Spiritu Utumbila Wamushirikin Kal Korney

Mu Sezarey, mwading mukurump wa amasalay wa in Rom dijin dend Korney. Ap anch kadingap mwin Yuda, pakwez in Yuda amulimishang. Wayikwashang atuzwendj ni antu ading mu maswir. Korney wading witiyijin muday Yehova ni wamulembilang chisu chawonsu. Dichuku dimwing mwangel wamubudikina Korney ni wamuleja anch: ‘Nzamb uteshining malembil mey. Katatak tum antu ku musumb wa Yopa, kwinikwa kwawiy kushichay Pita ni muleja chakwel eza.’ Kapamp kamwing, Korney watuma antu asatu ku Yopa pading a kilometre piswimp 30 kwinkaj.

Chisu chawiy chinicha mu Yopa, Pita wamana chishimushimu. Wamana annam ading ayijidikau kal in Yuda kuda, ni wova dizu damulej anch dang. Pita walika ni walonda anch: ‘Kand kal nidangangap annam ijondina mu mwom wam.’ Dizu damuleja anch: ‘Kangal kutazuk annam inay anch ijondin, mulong Nzamb wayishitwishin kal.’ Amuleja kand Pita anch: ‘Antu asatu ad ku chis chey. Yang nau.’ Pita waya ku chis ni wayipula antu mulong wak amukimbin. Akula anch: ‘Korney, mukurump wa amasalay a in Rom ndiy watutumang. Ukutwish kuya kwol kwend ku Sezarey.’ Pita wayileja antu inay kulal kwol kwend mud angendj. Mukwacha, waya nau ku Sezarey pamwing nau akadivar amwing adokala ku Yopa.

Pamumanau Pita kud Korney, wamwasina manungin. Pakwez Pita wamwela anch: ‘Tumbuk! Nid muntu mud ey. Nzamb wanlejang kwez kwol kwey, ap anch in Yuda kakuyangap ku yikumbu ya antu a Michid yikwau. Katat nleja amboku mulong wak wantazukang.’

Korney wamuleja Pita anch: ‘Kwasut kal machuku manying, nading nimulembil Nzamb, chad mwangel wanlejang anch nikutazuk. Nilemb amboku tufundisha dizu da Yehova.’ Pita walonda anch: ‘Nijik kal anch Nzamb kakwetap kasolikany. Nzamb ukat kwitiy muntu mwawonsu ukatina kumwifukwil.’ Pita wayifundisha yom yivud piur pa Yesu. Spiritu utumbila wamushirikina Korney ni antu adingay nend, ni ayibatisha awonsu.