Ngond wa 8

Tulembil anch uruu tulejena wa kubabesh autesha kud antu avud ni kwibomb netu pamwing mu difukwil dishitwila. Pakwez chid nchik piur pa antu akulika kutesh uruu winou nlel? Pamwing ap Yehova ukusot kuyipandish antu akuswimpa michim pakumanau mutapu ukusheshikay Babilon Mujim. Anch mwawiy, komb chid cha usey nakash kudandamen kuyibabesh katat. Yom tuyilejina katat akutwish kuyivurik pa chisu chinicha. (Ilakej ni Ezekiel 33:33) Pamwing ap akuvurik yom twayileja mulong wa kuyibabesh ni yikuyibachik kwibomb netu mu difukwil dishitwila kurutu chisu chisuta. Mud kalam wa rukan wa ku Filip wakarumuka kupwa kusu kwa “kunyikek kujim kwa divu” kwasadika, pamwing ap antu amwing alikina kutesh nlel akukarumuk kupwa kwa kusheshik kwa Babilon Mujim kukunyikesha mangand.​—Mid. 16:25-34. w24.05 17 par. 9-10

Twilejin dilejan da usey nakash kusutin yom yayifundinau in Kristu in Hebereu kud kambuy Paul. Amwing kadandamenap kukul mu spiritu, kupwa ading ‘achikwet kand kuswir kwa kuna kusu mayel, pa ndond pa kudia yakudia ya [mu spiritu] ya amakurump.’ (Heb. 5:12) Kilejangap ni kwitiy yom yisu yayifundishangau kud Yehova mu chikumangen. (Jnsw. 4:18) Chilakej, kupwa kwa mivu 30 kwa kupan ya kupesh, in Yuda avud ading itiyijin yijil ya Moses ap anch ading ayibwikin kal kusutin yakupesh ya Yesu. (Tit. 1:10) Muntu mwawonsu watanga mukand upepidilau wayifundinau in Kristu in Hebereu kud Paul wafanyina kwitiy anch mukand winou ukwet chakuda cha mu spiritu chikash ap cha amakurump. Mukand winouwayikasikesha kand in Kristu kwikal atakamena mulong wa kusal mudimu wa kulejan chikalap nchik rupompat ra in Yuda.​—Heb. 10:19-23. w24.04 6 par. 15

Kudosh kwibombay Adam ni Ev kud Satan ni kumubwambwil Yehova Nzamb, ma milion ma antu mafil. Uvud wa antu 144 000 ada pakach pa in kwilej a Kristu ashinshamena akuyivumbul mulong wa kwikal ni mwom wad kufang mwiur. (Kuj. 14:1) Ni antu avud ashinshamena amakundj nau amband amukatina Yehova akuyivumbul ku “divumbuk . . . da antu awamp,” ni kushakam chikupu pa divu anch ashal ashinshamena mu Mivu Kanan ya Winyikel wa Kristu ni pa chisu cha kupak kwa nsuden. (Dan. 12:13; Heb. 12:1) Chikwau kand pa chirung cha Mivu Kanan, “antu akad kutentam”​—kuwejaku antu alik kumusadin Yehova ap “asala yom yiyimp”​—akuyikish chisu cha kuswimp yaku yau ni kwikal antu ashinshamena. (Yoh. 5:29; Luka 23:42, 43) Pakwez, antu adinga ayimp kakezap kuyivumbul kud Yehova.​—Luka 12:4, 5. w24.05 2 par. 3; 5 par. 15; 6 par. 17

Muntu ukatina chakwel Yehova amwitiya ufanyidin “kulond uyakin mu muchim wend.” (Kus. 15:2) Chinech chirumburikin kusal yom yivud kusutamu kwau kudimban. Yehova ukatin anch twikal in kashinsh mu yom tulondina ni kusal. (Heb. 13:18) Chid cha usey kusal mwamu, ‘mulong Yehova umukisin muntu ukweta makasu, pakwez ud murund wa antu atentamina.’​—(Jnsw. 3:32) Antu akata ‘kulond uyakin mu michim yau’ kakatap kumekesh anch ad in kuziyin anch ad pakach pa antu pakwez awiy akat kujip yijil ya Nzamb ku ujindj. Akat kwipuk kwikal in rubabek. Muntu ukweta rubabek ukutwish kutong anch mbil ja Yehova jidingap jiwamp chisu chawonsu. (Yak. 1:5-8) Ukutwish kumubwambwil Yehova mu milong yimenay anch yid kwau yikemp. Kupwa, anch kwikil kwau yibudikin yidokila ku kubwambwil kwend ukutwish chad kusambish kusal yom yipandakena kuyip nakash. Ap anch utongin anch umusadidin Nzamb, Yehova kakwitiyap difukwil dend. (Mul. 8:11) Pakwez etu, tusotin kwikal in kashinsh mu yom yawonsu. w24.06 10 par. 7-8

