Ov, Tumuswiridin Mesia?

UKUSAL nawamp kwiyipul chipul chinech, “Ov, tumuswiridin Mesia?” Inge, chidi chovikena kwiyipul anch chakin kamu Mesia ukez kwikal nich chibudikin kanang pad ey.

Antu amwing akweta yitongijok yiukutwisha kulimish akez kukulej nich kushinshik anch chakul chiswapela ni chakin chidi anch: Chakin kamu umuswiridin Mesia, mud kamu mumuswiridinay muntu mwin mwawonsu. Nsil umwing wa chijil cha in Yuda wa mu mivu chitot ya kusambish wafunda piur pa Mesia anch: “Mulong kushilimu kwawonsu kwa Nzamb [kwikala] Inge kwau mwi ndiy.” Chawiy ndiy wakasikeshina mwaz ujim ukwetay Mesia mu rutong ra Sakatang ra kuyukish michid yawonsu ya pansh. (2 Korint 1:20) Mwaz wa Mesia udi wa usey nakash chawiy uprofet wa Bibil wisambina nakash pa kwez kwend ni pa mwom wend wa pansh. Mu buku wa yany wasadidilau kud tutikit twa antu mu mivu 70 yasutila ey, Henry H. Halley walonda nich kujijaman anch: “Manswik Makur amafunda mulong wa kulangwish ruchingej, ni kubol njil mulong wa, Kwez kwa [Mesia].” Ov, kwez kwend kudi kwa usey? Ov, mulong wak ufanyidinany ku kubangin?

Chakin kamu dizu “Mesia” dirumburikin “Uzizidilau Many” ni didi chilik chimwing nich dizu dijikena nawamp anch “Kristu.” Muntu winou, ndiy wisambidinau mu Encyclopædia Britannica, Dichap dia 1970, mud “mupandish mujim,” wading ufanyidin kwez mulong wa yisal yakad kalimish ya antu aad a kusambish, Adam ni Eve. Ayitanga awanyidina, nich ruchingej risangareshina ra mwom wakad kusul mu Paradis, pakwez ashadisha kwau ruchingej riner. Mwangel umwing mbwambol, weza kwijikan mud Satan Djabul, wabudisha chitong anch Sakatang wadinga nich yijidik yikash ni anch akutwish kushakam nawamp nakash anch ikwatin ayinau mipak piur pa chadinga chiwamp ni chadinga chiyimp.—Disambishil 3:1-5.

Eve amudimba ni witiyija makasu minam. Chimeken kamu anch Adam, walimisha nakash wimbay wend ni mukajend kupandakanamu kushinshaman kud Nzamb, niyend winunga mu wimbwambol wasarumunay Djabul. (Disambishil 3:6; 1 Timote 2:14) Ku yisal yau, asala yivud kupandakanamu kulik ruchingej rau ra mwom wakad kusul mu mashakamin mau mu paradis. Ayiswanisha anau adinga akad kuvadik chitil ni yidiokila ku chitil, rufu.—Rom 5:12.

Pinipa kamu Sakatang wetu, Yehova, wijikisha mutapu wa kudiosh yibudikin yiyimp ya kulondulijan kwa yishiken yadiokala ku kubwambwil. Ndiy ukez kuchakwish kusutil ku chikeza kwikal chijidik chitiyikina mu Chijil cha Moses—kuchirish chom chilikena nich. (Kuvurik Yijil 19:21; 1 Yohan 3:8) Chijil chinech chitiyikina ela kuchiwanish ching anch umwing wa an a Adam ni Eve wez kutambul mwom wakad kusul mu paradis pansh, mud mwatonginay Sakatang mulong wa dijuku dia muntu. Chinech chatutwala kudiay Mesia.

Pamurumburishay Djabul, Yehova Nzamb walonda mu uprofet wa kusambish wa Bibil anch: “Am nikez kutek rukuny pakach pey ni mband, ni pakach pa mbut yey ni mbut ya mband. Ndiy ukez kukuchany ku mutu wey, niyey ukez kumusum ku kapolantundu kend.” (Disambishil 3:15) Ngang-a-Bibil umwing walonda anch “rusangu ra yakushilamu ya mesia mud murilejenau mu Mifund rasambisha nich dizu dined.” Mukwau walonda anch Mesia udi chom cha mudimu cha Nzamb “chikeza kupwish mar mawonsu madiokala ku chitil cha antu akusambish,” ni kuyiletin kand antu yiyukish.—Hebereu 2:14, 15.

Pakwez, ukutwish kwijik anch, katat antu adi kulemp nich kutan chiyukish. Chinyim ni chinech, muchid wa muntu udi mu kuburen kujim kwa ruchingej. Chawiy, The World Book Encyclopedia ulondil anch, “in Yuda avud achidi ni katat kumuchingejin Mesia eza” ni anch ndiy “ukez kupwish uyimp ni kuyipandakan akankuny a antu.” Pakwez, Bibil ulondil anch Mesia weza kal.