Dipandish Dia Nzamb Kusutil Kudiay Mesia

“Mulong mudi awonsu chafilau mu Adam, chawiy kand ni awonsu akez kikadil aom mu Kristu.”—1 KOR. 15:22.

1, 2. (a) Chom ik chasalay Andre ni Filip pamutanau Yesu? (b) Mulong wak tulondila anch tukwet uman uvud ulejena anch Yesu ndiy Mesia kuyipandakanamu in Kristu adingaku mu mivu chitot ya kusambish?

ANDRE wamuleja mwanamakwend Pita anch: “Twamutan kal Mesia,” mulong witiyija anch Yesu wa ku Nazaret ndiy wadinga Uzizidilau Many wa Nzamb. Filip niyend witiyija ni waya kumukimb murund nend Nataniel ni wamuleja anch: “Twamutan kal ndiy wafunday Moses mu yijil, ni aprofet kand, Yesu wa ku Nazaret, mwan wa Yosef.”—Yoh. 1:40, 41, 45.

² Ov, witiyijin chakin kamu anch Yesu udi Mesia washilaumu, ‘Kalal wa dipandish’ wa Yehova. (Heb. 2:10) Nlel tukwet uman uvud ulejena anch ndiy Mesia kupandakanamu uman wadingau nich in kwilejend a mu mivu chitot ya kusambish. Kudiosh pa kuvadik djat ni pa kuvumbuk kwa Yesu, Dizu dia Nzamb diletin uman ukash ulejena anch ndiy wadinga Kristu. (Tang Yohan 20:30, 31.) Bibil ulejen kand anch Yesu ukudandamen nich kuwanyish mudimu wend mudi Mesia ap chidiay mwiur. (Yoh. 6:40; Tang 1 Korint 15:22.) Mu kurumburik kwa muspiritu, niyey ukutwish walond nlel anch “wamutan kal Mesia.” Pakwez tuyishinshikinany in kwilej inay a mu mivu chitot ya kusambish ku kulond nawamp kamu anch amutan kal Mesia.

‘Ujindj Utumbila’ wa Mesia Aujingunina Pakemp Pakemp

3, 4. (a) Mutapu ik watwishau in kwilej a mu mivu chitot ya kusambish ‘kumutan Mesia’? (b) Mulng wak ulondila anch ching Yesu kusu ndiy wawanyisha mauprofet ma Mesia?

³ Mutapu ik watwishau in kwilej a Yesu a mu mivu chitot ya kusambish kulond nich uyakin anch ndiy wadinga Mesia? Kusutil kudi aprofet, Yehova wajinungina pakemp pakemp yijingidij ya Mesia wadinga wezina. Mwin kwilej Bibil umwing wafanikesha chom chinech nich kukumangej yikunku ya mukish wa diyal dia usey. Tongin bil anch amakundj avud akad kumanijan ni kwisambin pamwing umwing ni mukwau alet yikunku ya diyal dined mu kapalany kamwing. Anch yikunku yiney yiliken nawamp mu chilik cha kusal kand mukish muwamp, ukutwish washiken ku kulond kamu anch kudi muntu kanang ujingamena wanonola yikunku yifanyidina ni wamutumin muntu ni muntu chikunku chimwing. Mudi chikunku ni chikunku cha mukish, uprofet ni uprofet piur pa Mesia ukutwish wikal chikunku cha usey cha rusangu ra Mesia.

⁴ Ov, chitwishikin mutapu ik anch mauprofet mawonsu misambina piur pa Mesia mawanyina kwau mu mutapu wa kuyuk padi muntu umwing? Ikundj umwing mwin kukimbijol walonda anch chikasiken nakash anch muntu kanang awanyisha mauprofet mawonsu ma Mesia ku kuyuk kwau mudi “kwizwish uvud” chikasiken kusadik. “Yesu—ching Yesu kusu mu rusangu rawonsu ra muntu—ndiy uwanyishina yom yiney.”

5, 6. (a) Mutapu ik ukezau kumurumburish Satan? (b) Mutapu ik wajingunishay Nzamb pakemp pakemp dijuku dia “mbut”?

