Malejan Tukutwisha Kwilejin Ku Mikand Yaad ya Pita

1. Yehova wamusadina kambuy Pita mutapu ik kurutu afa?

KAMBUY Pita wading wij ud piswimp ni kufa. Mu mivu wipanang nich kushinshaman mu mudimu wa Yehova, wendang pamwing ni Yesu, wasambisha kusal mudimu wa kulejan ni wasala kand mu chisak chitakedila. Pakwez mudimu wend wimenap pinap. Piswimp ni muvu wa 62-64 C.C., amupepila kud Yehova kufund mikand yaad ya Bibil, 1Pita ni 2Pita. Pita wading uchingejin anch mikand yend yafanyina kuyikwash in Kristu kupwa kwa rufu rend.​—2 Pita 1:12-15.

2. Mulong wak mikand yafunday Pita yid ya usey nakash?

² Pita wafunda mikand pa chisu chading chirishinau nich ambay nend in Kristu ni “mar ma mitapu ni mitapu.” (1 Pita 1:6) Antu ayimp apakisha kulet mafundish ma makasu ni yaku yijondila mu chikumangen cha win Kristu. (2 Pita 2:1, 2, 14) In Kristu ading ashicha mu Yerusalem afanyina pakad kulab kurish ni ‘disudiel dia yom yawonsu’—kusheshik kwa musumb winou ni kwa ditenchik dia in Yuda kud akankuny in Rom. (1 Pita 4:7) Chakin kamu mikand ya Pita yayikwasha in Kristu kwijik mutapu wa kushal ashinshamena chikalap nchik yikokujol yading yirishinau nich ni kwirijek mulong wa yikokujol yikuyishikena mu machuku ma kurutu.b

3. Mulong wak tufanyidin kushinshikin mikand yafunday Pita?

³ Ap anch Pita wafunda mikand yiney mulong wa in Kristu ading mu mivu chitot ya kusambish, Yehova wayiweja mu Dizu Diend. Tukutwish niyetu kutaninamu mu mikand yiney. (Rom 15:4) Pitushicha mu mangand minam mizwila ni yisal yijondila, tukutwish kurish ni yikokujol yikutwisha kutuziyish mu mudimu wa Yehova. Chikwau kand, tukurish ni mar makash mud maletisha disudiel dia yom ya in Yuda. Tutanin yivurish ya usey mu mikand yaad ya Pita. Yukutwish kutukwash kudandamen kuchingel dichuku dia Yehova, kupandakan wom wa antu ni kukudish rukat rikash amwing nau akwau. Yivurish yiney yikutwish kand kuyikwash amakurump kuman mutapu wa kuyikwash amikoku adia mu maswir.

DANDAMEN KUCHINGEL

4. Mud mulejenau mu 2 Pita 3:3, 4, yom ik yikutwisha kuziyish ritiy retu?

⁴ Atunyingumukin kud antu akad kwijik yom yilondinay Bibil piur pa machuku ma kurutu. In rukis akutwish kutusip mulong twachingedin kal disudiel dia mangand mu mivu yivud. Antu amwing akat kulond anch dikwezap kwau. (Tang 2 Pita 3:3, 4.) Anch twatesh yom ya mutapu mud winou kud muntu tulejina rusangu ruwamp, kud ambay netu a ku mudimu, ap antu mu dijuku dietu, ritiy retu rikutwish kuziy.Chawiy Pita urumburil yom yikutwisha kutukwash.

5. Yom ik yikutwisha kutukwash kuchingel nich kushimpish muchim disudien dia mangand minam? (2 Pita 3:8, 9)

⁵ Antu amwing akutwish kuman anch Yehova ulabin ni kulet disudiel dia mangand minam mayimp. Mazu ma Pita makutwish kutukwash kwikal ni chitongijok chiwamp, ni kutuvurish anch mutapu umenay Yehova yom ushalijadin ni wa antu. (Tang 2 Pita 3:8, 9.) Ku mes ma Yehova mivu kanan yid kwau mud dichuku dimwing. Yehova ushimpishin muchim, mulong kasotinap anch muntu ap umwing asheshika. Chisu chikushika dichuku diend, mangand minam makwikalapaku kand. Tukwet chisend cha kusadil chisu chishadinaku mulong wa kupan uman kud antu a michid yawonsu.

