Mud Pita, Ukutwish Niyey Kushal Ushinshamena

1. Mutapu ik wiyovay Pita pamanay chilay cha Yesu?

PITA wasutisha uchuku wakabuj mu kuta ansh pakwez kakwatap insh ap kusu umwing. Chishimwokishena, Yesu wamuleja anch: “Twal waat ku mem makurukina, chad ey nau arund ney, djibulany mand men mu mem chakwel ukwatany ansh.” (Luka 5:4) Pita widjidjeka anch kakukwatap kwend insh ap umwing, pakwez wasala mud mwamulejau kud Yesu. Mand madjibulau masambisha kwapok mulong wa kuvul kwa ansh afap. Mulong amana chilay chasalay Yesu Pita nau antu adingay nend “ashimwoka nakash.” Pita walonda anch: “Sejany mwan kulemp, Nsalejam mulong am nidi mwin yitil.” (Luka 5:6-9) Pita wimana pamwing ap mud muntu wakad kuwanyin ni kafanyidinap kwibomb pamwing ni Yesu.

2. Mulong wak chid cha usey kud etu kushinshikin chilakej cha Pita?

² Pita wading uyingin kwend nich—wading “mwin yitil.” Mifund yilejen anch pamwing ap walondang ni kusal yom yamanangay anch yiyipin mu kusut kwa chisu. Niyey ukat kwiyovang mwamu yisu yimwing mud Pita? Ov, ukat kurish ni chisal chimwing mu wuntu wey pakwez chidandamedin? Anch mwawiy, chilakej cha Pita chikutwish kukukasikesh. Mutapu ik? Shinshikin chom ech: Yehova wafanyina kwend kwilik kufundikish kurumbok kwa Pita mu Bibil. Pakwez afunda yom yiney mulong wa kutufundish nich. (2 Tim. 3:16, 17) Chisu twilejina yom yamushikena Pita, chikutukwash kwijik anch Yehova kakatap kuchingej anch tusala yom mud antu awanyidina. Ukatin anch tujijaman—mulong wa kudandamen—chikalap nchik kuziy kwetu.

3. Mulong wak tufanyidin kujijaman?

³ Mulong wak tufanyidin kujijaman? Mulong anch twadandamen kusal mwamu tukat kuswimp. Tushinshikin chilakej ech: Mwin kubul mizik ukutwish kusal mivu yivud mulong wa kwiyijidish nich chom cha kubul nich mizik. Pa chisu chinech ukutwish kwikasikasol nakash, pakwez anch wadandamen kwiyijidish ukutwish kubul nawamp. Ap anch wikal mwin kubul mizik ukweta ukaliweny, ukutwish yisu yimwing kubul nayimp. Pakwez kakulikap kubul. Ukudandamen kusal mudimu wend. Chilik chimwing, ap kupwa kwa kwiyov anch twatwishin kupandakan kuziy kumwing, tukutwish kand twaziy. Pakwez tufanyidin kudandamen kusal usu mulong wa kuwanyish rutong. Etu awonsu tukat kulond ap kusal yom yikata kutunenganesh mu kusut kwa chisu; pakwez, anch tuziyinap, Yehova ukutukwash kudandamen kuya kurutu. (1 Pita 5:10) El amboku tushinshikinany chilakej cha kujijaman cha Pita. Riy ramwovilau kud Yesu chikalap nchik kurumbuk kwend rikutwish kutukwash kudandamen kumusadin Yehova.

PITA WARISHA NI WATAMBULA YIYUKISH

4. Mud mulejenau mu Luka 5:5-10, yom ik yalonday Pita piur pa amwinend, pakwez mutapu ik wamwinkishau kashinsh kud Yesu?

⁴ Mifund yilejenap mulong wak Pita amwinend walonda anch wading “mwin yitil” ap yitil ik yading yitongidinay chisu chalonday mazu minam. (Tang Luka 5:5-10.) Pakwez warumboka nakash. Yesu wading wij anch pita wading wovil wom, pamwing ap mulong Pita wading wiyovil anch kadingap kwend muntu muwamp. Pakwez Yesu wading wij kand anch Pita ukutwish kushal ushinshamena. Chawiy nich rukat Yesu wamuleja Pita anch “Kangal wov kwey wom.” Yesu wading umuchingejidin Pita ni chinech chaswimpa mwom wend. Kupwa Pita ni mwan amakwend Andre alikap mudimu wau wa kutang ansh ni ikala in kwilej a Yesu, ni Yehova wayiyukisha nakash.—Marko 1:16-18.

