“Want Wey Weza”

Yehova wakana anch: ‘Kukez kikalap madil, kusansan, mayej, ap rufu. Nikez kayikuswol mansoj mawonsu ku mes mau. Yom yawonsu yiyimp yikez kamekanap kand.’

Yehova wamuteka Adam ni Ev mu chir cha Eden chakwel ashakam mu chisambu ni musangar. Afanyina kumwifukwil Tatukwau wa mwiur ni kuval an chakwel izwish divu. Adam ni Ev amubwambwila Yehova, pakwez chitongijok cha Yehova chaswimpap. Mu buku winou twilejin anch yom yawonsu yakanay Nzamb yikat kuwanyin. Want wend ukulet yiyukish yipandakena kuwap pa divu, mud mwashilayimu kud Aburaham.

Kurutu oku Satan, ayilembil end, ni antu ayimp awonsu akuyijiyish. Muntu mwawonsu ukupanda ukumwifukwil Yehova. Tukuyelap kand ap kufa. Pakwez, dichuku dawonsu tukulankang ni usu ni musangar. Divu dikwikal paradis. Muntu mwawonsu ukwikal ni yakuda yiwamp ni chikumbu chiwamp. Antu akwikal awamp, akad chisum. Annam ayidany kakutwovishap wom, niyetu tukuyovap wom.

Chikez kikal chisu cha musangar pakusambishay Yehova kuyivumbul antu afila kal. Tukez kayak antu a pakur, mud Abel, Nowa, Aburaham, Sara, Moses, Rut, Ester, ni David. Tukushakam nau mulong wa kusal Divu dikala paradis. Kukwikal midimu yivud yisangareshina ya kusal.

Yehova ukatin anch niyey wikalamu. Ukumwijik Yehova mu mitapu yakad kutongin. El tusejany piswimp nakash ni Yehova dichuku dawonsu, kusambish katat ni chikupu!