Awiy Ading Amuchingejin Mesia

“Pandingau achingejin,antu awonsu ading ni kwinungesh mu muchim yau mulong wa Yohan, anch palemp udi Mesia.”—LUKA 3:15, TMK.

1. Ov, chijikish ik cha mwangel chateshau kudi atufung?

UCHUKU, atufung ading pol, alamin yisak yau ya amikoku. Awiy ova wom mud ik pamanau mwangel wa Yehova wiminy piswimp nau ni uyaj wa Nzamb uyimunyikin! Tesh! Mwangel ulondin mu mutapu wamushena anch: “Likany kwov wom, mulong talany bil, nakuletilangany jinsangu ja musangar ujim ukeza kwikal kudi antu awonsu, mulong, akuvadilany kal Mupandish pa dichuku dined, ndiy Kristu Mwant” ndiy ukez kwikal Mesia. Atufung akutwish kumutan mwan ulel mwindond yikatau kuyidishil anam mu ul wadinga piswimp. Kukashimuk, “chisak chijim aruu a mwiur” chasambish kumushiman [Yehova] ni kulond anch: “Chifanyidin apana uyaj kudi Nzamb mwiur, ni chisambu chikala pansh kudi antu akatilay.”—Luka 2:8-14.

2. Ov, dizu “Mesia” dirumburikin ik ni mutapu ik watwishau kumujingunin?

² Atufung afanyina kwiyipul anch, ‘Ov, Mesia udi nany?’ Pakwez, atufung in Yuda ijika ach dizu “Mesia” diading dirumburikin “Uzizidilau many.” (Kub. 29:5-7) Chad mutapu ik watwishau kwitiyij antu akwau anch mwan wisambinau kudi mwangel ukez kwikal Mesia watondau kudi Yehova? Kusutil ku kushinshikin uprofet udia mu Mikand ya in Hebereu ni mu kwisikesh yom yiney nich mijikit ni mwom wa mwan winou.

Ov, Mulong wak Antu Ading Akat Kuchingel?

3, 4. Ov, mutapu tuteshina kurumburik kwa Daniel 9:24, 25?

³ Pamanay Yohan Mubabatish kupwa kwa mivu kanang, mazu ni yisal yend yayibachika antu amwing ku kwiyipul anch Mesia washikin kal. (Tang Luka 3:15.) Antu amwing akutwish kutesh nawamp kurumburik kwau uprofet wa Mesia ulejena piur pa “mbing makum sambwad.” Anch chidi mwamu, awiy ela kumekesh chisu chikezay kumekan Mesia. Chikwau kand, uprofet winou walejana anch: “Kudiokal chisu chalejanau anch, chifanyidin kusambish kutungiril Yerusalem, djat ni chisu chikushikay Uzizidilau Many, ndiy Mwin Kutakel watondau kudi Nzamb, mivu sambwad tupamp sambwad yikez kasut.” (Dan. 9:24, 25) In kwilej avud akat kwitiyij anch jimbing jinej jisambidin uvud wa mivu. Chawiy lel, mu Mukand wa Nzamb afundin anch: “Mivu sambwad tupamp sambwad yikez kasut.”

⁴ Nlel unou, atushalapol a Yehova ij anch ambing 69, ap mivu 483, yidia mu Daniel 9:25 yasambisha mu muvu wa 455 K.C.C. pamwinkishau Nehemiy mbil ya kutungiril Yerusalem kudi Mwant Aritaserisis wa in Peris. (Neh. 2:1-8) Jimbing jinej jashika kwinsudiel kwinyim kwa mivu 483, mu muvu wa 29 C.C., pamubatishau Yesu wa ku Nazaret ni kumuzizil many, chawiy chasala anch ikala Mesia.—Mat. 3:13-17.a

5. Ov, uprofet ik tukeza kushinshikin katat?

⁵ Shinshikinany amboku uprofet ukwau ukemp pakach pa uprofet uvud piur pa Mesia wawanyina pa kuvadik, mwom ni mudimu wa kulejan wa Yesu. Chinech chikez chakin kamu kukasikesh ritiy retu mu dizu dia uprofet dia Nzamb. Ukez kumekesh kand patok anch Yesu wading chakin kamu Mesia wading uchingedinau chisu chilemp.