Antu a Yehova akatin uyakin uda mu Dizu da Nzamb. Pawiy pimedina ritiy retu. (Rom 10:17) Twashikedin kwitiyij anch Yehova wateka chikumangen cha win Kristu mud “dinguj ni kwa kwikamen kwa uyakin.” (1 Tim. 3:15) Satan ukatin anch tulik kuchingejin Bibil ni umutakel udokila ku dirijek da Nzamb. (Efes 4:14) Piswimp ap Satan ukusadin makasu mulong wa kuyibachik antu a michid yawonsu kumubwambwil Yehova. (Kuj. 16:13, 14) Twij kand anch Satan ukutwish kusal usu nakash mulong wa kuyidimb antu a Yehova. (Kuj. 12:9) Chawiy, chid cha usey kwifumb mulong wa kwijik kushalijan kuda pakach pa uyakin ni makasu, ni kuziyin ku uyakin. (Rom 6:17; 1 Pita 1:22) Anch twasal mwamu tukupand pa chisu cha mar makash! w24.07 8 par. 1-3

Payitenchikay in Isarel kwikal muchid, ­Yehova wasuka nau mansuk, ni amukana anch akumaziyin. Anch adandamena kuziyin yijil yend, Yehova wafanyina kuyiking ni kuyiyukish. Pakwez anch amubwambwil​—chilakej, kusutin kutond kuyifukwil anzamb akwau​—wafanyina kuyitambul chiyukish chend, ni afanyina kuman mar. Pakwez chinech chirumburikinap anch Yehova wafanyina kuyidjubul rawonsu. Ading ni mutapu wa ‘kuchirik kud [Yehova] Nzamb wau ni kutesh dizu dend.’ (Kuv. 30:1-3, 17-20) Mu kulond kukwau, afanyina kukarumuk. Anch asala mwamu, Yehova wafanyina kuyisejin ­piswimp ni kuyiyukish kand kapamp kakwau. Antu atonday Yehova amubwambwila tupamp ni tupamp. Mud chibudikin, amana mar. Pakwez Yehova wadandamena kuyikwash antwend chakwel amusadin kand. Watuma aprofet tupamp ni tupamp mulong wa kuyikasikesh antwend kukarumuk ni kumuchirikin kand ndiy. (2 Ant 17:13, 14) w24.08 9 par. 4-5

In Kristu a mu Yerusalem ni mu Yudeya arisha ni yikokujol yivud. Kwalanka rupompat rikash chisu chikemp kupwa kwa kutek chikumangen cha win Kristu. Chawiy kupwa kwa mivu 20 arisha ni uzwendj nakash, pamwing ap wadokala ku kamungun kashikena mwi ngand pa chisu chinicha. (Mid. 11:27-30) Pakwez, piswimp ni muvu wa 61 C.C., in Kristu andama mu chirung cha chisambu, ap anch kwad kand yikokujol yikwau yada yiyichingedina. Pa chisu chinicha, Yehova wamupepila kambuy Paul kuyifundin mukand. Yiyul yading mu mukand winou yawiy kamu yading yiswirikedinau mulong wa kujijamen yom yafanyina kuyishiken kupwa kwa chisu chikemp. Mukand wa Hebereu washika kamu pa chisu chiwanyidina, mulong chisambu chadingaku pa chirung chinicha chafanyinap kulab. Paul wapana yiyul yafanyina kuyikwash in Kristu awonsu kujijamen mar mafanyina kuyishiken. w24.09 8 par. 1-2

Chisu chiturishina ni yikokujol, Yehova ukat kuyisadin akadivar nau anambaz netu mulong wa kutumekeshin rukat. Ambay netu in Kristu akutwish kutukasikesh kusutin kututesh nawamp, ap kusutin kusutish netu chisu pamwing. Akutwish kand kutukasikesh kusutin kutang netu verse wa Bibil ap kulembil netu pamwing. (Rom 15:4) Yisu yimwing, mukadivar ap nambaz ukutwish kutuvurish mazu ma Yehova ni chinech chikutwish kutukwash kwiyov kamu pee. Ambay netu in Kristu akutwish kand kutukwash mu mitapu yikwau, mud kutwinkish yakuda chisu tuda mu yikokujol. Yisu yimwing tukweting kuswir kwa kuyit antu akwau ukwash. (Jnsw. 17:17) Kakutwishap kwijik mutapu twiyovila ni yom tuswirikedina. (Jnsw. 14:10) Yilejamu arund aswila ni yileja mutapu wiyovila. Yileja yom yikutwisha kukukwash. Ukutwish kwambamb ni mukurump umwing ap aad uding nau mu urund. Anambaz amwing amen kal anch chiding chiwamp kwambamb nau anambaz akwau aswila mu spiritu. w24.10 10 par. 15-16

