Amutana Mesia!

“Twamutan kal Mesia.”—YOHAN 1:41, TMK.

1. Ov, chom ik chayibachikina alonda anch: “Twamutan kal Mesia”?

YOHAN MUBABATISH wiminy ni in kwilej end aad. Pakatay kumushejin piswimp Yesu, Yohan walond nich dizu piur anch: “Talany kwa, Mwan a Mukoku wa Nzamb!” Andre ni in kwilej akwau asambisha kumulondul Yesu kapamp kamwing ni kushakam pamwing nend. Kupwa, Andre wamutana mwanamakwend Simon Pita, ni wamutwal kudi Yesu kupwa kwa kumwijikish mu mutapu wamushena anch: “Twamutan kal Mesia.”—Yoh. 1:35-41.

2. Ov, mutapu ik tukeza kutaninamu mu kushinshikin nakash piur pa uprofet wa Mesia?

² Pikwasuta chisu, Andre, Pita, ni antu akwau eza kwikal ni mutapu wa kukimbijol mu Mukand wa Nzamb ni kulond nich muchim wawonsu anch Yesu wa Nazaret udi Mesia washilaumu. Ritiy retu mu Dizu dia Nzamb ni mudiay Uzizidilau many akez kurikasikesh pitudandamedina katat kushinshikin piur pa uprofet wa Mesia.

“Talany! Mwant Wen Ukat Kwez”

3. Ov, uprofet wisu wa wanyina kusutil ku kwandam kwa Yesu nich katumb mu Yerusalem?

³ Mesia ukez kwandam mu Yerusalem ni katumb. Muprofet Zakariy walonda anch: “Sangarany, sangarany kwen in Sion! Barokany nich musangar, nich musangar, Yerusalem! Talany, Mwant wen ukat kwez kudi en! Wezil nich katumb ni ulabu wa kupandakan, pakwez witudishin, wezidil pa chimbur, wezidil pa musambu a chimbur.” (Zak. 9:9) Nfund a kuseng wafunda anch: “Wayuk ndiy ukata kwezil mu dijin dia [Yehova].” (Kus. 118:26) Yesu kayilejap yisak yiney anch yisala mwamu bwat. Pakwez, mu kuwanyin kwa uprofet, antu inay atoya nich musangar ukash. Piutangina jinsangu jinej, tal bil mu manangu yom yiney ni tesh mazu ma musangar.—Tang Mateu 21:4-9.

4. Rumburil yashikena chakwel Kuseng 118:22, 23 awanyina.

⁴ Ap anch antu avud akez kumulik Yesu chikalap nchik uman wend umekeshin anch udi Mesia, ndiy ukwet usey kudi Nzamb. Mudi mwatakelau kulejan, Yesu ‘amudiurola ni kumudiul’ kudi antu alikanga kumwitiyij. (Isa. 53:3; Mar. 9:12) Pakwez, Nzamb wamupepila nfund a kusend chakwel alonda anch: “Diyal dialikau in kutung diawiy kamu dinidia dikala diyal dijim diatekau pa dikonk. [Yehova] ndiy wasala yom yiney.” (Kus. 118:22, 23) Yesu wapwitina yitongijok ya akankuny nend a chirelijon ku verse winou, ni Pita walonda anch yiney yawanyina padi Kristu. (Mar. 12:10, 11; Mid. 4:8-11) Yesu wikala “diyal dijim dia pa dikonk” dia chikumangen cha in Kristu. Diadjibulau kudi antu akad kumwijik Nzamb, ndiy “amutonda kudi Nzamb kwikal diyal dia usey.”—1 Pita 2:4-6.

Akez Kumupan ni Kumulik!

5, 6. Ov, chom ik chatakelau kulejan ni chawanyina piur pa kumutungun Mesia?

