Mwimburija Yehova ni Yesu mu Mutapu wey wa Kutong

1-2. Mutapu ik tufanyidina kumukat Yehova, ni mutapu ik wovikeshay Yesu patok chitongijok chinech?

“CHIFANYIDIN kumukat [Yehova] Nzamb wey nich muchim wey wawonsu, nich mupim wey wawonsu, nich usu wey wawonsu, nich kand manangu mey mawonsu.” (Luka 10:27) Yesu wovikesha patok anch chinech chading chijil cha usey nakash mu Chijil cha Moses. Mukand umekeshin anch tufanyidin kumukat Yehova nich muchim, charumburik anch nich rusot, yovil, ni manang metu. Kuwejinaku kand kwipan nich mupim wetu wawonsu, ni usu wetu. Pakwez tufanyidin kand kumukat Yehova nich manang, chinech chirumburikin mutapu wetu wa kutong pa milong kushalijan. Chakin, tukutwishap kamu kutesh nawamp mutapu wawonsu wa kutong wa Yehova. Pakwez tukutwish kutesh chitongijok cha Nzamb kusutin kwilej “chitongijok cha Kristu”, mulong ndiy uda chilakej chiwanyidina cha mutapu wa kutong wa Yehova.​—1 Kor. 2:16.

² Yesu wamukata Yehova nich manang mend mawonsu. Wading wij rusot ra Nzamb piur pend, ni wakwata mupak wa kusal yom kukwatijan ni rusot riner, ap anch kusutin kusal mwamu wafanyina kuman mar mulong wa yom yitentamina. Mu kudandamen kusal rusot ra Tatukwend, Yesu kitiyap anch chom ap chimwing chimukangesha kuwanyish mupak winou.

3. Yom ik yilejinay Pita kud Yesu, ni Pita wayikasikesha ambay nend in Kristu kusal yom ik? (1 Pita 4:1)

³ Pita nau atwimbuy akwau ading ni dilau da kusutish chisu pamwing ni Yesu ni kuman mutapu watongangay. Pafunday Pita mukand wend wa kusambish, wayikasikesha in Kristu kwikal ni chitongijok cha mutapu umwing ni chadingay nich Kristu. (Tang 1 Pita 4:1.) Mu mazu ma Grek, pafunday Pita anch: “Wikasikeshany kwikal nich,” wasadina mazu mamekeshina amasalay adjadina yom ya njit. Chawiy anch in Kristu imburij chitongijok cha Yesu, akwikal ni yom ya njit yikash yikuyikwasha kurish ni maku ma kusal yom yiyimp ni kurish ni mangand minam mayikedinau kud Satan.​—2 Kor. 10:3-5; Efes 6:12.

4. Mutu wa mulong winou ukutukwash mutapu ik kusadin chiyul cha Pita?

⁴ Tukushinshikin mutapu wa kutong wa Yesu ni mutapu tukutwisha kumwimburij. Tukuman mutapu tukutwisha (1) kwimburij mutapu wa kutong wa Yehova mulong wa kwovijan mu yitongijok umwing ni mukwau, (2) kwikal ikepishina, ni (3) kwikal ni manang mawamp kusutin kumuchingejin ni kumulembil Yehova.

IMBURIJ MUTAPU WA KUTONG WA YEHOVA

5. Mulong wak chisu chimwing Pita kamekeshap chitongijok cha Yehova?

⁵ Shinshikin chisu chalikay Pita kwimburij mutapu wa kutong wa Yehova. Yesu wayileja in kwilej end anch ufanyidin kuya ku Yerusalem, ni kwinikwa akumupan kud amakurump a chirelijon, kumumesh mar, ni kumujip. (Mat. 16:21) Pita wading wij anch Yesu ndiy wading Mesiya washilawamu ni wafanyina kuyipandish antu a Nzamb. Chawiy, chading chimukasikedin Pita kwitiy anch Yehova alika chakwel amujipa Yesu. (Mat. 16:16) Pita wamupwitina Yesu kuns ni wamwel anch: “Iyovila riy Nsalejam, yom yiney yikukushikenap bwat.” (Mat. 16:22) Yesu ni Pita katanijanap pa mulong winou, mulong Pita kadingap ni chitongijok cha Yehova.

