Kambuy Paul wisambina piur pa uumwing wa chikumangen cha in Kristu azizidilau many pafunday anch: “Pakwez etu tufanyidin kulond uyakin nich rukat. Tufanyidin kand kukul chakwel tufanakan nend Kristu mu mitapu yawonsu, ndiy udia mudi mutu [. . .] Mwi ndiy yikunku yawonsu ya mujimbu yaurokina yinungin pamwing, chawiy mujimbu wawonsu wikasin pamwing nich yinungin yatenchikau. Chad chid ni chid chifanyidin kusal mudimu wach mudi muchifanyidina, chakwel mujimbu wawonsu ukutwish kukul ni kukasikan mu rukat.”—Efes 4:15, 16.

¹⁰ Chikumangen cha azizidilau many ni “amikoku akwau” chikwet yid kushalijan, mudi mujimbu wa muntu. Anch muntu ni muntu mu chikumangen wovijan nawamp nau antu akwau ni anch antu awonsu asal mu kovijan mu umutakel wa Kristu, kukat kwikal kukul ni kulam rukat ridia “mwoj uwanyidina ukasila yawonsu pamwing.”—Yoh. 10:16; Kol. 3:14; 1 Kor. 12:14-26.

¹¹ Yom yisadikina mu mangand yiwanyishina uprofet wa Bibil yimekeshin patok anch kudiosh kamu mu muvu wa 1914, Yesu Kristu amwinkisha kal ulabu wa Want. Uyikedil katat mukach mwa akankuny end. (Kus. 2:1-12; 110:1, 2) Chom chinech chirumburikin ik kudi antu ashicha pa divu? Piswimp ap Yesu ukumekesh chisend chend cha kwikal Mwant wa ant ni Nsalej wa ansalejau chisu chikuletay dirumburish dia Nzamb kudi akankuny end. (Kuj. 11:15; 12:10; 19:16) Mwamu kushilamu kwa Yehova kwalonday mulong wa dipandish kwinsambishil kwa wintombwij wa muntu kukuwanyin katat kamu ak kudi antu adia ku chikas cha katatuku cha Kristu ni akweta dilau diend. (Rom 16:20) Musangar mud ik tukweta pa kujingunin chisend cha Kristu mu ditenchik dia Nzamb! Tushalany mu uumwing mulong wa kuwanyish mudimu usadikina pa mangand mawonsu mu umutakel wa Kristu mu machuku minam mansudiel.