Atakela Kulejan Piur pa Mwom Wend

6. Rumburil mutapu wawanyina Disambishil 49:10.

⁶ Mesia wafanyidina kuvadikin mu muchid wa in Isarel wa in Yuda. Padingay ni kuyiyukish anend kurutu kwa kufa Jakob wabwaka anch: “Diland kidikez kadiokalap kudi Yuda, ap mukombu wa want kiukudiokalap pakach pa a majuku mend, ching ni pakwezilay mwin mukombu, ndiy ukez kaziyilau kudi antu.” (Dis. 49:10) In kwilej avud a pasak amasadila mazu minam piur pa Mesia. Kusambish nich kuyikel kwa Mwant David wa in Yuda, diland ap ukaleng wa want ni mukombu wa want wading mu muchid wa in Yuda. Dizu ‘Silo’ ap “mwin mukombu” dirumburikin ‘ndiy ukweta mbil.’ Dijuku dia ant in Yuda diela kusudil padiay ‘Silo’ mudi mwin kunswan want wa rawonsu, mulong Nzamb wamuleja Sedikias mwant wa nsudiel wa in Yuda anch wintakel winou akez kuupan kudi muntu ukweta mbil. (Ezek. 21:26, 27) Kupwa kwa Zedekiya Yesu wading umwing kusu wa mu dijuku dia David wakanau want. Kurutu kwa Yesu kuvadik, mwangel Gaburiel wamuleja Mariy anch: “[Yehova] Nzamb ukez kupan nkwas ya tatukwend David kudia ndiy, ukez kuswan piur pa chikumbu cha Jakob chikupu.” (Luka 1:32, 33, TMK) Silo wafanyidina kwikal Yesu Kristu, wadinga mwan wa Yuda ni wa David.—Mat. 1:1-3, 6; Luka 3:23, 31-34.

7. Ov, kwisu kwavadikinay Mesia, ni mulong wak chinech chidi cha usey?

⁷ Mesia wafanyidina kuvadikin mu Betlehem. Muprofet Mika wafunda anch: “Ey, ul wa Betlehem Eferata, ey udi kau kakemp mwi ngand ya Yuda, mukach mwa antwey nikez kamubudish mwin kutakel wa in Isarel, ukez kikal wa dijuku dia pakur.” (Mike 5:2) Mesia wafanyidina kuvadikin mu Betlehem, ngand ya Yuda yadinga yitazukinau anch Eferat. Ap anch Mariy makwend a Yesu ni Josef tatukwend wamulila, ashakama mu Nazaret, chijil cha in Rom cha kufundish majin chasala anch aya ku Betlehem, kwawiy kwavadikinay Yesu mu muvu wa 2 K.C.C. (Mat. 2:1, 5, 6) Kudi kuwanyin kukash mud ik kwa uprofet!

8, 9. Ov, chom ik chatakelau kulejan piur pa kuvadik kwa Mesia ni yinship yilondwilaku?

⁸ Mesia akez kumuval kudi changadim wakad kumwijik ikundj. (Tang Isay 7:14.) Dizu dia Hebereu bethu·lahʹ dirumburikin “wakad kumwijik ikundj,” pakwez dizu dikwau (ʽal·mahʹ) didi mu Isay 7:14. Mwabwakau anch “changadim mujik [ha·ʽal·mahʹ]” ukez kuval mwan. Dizu ʽal·mahʹ asadila kand dizu dined pisambinau piur pa Rebeka kurutu kwa uruw wend. (Dis. 24:16, 43) Ku usu wa spiritu, Mateu wasadila dizu dia Grek mulong wa kujimbul “wakad kumwijik ikundj” (par·theʹnos) palejanay anch Isay 7:14 wawanyina pa kuvadik kwa Yesu. Rusangu Ruwamp ra Mateu ni Luka rilejen anch Mariy wadinga wakad kumwijik ikundj wimisha ku ukash wa spiritu wa Nzamb.—Mat. 1:18-25; Luka 1:26-35.

⁹ An akemp akez kuyijip kupwa kwa kuvadik kwa Mesia. Chidi chilik chimwing ni yashikena pasutin kal mivu chitot, papanau mbil kudi Farao wa Idjibit anch ayidjibula an amakundj awonsu a in Hebereu mu wit wa Nil. (Kub. 1:22) Mulong chimeken anch mu Jeremiy 31:15, 16, mulejenau Rechel ukat kudil mulong wa anend asendau “mwin ngand ya akankuny.” Madil mend amatesha djat ni ku Rama, mwin ngand ya Benjamin kwindum kwa Yerusalem. Mateu ulejen anch mazu ma Jeremiy mawanyina pa chisu chaletay Mwant Herod mbil ya kuyijip an amakundj adinga mu Betlehem ni mu jingand jadinga kuns. (Tang Mateu 2:16-18.) Tongin bil pa mar madinga mwin ngand yiney!