Antu avud akat kwikasikesh kuda yom yiwamp ni kwiyijidish mulong wa kushakam machuku mavud pa divu. Pakwez, ij anch kusal mwamu kukutwishap kuyikangesh kunanap ap kufa. Pamwing ap akat kutong anch chikasiken kushakam chikupu pa mangand. Pakwez, Yesu walonda anch antu akutwish kwikal ni “mwom wa chikupu” mud mufundinau mu Yohan 3:16 ni 5:24. Dichuku dimwing, Yesu wayidisha antu avud nakash mikat ni ansh mu chilay. Yom yiney yading kamu yishimwokishen, pakwez yom yalonday dichuku dalondulaku, yading yishimwokishen kupandakan. Antu amulondula ku Kapernaum, ni kwinikwa ku chikum cha Karung wa Galaliya, Yesu wayileja anch antu akutwish kuvumbuk ni kusanger mwom wa chikupu. (Yoh. 6:39, 40) Yom yalonday Yesu yikwinkishin kashinsh anch antu avud afila kal akutwish kuvumbuk ni anch ey ni akatish ney ukutwish kusangerany mwom wa chikupu! w24.12 8 par. 1-2

Rapor wa katat wa Organisation mondiale de la santé ulejen anch amakundj avud akat kuyisadin akajau kwa chisum ku mujimbu, mu mazu ni mu manang. Ikundj ukweta chaku chinech ukat kumekesh anch umulimishin mukajend anch ud nau antu akwau, pakwez ku chikumbu ukat kumumesh mar. Yom ik yikata kuyibachik amakundj kuyimesh akajau mar? Yikutwish kushiken anch muntu amulila kud tatuku ukweta chisum, chawiy ukutwish kutong anch chidap kwau chiyimp kumumesh mband mar. Antu akwau chid mulong wa yibachikin ya chaku cha ndond yishichau, yikutwisha kuyibachik kutong anch “ikundj wakin” ufanyidin kusadin usu wend chakwel mukajend amana anch ndiy ntakel. Amakundj akwau kayifundishap kwau mutapu wa kudutish yovil ni ujim wau. Amakundj amwing ayipishin kal chitongijok chau piur pa amband ni kulalijan, mulong wa chaku cha kutal pornografi. Chikwau kand, marapor malejen anch chipupu cha KOVID-19, chapandakeshin yom yiney. Chikalap nchik mwamu, ikundj kakwetap diyingishin ap dimwing da kumumesh mukajend mar. w25.01 8 par. 2-3

“Chifanyidin kumukat [Yehova] Nzamb wey nich muchim wey wawonsu, nich mupim wey wawonsu, nich usu wey wawonsu, nich kand manangu mey mawonsu.” (Luka 10:27) Yesu wovikesha patok anch chinech chading chijil cha usey nakash mu Chijil cha Moses. Mukand umekeshin anch tufanyidin kumukat Yehova nich muchim, charumburik anch nich rusot, yovil, ni manang metu. Kuwejinaku kand kwipan nich mupim wetu wawonsu, ni usu wetu. Pakwez tufanyidin kand kumukat Yehova nich manang, chinech chirumburikin mutapu wetu wa kutong pa milong kushalijan. Chakin, tukutwishap kamu kutesh nawamp mutapu wawonsu wa kutong wa Yehova. Pakwez tukutwish kutesh chitongijok cha Nzamb kusutin kwilej “chitongijok cha Kristu”, mulong ndiy uda chilakej chiwanyidina cha mutapu wa kutong wa Tatukwend.​—1 Kor. 2:16. w25.03 8 par. 1

Mulong wading muntu uwanyidina, Yesu wading ukwet usey umwing ni muntu wa kusambish, Adam, kurutu asala chitil. (1 Kor. 15:45) Mulong wafa mulong wetwetu, Yesu watwisha kufut difut dikweta usey umwing ni mwom washadishay Adam. (Rom 5:19) Mwamu Yesu wikala “Adam wa nsuden.” Tukwetap kand kuswir kwa muntu mukwau mulong wa kwez kufut yom yashadishay Adam. Yesu “walambula yakupesh kapamp kamwing.” (Heb. 7:27; 10:12) Chad, kushalijan ik kuda pakach pa kuchakwish ni difut? Kuchakwish yid yom yikatay Yehova kusal mulong wa kuchirish urund wa piswimp ni antu. Difut ud usey wapanay Yehova chakwel atwish kuchakwish ni antu akayitil. Usey winou umekeshin mash ma usey nakash ma Yesu michilau mulong wetwetu.​—Heb. 9:14. w25.02 5 par. 12-13

