Daniel Ud mu Dibuku da Antambu

Mwant mukwau wa mu Babilon wading Darius wa ku Mediy. Darius wamana anch Daniel wading muntu umwing wa pakampwil. Chawiy, chamwinkishay Daniel chisend cha usey nakash mwi ngand yend. Antu akwau amwovila Daniel mukau ni akimba mutapu wa kuyipish mashakamin mend. Ading ij anch Daniel wamulembilang Yehova tupamp tusatu pa dichuku, chawiy chamulejau mwant Darius anch: ‘A! Mwant chifanyidin kwikal chijil cha kukwifukwil chikulimishau antu awonsu. Muntu mwawonsu ukubwambwila ku chijil chey afanyidin kumudjibwil mu dibuku da antambu.’ Darius witiya chitongijok chinech ni wafunda mulong wa kumekesh anch wachitiyij kal.

Pateshay kamu Daniel chijil chinech chisu, waya mu chikumbu chend. Wasa manungin kurutu kwa dididish dend dading dawash ni wasambisha kumulembil Yehova. Akankuny end amutana mu chikumbu ukat kulembil. Aya mau kud mwant Darius ni amuleja anch: ‘Daniel ukubwambwidin. Ukat kumulembil Nzamb wend tupamp tusatu pa dichuku.’ Pakwez, Darius wading umukatin nakash Daniel ni kakatap anch amujipa. Mwant wakimba mitapu yawonsu mulong wa kumupandish Daniel. Pakwez, chading chikasikena kud mwant kuswimp chijil chitiyay. Mwant wapana mbil ya kumudjibwil Daniel mu dibuku da antambu.

Uchuku winiwa Darius winana nakash ni kalalap mulong wa Daniel. Pikwacha, mwant waya mau ku dibuku da antambu ni wamutazuk Daniel anch: ‘Ov, Nzamb wey wakupandishang kal?’

Darius watesha dizu da Daniel! Daniel wamuleja Darius anch: ‘Mwangel wa Yehova wafungang tun twa antambu. Kandangap.’ Darius wasangara nakash! Walejana chakwel amudosha Daniel mu dibuku mwadingay. Daniel kadingap ni yipusupusu ya yitat. Kupwa mwant wapana mbil anch: ‘Yidjibulany akankuny a Daniel mu dibuku da antambu.’ Payidjibulau antu inay, antambu ayida pakad kulab.

Darius wayitumina antu awonsu chijil chilondina anch: ‘Muntu mwawonsu ufanyidin kumwov Nzamb wa Daniel wom. Mulong wamupandishin Daniel mu dibuku da antambu.’

Ukat kumulembil Yehova dichuku dawonsu, mud mwasalangay Daniel?