Kalam wa Rukan Wilej kal Uyakin

Mwi ngand ya Filip mwading changadim umwing muswik wading ni chilembil. Chilembil winou wamukwashang changadim kubwak ni changadim winou wikala nich nfalang jivud ni wayipitisha ansalejend. Payangangay Paul ni Silas ku Filip, changadim winou wayilondulanga. Chilembil winou wamubachikang changadim winou kutoy anch: “Amakundj inay ad atushalapol a Nzamb Upandakena Piur Nakash.” Kupwa Paul wamwela chilembil anch: “Nikulejin kumudokal changadim winou mu dijin da Yesu Kristu.” Chilembil wamudokala changadim.

Pamanau ansalejend a changadim winou anch kakutwishap kand kwikal ni nfalang, ajimana nakash. Amukakalijana Paul ni Silas ayitwal kud amakurump a musumb, alonda anch: “Antu inay aletin kanvundangesh mu musumb nakash!” Amakurump a musumb apana mbil ja kumubul Paul ni Silas ni kuyitek mu rukan. Kalam wa rukan wayiteka mu kapalikany ka mukach kakweta mididim ni wayiteka makas ni mend mu mabay ma kufuril kupwa amapamp ni mbwambu.

Antu akwau a rukan atesha pading pawanginay Paul ni Silas miminy ya kumutumbish nich Yehova. Kukashimuk mukach mwa uchuku, divu dazala ni rukan rawonsu ranyikeka. Yis ya rukan yazurika ni miyolal yading yiyikasinau antu a rukan yasuburoka ni mabay mwayandjikau makas ni mend mazakoka. Kalam wa rukan waya mau mu kapalikany ka mukach ni watana yis yazurikang kal. Wamana anch antu a rukan awonsu achinang kal, chawiy wanona mpak yend ya musamun chakwel ijipa.

Mu chisu chinicha, Paul wamwela ni dizu da piur anch: “Kangal wisal nayimp, mulong etu awonsu tud kwetu mwinomu!” Kalam wa rukan waya mau ni wawa pansh kurutu kwa Paul ni Silas. Wayipula anch: “Yom ik nifanyidina kusal chakwel nipanda?” Amwakula anch: “Mwitiyija Nsalejetu Yesu, ni ukupand, ey pamwing ni dijuku dey dawonsu.” Kupwa Paul ni Silas amufundisha kalam wa rukan ni dijuku dend dizu da Yehova, ni ayibatisha.