⁵ Atakela kulejan anch Mesia akez kumutungun kudi murund muyimp. David wabwaka anch: “Murund nam, mwin kamu, twilamatijadina nend, unading nichingejila, unadianga nend yakudia, niyend wanchin kal.” (Kus. 41:9) Muntu wading udil ni muntu mukwau ading amumen mudi murund nend. (Dis. 31:54) Pakwel kumutungun Yesu kudi Yudas Isakariyot mading matung mayimp nakash kamu. Yesu wapwitina yitongijok piur pa kuwanyin kwa mazu ma uprofet ma David pisambinay piur pa mwin kumutungun ni wayileja atwimbuy end anch: “Kinilondilap mulong wenen awonsu, bwat. Nij nawamp mutapu wa antu natonda, chifanyidin mazu ma mukand wa Nzamb mawanyina mudi mwalondau anch: ‘Muntu twadianga nend pamwing wambwambwila kal.’”—Yoh. 13:18.

⁶ Mwin kumutungun Mesia ukez kutambul nfalang makum masatu ja utad wa argent—difut dia kumuland nich muswik! Pisambinay piur pa Zakariy 11:12, 13, Mateu wamekesha anch Yesu amutunguna nich nfalang jinej jikemp. Pakwez, mulong wak Mateu walonda anch yiney asambela kuyilejan kusutil kudiay “Jeremiy muruu wa Nzamb”? Mu chirung cha Mateu, Jeremiy ateka pa ndond ya kusambish mikand ya mu Bibil pamwing ni mukand wa Zakariy. (Isikej nich Luka 24:44.) Yuda kasadilap nfalang jikemp ja tambulay kusutil ku chisal chend chiyimp, ndiy wadjibula nfalang jinija mu tempel, chad wikudika amwinend.—Mat. 26:14-16; 27:3-10.

7. Ov, mutapu ik wawanyina Zakariy 13:7?

⁷ Ap in kwilej a Mesia akez kupalangan. Zakariy wafunda anch: “Amikoku akez kapalangan. Nikez kayirishikish antwend.” (Zak. 13:7) Pa Nisan 14, wa muvu wa 33 C.C., Yesu wayileja in kwilejend anch : “En awonsu ukwinchinany, wanshany amwinam, mudi mwafundau mu Mukand wa Nzamb anch: ‘ukez kamujip kafung, chad amikoku awonsu a chisak akez kapalangan.’” Chawiy chashikena, mulong Mateu walejana anch: “in kwilejend awonsu amuchina, aya mau.”—Mat. 26:31, 56.

Amufunda ni Kumubul

8. Ov, mu mikadil ik Isay 53:8 wawanyina?

⁸ Mesia ela kumwoz ni kumufish nich. (Tang Isay 53:8.) Pamanch pa Nisan 14, in Sanedrin awonsu atanijana, amukasa Yesu ni amutwala kudi Nyikel mwin Rom Pons Pilat. Ndiy wamwipula Yesu ni wamana anch ndiy kadingap kwend ni mulong. Payilejau kudi Pilat anch akutwish kumulikishaku Yesu, pakwez chisak chabaroka cha mwakul anch: “Mupampila ku mutond!” kupwa amuleja anch amulikishaku mwin chisum Barabas. Mulong wasota kuyisangarish antu, Pilat wamulikishaku Barabas, ni walejana kumubul Yesu nfimbu, chad wamupana chakwel amupampa ku mutond.—Mar. 15:1-15.

9. Ov, chom ik chashikena mu chirung cha Yesu chatakelau kulejan mu Kuseng 35:11?

⁹ Atuman a makasu akez kupan uman uyimp piur pa Mesia. Nfund a kuseng David walonda anch: “Atuman a makasu anlankidin, akat kwintambil yom yinakad kwijik.” (Kus. 35:11) Uprofet winou wading wakin mulong, “in kupesh ajim ni ankalansambu awonsu apakisha kuman uman wa makasu mulong wa kumufish nich Yesu kwa kumujip.” (Mat. 26:59) Chawiy lel, “antu avud amutwambila Yesu makasu, pakwez uman walejanau kiwilikanap.” (Mar. 14:56) Uman wa makasu wadingap nich usey kudi akankuny a Yesu adinga ni ujim ukash, asota rufu rend.