6. Mutapu ik wamekeshay Yesu anch mutapu wend wa kutong wading ukwatijadin ni wa Yehova?

⁶ Mulong Yesu wading utongin kamu mud tatukwend uda mwiur, chawiy wamwakula Pita anch: “Sut kwinyim kwam, Satan! Ud diyal da kwimpwakesh, mulong yitongijok yey yidap ya Nzamb, pakwez yid ya antu.” (Mat. 16:23) Yesu wading wij anch, mulong wa kusal rusot ra Yehova, chading chimufanyidin kuman mar ni kufa. Chawiy Yesu walika chiyul cha Pita ap anch Pita wading upakishin kumukwash. Mulong wa chom chinech, Pita wileja anch wading ufanyidin kutong mud mutonginingay Yehova. Dined did dilejan da usey nakash tufanyidina niyetu kwilej.

7. Mutapu ik wamekeshay Pita anch wasambisha kutong mud mutonginingay Yehova? (Tal chipich cha pa chibur.)

⁷ Mu kusut kwa machuku, Pita wikasikesha kutong mud mutonginingay Yehova. Pichawanyina chirung cha kuyinkish antu ading akad kwikal in Yuda mutapu wa kwikal antu a Nzamb, amwinka Pita chisend cha kuya kumulej Korney, muntu wa muchid ukwau, rusang ruwamp. Korney ndiy wading muntu wa kusambish kumwifukwil Nzamb mu chisak chinech chisu. Mulong in Yuda kibombangap nau antu a michid yikwau, chawiy Pita wading ukwet kamu kuswir kwa ukwash mulong wa kuwanyish chisend chinech. Pajinguninay Pita chitongijok cha Nzamb piur pa antu a michid yikwau, waswimpa kamu mutapu wend wa kuman yom. Chawiy, pamutazukau kud Korney, Pita waya ‘pakad kwidjidjek’. (Mid. 10:28, 29) Wamufundisha Korney nau antu ading ku chikumbu chend kupwa ayibatisha.​—Mid. 10:21-23, 34, 35, 44-48.

8. Mutapu ik tukutwisha kumekesh anch tutongin mud mutonginingay Yehova? (1 Pita 3:8)

⁸ Mu kusut kwa mivu, Pita wayikasikesha ambay nend in Kristu kwikal ni “chitongijok chimwing.” (Tang 1 Pita 3:8.) Mulong tud atushalapol a Yehova, niyetu tukwikal ni chitongijok chimwing anch twimburij mutapu utonginingay Yehova mud mutufundishinay mu Bibil. Chilakej, Yesu wayikasikesha in kwilej end kutek Want wa Nzamb pa ndond ya kusambish mu mwom wau. (Mat. 6:33) Mulong wa kusadin chiyul chinech, mwin kulejan umwing mu chikumangen chey ukutwish kukwat mupak wa kusambish mudimu wa uchibol ap kand mudimu ukwau wa chisu chawonsu. Pa ndond pa kumulej anch itongina amwinend, tufanyidin kumukasikesh mulong wa mupak winou uwamp ni kukimb mutapu wa kumukwash.

IKAL WIKEPISHINA

9-10. Mutapu ik wamekeshay Yesu anch ud kamu mwin kwikepish nakash?

⁹ Uchuku kurutu kwa kufa, Yesu wamufundisha Pita nau in kwilej akwau dilejan da usey piur pa kwikepish. Cha kusambish, wading wamutumang kal Pita ni Yohan kutenchik yakuda yafanyinay kuda nau pamwing kurutu afa. Chom chafanyinau kand pamwingap kusal, afanyina kwikal ni kashinsh anch kud dilong da mem ni masun ma kwikuson nich ku mend kurutu kwa kuda. Ov, nany wafanyina kuwanyish chisend chinech cha kwikepish kurutu kwa kuda?

