Amapal Ayidiburil, ni Kuyimesh Mar
MUD mwadiay uyinyigumukin, nzamu umwing wanenganana nakash mulong wa chom chipandakena kuyip chamanay. Ndiy, wamana yital yaad yilel pol pa chikumbu chimwing cha etaj chiwamp—ambay a uruw amapal amatikina pa dididish kudiokal ku etaj wa chinan. Ap anch kwijip kwau kwaleta runeng nakash, chitong chayibachika ijipa chaleta kand runeng rupandakena. Mukand watanau mu dibeng dia ikundj walonda anch: “Twijip kal chidi mulong wa kutumesh mar ni yisal ya chisum yitusadilay mwanetu ikundj ni mukajend.”
Rusangu riner rikutwish kwikal rakad kwovikan, pakwez mulong winou uletin kanrumbangesh ndond yawonsu. Chakin, kuyimesh amapal mar kupalangen pa mangand mawonsu. Shinshikin yilondwila ey:
• Mu kukimbijol kumwing kwasadika, amapal 4 pa chitot a mu Canada alonda anch ading ni kuyimesh mar—chisu chivud kud muntu wa mu dijuku diau. Pakwez, amapal avud oviling usany nakash ap oviling wom nakash wa kulond piur pa mikadil yau yiyimp. Ansil alondin anch, uvud wakin ukutwish kwikal wa amapal 10 pa chitot.
• Jurnal India Today ulondil anch: “Mwishin mwa kumekan kwa majuku makash, muchid wa Inde, uziyil mulong wa kuvulijan kwa amapal akisinau kud anau.”
• Kwambatan nich kushinshikin kwasadika, Ditenchik dia Ngand Ditadila Milong ya Kuyimesh Amapal Mar dilondil anch: “Pakach pa miliyon 1 ap 2 a in Amerik a reng ra mivu 65 ni kuya kurutu ayirumbukina, ayiya, ap mu mitapu yindjing ayimesha mar kud muntu wadia uchingejidinau kuyilam ni kuyichidij.” Depite umwing wa mu distrik dia San Diego, mu Californie, utazukin chisal cha kuyimesh amapal mar mud “umwing wa milong yikash yirishina nich chijil nlel.” Wawejina kand anch: “Nimen anch mulong winou ukujimb nakash ku mivu yezinaku ey.”
• Kudi kwiyakamish nakash mu musumb wa Canterbury, mu Nouvelle-Zélande, mulong antu a dijuku ayimen amapal kwikal diloz mulong wa mapit mau—pakampwil kud in akweta milong ya kuna mon ya kuleushan, mar, ap in kusengan masengan ma nfalang. Uvud wa milong ya kuyimesh amapal mar mu Canterbury wapandakana nakash kudiokal ku milong 65 mu muvu wa 2002 kushik ku milong 107 mu muvu wa 2003. Mukurump utakedila mudimu wa ditenchik dimikau mulong wa kukangesh yisal yiney ya kuyimesh amapal mar ulondil anch uvud winou udi kwau “ukemp nakash kwilikej nich uvud wakin wa amapal ameshinau mar.”
• Jurnal umwing (Japan Times) ulondil anch, Ditenchik dia in Kwilej Yijil dia mu Japon diayula anch “amapal ameshinau mar aswiridin kuyibangin nakash kupandakanamu mutapu ukatau kumubangin mwan umeshinau mar ap yisal yikwau ya chisum yidinga mu majuku.” Ov, mulong wak? Jurnal Times ulondil anch, diyingish dimwing didi anch, “mu kwilikej nich mar mamumeshiningau mwan ap mband, mar ma amapal makatap kwijikan swa, chisu chimwing chiding mulong ipal ukat kwiyov kwikal musul wa yisal ya chisum pakampwil anch anend awiy amumeshina mar, ni chiding kand mulong guvernema ni winyikel wa pol pau yikangeny kupwish mulong winou.”
Yilakej yiney yikemp yilejena yisadikina mu mangand yitushikijin ku kwipul anch: Ov, mulong wak ukatau kuyidiburil amapal avud ni kuyimesh mar? Ov, kudi ruchingej ra kwel anch yom yikez kukarumuk? Rongoj ik ridiaku mulong wa amapal?