Mazu ma kusambish nich

Buku Mifund ya Ukwash Mulong wa Mashakamin ma Win Kristu ukukukwash kutan swa maverse ni nsangu ja Bibil yikutwisha kukukwash kupandankan yikokujol urishina nich. Ukutwish kand kukukwash kutan mifund ya Bibil yiwanyidina mulong wa kuyikasikesh nich antu akwau ni kuyikwash kukwat mipak yimutumbishina Yehova. Tond mutu wa mulong ukusangareshina ni londwish yipul ni mazu ma mu wiswimp mada mu mutu wa mulong winou. (Tal mushet “Mutapu wa Kusadin Buku Winou.”) Ukutanamu mifund yikukwinkisha yiyul, umutakel, ni rongoj uswirikedina. Ukutanamu kand yom ya usey ukutwisha kwisamb ni antu akwau—mud maverse ukutwisha kusadin mulong wa kuyikwash ni kuyikasikesh antu akwau.

Mutapu wa Kusadin Buku Winou

Mulong wa kutan mutu wa mulong, ukutwish kusadin mushet, ap milad. Buku Mifund ya Ukwash Mulong wa Mashakamin ma Win Kristu amwangen mu milad ap anch yikunku sambwad: Yikokujol, Mwikadil, Chikumangen, Mwom wa Dichuku Diawonsu, Dijuku, Urund ni Yehova, ni Mikadil. Ukutan pamwing ap mitu ya milong ukimbina mu yikunku yiney. Andam mu mulad kanang ni tond mutu wa mulong ukimbina. Pakwez, anch ukwetap kashinsh piur pa mulad ukwatijadina ni mutu wa mulong ukusangareshina, tond Yawonsu ni kimbijol mitu ya milong djat ni paukutanina uukimbina. Mwinshin mwa mutu wa mulong win wawonsu, ukutanamu mitu ya milong yivud ya kushiril. Yimwing yid yijikish; yikwau yid yipul. Piutangina maverse makushiril madia mwinshin mwa mutu wa mulong, tongijokin pa mutapu makwatijadina ni yijikish ap kwakul ku chipul. Yisu yimwing, mutu wa mulong akutwish kuwangan mu tumitu twa milong tuvud mulong wa kukukwash kutan jinsangu ukimbina pakad kulab. Yisu yimwing awejidinaku maverse malejenau anch “Tal kand”. Maverse minam malejen yitongijok yikwatijadina ni mutu wa mulong. Yisu yivud ukutan kand “Yilakej ya mu Bibil yikutwisha kukukasikesh.” Kupwa kwa verse win mwawonsu ukutan mazu marumburila mu wiswimp chitongijok cha pa dishin cha verse winou ap dilejan tudioshidinaku. Piutangina mufund, sadin mazu minam mulong wa kwijik yom ufanyidina kutongijokin.

Chakin, mukand winou ujimbwilap mifund yawonsu ya mutu wa mulong wisambidinau. Pakwez ud mutapu uwamp nakash ukutwisha kusambish kukimbijol nich. (Jnsw 2:1-6) Mulong wa kukimbijol chikurikina, sadin mareferans marijinal ni yom ya kwilej nich yida mu Traduction du Monde Nouveau. Sadin Ukwash wa Kukimbijol Nich wa Atuman ap Index des publications des Témoins de Jéhovah mulong wa kwilej chikurikina kurumburik kwa mufund ap mulong wa kuman mutapu wa kuusadin. Sadin yom yabudishinau katat mulong wa kusal kukwatijan ni kutesh kwa katat kwa uyakin wa Mifund.

El Buku Mifund ya Ukwash Mulong wa Mashakamin ma Win Kristu akukwash kujingunin manangu, ronganyin, ni ukaliweny wa kujingunin yida mu Mifund Yitumbila. Piudandamedina kusadin buku winou, ukwikal ni kashinsh anch komb “Dizu [dia] Nzamb dikwet mwom, dikwet kand ukash.”—Heb 4:12.