¹⁰ Yesu kidjidjekap kuwanyish chisend chinech chimekeshina kwikepish kwend. In kwilej ashimwoka pamumanau Yesu ukat kusal yom yafanyinay kusal kashalapol. Wadjola kabwik wend, wikas disun da kukusul nich mem mwi mbund, watubwila mem pa dilong, wasambish kowish yidjatil ya in kwilej end. (Yoh. 13:4, 5) Chamwita chisu pa kowish yidjatil ya in kwilej end 12, kuwejaku ni Yudas, muntu wafanyina kumupungan. Pakwez Yesu wawanyisha kamu chisend chinech ni kwikepish. Nich kushimpish muchim, Yesu wayela in Kwilej end anch: ‘Ov, wovany kal kurumburik kwa yom nasala kal kud en? En ukat kwintazukany anch: ‘Mulej’ ap anch ‘Nsalejetu’ ni uyinginany nich, mulong mwawiy kamu munida. Chawiy, anch am nida Nsalejen ni Mulej, nakwowishany kal ku mend, niyen ufanyidinany kwowishijan ku mend umwing ni mukwau.’​—Yoh. 13:12-14.

11. Mutapu ik wamekeshay Pita anch wileja kwikal muntu wikepishina? (1 Pita 5:5) (Tal kand chipich.)

¹¹ Pita wilejina ku chilakej cha Yesu cha kwikepish. Kupwa kwa Yesu kuchirik mwiur, Pita wamwoka mu chilay ikundj umwing wading chishet. (Mid. 1:8, 9; 3:2, 6-8) Antu avud amunyingumuka Pita mulong wa chilay chinech. (Mid. 3:11) Ov, Pita wasangera ntumb yamwinkishau chisu chinicha mulong wading muntu wapamina kwi ndond kwayibachikangau antu kukimb katumb ni ndond ya piur? Bwat kamu, Pita wayileja antu kupan ntumb kud Yehova ni Yesu, palonday anch: “Ukash wa dijin dia Yesu ni ritiy mu dijin diend, yawiy yamwoka kal muntu umenanya ou, ndiy kand wijanya kal.” (Mid. 3:12-16) Mu kusut kwa machuku, mulong wa kumekesh usey wa kwikepish, Pita wasadina mazu “djalany kwikepish” mu mukand wend umwing kud in Kristu umekeshina yom yasalay Yesu padjalay disun da kwikusul nich mwi mbund ni kowish yidjatil ya in kwilej end​—Tang 1 Pita 5:5.

12. Mutapu ik tukutwisha kumwimburij Pita ni kudandamen kwikal ikepishina?

¹² Tukutwish kwimburij chilakej cha Pita anch twakudish mwikadil wa kwikepish. Vurik anch kwikepish kwakin kwitin kusal yom yivud kusutamu kwau kulond mazu mawamp. Mazu masadidinay Pita makarumwinau anch “kwikepish” mamekeshin yitongijok yetu ya mukach, mutapu tukata kwiman ayinetu ni mutapu tukata kuyiman antu akwau. Tukat kusalang yom yiwamp kud antu akwau mulong tumukatin Yehova ni antu, pakwez kadap chakwel atubaza. Tukumekesh anch twikepishin chakin anch twamusadin Yehova ni akadivar netu nich musangar kukwatijan ni usu wetu ap anch antu akwau kamenap yom tusadina​—Mat. 6:1-4.

‘IKALANY NI MANANG MAWAMP’

13. Kwikal ni “manang mawamp” kurumburikin ik

¹³ Kwikal ni ‘manang mawamp’ kurumburikin ik? (1 Pita 4:7) Mwin Kristu ukweta ­manang mawamp ukat kwikasikeshang kukwat mipak yiwamp yikwatijadina ni chitongijok cha Yehova. Mwin Kristu winou wijing anch kwikil chom chida cha usey nakash kusutamu urund wend ni Yehova. Ukweting chitongijok chiwamp piur pa amwinend, ni witiyining kand anch kijap kamu yom yawonsu. Ukat kumekesh kand anch umuchingejidin Yehova kusutin kumulembil chisu chawonsu nich kwikepish.