10. Rumburil mutapu ik wawanyinay Ozey 11:1 piur pa Yesu.

¹⁰ Mudi in Isarel, Mesia Akez Kumutazuk Kudiokal mu Idjibit. (Ozey 11:1) Kurutu kwa Herod kulet mbil ya kujipan, mwangel umwing wayitakela Josef, Mariy ni Yesu chakwel aya mu Idjibit. Ashala kwinikwa “djat ni pafilay Herod, chom chinech chamekesha mulong wa kuwanyish mazu malonday [Yehova] kudi muprofet wend [Ozey] anch: ‘Namutazuka mwanam kudiokal ku Idjibit.’” (Mat. 2:13-15) Chakin kamu, Yesu amwinend kelap kusal anch yom yawonsu yabwakau piur pa kuvadik ni mwom wend yisadika.

Mesia Wasambisha Kusal Mudimu!

11. Mutapu watenchikau kurutu kwez kwa Uzizidilau Many wa Yehova?

¹¹ Arijeka njil mulong wa Uzizidilau Many wa Nzamb. Malakiy wabwaka anch “[muprofet] Elija” ukez kusal mudimu winou, kukarumun michim ya antu mulong wa kwez kwa Mesia. (Tang Malakiy 4:5, 6, NW.) Yesu amwinend walejana anch “Elija” winou wadinga Yohan Mubatish. (Mat. 11:12-14) Ni Marko walejana anch mudimu wa Yohan wawanyisha mazu ma uprofet ma Isay. (Isay 40:3; Mar. 1:1-4) Yesu katenchikap amwinend yom chakwel Yohan asala mudimu mudi wa Elija mudi mwing kumutakel. Mujikit wa “Elija” winou wasambelau kulejan ausala kwambatan nich rusot ra Nzamb chakwel amujingunina Mesia.

12. Ov, mudimu ik wakwasha kumujingunin Mesia?

¹² Mudimu wapanay Nzamb ukwashin kumujingunin Mesia. Mu sinagog wa ku Nazaret, mu ul mwapaminay, Yesu watanga mu muvungur wa Isay ni walejana anch mazu minam mawanyidin piur pa amwinend anch: “Spiritu wa [Yehova] udi padi am, mulong ndiy wanzizidil kal many, anch yileja atuzwendj jinsangu jiwamp, ndiy wantuma am kuyilej apitilau ya kuyikol, ni mwakupanyin mes kudi amputames, ni kuyikol alaminau, ni kulejan mivu yitiyijay [Yehova].” Mulong ndiy wading chakin kamu Mesia, Yesu walonda anch: “Yom yiwateshangany mu mukand wa Nzamb yawanyin kal ilel unou.”—Luka 4:16-21.

13. Ov, mutapu ik atakelau kulejan piur pa kusambish kwa mudimu wa kulejan patok wa Yesu mu Galileya?

¹³ Abwaka kand kusambish kwa mudimu wa patok wa Mesiamu Galileya. Piur pa “ngand ya Zabulon ni ngand ya Nefitali . . . Ngand kand ya Galalia mushichau in michid yikwau,” Isay wafunda anch: “Antu ading ni kwendil mu mididim amana kutok kujim. Antu ading ashich mwi ngand ya mididim yikash, chimunyik chayimunyikina awiy.” (Isa. 9:1, 2) Yesu wasambisha mudimu wend wa patok mu Galalia, washakama mu Kapernaum, mwinimwa antu avud adinga mwin ngand ya Zabulon ni ngand ya Nefitali asangera yiyukish ya chimunyik cha muspiritu chatambulau kudi ndiy. (Mat. 4:12-16) Mu Galalia, Yesu wasala diskur diend diamushena pa Mukandu, wayitonda atwimbuy end, wasala chilay chend cha kusambish, kupwa wamekana kudi in kwilej end 500 kupwa kwa kuvumbuk kwend. (Mat. 5:1–7:27; 28:16-20; Mar. 3:13, 14; Yoh. 2:8-11; 1 Kor. 15:6) Chawiy lel, ndiy wawanyisha uprofet wa Isay kusutil kulejan mwin “ngand ya Zabulon ni ngand ya Nefitali.” Chakin kamu, Yesu walejana uruw wa Want ndond yawonsu mu Isarel.

Mijikit Yikwau Yasambelau Kulejan ya Mesia

14. Ov, mutapu ik wawanyina Kuseng 78:2 piur pa Yesu?

¹⁴ Mesia Wafanyidina Kulond mu Yishimu ap mu yilakej. Nfund-a- kuseng Asaf wawanga anch: “Nikulond nich yishimu.” (Kus. 78:2) Ov, mutapu ik twija anch uprofet winou wawanyina piur pa Yesu? Mateu utulejin mwamu. Kupwa kwa kulejan yishimu mwafanikechay Yesu Want nich kupam kwa ritand ra mutard rijimbina ni nich chivish, Mateu ulondin anch: “Kayilejap [Yesu] chom wakad kuyitil yishimu, ndiy wasala mwamu chakwel mawanyina mazu malonday muruu wa Nzamb anch: ‘Nikez kayilejin mu yishimu, nikez kayilej yom yakad kwijikan kudiokal ku disambishil dia mangand.’” (Mat. 13:31-35) Yesu wading ukat kusadil jinswir ap yishimu mu kulejan kwend.

