Yehova Wamutond kal Yoshua

Kupwa kwa kutakel muchid wa Isarel mu mivu yivud, Moses wading piswimp ni kufa. Yehova wamuleja anch: ‘Ukuyitwalap kand an a Isarel mwi Ngand ya Kushilamu. Pakwez nikusal anch uman ngand.’ Moses wamuleja Yehova anch atond ntakel mwindjing chakwel alama muchid wa Isarel. Yehova wamuleja anch: ‘Yang kud Yoshua, ni muleja anch namutond kal kwikal ntakel.’

Moses wayileja in Isarel anch ukimbin kufa ni anch Yehova wamutondin Yoshua mulong wa kuyitakel kushik ni pakushikau mwi Ngand ya Kushilamu. Moses wamuleja Yoshua anch: ‘Kangal wov wom. Yehova ukukukwash.’ Kupwa kwa yom yiney, Moses waya piur pa Mukandu wa Nebo, pinipa Yehova wamuleja kutal ngand Yashilayamu kud Aburaham, Izak, ni Yakob. Moses wafa ni mivu 120.

Yehova wamuleja Yoshua anch: ‘Auk Wit wa Yordan, ni yang mu Kanan. Nikukukwash mud namukwasha Moses. Ikal ni kashinsh anch utangining Yijil yam dichuku dawonsu. Kangal wov wom. Ikal muntu utakamena. Yang ni sal yom nakulejina kusal.’

Yoshua watuma in kutentish aad mu musumb wa Yeriko. Mu rusang rilondwilaku er, tukwilej yom yivud piur pa yom yasadika mu Yeriko. Pachirikau, alejana anch chinech chawiy chisu chiwamp cha kuya mu Kanan. Mukwacha, Yoshua wayileja in Isarel anch irijek. Wayiteka in kupesh ading asendina mushet wa manswik kurutu chakwel auka Wit wa Yordan. Wit wading wizulang kal. Pakwez pandjikau in kupesh mend mu mem, mem mimana, ni mauma! In kupesh endina pakach ni pakach pa wit ni imana pinipa kushik ni pauka muchid wawonsu. Utongin anch chilay chinech chayivurisha yom yasalay Yehova pa Karung Musunz?

Kupwa kwa mivu yiney yawonsu, in Isarel ashika mwi Ngand ya Kushilamu. Atunga yikumbu ni misumb. Adima yir ya nviny, ni mitond yikwau. Yading ngand yizwila mayel ni woch.