5. Mutapu ik wamuyukishau Pita mulong wadandamena kumulondul Yesu?

⁵ Pita wataninamu nakash mulong wading mwin kwilej wa Kristu. Wamana mutapu wokangay Yesu ayej, kudiosh ayilembil ni mutapu wavumbulay kand afu.b (Mat. 8:14-17; Mar. 5:37, 41, 42) Pita wamumana Yesu mu chilay mud Mwant wa Want wa Nzamb wa mu machuku ma kurutu. (Mar. 9:1-8; 2 Pita 1:16-18) Chakin kamu, Pita wamana yom yivud, pakwez kelap kuyiman anch kikalap mwin kwilej wa Yesu. Inge wova musangar nakash mulong watwisha kupandakan yitongijok yend yiyimp ni kuman yiyukish yiney yawonsu!

6. Ov, Pita wapandakana kuziy kwend kapamp kamwing? Rumburil.

⁶ Chikalap nchik yom yawonsu yamanay ni yateshay, Pita wadandamena kurish ni kuziy kwend. El tushinshikinanyaku yilakej yikemp. Parumburilay Yesu mutapu ukumanay mar ni kufa mulong wa kuwanyish uprofet wa Bibil, Pita wamupupa. (Mar. 8:31-33) Tupamp tuvud Pita nau atwimbuy akwau atendang mulong wa kwijik nany wadinga mukurump pakach pau. (Mar. 9:33, 34) Chisu chamukwatau Yesu, Pita wakatula ditu dia ikundj umwing. (Yoh. 18:10) Pa uchuku winawa, Pita wova wom ni wamutuna Yesu tupamp tusatu ni kulond anch kamwijap kwend. (Mar. 14:66-72) Chinech chamushikija Pita ku kudil ni kushikok nakash.​—Mat. 26:75.

7. Kupwa kwa Yesu kuvumbuk, chisend ik chamwinkishay Pita?

⁷ Yesu kamulikap kambuy wend wading uziyina. Kupwa kwa Yesu kuvumbuk, wamekesha anch umukatin Pita. Yesu wamwinkisha Pita chisend cha kudish amikoku end. (Yoh. 21:15-17) Pita witiyina kuwanyish chisend chinech. Pa dichuku dia Pentekot wading ku Yerusalem ni wading pakach pa antu akusambish azizilau many ku spiritu utumbila.

8. Kurumbuk ik kukash kwasalay Pita ku Antiosh?

⁸ Ap kupwa kwa kwikal mwin Kristu uzizidilau many, Pita wadandamena kurish ni kuziy kwend. Mu 36 C.C., Nzamb wamutuma Pita kwa Korney muntu wading wakad kwikal mwin Yuda. Ni kupwa, Nzamb wamutonda Korney kwikal pakach pa antu azizidilau many, chinech chamekesha patok anch “Nzamb kakwetap kasolikany” ni antu akad kwikal in Yuda akutwish kwandam mu chikumangen cha win Kristu. (Mid. 10:34, 44, 45) Kupwa Pita wasambisha kadia pamwing nau antu a michid, chom chading chakad kusalangayap kal. (Gal. 2:12) Pakwez, in Kristu amwing in Yuda asambisha kulond anch in Yuda nau Akamichid kafanyidinap kudia pamwing. Chawiy pashikau in Yuda inay ku Antiosh, Pita walika kudia kand nau akadivar nend ading akad kwikal in Yuda, pamwing ap mulong wading wovil wom wa kuyijimesh in Kristu ading in Yuda. Pamanay kambuy Paul yom yading yisadinay Pita wamupupa pakach pa in Kristu akwau. (Gal. 2:13, 14) Chikalap nchik kurumbuk kwend, Pita kaziyap. Yom ik yamukwasha?

YOM IK YAMUKWASHA PITA KUDANDAMEN?

9. Yohan 6:68, 69 umekeshin mutapu ik anch Pita wading muntu ushinshamena?

⁹ Pita wading muntu ushinshamena; kalikap chom ap chimwing chimukangesha kumulondul Yesu. Chilakej Dichuku dimwing, Yesu walonda yom yalikau kutesh in kwilej end awonsu, pakwez Pita wamekesha anch wading muntu ushinshamena. (Tang Yohan 6:68, 69.) Pa ndond pa kukimb kutesh nawamp mazu mend, in kwilej avud alikap kumulondul Yesu. Pakwez Pita kasalap mwamu. Wading wij anch ching kusu Yesu ndiy wading “ukweta mazu makata kulet mwom wa chikupu.”