10. Rumburil mutapu ik wanyina Isay 53:7.

¹⁰ Mesia kakezap kulond chom kurutu kwa in kumufish nich. Isay wabwaka anch: “Amuzengola, pakwez ndiy wishikumwisha. Ndiy kalondap chom. Wading mudi mwan a mukoku utwadilau ni kumujip, ap ni kumukatul mavuj, chawiy chimwing, kalondap dizu.” (Isay 53:7) Pakwez [Yesu] “kakulap dizu ku yom yamufundau kudi in kupesh ajim ni amakurump.” Pilat wamwipula anch: “Ov, kiwovilap kwey yom yawonsu yikufundilau?” Pakwez, Yesu “walika kand kulond dizu, chad Pilat washimwoka nakash.” (Mat. 27:12-14) Yesu kayisalap in kumufund.—Rom 12:17-21; 1 Pita 2:23.

11. Ov, chom ik chasadika mu kuwanyin kwa Isay 50:6 ni Mike 5:1?

¹¹ Isay wabwaka anch Mesia akez kamubul. Muprofet wafunda anch: “Nataku nyim kudi awiy ambula. Kinayikangeshap in kwinsaal masaal, ap in kwimbwit mwedj, ap in kwinchil mat mwis.” (Isay 50:6) Mika wabwaka anch: “Mukach mwa antwey nikez kamubudish mwin kutakel wa in Isarel.” (Mike 5:1) Mulong wa kukasikesh piur pa kuwanyin kwa uprofet winou, Rusangu ruwamp rafunday Marko rilondin anch: Antu amwing asambisha kumuchil [Yesu] mat, amukasa chibel pa mes, amubul yinkany, chad amwela anch: “Bwak muntu wakubulang! Atulam amusenda Yesu, amutwal, chad amubul masu.” Marko wafunda anch amasalay “amubula mu mutu nich mutond, amuchila mat, amwasin manungun pansh, amwifukwil.” (Mar. 14:65; 15:19) Chakin kamu, Yesu kasalap chom ap chimwing chakwel ayisaruna in kumsal inay.

Kushinshaman Djat ni ku Rufu

12. Ov, mutapu ik wawanyina Kuseng 22:16 ni Isay 53:12 piur pa Yesu?

¹² Abwaka mutapu ukezau kumupampin Mesia pa mutond. Nfund a kuseng wafunda anch: “Chisak cha atunya- milong angombamu kal, abuza kal makas mam ni yidjatil.” (Kus. 22:16, TMK) Pafunday yom yijikena nawamp kudi in kutang Bibil, Rusangu ruwamp rafundau kudi Marko rilejen anch: “Amupampa pamanch [pa saa ya chidivu pamanch].” (Mar. 15:25) Abwaka kand anch Mesia akez kumuchindin pakach pa akayitil. Isay wafunda anch: “Ndiy wapana mwom wend ku rufu, witiya kufa rufu ra antu ayimp.” (Isa. 53:12) Chawiy lel “amupampa [Yesu], pamwing nau ampongirik aad, umwing ku chikas cha katatuku, mukwau ku chikas cha kamaku.”—Mat. 27:38.