6. Mutapu ik tukutwisha ‘kulam mu manangu’ dichuku dia Yehova? (2 Pita 3:11, 12)

⁶ Pita utukasikeshin anch ‘tulam mu manangu’ dichuku dia Yehova. (Tang 2 Pita 3:11, 12.) Mutapu ik tukutwisha kusal mwamu? Tukutwish kusal mwamu anch twatongijokin pa yiyukish tukwikala nich mu mangand masu. Tongijokin mud ukat kusut rinkind muwamp, oku ukat kudia yakudia yiwamp, ukat kand kuyak akatish ney avumbukina ni kuyifundish antu afa kurutu uprofet wa Bibil uwanyina. Kutongijokin mud kwinoku kukukwash kuchingel nich impu chisu chikuwanyina yom yiney ni kwikal ni kashinsh anch disudiel dikwez. Anch ‘twijik yom yiney kurutu’ piur pa machuku ma kurutu, ‘kakutudimbap’ ni mafundish ma makasu.​—2 Pita 3:17.

PANDAKAN WOM WA ANTU

7. Mutapu ik ukutwisha wom wa antu kwikal ni usu pad etu?

⁷ Anch twalam dichuku dia Yehova mu manangu, chikutuswapel kuyilej antu akwau rusangu ruwamp. Pakwez yisu yimwing chikutwish kutukasiken kusal mwamu. Mulong wak? Tukutwish pamwing ap kwov wom wa antu akwau. Yawiy yom yamushikena Pita. Uchuku kurutu kwa rufu ra Yesu, Pita wova wom wa kwitiyin anch ud mwin kwilej wa Yesu ni wamutuna tupamp tuvud anch kamwijap kwend! (Mat. 26:69-75) Pakwez pita wapandakana wom ni kupwa wafunda anch: ‘kangal wayovany wom, ap kwiyakamish.’ (1 Pita 3:14) Mazu ma Pita matwinkishin kashinsh anch tukutwish kupandakan wom wa antu.

8. Yom ik yikutwisha kutukwash kupandakan wom wa antu? (1 Pita 3:15)

⁸ Yom ik yikutwisha kutukwash kupandakan wom wa antu? Pita utulejin anch: “Mutumbishany Kristu mu michim yen.” (Tang 1 Pita 3:15.) Chinech chimekeshin kutongijokin pa ulabu ni usu ukwetay Nsalejetu udia Mwant Yesu Kristu. Anch wovil ja kumulej muntu mukwau rusangu ruwamp, pakwez wovil wom ap kuzal, muvurika Mwant wetu. Tongijokin mutapu uyikedilay mwiur pamunyingumukinau kud ma miliyon ma angel. Vurik anch ukwet “ulabu wawonsu wa mwiur ni wa pansh” ni “[u]kwikal [niyey] machuku mawonsu, djat ni kwisudiel kwa mangand.” (Mat. 28:18-20) Pita utukasikeshin ‘machuku mawonsu kwikal awanyidina’ mulong wa kulondin ritiy retu. Ov, ukatin kupan uman ku mudimu, ku shikol, ap kusal mwamu ndond yikwau? Tongijokin kurutu chisu ukumana mutapu wa kusal mwamu ni rijek yom ukulonda. Lembil mulong wa kwikal utakamena, ikal nich kashinsh anch Yehova ukukukwash kupandakan wom wa antu.​—Midimu 4:29.

“IKAL NI RUKAT RIKURIKINA”

9. Mutapu ik wakanganyay Pita kumekesh rukat mu chisu chimwing? (Tal kand chipich.)

⁹ Pita wileja mutapu wa kumekesh rukat. Wadingaku chisu chalonday Yesu anch: “Katat nakulejany kal chijil chisu anch, katijanany muntu ni mukwau. Chifanyidin en kukatijanany muntu ni mukwau mudi am chinakukatanya en.” (Yoh. 13:34) Chikalap nchik mwamu, Pita wova wom wa antu ni walika kudia pamwing nau in Kristu ading akad kwikal in Yuda. Kambuy Paul watazuka yom yasalay Pita anch “rubabek,” ap yisal ya rubabek. (Gal. 2:11-14) Pita witiyina kupup kwinoku ni wadioshinaku dilejan. Mu mikand yend yaad, wakasikesha anch tufanyidinap kwetu kwikal ni yovil ya rukat piur pa akadivar nau anambaz netu pakwez tufanyidin kand kumekesh rukat riner mu yisal.