10. Mutapu ik wamekeshay Yesu anch wading umuchingejidin Pita? (Tal kand chipich.)

¹⁰ Yesu kamulikap Pita. Uchuku wa nsudien wa mwom wend pa divu, Yesu wading wij anch Pita pamwing nau atwimbuy akwau akumuchin. Ap mwamu, Yesu wading ukwet kashinsh anch Pita ukuchirik ni ukushal ushinshamena. (Luka 22:31, 32) Yesu wading wij anch “Muchim wa muntu usotil kusal nawamp, pakwez ndiy kakwetap usu.” (Mar. 14:38) Chawiy, ap anch Pita wamutuna, Yesu kamulikap kambuy wend. Kupwa kwa kuvumbuk, Yesu wamubudikina Pita padingay amwinend. (Mar. 16:7; Luka 24:34; 1 Kor. 15:5) Tongin mutapu chafanyina kumukasikesh Pita wading wovila ushon nakash mulong wa yom yasalay!

11. Mutapu ik Yesu wamwinkishay Pita kashinsh anch Yehova ukumukwash?

¹¹ Yesu wamwinkisha Pita kashinsh anch Yehova ukumuwanyishin maswir mend. Pavumbukay Yesu, wamukwasha Pita nau in kwilej akwau kukwat ansh avud mu chilay. (Yoh. 21:4-6) Chakin kamu chilay chinech chamwinkisha Pita kashinsh anch Yehova ukumuwanyishin maswir mend. Pamwingap Pita wavurika mazu ma Yesu malondina anch Yehova ukuwanyish maswir ma antu akata ‘kudandamen kukimb bil Want.’ (Mat. 6:33) Yom yiney yawonsu yamukwasha Pita kutek mudimu wa kulejan pa ndond ya kusambish kulik mudimu wa kutang ansh. Walejana nich kutakaman pa dichuku dia Pentekot wa 33 C.C., chinech chayikwasha antu avud kwitiy rusangu ruwamp. (Mid. 2:14, 37-41) Kupwa wayikwasha in Samaria ni antu akad kwikal in Yuda kwilej piur pa Yesu ni kwikal in kwilejend. (Mid 8:14-17; 10:44-48) Yehova wamusadina Pita mu mutapu ushimokishena nakash mulong wa kuyikwash antu a michid kwandam mu chikumangen cha win Kristu.

MALEJAN IK TWILEJIDINAKU?

12. Mutapu ik ukutwisha chilakej cha Pita kutukwash anch chom kanang chituziyishina chalab?

¹² Yehova ukutwish kutukwash kujijaman. Chiswampelingap kamu kusal mwamu chisu chawonsu pakampwil anch turishin ni chom kanang chituziyishina ni chalabina kal. Pamwing ap, chikokujol turishina nich chikutwish kumekan mud chikasiken nakash kusutamu ni charishay nich Pita. Pakwez Yehova ukutwish kutwinkish usu tuswirikedina mulong wa kujijaman. (Kus. 94:17-19) Chilakej mukadivar umwing wasala utun mu mivu yivud kurutu kwa kwijik uyakin. Wakwata mupak wa kuswimp mwom wend ni kushakam kukwatijan ni yom yilondinay Bibil. Pakwez yisu yimwing, warishang ni maku mayimp. Yom ik yamukwasha kujijaman? Urumbul anch: “Yehova ukat kutukasikesh.” Uwejidinaku anch: “Kusutil ukwash wa spiritu wa Yehova nileja anch . . . , chiswapel kwikal ni mashakamin mamusangareshina Yehova . . . Yehova ukatin kamu kwinsadin, chikalap nchik kurumbok kwam udandamedin kwinkasikesh.”