⁵ Diloz dia mauprofet ma Mesia didi ‘ujindj utumbila’ ukweta yom yivud ya usey mu mangand mawonsu. (Kol. 1:26, 27; Dis. 3:15) Mu ujindj winou mwadinga kand dirumburish dia Satan Djabul, “nnak mukuru,” wayandjika antu mu chitil ni mu rufu. (Kubur. 12:9) Mutapu ik ukeza kusadik dirimburish dined? Yehova wabwak anch “mbut” yikezay kuval “mband” yikez kumuchany Satan ku mutu. “Mbut” yabwakau yikeza kuuchany mutu wa nnak, yikez kudiosh musul wa wintombuj, mayej ni rufu. Pakwez, kusutil kwi mbil ya Nzamb, Satan ukez bil kumusum ku kapolantundu “mbut” ya mband.

⁶ Pakemp pakemp Yehova wamujinunina ukeza kwikal “mbut” ya kushilamu. Nzamb wachipa kudiay Abraham anch: “Ku a majuku mey kwawiy kukez kuyukila michid yawonsu ya pansh.” (Dis. 22:18) Moses wabwaka anch Muntu winou ukez kwikal “muruu” mujim kumupandakanamu Moses. (Kuvur. 18:18, 19) David wadinga nich kashinsh, ni kwinyim aprofet akasikeshina chom chinech, anch Mesia ukez kwikal wa mu dijuku diend ni ukez kuswan chikupu ditand dia David.—2 Sam. 7:12, 16, NW; Yer. 23:5, 6.

Uman Ulejena Anch Yesu Ndiy Mesia

7. Mwinjil ik mwezay Yesu kudiokal kudiay “mband” wa Nzamb?

⁷ Nzamb wamutuma Mwanend, chitang chend cha kusambish, kumudiosh kudiay Mukajend wa chifanikesh dirijek diend dia yitang ya muspiritu yidia mwiur chakwel ikala “mbut” yashilayimu. Chom chinech chita anch Mwan kapokal wa Nzamb ‘walika amwinend’ mwom wa mwiur ni wavadika mudi muntu uwanyidina. (Filip. 2:5-7; Yoh. 1:14) Spiritu utumbila ‘wamubwika’ Mariy mulong mwan ukuvalay wadinga ufanyidin kwikal ‘mwan utumbila ukezau kupil anch Mwan a Nzamb.’—Luka 1:35.

8. Mutapu ik wawanyishay Yesu uprofet wa Mesia payay mulong wa ku mubabatish mu mem?

⁸ Mauprofet ma Mesia malejan ndond ni chisu chikezay Yesu kumekan. Yesu wavadikina ku Betlehem mudi mwabwakau. (Mike 5:2) Mu mivu chitot ya kusambish, Ayuda adinga ni kuchingejin nakash. Mudi mwadingau ni kuchingejin nakash kumekan kwa Mesia, amwing au ipula piur penday Yohan Mubabatish anch: “Udi Kristu”? Pakwez Yohan wakula anch: “Kukat kwez umwing ukweta usu wimpandikenamu am.” (Luka 3:15, 16) Payay kudiay Yohan pa chiship cha mu muvu wa 29 C.C. chakwel akamubabatishay padingay ni mivu 30, Yesu wiyijikisha amwinend mudi Mesia pa chisu chinicha kamu. (Dan. 9:25) Ni wasambisha kapamp kamwing mudimu wend ujim wa kulejan, ni walonda anch: “Muten washiken kal, ni want wa Nzamb udi kal piswimp.”—Marko 1:14, 15.

9. Ap anch kadingap ni uman wawonsu, chom ik chadinga chitiyijinau in kwilej a Yesu nich kashinsh?

⁹ Chadinga chifanyidin kutenchik yom yadingau antu ni kuchingejin. Amwaka kamu nawamp Yesu mudi Mwant, pakwez winyikel wend wadinga wa ku machuku ma kurutu ni antu adingap ovila nawamp anch want winou ukwikal wa mwiur. (Yoh. 12:12-16; 16:12, 13; Mid. 2:32-36) Chikalap nchik mwamu, pipulay Yesu anch: “En ukat kwingelany am anch nidi nany?” Pakad kwidjidjek Pita wamwakula anch: “Yey Kristu, Mwan a Nzamb mwom.” (Mat. 16:13-16) Pita wakula kand chilik chimwing pa chisu chipwakalau avud pa malejan.—Tang Yohan 6:68, 69.