10. Yom ik yikutwisha kutukwash kumekesh “rukat rakin”? Rumburil. (1 Pita 1:22)

¹⁰ Pita ulondin anch tufanyidin kwikal ni ‘rukat ra ukadivar rakad rubabek’ mulong wa akadivar nau anambaz netu. (Tang 1 Pita 1:22.) Rukat mud riner ridokiling ‘ku kuziyin ku uyakin.’ Uyakin winou utufundishin anch “Nzamb kakwetap kasolikany.” (Mid. 10:34, 35) Tukutwishap kamu kuziyin kwi mbil ja Yesu piur pa rukat anch twayikat antu amwing mu chikumangen pakwez akwau bwat. Pakwez tufanyidin kwikal piswimp nau antu awonsu mud mwasalay Yesu. (Yoh. 13:23; 20:2) Pita utuvurishin anch tufanyidin kwikasikesh kwikal ni “rukat ra ukadivar”—mud rikwetingau antu a mu dijuku dimwing—mulong wa akadivar nau anambaz netu awonsu.​—1 Pita 2:17.

11. Chom ik chirumburikina ‘kukatijan umwing ni mukwau nich muchim umwing’?

¹¹ Pita utukasikeshin ‘kukatijan amwing nau akwau nich muchim umwing.’ Pinap dizu kukatijan ‘nakash’ dirumburikin kumukat muntu ap anch kusal usu wa kumekesh anch umukatin. Chilakej, yom ik ukusala anch mukadivar wakutap ku muchim mu chilik kanang? Chakusambish tukukimb kusal mud mwatusalangay ndiy pa ndond pa kumekesh rukat. Pakwez kusutil chilakej cha Yesu, Pita wileja anch kufundakesh kukatap kumusangaresh Nzamb. (Yoh. 18:10, 11) Pita wafunda anch: “Kangal wafundakeshany kuyip ku kuyip, ap masaal ku masaal, pakwez yiyukishany akusadilanya nayimp.” (1 Pita 3:9) Anch ukwet rukat rikurikina rikukubachik kwikal mwin ranaken ni kuyibangin ap antu akurumbukidina.

12. (a) Rukat rikurikina rikutwish kutukwash kusal ik? (b) Yom ik ufanyidina kwikasikesh kusal mud mulejenau mu video Préservons l’unité, un cadeau précieux ?

¹² Mu mukand wend wa kusambish, Pita wasadina mazu ‘rukat rikurikina.’ Rukat mud riner rikatap kwau ching kubwik, kusu yitil yikemp, Pakwez “miril ya yitil.” (1 Pita 4:8) Pamwing ap Pita wavurika dilejan piur pa kulikishin dilejinay kud Yesu mivu yikemp kurutu afa. Pa chisu chinicha, chimeken anch Pita wading witiyijin anch wading muntu muwamp palonday anch ukutwish kumulikishin muntu mukwau kushik “tupamp sambwad.” Pakwez yom yamulejau kud Yesu—yitufundishin—kulikishin ‘tupamp makum sambwad ni sambwab’ ,charumburik anch kwikil mimbu piur pa kulikishin. (Mat. 18:21, 22) Anch chikukasikedin kusadin chiyul chinech kangal waziy! Atushalapol awonsu Yehova akad kuwanyin chikat kuyikasiken awonsu kulikishin. Chom cha usey nakash kud ey chid kusal usu nakash mulong wa kuyilikishin akadivar ney awonsu ni kushakam nau mu chisambu.c

AMAKURUMP, LAMANY CHIKUMANGEN

13. Mulong wak chikutwish kuyikasiken amakurump kwikal ni chisu cha kuyikasikesh akadivar ni anambaz nau?

¹³ Chakin kamu, Pita kavuramenap yom yamulejau kud Yesu kupwa kwa kuvumbuk anch: “Lam amikoku am.” (Yoh. 21:16) Anch ud mukurump wij anch mazu minam makutadin niyey. Pakwez chikutwish kuyikasiken amakurump kuwanyish chisend chinech cha usey. Amakurump afanyidin chakusambish kwikal ni kashinsh anch antu a mu dijuku diau akwet yom yiswirikedinau mulong wa kwikal ni mwom, iyovil anch ayikatin ni afanyidin kand kuyikwash kusej piswimp ni Yehova. Afanyidin kand kwikal ni mushiku mu mudimu wa kulejan, ni akwet kand chisend cha kurijek ni kusal yikunku ku yikumangan, ku yitentam ya munyingumuku ni ya rejon. Amwing akwet kand yisend yikwau mud kwikal mu chisak cha Komite wa Kupan Ukwash ku Milong ya Opital (CLH) ap kukwash ku ma proje ma kutung ni kurijek yikumbu ya Want. Chakin kamu amakurump akwatiken kamu nakash!