14. Chisu chimwing mutapu ik wakanganyay Pita kumuchingejin Yehova?

¹⁴ Uchuku wa nsuden kurutu kwa rufu rend, Yesu wayileja in kwilej end anch: “Mulong wa yom yikwinshikena, en awonsu ukwipwakalany uchuku winou.” Pita wamwakula anch: “Ap anch akwetu awonsu akwipwakal mulong wa yom yikukushikena, am nikwipwakalap ap pakemp!” Uchuku winiwa Yesu wayibabesha in kwilej end amwing anch: “Dandamenany kuchish ku mes ni kulembil chisu chawonsu.” (Mat. 26:31, 33, 41) Anch Pita walondula kubabesh kwinoku kurutu yom yishikena, wafanyina kwikal ni kutakaman kwa kulik kumutun Yesu. Pakwez, Pita wamutuna Mwant wend ni kupwa wova ushon nakash.​—Mat. 26:69-75.

15. Mutapu ik walamay Yesu manang mawamp uchuku wend wa nsuden pa divu?

¹⁵ Yesu wamuchingejinang Yehova nakash. Ap anch wading muntu uwanyidina, walembila nakash uchuku kurutu kwa kufa. Kusal mwamu kwamukwasha kusal yom yading yikatinay Yehova anch asala. (Mat. 26:39, 42, 44; Yoh. 18:4, 5) Chakin kamu, Pita kavuramenap anch Yesu walembila tupamp tuvud uchuku wend wa nsuden pa divu.

16. Mutapu ik wamekeshay Pita anch wikala ni manang mawamp? (1 Pita 4:7)

¹⁶ Mu kusut kwa chisu, Pita wileja kumuchingejin Yehova nakash mu malembil. Kupwa kwa kuvumbuk, Yesu wamwinkisha Pita nau atwimbuy akwau kashinsh anch akutambul spiritu utumbila mulong wa kuyikwash kuwanyish mudimu wau wa kulejan. Chawiy, Yesu wayileja kuchingel ku Yerusalem kushik ni pakuwanyina chom chinech. (Luka 24:49; Mid. 1:4, 5) Yom ik yasalay Pita pading pachingedinay? Pita nau ambay nend in Kristu “adandamena kulembil.” (Mid. 1:13, 14) Mu kusut kwa chisu, pafunday mukand wend wa kusambish, Pita wayikasikesha ambay nend in Kristu kwikal ni manang mawamp ni kumuchingejin Yehova mu malembil. (Tang 1 Pita 4:7.) Pita wileja kumuchingejin Yehova ni wikala mwin kuyikwash ni kuyikasikesh akadivar nau anambaz nend.​—Gal. 2:9.

17. Ap anch tutongin anch yom yimwing yituswapedining kwetu, yom ik tufanyidina kudandamen kusal? (Tal kand chipich.)

¹⁷ Mulong wa kwikal ni manang mawamp, tufanyidin kumulembil Yehova chisu chawonsu. Tufanyidin kudandamen kumulembil Yehova ap anch tutongin anch yom yimwing yituswapedining kwetu kusal. Pakampwil anch tukimbin kukwat mipak ya usey nakash, tufanyidin kumulembil Yehova chakwel atutakel, ni kwikal ni kashinsh anch ndiy kamu wija yom yida yiwamp kud etu.

18. Mutapu ik tukutwisha kwimburij mutapu wa kutong wa Yehova?

¹⁸ Tumujikitishin Yehova nakash mulong watutanga ni ukaliweny wa kwimburij mikadil yend. (Dis. 1:26) Chakin kamu, tukutwishap kumwimburij Yehova mu mutapu uwanyidina. (Isay 55:9) Pakwez, mud Pita, tufanyidin kudandamen kwikasikesh kutong mud Yehova, kwikal ikepishina, ni kwikal ni manang mawamp.