15. Lejan mutapu wawanyina Isay 53:4.

¹⁵ Ulim wetu afanyina kuusend kudi Mesia. Isay wabwaka anch: “Chakin kamu, wasenda mar metu, ni kwitwik chisend cha kusansan kwetu.” (Isay 53:4) Mateu walonda yiney kupwa kwa kumwok mawenend a Pita, Yesu wayoka antu akwau mulong “wa kuwanyish mazu malonday Isay, muruu wa Nzamb, anch: ‘Ndiy amwinend wadiosha kuziy kwetu, woka kand mayej metu.’” (Mat. 8:14-17) Riner ridi rusangu rumwing pakach pa jinsangu jivud jafundau mulong wa ayej okau kudi Yesu.

16. Ov, mutapu ik wamekeshay kambuy Yohan anch Yesu wawanyisha Isay 53:1?

¹⁶ Chikalap nchik yom yawonsu yiwamp yasalay Mesia, antu avud kamwitiyijap. (Tang Isay 53:1.) Palejanay anch uprofet winou wawanyina, kambuy Yohan wafunda anch: “Ap anch wasalap nchik yilay yiney yawonsu mukach mwau, awiy alika kumwitiyij; yom yiney yamekana chakwel mazu malonday Isay, muruu wa Nzamb mawanyin anch: ‘Ov, N’salej [Yehova] nany witiya rusangu rutwalonda? Ov, N’salej [Yehova] wamekesha ukash wend kudi nany?’” (Yoh. 12:37, 38) Pakwez, antu akemp ateka ritiy mu rusangu ruwamp piur pa Yesu, Mesia, mu mudimu wa kulejan wa Paul.—Rom 10:16, 17.

17. Ov, mutapu ik wasadilay Yohan mazu madia mu Kuseng 69:4?

¹⁷ Mesia akez kumukis pakad mulong. (Kus. 69:4) Kambuy Yohan wafunda mazu malonday Yesu anch: “Anch am kinasalap yom mukach mwau [antu] yakad kal kusalangap kudi muntu mukwau, ing kakwetap kwau chitil, pakwez katat awiy amen kal yisalijok yam, chad ankis kal am ni Tatukwam. Pakwez yom yiney yamekana mulong wa kuwanyish yom yafundau mu Yijil yau anch: ‘Awiy ankisa am wakad mulong.’” (Yoh. 15:24, 25) Yisu yivud “Yijil” yirumburikin Bibil mwawonsu. (Yoh. 10:34; 12:34) Rusangu ruwamp rimekeshin anch amukisa Yesu, pakampwil kudi antakel in Yuda. Chikwau kand, Kristu walonda anch: “Antu a pa mangand kakwetap kwau mulong wa kukukisinany en, pakwez akat kwinkis am, mulong nikat kuyilejang anch, yisalijok yau yidi yiyimp.”—Yoh. 7:7

18. Ov, yom ik yikwau yitufanyidina kushinshikin yikeza kukasikesh ukashinsh wetu wakwel anch Yesu udi Mesia chakin kamu?

¹⁸ In kumulondul Yesu a mu mivu chitot ya kusambish ading ij nich kashinsh anch Yesu wading Mesia, mulong ndiy wawanyisha uprofet wa Mesia wafundau mu Mikand ya Hebereu. (Mat. 16:16) Mudi mutwamena, uprofet umwing pakach pa winou wawanyina chisu chadingay pa divu, ni mu mudimu wa kulejan wa Yesu wa Nazaret. Uprofet ukwau wa Mesia akez kuushinshikin mu mutu wa mulong ulondwilaku. Kutongijokin kwetu mu malembil pa milong yiney kukez kukasikesh chakin kamu ruchingej retu anch Yesu Kristu udi chakin kamu Mesia watondau kudi Tatukwetu wa mwiur, Yehova.

[Dizu didia Kwishin kwa paj]

Ov, Mutapu ik Ukutwisha Kwakul?

• Ov, uprofet ik wawanyina piur pa kuvadik kwa Yesu?

• Ov, mutapu ik warijekau njil kurutu kwa kushik kwa Mesia?

• Ov, mazu ik ma uprofet madia mu Isay shapitre wa 53 mawanyina padiay Yesu?