14. Yom ik yikutwisha kuyibachik amakurump kubangin amikoku a Yehova? (1 Pita 5:1-4)

¹⁴ Pita wayileja amakurump akwau anch: “Yilamany yisak ya amikoku a Nzamb,”. (Tang 1 Pita 5:1-4.) Anch ud mukurump, twij anch uyikatin akadivar nau anambaz ney ni uyibangidin kamu. Pakwez yisu yimwing, ukutwish kwiyov mud ukwatiken nakash ni uziyin nakash ni anch ukutwishap kamu kuwanyish chisend chey. Yom ik yikutwisha kukukwash? Muleja Yehova mutapu wiyovila ni anch ukatin kamu kuyikwash akadivar ni anambaz ney. Pita wafunda anch: “[Muntu] watambula mutapu wa kusal mudimu wa kukwashan, asala nich usu umwinkishinau kudi Nzamb.” (1 Pita 4:11) Akadivar nau anambaz ney akutwish kurish ni yikokujol yikutwisha kupwa ching mwi ngand yisu. Pakwez vurik anch Yesu Kristu udia “kafung mujim,” ukutwish kuyikwash chipandakena kusutamu mutapu ukutwishay kusal muntu mwawonsu. Ukutwish kusal mwamu nlel ni mwi ngand yisu. Nzamb uyitin kwend amakurump kuyikat akadivar nau, kuyibangin ni kwikal “chilakej chiwamp kud amikoku.”

15. Mutapu ik wamekeshay mukurump umwing anch wading uyibangidin amikoku a Yehova? (Tal kand chipich.)

¹⁵ William, udia mukurump kwasut kal mivu yivud, wajingunina usey wa kuyibangin amikoku. Pasambisha chipupu cha KOVID-19, ndiy ni mukurump mukwau akwata mupak wa kutazuk antu awonsu a mu yisak yau ya mudimu wa kulejan rubing rawonsu. Mulong wak? Urumburil anch: “akadivar avud ading ayinau ku yikumbu ni chading chiyiswapedin kwikal ni yitongijok yiyimp.” Anch mukadivar urishin ni yikokujol, William wamuteshang nawamp palondinay mulong wa kwijik maswir mend ni mutapu ukutwishay kumukwash. Kupwa ukat kusal usu wa kukimb mikand ap mavideo pa JW.org, mulong wa kumukwash nich. Ulondin anch: “Amikoku akwet kuswir kwa kuyibangin nakash nlel kusutamu pakur. Tukat kusal usu nakash mulong wa kuyikwash antu kumwijik Yehova; tufanyidin kand kusal mwamu mulong wa kuyikwash amikoku a Yehova chakwel ashala mu uyakin.”

EL YEHOVA APWISH KUKUFUMB

16. Mutapu ik tukutwisha kusadin malejan madiokila mu mikand yafunday kambuy Pita?

¹⁶ Twisambina kal malejan makemp madiokila mu mikand yaad yafunday Pita. Pamwing ap waman kal yom ufanyidina kuswimp. Chilakej, ov, ukatin kutongijokin yisu yivud piur pa yiyukish ukutambula mwi ngand yisu? Ov, wakwatin kal mupak wa kulejan ku mudimu, ku shikol ap kwi ndond yikwau? Umen mutapu ukutwisha ku mekesh rukat rikurikina kud akadivar nau anambaz ney chipandakena? Anch ud mukurump, ov, ukwatin mupak wa kuyibangin amikoku a Yehova? Anch wishinshikin nich kashinsh kawonsu ukutwish kuman yom ufanyidina kuwapish, pakwez kangal waziy. “Nsalejetu udi muwamp,” ni ukukukwash kuswimp. (1 Pita 2:3) Pita utwinkishin kashinsh anch: “Nzamb . . . Ukez kukupizurishany, ni kukukasikeshany, ni kukwimikany dang.”​—1 Pita 5:10.

17. Anch twajijaman ni kulik anch Yehova atufumb, yibudikin ik yikwikalaku?

¹⁷ Dichuku dimwing Pita wiyova anch kawanyidinap kwikal ni Yesu. (Luka 5:8) Pakwez kusutin ukwash wa Yehova ni Yesu Pita watwisha kudandamen kumulondul Yesu. Chawiy Nzamb wamutonda Pita kwandam “mu Want wa chikupu wa Nsalejetu, ndiy kamu Mupandish wetu Yesu Kristu.” (2 Pita 1:11) Difut diwamp mud ik! Anch wajijaman mud Pita ni walik anch Yehova akufumba, niyey ukutwish kutambul difut dia mwom wa chikupu; Mud ‘difut dia ritiy rey, diawiy dipandish dia mupim wey.’​—1 Pita 1:9.