Une bonne nouvelle pour des gens de toutes nations

CHILEJENAU piur ap kadi kabroshir kabudishau mu muvu wa 2004/2005 ku Yitentam ya Distrik “End Nend Nzamb” ya Atuman a Yehova. Dichap dimwing dia kabroshir kinak kakwet mapaj 96 kakwet uruu wiswimp mu jindim 92, jipanginau kusambish nich Afrikaans djat ku Chizulu, ni akatenchika mulong wa kukwash kupalangesh rusangu ruwamp ra Want kud antu avud mud muchitwishikina. (Mateu 24:14) Yilondwila ey yidi yimwing ya yamanau pasadilau kabroshir kinak.

• Kwinyim kwa kutambul kabroshir ku chitentam, dijuku dimwing dia Atuman diayang kwendil mu yingand yisatu. Ayitana kwinikwa antu adiokila mu Inde, mu Pays-Bas, Pakistan, ni mu Philippines. Ngatan walonda anch: “Ap anch antu inay awonsu alondaku Inglish, akashimuka nakash pitwayileja uruu mu jindim jau cha chivadik, mulong adinga kulemp nakash ni kwol kwau. Ngikadil ya pa mangand mawonsu ya mudimu wetu ni uumwing wetu yajingunika patok kud awiy.”

• Kaman umwing wamuleja kabroshir mbay nend wadiokal mu Inde. Wasangara nakash pa kuman jindim jawonsu jadingamu ni watanga uruu mu rudim rend ra chivadik. Chinech chikala mbutwil ya minsamb yivud ya Bibil. Mbay wa mudimu wadiokala mu Philippines washimoka pa kutan rudim rend ra chivadik mu kabroshir ni wasangera kwilej yivud piur pa Atuman a Yehova.

• Mu Canada, mband umwing wadiokala mu Népal witiyija kwilej Bibil ni Kaman kusutil ku mond pakwez widjidjeka kumutazuk nambaz ku chikumbu chend. Pakwez, Kaman wamuleja mband winou kabroshir nich uruu mu Chinepal, wasangara ni wamuladikija nambaz kwez kwol kwend. Wasota imena amwinend uruu mu rudim rend ra chivadik! Kusambish pinipa kamu dilejan diasadikina ku chikumbu cha mband winou.