Kwijik anch Yehova udaku kamu chakin kukat kutukwash kujingunin chakin kamu yikokujol yetu. Mu mutapu ik? Tukusambish kuman anch yikokujol yetu yid mulong ukash kud Yehova ni Satan. Djabul ukat kulond anch ang twarish ni yikokujol yikash, tukulik kumusadin Yehova. (Job 1:10, 11; Jnsw. 27:11) Pakwez anch twapandakan yikokujol yetu, tukat kumekesh anch tumukatin Yehova ni kumekesh anch Djabul ud mukamakasu. Ov, urishin ni rupompat ridokila ku guvernema, kukasikan kwa nfalang, kulik kwa antu kusanger mudimu wa kulejan ap chikokujol chikwau? Anch chid mwamu, vurik anch chikokujol chey chikwinkishin mutapu wa kusangaresh muchim wa Yehova. Vurik kand anch, kakwitiyap anch akupaka mu chilik wakad kutwish kujijaman. Ukukwinkish usu mulong wa kujijaman. w24.06 22 par. 9

Ov, wij yom yiswapeling kukupak ey? Chikutwish kwikal cha ubaj kuvuramen kuziy kwetu ap kwichingejin anch tukutwishap kusal chitil. (1 Yoh. 1:8) Vurik anch Paul walonda anch, ap antu “[aswila] mu spiritu” akutwish kuwil mu choziu anch kachilap ku mes. (Gal. 6:1) Tufanyidin kwikal in kashinsh pantaliken ni ayinetu ni kwijik mu yom tuziyina. (2 Kor. 13:5) Kupwa kwa kujingunin yom yikata kutupak nakash, yom ik tufanyidina kusal? Tufanyidin kusal usu nakash mulong wa kupandakan yoziu yiney! Chilakej, pasak yis yawiy yom yading yiziyina nakash ku rubumbu ra musumb. Chawiy chasalang anch atulam ashakamin ku yis. Chisik chimwing, tufanyidin kubabal nakash mu yom twija anch tuziyining.​—1 Kor. 9:27. w24.07 15 par. 5-7

Mudimu uwamp wisambidinau mu mufund wa dichuku da nlel, mud kand kulejan rusang ruwamp. Chawiy anch twatang Dizu da Nzamb ni kuditongijokin ritiy retu muday Yehova rikat kukasikan ni tukat kuman usey wa kulejan rusang ruwamp ra Want. Mulong wa kutaninamu mu Dizu da Nzamb, tufanyidin kwipuk kutang, kwilej, ni kutongijokin kwa mau mau. Itekina chisu. Anch utangin mufund ukukasikedina kutesh, kangal wasutap mau mau. Pakwez, sadin Index de ­Publications ap Ukwash wa Kukimbijol Nich wa Atuman a Yehova mulong wakutan mutapu urumburilau verse. Anch witekin chisu piwilejina ukukasikesh kashinsh key anch yom yilondinay Bibil yid yakin. (1 Tes. 5:21) Anch wikal nich kashinsh kinak, ukusanger kulejan yom wilejina kud antu akwau. w24.04 15 par. 4-5

David walonda anch Yehova “ud muwamp, ukat kulikishin.” (Kus. 86:5) Mike wafunda anch: “Kwikil [nzamb] udia mudi ey. Ey ukat kulikishin yitil ya antwey.” (Mike 7:18) Ni Isay walonda anch: “Chifanyidin antu ayimp ­akarumun yaku yau, akarumun kand yitongijok yau. Chifanyidin awiy akarumuk, eza kudi [Yehova] Nzamb wetu. Ndiy udi mwin riy, ukuyilikishin swa.” (Isay 55:7) Mulong wa kumwimburij Yehova, chikumangen cha Korint chafanyina kumwak muntu wakarumuka ku ­yitil yend ni kumwinkish kashinsh anch amukatin. Kusutin kulondul umutakel chikumangen chamekesha “[kuziyin] mu yom yawonsu.” Ap anch muntu ­winou amwopata mu chikumangen mu angond akemp kusu, chinech chamukwasha kukarumuk. Chawiy kwadingap diyingishin da kulab kumuchirish mu chikumangen. w24.08 17-18 par. 12-13