Tumuteshany Mesia

10. Mulong wak Yehova wakasikeshina anch tumutesha Mwanend?

¹⁰ Padingay mwiur, Mwan kapokal wa Nzamb wadinga muntu wa muspiritu mwin dikand. Pezay pansh, Yesu wadinga “ntimesh wa Tatukwend.” (Yoh. 16:27, 28, NW) Ndiy walonda anch: “Malejan minilejena kimadiap mamam amwinam, pakwez madiokil kudi Nzamb wantuma.” (Yoh. 7:16) Yehova walonda anch: “Muteshany,” pa chisu chikarumunay Yesu chifu mulong wa kukasikeshin anch udi Mesia. (Luka 9:35) Mwaning, tumuteshany, ap anch tumuziyilany Muntu Watondau. Chom chinech chitin ritiy ni midimu yiwamp—mulong yom yiney yaad yidi ya usey nakash chakwel kumusangaresh Nzamb ni mulong wa kutambul mwom wa chikupu.—Yoh. 3:16, 35, 36.

11, 12. (a) Ayuda a mu mivu chitot ya kusambish alika kumwitiyij Yesu kwikal Mesia mulong wa mayingishin ik? (b) Anany amwitiyija Yesu?

¹¹ Ap anch Yesu wadinga kal ukwet uman uvud wakin ulejena anch ndiy wadinga Mesia, Ayuda avud adingaku mu mivu chitot ya kusambish kamwitiyijap. Mulong wak? Mulong adinga ni yitongijok yau ayinau piur pa Mesia, adinga ni kutongin anch ukwikal ntakel wa chipolitik ukutwisha kuyikol mu mar madingau ni kuyimesh kudiau in Rome. (Tang Yohan 12:34.) Chawiy chakanganyau kumwitiyij Mesia wawanyisha mauprofet malonda anch akez kumudiurol, kumulik kudi antu, kumumesh mar ni mayej ni kupwa akez kamujip. (Isay 53:3, 5) Ap amwing a in kwilej ashinshamena a Yesu ova ushon pa kuman anch ndiy kayikolap mu mutapu wa chipolitik. Pakwez ashala ashinshamena, ni pa kusut kwa chisu, ayinkisha mutapu uwamp wa kutesh yom.—Luka 24:21.

¹² Antu akwau amulika Yesu anch kadiap Mesia washilaumu mulong wa malejan mend, mamanau antu avud anch makasiken kumitiyij. Kwandam mu Want kwadinga kumwitin ‘muntu ilika amwinend,’ ‘kudia’ mbij ja Yesu ni kuna mash mend, ‘kuvadik muntu musu,’ ni kulik kwikal “a mangand.” (Marko 8:34; Yoh. 3:3; 6:53; 17:14, 16) In kwibaz, ampich ni in rubabek amana anch chikasiken kuyiwanyish yom yiney yitinau. Pakwez, Ayuda in kwikepish amwitiyija Yesu kwikal Mesia, mudi mwalondau in Samariy amwing anch: “Mwinou chakin ndiy Mupandish wa mangand.”—Yoh. 4:25, 26, 41, 42; 7:31.