13. Mutapu ik tukutwisha kwimburij chilakej cha Pita mud mulejenau mu Midimu 4:13, 29, 31? (Tal kand chipich.)

¹³ Mud mutapu twamana kal, Pita warumboka nakash mulong wa wom wa antu. Pakwez kumulembil Yehova, kwamukwasha kwikal muntu utakamena. (Tang Midimu 4:13, 29, 31.) Niyetu tukutwish kupandakan wom wetu. Shinshikin yom yamushikena Horst, mukadivar umwing nsand wading ushicha mu Alemany pa chisu cha njit ja kaad ja pa mangand mawonsu. Pa chisu chinicha antu asadinang moy wa pakampwil ulondina “Heil Hitler!” Ap anch nsand winou wading wij anch chiyipin kusadin moy winou, yisu yivud ni ndiy wausadinang mulong wa wom wa ansand a shikol ni alej end. Pa ndond pa kumuswejen, anvaj a Horst alembila nend pamwing mulong wa kumwit Yehova chakwel amukwasha kwikal utakamena. Kusutil ukwash wa anvaj end ni kumuchingejin Yehova, Horst wikala ni usu ni watwisha kwinan dang. Kupwa walonda anch: “Yehova kandikal andjibulangap.”c

14. Mutapu ik ukutwishau atufung abangindina amikoku kuyinkish antu aziyina kashinsh?

¹⁴ Yehova ni Yesu kakutulikap bwat. Kupwa kwa Pita kumutun Kristu, wafanyina kukwat mupak wa usey nakash mu mwom wend. Ov, wafanyina kudandamen kwikal mwin kwilej wa Kristu ap kulikap? Yesu wamulembila Yehova chakwel ritiy ra Pita kangal raziy. Yesu wamulejamu Pita piur pa malembil minam ni wamekesha anch wading ni kashinsh anch Pita wafanyina kwikal ni mutapu wa kuyikasikesh akadivar nend. (Luka 22:31, 32) Patongijokinangay Pita piur pa mazu minam ma Yesu wikala nich kashinsh! Anch tukimbin kukwat mupak wa usey mu mwom wetu, Yehova ukutwish kuyisadin atufung akata kutubangin mulong kutwinkish kashinsh tuswirikedina mulong wa kushal ashinshamena. (Efes 4:8, 11) Paul udia mukurump pasut kal mivu yivud ukat kwikasikesh kusal mwamu. Ukat kuyipol antu aziyina yom yayibachika kwitiy uyakin kapamp kakusambish. Kupwa ukat kuyinkish kashinsh anch mulong wa rukat rishinshamena ra Yehova kakuyilikap ayinau. Kwinsudien ulondin anch, “Nashikedin kuman antu avud aziyina atwishina kujijaman kusutil ukwash wa Yehova.”

15. Chilakej cha Pita ni Horst chimekeshin mutapu ik anch yom yilondinay Mateu 6:33 yid yakin?

¹⁵ Mud mwawanyishay Yehova maswir ma ku mujimbu ma Pita ni ma atwimbuy akwau, Yehova ukutuwanyishin niyetu maswir anch twatek mijikit ya mu spiritu pa ndond ya kusambish mu mom wetu. (Mat. 6:33) Kupwa kwa Njit ja Kaad ja pa Mangand, Horst twisambinang kwiur oku, wasambisha mudimu wa uchibol. Pakwez wading kazwazu nakash, ni widjidjekang anch ukutwish kuwanyish maswir mend mulong wa kudandamen mu mudimu wa chisu chawonsu. Yom ik yasalay? Wakwata mupak wa kumupak Yehova mulong wa kuman anch ukumuwanyishin maswir mend. Chawiy wasutisha rubing rakabuj mu mudimu wa kulejan payendinau kud kalam wa munyingumuku. Kupwa kwa rubing ra pakampwil, washimwoka nakash pamwinkishau nfalang kud kalam wa munyingumuku, pakwez kamulejap Horst muntu wamwinkishaj. Jading kamu nfalang jiwanyidina jafanyina kumukwash kusal mudimu wa uchibol mu angond avud. Chipan chinech chamwinkisha Horst kashinsh anch Yehova ukumukwash kuwanyish maswir mend. Wasadina mwom wend wawonsu mu kutek yisakin ya Want pa ndond ya kusambish.​—Mal. 3:10.

16. Mulong wak tufanyidin kuta matu nakash ku chilakej cha Pita ni ku yom yafunday?

¹⁶ Pita wafanyina kusangar nakash mulong Yesu kamulikap, mud mwasotay amwinend chisu chimwing! Kristu wadandamena kumufumb Pita chakwel ikala ushinshamena ni kushal chilakej chiwamp kud in Kristu awonsu. Rusangu riner ritufundishin malejan mavud tukutwisha kwilejinaku. Pita wafunda mikand yaad yatumay ku yikumangen ya mu mivu chitot ya kusambish, ni mikand yiney yid mu Bibil. Mutu wa mulong wambakedinap ukwisambin yom yimwing ya usey yidia mu mikand yiney ni tukuman mutapu tukutwisha kuyisadin nlel unou.