13. Ov, mutapu ik wawanyina Kuseng 22:7, 8 piur pa Yesu?

¹³ David wabwaka anch akez kumusal Mesia. (Tang Kuseng 22:7, 8.) Amusala Yesu padinga pa mutond wa mar, Mulong Mateu ulejen anch: “Antu ading ni kusut mwi njil amuzwiya Yesu mitu ni kumukonkurol anch: ‘Ey welanga anch nikuumbwol chikumbu cha Nzamb, chad nikuchitung kand mu machuku masatu! Anch udi mwan a Nzamb, shirik bil pa mutond, wipandisha amwiney!’” Chawiy chimwing, in kupesh ajim ni alej, ni amakurump amuswingisha Yesu anch: “Ndiy wapandisha antu akwau, pakwez katat kakutwishap kwipandish amwinend! Ov, kindiyap Mwant wa in Isarel katat anch washirik ku mutond, niyetu tukumwitiyij. Ndiy ukungamena kudi Nzamb, chad wadi ni kufa mukan anch: ‘Nidi Mwan a Nzamb.’” (Mat. 27:39-43) Mwaning, Yesu witiyija yom yiney yawonsu nich kalimish. Chidi chilakej chiwamp mud ik kud etu!

14, 15. Lejan mutapu wawanyina uprofet wa pakampwil piur pa yidjal ya Mesia ni kumwinkish maar ma nviny.

¹⁴ Ubal akez kuutek pa yidjal ya Mesia. Nfund a kuseng wafunda anch: “Angana yidjal yam pakach pau, ni kabwik wam amutila ubal.” (Kus. 22:18) Chawiy chashikena, mulong “[amasalay in Rom] amupampila [Yesu] ku mutond, chad anganijana maswin mend patau ubal.”—Mat. 27:35; tang Yohan 19:23, 24.

¹⁵ Mesia akez kumwinkish maar ma nviny nich yom yiridila. Nfund a kuseng walonda anch: “Pakwez ateka karidish ku yakudia yam, nading ni impu, anginka ukau kuna.” (Kus. 69:21) Mateu utulejin anch: “Amwinkisha [Yesu] maar ma nviny makubombakesh nich yom yiridila, pakwez chamapakay, walika kuna.” Kupwa, “Muntu umwing weza mau nich mwimpalambay, wauuchik mu maar ma nviny masasina, chad waukasin ku mutond, chad wamwinkisha Yesu mulong wa kuna.”—Mat. 27:34, 48.

16. Rumburil mutapu mawanyina mazu ma uprofet madia mu Kuseng 22:1.

¹⁶ Mesia akez kumulik kudi Nzamb. (Tang Kuseng 22:1.) Kwambatan nich uprofet, “pa muten wa yisatu Yesu wabarika nich dizu dikash anch: ‘Eloi, Eloi, lema sabakatani?’ chirumburikin anch: ‘Nzamb wam, Nzamb, ov, mulong wak wanlika am?’” (Mar. 15:34) Yesu kashadishap ritiy mudi Tatukwend wa mwiur. Nzamb wamulika Yesu mu makas mwa akankuny nend pakad diking chakwel apaka kushinshaman kwa Kristu. Ni kusutil ku kudil kwinoku, Yesu wawanyisha Kuseng 22:1.

17. Ov, mutapu ik wawanyina Zakariy 12:10 ni Kuseng 34:20?

¹⁷ Mesia akez kumupamp, pakez mafup mend akezap kumabukon. Antu a mu Yerusalem “akez katal kudi am mulong wa muntu wapampau.” (Zak. 12:10) Ni Kuseng 34:20, TMK ulondin anch: “[Nzamb] ukat kulam mafup mend mawonsu, kwikil dimwing dibukukina.” Mulong wa kukasikesh manans minam, Kambuy Yohan wafunda anch: “Pakwez isalay umwing wamupampa Yesu murumbu mwin mbavu, pawiy kamu pinipa mash ni mem mabudika. Muntu [Yohan] wamana yom yiney walejana uman wend, uman wend udi wakin . . . Yom yiney yamekana mulong wa kuwanyish mazu mafundilau mu Mukand wa Nzamb anch: ‘Kwikil difup dikez kabukunau.’ Mazu makwau ma Mukand wa Nzamb malondil anch: ‘Antu akez kamutal ndiy wapampau murumbu.’”—Yoh. 19:33-37.