13. Mutapu ik wamusumau Yesu ku kapolantundu ka chifanikesh?

¹³ Yesu wabwaka anch akez kumufish nich kudiau in kupesh a pa mutu ni akez kumujip kudi in Michid, pakwez pa dichiku dia kasatu, ukez kuvumbuk. (Mat. 20:17-19) Kulond kwend nich kashinsh kurutu kwa Sanedrin anch ndiy wadinga “Kristu, Mwan a Nzamb” akumana mudi masaal. (Mat. 26:63-66) Pilat kamanap “chom cha kumujipin,” pakwez mulong Ayuda amufunda kand anch ukat kuyirumbul antu, Pilat “wamupana Yesu mu makas mau chakwel amusala mudi musotilau.” (Luka 23:13-15, 25, MM) Chawiy ‘amwituna’ ni asota ching kumujip “Mwant wa dipandish,” chikalap nchik uman uvud wadingau nich wamekesha anch amutuma kudi Nzamb. (Mid. 3:13-15) Chawiy Mesia ‘amujipa’ mudi mwabwakau, amupampina pa mutond wa mar pa Dichuku dia Kusut kwa Yehova mu muvu wa 33 C.C. (Dan. 9:26, 27; Mid. 2:22, 23) Ku rufu riner ra chisum, kwawiy kwamusuminau ku “kapolantundu” mudi mwabwakau mu Disambishil 3:15.

Mulong Wafilay Mesia

14, 15. (a) Yehova wamulika Yesu afa mulong wa mayingishin ik maad? (b) Chom ik chasalay Yesu kupwa kwa kuvumbuk kwend?

¹⁴ Yehova walika anch Yesu afa mulong wa mayingish maad ma usey. Dia kusambish, kushinshaman kwa Yesu djat ni ku rufu rend kwajingunisha chom chimwing cha usey nakash cha ‘ujindj utumbila.’ Ndiy wamekesha mu chilik chijim nakash anch muntu uwanyidina ukutwish walam “ritiy” ni kukasikeshin ukaleng wa Nzamb kwikalap nchik kupakiu kukash kudiokila kudiay Satan. (1 Tim. 3:16, MM) Cha kaad, mudi mwalonday Yesu, “Mwan a Muntu . . . weza mulong wa . . . kupan kand mwom wend mulong wa kuyikwol antu avud.” (Mat. 20:28, MM) “Chakupesh cha difut” chinech achifuta mulong wa dipup dia chitil chitwaswana kudiay Adam ni chatwishisha kuyinkish mwom wa chikupu antu awonsu amwitiyija Yesu mudi muntu usadidilau mulong wa dipandish dia Nzamb.—1 Tim. 2:5, 6, NW.

¹⁵ Kupwa kwa machuku masatu mwinzay, Kristu walanka, ni mu machuku 40 wadinga ni kuyibudiokin in kwilejend, mulong wa kuyilej anch udiaku mwom ni kuyinkish yijidik yikwau. (Mid. 1:3-5) Kupwa wakandama mwiur chakwel akamwinkisha Yehova usey wa chakupesh chend ni chakwel achingela chisu chatenchikau kal chikeza kusambish kwikalaku kwend mudi Mwant Mesia. Pakwez usadil kand yom yivud pachingedilay.

Wawanyisha Mudimu Wend Mudi Mesia

16, 17. Lejan mudimu usadilay Yesu mudi Mesia kudiosh pakandaminay mwiur.

¹⁶ Mu kusut kwa yitot ya mivu kudiosh pavumbukinay, Yesu wimanyidin nich kushinshaman midimu ya chikumangen cha Ukristu chikatay kuyikel mudi Mwant. (Kol. 1:13) Pa chisu chatenchikau kal, ukez kusambish kusadil usu wend mudi Mwant mu Want wa Nzamb. Mauprofet madia mu Bibil ni yinship yisadikina mu mangand yilejen anch kwikalaku kwend mudi Mwant kwasambisha mu muvu wa 1914, ni “disudiel dia mangand” diasambisha. (Mat. 24:3; Kubur. 11:15) Kupwa kwa ka chisu kakemp, wadinga ku mutu kwa chisak cha angel ayidiosha Satan ni ayilembil end mwiur.—Kubur. 12:7-10.

¹⁷ Mudimu wa kukun dizu ni wa kulejan wasambishay Yesu mu muvu wa 29 C.C. udi piswimp ni kupwa. Ukuyirumburish aom awonsu piswimpap. Ukez kuyilej antu adia mudi amikoku amwitiyijina mudi muntu usadidilau kudiay Yehova aleta dipandish chakwel ‘aswana want wayirijekilau kal kudiokal kwisambishil kwa mangand.’ (Mat. 25:31-34, 41) Antu amulikina Mwant Yesu akez kuyishesh pakezay kwez ni amasalay a mwiur kuyitaliken antu ayimp awonsu. Chad Yesu ukez kumukas Satan ni kumudjibwil pamwing ni ayilembil end mu “dibuku diakad musul.”—Kubur. 19:11-14; 20:1-3.