Tushich pa chirung chiswimpina yom nakash! Piswimp ap, Yesu ukuyirumburish antu awonsu ashicha pa divu. Yesu walonda anch dirumburish dined did piswimp nakash. Wayileja in kwilej end “chijingidij” chikumekesha kwikalaku kwend ni cha “chirung cha nsuden cha mangand.” (Mat. 24:3) Uprofet winou ud mu Mateu shapitre 24 ni 25, mu Marko shapitre 13 ni mu Luka shapitre 21.Yesu wasadina yishimu yisatu mulong wa kutukwash kwirijek. Yishimu yiney yikat kutubabesh. Pakach pa yishimu yiney, pad chishimu cha amikoku nau ampemb, chishimu cha atujik ayisup ni ababela, ni chishimu cha atalant. Yishimu yiney yawonsu yikutukwash kutesh anch Yesu ukumurumburish muntu kukwatijan ni yisal yend. w24.09 20 par. 1-2

Tongin piur pa chilakej chiwamp nakash cha Yesu. Yom yawonsu yasalangay yading yimedin pa rukat mulong wa Tatukwend ni rukat mulong wa antu. Rukat riner ramubachika kusal mudimu wa usu ni kuwanyish yisend yamanangau antu akwau anch yid ya pansh. ( Mat. 20:28; Yoh. 13:5, 14, 15) Anch rukat rawiy rikubachikina, Yehova ukukuyukish ni ukukukwash kuwanyish yitinau mulong wa kwikal nkwash a mudimu. (1 Pita 5:5) Mu mangand antu akat kuyibaz antu ikwatining nich usey. Pakwez chidap mwamu mu dirijek da Yehova. Mukadivar uyikatina antu akwau mud Yesu, kakatiningap kuyikel antu akwau ap kumekan anch ud wa usey nakash. Anch muntu wikwatina nich usey nakash amwinkish chisend chinech mu chikumangen, chimeken anch ukulik kuwanyish yisend yimekena anch yid ya pansh ni yom yikwau yida ya usey mulong wa kubangin amikoku a Yehova. Ukutwish kutong anch midimu yiney yid ya pansh nakash.​—Yoh. 10:12. w24.11 15 par. 6-7

Pa mangand mawonsu, tukwet kuswir kwa akadivar akutwisha kwikal ‘mud yipan.’ (Efes 4:8) Anch ud mukadivar wabatishinau kal, ov, ukutwish kumusadin Yehova mu mutapu winou? (Jnsw. 3:27) Ov, ukutwish kwitekin mupak wa kwikal nkwash wa mudimu? Ov, ukutwish kuwanyish yitinau mulong wa kwikal mukurump wa chikumangen? Ov, ukutwish kuswimp yom kanang mu mwom wey mulong wa kwikal ni mutapu wa kuya ku Shikol ya in Kulejan a Want? Shikol yiney yikukufumb ni kukukwash chakwel akusadin nakash kud Yesu. Anch umen mud ukutwishap kusal yom yiney, mulembila Yehova. Mwita chakwel akwinkish spiritu wend utumbila mulong wikal ni mutapu wa kuwanyish chisend chin chawonsu chikukwinkishau. (Luka 11:13) Akadivar atondau kud Yesu mulong wa kwikal ‘mud yipan’ amekeshin patok anch Yesu ukat kututakel mu machuku minam ma nsuden. (Mat. 28:20) Tujikitishin nakash pa kwikal ni Mwant wa rukat, mwin kupan, wija maswir metu ni utwinkishina akadivar mulong wa kutukwash. w24.10 23 par. 16-17

Pakwez chikwikal nchik piur pa yom yayiletishina atushalapol a Nzamb kusansan ni mar? Chakin kamu yom yiney ‘akuyivuramen [ni] kujingam kumes ma Nzamb.’ (Isay 65:16) Yehova ukupwish yakamish yetu, ni pa chisu chinacha tukuvurikap kand yom yawonsu yiyimp. Ap katat, tukat kwiyov zoong chisu tuda ku yikumangan, kwinakwa tukatap kutong piur pa yom yikata kutwakamish. Tukat kuyikwash kand akadivar nau anambaz netu anch twamekesh rukat, musangar, chisambu, ranaken, kudimuk; yiney yid pakach pa mikadil ya dibuj da spiritu wa Nzamb. (Gal. 5:22, 23) Yiyukish mud ik yikutaninawamu antu akwimbomba niyetu mu dirijek da Nzamb! Antu akushala mu paradis wa mu spiritu akuman kuwanyin kwawonsu kwa kushilamu kwa Nzamb piur pa “maur masu ni divu disu.” w24.04 22 par. 9-10