18. Ov, mutapu ik amujika Yesu mukach mwa ampich?

¹⁸ Mesia akez kumujik mukach mwa ampich. (Tang Isay 53:5, 8, 9.) Chikwazweka urel, “muntu umwing mpich wa ku ul wa Arimatey washika. Dijin diend wading Josef,” wamwita Pilat chakwel amwinkisha mujimbu wa Yesu, Pilat witiya. Rusangu ra Mateu ruwejin kand anch: “Josef wausenda, wauvung mu diswin disu dia ndand muwamp. Chad waujika mwi nzay yend amwinend yatotay mu diyal mu machuku minima. Chawiy ndiy wabumburila diyal dijim, wadipat kwi nzay, waya kwend.”—Mat. 27:57-60.

Mushimanay Mwant Mesia!

19. Ov, chom ik chashikena kwambatan nich mazu ma uprofet madia mu Kuseng 16:10?

¹⁹ Mesia akez kumuvumbul. David wafunda anch: “Kiukutwishap kwitiy mupim wam kufa, kiukutwishap kumulik mukarukat ney kuya mwi ndond ya afu.” (Kus. 16:10) Tongin bil mutapu mwakashikumukau amband eza kwi nzay kwatekau mujimbu wa Yesu. Kwinikwa awiy atana mwangel ukweta mujimbu wa muntu, wayileja anch: “Kangal wovany wom. Am nij anch, umusotilany Yesu wa ku Nazaret wapampilau ku mutond. Ndiy kadiap kunoku, wavumbukang kal kwikal kand mwom! Talany ndond yadiau amutekin.” (Mar. 16:6) Kambuy wachileja chisak chadinga mu Yerusalem pa dichuku dia Pentekot mu muvu wa 33 C.C., anch: “David wading wij yom yikez kasalay Nzamb kurutu. Chawiy ndiy walonda ya kuvumbuk kwa Kristu Uzizidilau Many anch: ‘Kamulikinap mwin ndond ya afu. Mujimbu wend kiwavundilap mwi nzay.’” (Mid. 2:29-31) Nzamb kalikap anch mujimbu wa Mwanend mukatish uvunda. Pakwez, Yesu amuvumbula mu chilay nich mwom wa muspiritu!—1 Pita 3:18.

20. Ov, mutapu ik wawanyina winyikel wa Mesia wabwakau?

²⁰ Mudi mwabwakau, Nzamb walonda anch Yesu udi Mwanend. (Tang Kuseng 2:7; Mateu 3:17.) Chikwau, yisak yamushimana Yesu ni Want wezina, ni alonda nich musangar piur pend ni winyikel wend wayukishau. (Mar. 11:7-10) Piswimp ap Kristu ukez kayishesh akankuny nend mulong ukat ‘kurish mulong wa uyakin, ni kwitudish, ni kutentam.’ (Kus. 2:8, 9; 45:1-6) Want wend ukez kulet chisambu ni mapit pa divu diawonsu. (Kus. 72:1, 3, 12, 16; Isay 9:6, 7) Ov, tukwet chisend mudi ik cha kulejan uyakin winou mudi Atuman a Yehova, anch Mwan winou Mukatish wasambishin kal kuyikel mwiur mudi Mwant Mesia!

Ov, Mutapu ik Ukutwisha Kwakul?

• Mutapu ik wamutungunau ni kumulik Yesu?

• Ov, yom ik yimwing yabwakau piur pa kumupamp Yesu Kristu?

• Ov, mulong wak ukwet kashinsh anch Yesu udi Mesia washilaumu?

[Chipich chidia pa paj wa 15]

Kwandam kwa Yesu nich katumbu mu Yerusalem kwawanyisha uprofet ik?

[Chipich chidia pa paj wa 17]

Yesu wafil mulong wa yitil yetu, pakwez ukat kuyikel katat mudi Mwant Mesia