DILEJAN 54
Yehova Washimpisha Muchim Wend Mulong wa Yona
Mu musumb wa Asiriya wa Niniv mwading antu ayimp nakash. Yehova wamuleja muprofet wend Yona kuya ku Niniv mulong wa kuyibabesh antu chakwel aswimpa mashakamin mau. Pakwez, Yona kitiyap kuya. Waya ni waat ujim utazukinau anch bato wading uyila ku Tarsis ni ku ditung.
Pading payilau pa karung, rinkind mukash watuta ni in kwendish waat ova wom nakash. Asambisha kulembil kud anzamb au anch: ‘Mulong wak yom yiney yatushiken kal?’ Kupwa, Yona wayileja anch: ‘Yama nikweta mulong. Nichinin kusal yom yanlejay Yehova kusal. Ndjibwilany kwam mu karung chakwel rinkind aduta.’ In kwendish waat kakatap kumudjibul Yona mu karung, pakwez amwinend wadandamena kuyilej anch amudjibula. Pamudjibulau mu karung, pakad kulab rinkind waduta.
Yona watonga anch ukufa. Padingay ni kushikumuk kwinshin kwa karung, wamulembila Yehova. Kupwa Yehova watuma insh mujim nakash. Wamuminya Yona pakwez, kamujipap. Padingay mwivum mwa insh winou Yona walembila anch: ‘Nashilamu kal anch nikudandamen kukuziyil yisu yawonsu.’ Yehova wamulama Yona mwivum mwa insh mu machuku masatu kupwa insh winou wamurika Yona ku chikum cha karung.
Pamupandishau Yona kud Yehova, ov, Yona wafanyina kand kulik kuya ku Niniv? Bwat. Yehova wamuleja kand Yona kuya ku Niniv. Pa chisu chinicha Yona waziyina. Waya ni wayileja antu ayimp anch: ‘Mu machuku 40, Niniv ukusheshik.’ Pakwez, kwading chom chimwing chisangareshina—In Niniv atesha ni akarumuka. Mwant wa mu Niniv wayileja antu anch: ‘Mwitany Nzamb ni likany yitil yen. Pamwing ap kakutusheshap.’ Pamanay Yehova anch antu a mu Niniv akarumuk kal, kayisheshap.
Yona wajimana nakash mulong musumb winou kausheshap. Tong bil: Yehova washimpisha muchim ni wamwovila Yona riy pakwez, Yona kayovilap antu a ku Niniv riy. Kupwa waya pol pa musumb ni washakama mwinshin mwa chifukis mulong wa kwot urel. Palipa chifukis chinech Yona wajimana nakash. Chawiy Yehova wamuleja anch: ‘Ey ukatin nakash chifukis chinech kusutamu in Niniv. Nayovidin riy ni nikatin apanda.’ Chom ik chading cha usey? Antu a mu Niniv ading akwet usey kusutamu chifukis chin chawonsu.
“Yehova . . . ukushimpishidinany muchim mulong kakatinap anch muntu ap umwing asheshik, pakwez ukatin anch awonsu ashiken ku kukarumuk.”—2 Pita 3:9