Ap anch kwendijadin kukutwish kulet musangar, pakwez rid kand rizau ra usey rikutwisha kuyishikij antu ku kwatijan. Pa dichuku dau da uruw, ambay a uruw akat kusal machip kurutu kwa Yehova kukatijan ni kulimishijan umwing ni mukwau mu mwom wau wawonsu. Kurutu kwa kuchip, ufanyidin kumushinshikin mbay wa uruw ni kubabal. Kinak kawiy kashinsh ka machip ma uruw. Kwendijadin kukat kuyikwash ambay a uruw kwijikijan umwing ni mukwau ni kukwat mupak wa manangu. Yisu yimwing mupak winou ukwikal wa kwatijan, yisu yikwau ukutwish kwikal mupak wa kwimik kwendijadin. Ap anch imik, chinech chirumburikinap anch kwendijadin kwau kwading kuyimp. Chawiy, kwendijadin kukwet rutong ra kuyikwash antu kukwat mupak wa kwatijan ap bwat. Mulong wak chid cha usey kwikal ni chitongijok chiwamp piur pa kwendijadin? Anch mujich ukwet chitongijok chiwamp, kakutwishap kuya kumutond muntu anch kakwetap chitongijok cha kumwat. w24.05 26-27 par. 3-4

Yisu yimwing ansand akat kwov wom wa kulondin yitiyij yau. Chilakej, akutwish kwov wom anch ayilej kurumburil mulong wak kitiyijinap mafundish ma dikarumuk. Mulong wak? Mulong alejau akutwish kulond nich kashinsh anch mafundish ma dikarumuk mad kamu makin. Anch ud nvaj, mutapu ik ukutwisha kumukwash mwaney kwikal ni kashinsh anch yitiyij yend yid kamu yakin?Mwaney kafanyidinap kwov usany mulong witiyijin muday Sakatang. Mulong wak? Uyakin ud anch ap in siyans avud akat kwitiyij anch mwom wiyezinap awinau. Akat kuman anch kud muntu ukweta manang nakash watanga yom yiney yawonsu yikweta mwom. Chawiy kakatap kwitiyij mafundish ma dikarumuk. Chom chimwing chikutwisha kumukwash mwaney kukasikesh ritiy ni kutakaman kwend kud kuman mutapu wikalau akadivar nau anambaz akwau ni kashinsh anch mwom autanga. w24.12 18 par. 14-15

Yesu walama chitongijok chiwamp piur pa mudimu wa kulejan. Kusal mwamu kwamukwasha kudandamen kulejan nich musangar. Chilakej, mu kusut kwa chisu, mu muvu wa 30 C.C. Yesu wamana anch antu asambisha kutesh rusang ruwamp, ni wayifanikesha nich mbut jiswila jiwanyidina kwangul. (Yoh. 4:35) Kupwa wayileja kand in kwilej end anch: “Yakwangul yidi yivud.” (Mat. 9:37, 38) Mu kusut kwa chisu wachirikinamu kand anch: “Yakwangul yidi yivud . . . Mulembijekany mwin chir chakwel ukutum in mudimu wa kwangul avud.” (Luka 10:2) Yesu wadandamena kwikal ni kashinsh anch kukwikal antu akukata kutesh rusang ruwamp.Yesu wayikwasha in kwilej end kudandamen kwikal ni mushiku ni kashinsh kawonsu anch mudimu wau ukwikal ni yibudikin yiwamp. w25.03 18-19 par. 15-16

Yehova ud mpwembu. Mud mukutwishay muntu kuchinin mu diyal mulong wa kujingam ubaj, Yehova ukat kutuking chisu turishina ni yikokujol yikash. (Ukat kutukwash kuchidij urund wetu ni ndiy ni kutwinkish kashinsh anch kwikil chom chitumeshina mar nlel chikutwisha kutusal nayimp chikupu. Ni utukanin anch mu machuku ma kurutu ukudosh chom chin chawonsu chikata kutuletin yakamish ap mayej. (Ezek. 34:25, 26) Mutapu umwing tukutwisha kusal anch Yehova ikal Mpwembu yetu, kud kusutin kumulembil. Anch twalembil, Yehova ukat kutwink “chisambu cha Nzamb” chikulama michim ni yitongijok yetu. (Filip 4:6, 7) Yehova udaku chisu chawonsu mulong wa kutukwash. Tufanyidin kumuchingejin mulong ud ‘Diyal da chikupu.’ (Isay 26:3, 4.) Chisu chawonsu udaku mulong wa kuwanyish kushilamu kwend, kutesh malembil metu, ni kutwinkish yom tukweta nich kuswir. Tufanyidin kand kumuchingejin Yehova mulong ushinshamen kud antu akata kumusadin. (2 Sam. 22:26) Kakuvuramenap yom tusadina, ni ukutufut chisu chawonsu.​—Heb. 6:10; 11:6. w24.06 27 par. 4-6