18, 19. Yom ik yiwanyishinay Yesu mu kusal mudimu wend mudi Mesia, ni kuyiletidin antu in kuziyil yom ik?

¹⁸ Mu Winyikel wa Mivu Kanan, Yesu ukez kuwanyish midimu yend yawonsu, mudi “Mwin Chiyul Ukwamushena, Nzamb Mwin Dikand, Tatuku wa Chikupu, Mwan Mwant wa Chisambu.” (Isay 9:6, 7, NW) Want wend ukez kuyichirish antu ku kuwanyin, pamwing ni antu akezau kuvumbul. (Yoh. 5:26-29) Mesia ukez kuyitwal antu asotilay ku “misul ya mem ma mwom,” chawiy chikeza kuyitwishish antu in kuziyil kusanger urund wa chisambu ni Yehova. (Tang Kuburik 7:16, 17.) Kupwa kwa kupakiu kwa nsudiel, antombuj awonsu, Satan pamwing ni ayilembil end, akez kuyidjibwil “mu karung wa kasu,” rawiy rufu ra kumuchany “nnak” ku mutu.—Kubur. 20:10.

¹⁹ Chamushen mudi ik ni Yesu ukez kuwanyish mudimu wend mudi Mesia mu mutapu upandakena kuwap! Mu paradis panap pansh mukez kwizul antu akulandau, akeza kushakam chikupu mu ukash wa mujimbu uwanyidina ni musangar. Dijin ditumbila dia Yehova akez kuditokish ku uyimp wawonsu, ni kuwanyish mbil ya ukaleng wend ni kuuchidij nawamp. Uswan ujim mudi ik uyichingedina kurutu oku antu inay awonsu akata kumuziyil Uzizidilau Many wa Nzamb!

Ov, Wamutanyin kal Mesia?

20, 21. Mayingishin ik ukwetanya piur pa Mesia ma kuyilej antu akwau?

²⁰ Kudiosh mu muvu wa 1914 tushich mu chirung cha parousia, ap anch cha kwikalaku kwa Kristu. Ap anch kwikalaku kwend mudi Mwant mu Want wa Nzamb kumekenap, kumekedin patok mu kuwanyin kwa mauprofet. (Kubur. 6:2-8) Chikalap nchik mwamu, mudi Ayuda a mu mivu chitot ya kusambish, antu avud nlel adiuril uman ulejena kwikalaku kwa Mesia. Niyau asotin ikala ni mesia wa chipolitik ap anch muntu ukusala pamwing ni anyikel a chipolitik. Pakwez en, washiken kal ku kumwijik anch Yesu uyikedil katat mudi Mwant mu Want wa Nzamb. Ov, usangerap mulong wa kujingunin yom yiney yawonsu? Mudi mwadingau in kwilej a mu mivu chitot ya kusambish, ufanyidinany kulejan anch: “Twamutan kal Mesia.”

²¹ Nlel, anch walondany piur pa uyakin, ov, ukat kukasikeshinany mudimu wa Mesia? Anch wasalany mwamu ukukudishany kusanger kwen mulong wa yawonsu yakusadilanyay, mulong wa yisadilay katat, ni mulong wa yikezay kusal. Mudi Andre ni Filip, pakad kwidjidjek niyen wayilejinany kal anamakwen ni arund nen piur pa Mesia. Ov, ukutwish wayichirikinany ni mushiku usu ni kuyilej anch Yesu Kristu udi chakin kamu Mesia washilaumu, muntu usadidilay Nzamb mulong wa dipandish?

Ukutwish Warumburil?

• Mutapu ik washikenau in kwilej a mu mivu chitot ya kusambish ku kumutan Mesia?

• Chidi mulong wa mayingishin ik maad ma usey mafilay Yesu?

• Chom ik chikezay Yesu kusal pa kuwanyish mudimu wend mudi Mesia?