Kwipuwangej kuyimp kukutwish kwayipish muchim wetu. Arund ayimp ap kutong anch kwikal mpich kud kwa usey nakash mu mwom. Anch twaman anch yom yiney yasambish kal kuziyish rukat retu mulong wa Yehova, yitin kusal usu wa kuyidosh mu manang (Mat. 5:29, 30) Tufanyidinap kulik muchim wetu uyipa. Kutong anch yom yiney yikutwishap kutushiken mulong tukwataken nakash mu kumusadin Yehova. Chilakej, tong bil ud pol wakashimuk kwiur kwayip kapamp kamwing kwasambish kutut rinkind ni mashik. Washik ku chikumbu wakish kasu. Ukwiyov mutapu ik? Chikwikal nchik anch washa ku chis kwawash? Rinkind wa mashik ukwandam kapamp kamwing mu chikumbu. Yom ik twilejidinaku? Tufanyidin kusal yom yivud kusutamu kwau kuda yakuda yiletina marungul mu urund wetu ni Yehova. Tufanyidin kand kupat chis cha yibachikin yiyimp, chakwel “rinkind” winou wa mashik ma mangand, ap yaku yiyimp kangal yandam mu muchim wetu ni kuuyipish.​—Efes 2:2. w24.07 21 par. 6-7

Tukutwishap kamu kwijik nawamp kuvul kwa mar majijamenay Yesu ap anch wamana mar nakash. Pa ndond pa kwit anch ayipup amasalay inay amupapina pa mutond wa mar, walembila anch: “Tatuku, yilikishina! Mulong awiy kijap yom yisadilau.” (Luka 23:34) Anch twalembil mulong wa antu atusadina nayimp, chikutukwash kwiyov nawamp ni kukepish ujim. Chikutwish kand kutukwash kuswimp mutapu tuyimena antu atumeshina mar. Pitudandamedina kushakam mu mangand minam mayimp, akutwish kutusadin mu mutapu wakad kutentam. Pakwez chikalap nchik yom tukurisha nich, kangal twalik kumwit Yehova ukwash mu malembil. Tufanyidin kand kwimburij yom yasalay Yesu pamurumbukinau kud antu akwau. Ni tufanyidin kudandamen kusadin yiyul yida mu Dizu da Yehova. Anch twasal mwamu, tukwikal ni kashinsh anch Yehova ukutuyukish.​—1 Pita 3:8, 9. w24.11 7 par. 16-17, 19

Yehova kadap Nzamb ukata kubwik mes pa yom yiyimp, ukisin chitil. (Kus. 5:4-6) Ukat kutwit kuziyin kwi mbij jend jitentamina, jatekay mu Dizu dend Bibil. Chid chakin anch Yehova kakatap kuyit antu akad kuwanyin kusal yom mu mutapu uwanyidina. (Kus. 130:3, 4) Pakwez chisu chawiy chimwing, kakatap kubwik mes pa yisal ya ‘amakundj akad kumulimish Nzamb, akwatina ranaken rijim ra Nzamb wetu mud diyingishin da kwikal nich mwikadil uyimp ni wa mukomu.’ (Yud 4) Chawiy, Bibil ulondin piur pa “kuyishesh antu amubwambwidila” Nzamb kwi njit ja Armagedon. (2 Pita 3:7; Kuj. 16:16) Pakwez, Yehova kasotinap anch muntu ap umwing asheshika. Bibil ulejen patok anch “usotil antu awonsu kukarumuk kudiokal ku yitil yau.” (2 Pita 3:9) Amakurump in Kristu akat kumwimburij Yehova pasadinau usu nich kushimpish muchim mulong wa kuyikwash antu asala yitil kuswimp mwikadil wau ni kwitapil kand dilau da Yehova. w24.08 26 par. 1-2

Mud Yehova, niyetu tukutwish kuyinkish antu akwau yom yiswirikedinau mulong tuyikatin. Chilakej, ov, wij mukadivar ap nambaz uswirikedina yakuda ap ya kudjal? Yehova ukutwish kukusadin mulong wa kuwanyish maswir mend. Atushalapol a Yehova akat kuyikwash antu akwau pa yisu ya mar. Chilakej, pa chisu cha chipupu cha KOVID-19, akadivar nau anambaz apana yakuda, yidjal ni yom yikwau kud antu akwau ading mu maswir. Akwau avud apana kand yipan mulong wa kukwash mudimu usadikina pa mangand mawonsu. Kusal mwamu kwayikwasha akadivar nau anambaz pa mangand mawonsu adinga mu maswir mulong wa chipupu. Akadivar nau anambaz inay asadina mazu mada mu Hebereu 13:16: “Kangal wavuramenany kusal yom yiwamp ni kukwashijanany muntu ni mukwau, mulong yakupesh ya mitapu yiney, yawiy yikata kumusangarish Nzamb.” w24.09 27 par. 6-7

Shinshikin chilakej ech. Ukimbin mudimu mulong wa kuwanyish maswir ma dijuku dey. Kwamekan midimu yaad. Washinshikin yom yawonsu, chilakej ud mudimu wa mutapu ik, program wa mudimu winou, chisu ukusenda mulong wa kuya ku mudimu ni kuchirik ku chikumbu, ni yom yikwau. Midimu yiney yawonsu yaad yijipinap kwau mbil ja Bibil. Pamwing ap ukusanger umwing pakach pa midimu yiney mulong ud mulad wa mudimu ukatining ap mulong difut did da piur. Pakwez kud kand yom yikwau ya kushinshikin kurutu kwa kukwat mupak. Chilakej, ov, pakach pa midimu yiney kud umwing wakad kukwatijan ni program wey wa yikumangan? Ov, pad ukukukangesha kwikal ni chisu cha kubangin dijuku dey mu spiritu ni mu manang? Kwiyipul yipul mud yiney kukukukwash kutek ‘yom yida ya usey nakash,’ charumburik anch difukwil dey ni maswir ma dijuku dey pa ndond ya kusambish. Mwamu ukutwish kukwat mupak ukuyukishay Yehova. w25.01 17 par. 11-13

Ap anch antu akwau akat kukusadin mu mutapu uyimp, ikal ni kashinsh anch Yehova ukukatin ni ud wa usey nakash kud ndiy. Ud “piswimp nau awiy akweta michim yinenganena.” Anch uziyin, vurik anch Yehova wamana yom yiwamp mu muchim wey chawiy chakupwitinay kud ndiy. (Yoh. 6:44) Usotin kamu kuku kwash mulong ud wa usey nakash kud ndiy. Tukutwish kwilej mutapu ukatay Yehova kwiyov kusutin kushinshikin chilakej cha Yesu. Padingay pa divu, wayibanginang antu asadinangau nayimp kud akwau. (Mat. 9:9-12) Mband umwing wading uyedina mayej makash pakwatay ku rizez ra disun dend ni ruchingej ra kuyerik, Yesu wamukasikesha ni wamujikitisha mulong wa ritiy rend. (Mar. 5:25-34) Yesu wamwimburija kamu Tatukwend mu mutapu uwanyididina. (Yoh. 14:9) Chawiy ikal ni kashinsh anch Yehova ukukwatin nich usey ni ukat kushinshikin mikadil yey yiwamp, mud ritiy ni rukat mulong wendendiy. w24.10 7 par. 4-5

Mu mwom wend, David wajijamena yikokujol yikash yivud yamudidisha. Kwading antu avud ading amukisina. Ap arunend amwing ni antu a mu dijuku dend kamushinshamenap ni apakisha kumusal nayimp. (1 Sam. 19:10, 11; 2 Sam. 15:10-14, 30) Pading parishinay nich chikokujol chikash mu mwom wend, wafunda anch: “Nikat kuziy nakash mulong wa kukimok. Nikat kukudidil ey uchuku ni uchuku, ni kutalesh ulal wam nich mansoj.” Mulong wak David wiyova mwamu? Walonda anch: “Mulong wa in kwinzengol.” (Kus. 6:7) Chikalap nchik yikokujol yarishay nich, David wading ukwet kashinsh anch Yehova wading umukatin. Wafunda anch: ‘Yehova ukutesh kudil kwam.’ (Kus. 6:9) Mazu ma mufund wa nlel makasikeshina nakash ni ukuman anch Yehova utukatin nakash ni ukat kubangin yovil yetu. David walonda anch chid mud Yehova watekang mansoj mend mu mulond ap kumafund mu buku. David wading ukwet kashinsh anch Yehova wamushinshikinang ni wamanang mar mend. Wading kand ukwet kashinsh anch Tatukwend wa rukat uda mwiur wading wij milong yend yawonsu ni wading wij kand mutapu mwayading yimusadina. w24.12 22 par. 11-12