Yehova Ulejen “Kudiosh Pa Kusambish Yom Yikeza Kamekan Kurutu”

“Kudiosh pa kusambish nakulejany yom yikeza kamekan kurutu. Nakulejanya pakur yom yikeza kez.”—ISAY 46:10.

1, 2. Chom ik chishimokishina piur pa kuwa kwa Babilon, ni yilejen ik piur pa Yehova?

AMASALAY akankuny eza pa uchuku mud ij kusutil mu Wit Efrat kuya ku diloz diau, dia kwandam mu musumb wa dikand wa Babilon. Amana chom cha kushimok, padingau ni kushej ku chis cha musumb. Chis chijim cha rubumb ra Babilon chadinga cha wash! Patuntukau kal mu wit, andama kapamp kamwing mu musumb. Akwata musumb pakad kulab. Kapamp kamwing Sirus mwin kupandakan, wayikela ngand yakwatau ni kupwa waleta mbil ya kuyilikishaku in Isarel adinga mu uyong. Tunan twa aswik twachirika kwol kwau mulong wa kuchirish difukwil dia Yehova mu Yerusalem.—2 Jinsangu 36:22, 23; Ezra 1:1-4.

² Katat in kwilej jinsangu ja pakur, itiyijin yishiken yiney yasadika mu muvu wa 539-537 kurutu kwa chirung chetu. Chom chishimokishina chidi anch yishiken yiney yadinga yijiken kurutu kwa mivu 200 anch yikez kusadik. Yehova wamutakela muprofet wend Isay nich mwiku utumbila chakwel kushimunin kurutu kwa muten kuwa kwa Babilon. (Isay 44:24–45:7) Nzamb kijikishap ching kusu ngikadil yikeza kushikij ku kuwa kwa Babilon pakwez wajimbula kand ni dijin dia kalal ukeza kuukwat musumb winou.a Yehova wayileja in Isarel adinga atuman end pakur anch: “Vurikany yom yinasala pakur. Itiyany, anch yam kusu Nzamb, kwikil mukwau mudi am. Kudiokal pa kusambish nakulejany yom yikeza kamekan kurutu. Nakulejanya pakur yom yikeza kez.” (Isay 46:9, 10a) Chakin kamu Yehova udi Nzamb ukutwisha kwijik yikeza kez kurutu kwa muten.

3. Tukushinshikin katat yakul ya yipul ik?

³ Yom yinch yikeza kez yijay Nzamb? Ov, wijing kurutu kwa muten yikezay kusal umwing ni umwing wetu? Ov, chakin kamu, dikez dietu aditenchika kal? Tukushinshikin yakul ya Bibil ku yipul yiney ni ku yipul yikwau pa mulong winou mu mutu wa mulong winou ni wambakedinap.

Yehova Udi Nzamb wa Uprofet

4. Nany Musul wa uprofet wafundau mu Bibil?

⁴ Yehova wayinkisha atushalapol end a pa muten wafundau Bibil mwiku utumbila chakwel afunda uprofet uvud, ututwishishina kwijik kurutu kwa muten yatonginay Yehova kusal, mulong ndiy wijing yikeza kez. Yehova walonda anch: “Yom yinalonda pakusambish katat yamekan kal. Katat nikukulejany kand yom yisu yikeza kamekan kurutu.” (Isay 42:9) Chakin kamu antu a Nzamb itapidil dilau!

5. Chisend ik chezininga pamwing nich kusambel kwijik kurutu kwa muten yikezay kusal Yehova?

⁵ Mu uprofet wa Amos atulejin anch: “[ Yehova] Nsalejetu kakat kusalap chom wakad kuyijikish atushalapol end [aprofet].” Kusambel kwijik yom kwinoku kukwet chisend. Shinshikin chilakej cha usu chisadidilay Amos: “Ov, ntambu anch wadil, nany ukulika kwov wom?” Mud kamu kudil kwa ntambu kukat kumuzadish pakad kulab muntu ni nnam udia piswimp, chawiy aprofet mud Amos itiyija yilondilay Yehova pakad kulab. “Anch [Yehova] Nsalejetu walond, nany ukulika kulejan mazu mend?”—Amos 3:7, 8.

Chakin Kamu “Dizu” dia Yehova ‘Diasala Yom Yawonsu’

6. Mutapu ik wawanyina “kutenchik” kwa Yehova piur pa kuwa kwa Babilon?

⁶ Yehova walonda, kusutil kud muprofet wend Isay anch: “Kutenchik kwam kukutwishap kuyip, chad nikuwanyish yom yawonsu mudi mudia rusot ram.” (Isay 46:10b) “Kutenchik” kwa Nzamb, rawiy rusot rend ap rutong rend mud muradinga pakur piur pa Babilon, mu rusot riner mwadinga kand kumutazuk Sirus kudiokal ku Peris mulong wa kwez kukwat ni kuwish Babilon. Yehova walejana rusot riner kurutu kwa muten. Mud mutwalondang kal, pakad kukangany rusot rend rasadika mu muvu wa 539 kurutu kwa chirung chetu.

7. Ov, mulong wak tufanyidina kwitiyij anch “mazu” ma Yehova makat kusadik kamu?

⁷ Piswimp mivu yitot yinying kurutu kwa Sirus mwin kukwat Babilon, Josafat Mwant wa in Yuda warisha njit ni amasalay a in Amon ni in Mowab. Walembila nich ruchingej anch: “[ Yehova], Nzamb wa angakiriletu, ov, kiyeyap Nzamb udia mu maur? Ov, komb kiyeyap uyikedila mant mawonsu ma in mangand? Usu ni dikand yidi mu makas mey kwikil ukutwisha kukukasiken ey.” (2 Jinsangu 20:6) Isay niyend wamekesha ruchingej rawiy rimwing palonday anch: “[ Yehova] Mwin Dikand watenchikin kal yom yikusalay. Chikas chend chid kal piur, kwikil umwing ukutwisha kumukangesh.” (Isay 14:27) Mwant Nebukadinezar mwin Babilon, pachirishay manangu mend witiyija nich kwikepish anch: “Kwikil muntu ap umwing ukutwisha kumukangesh [Nzamb] kusal mudi musotilay, ap ukutwisha kumurumburish ku yom yisadilay.” (Daniel 4:35) Chakin, Yehova uyinkishin antwend kashinsh anch: “Mazu mam, kimakutwishap kukangany yom yinatenchika kal. Mazu mam makez kasal yom yawonsu mudi munalonda.” (Isay 55:11) Tufanyidin kwikal nich ruchingej rikash anch “dizu” dia Yehova dikat kusadik kamu. Rusot ra Nzamb rikat kusadik kamu.

‘Chitongijok cha Chikupu’ cha Nzamb

8. ‘Chitongijok cha chikupu’ cha Nzamb chom ik?

⁸ Mu mukand wend wayifundilay in Kristu a ku Efes, kambuy Paul wisambina piur pa Nzamb mud ukwet ‘chitongijok cha chikupu.’ (Efes 3:11) Kwinoku kudiap kwau kutenchik kwa chamwamu, mud anch Nzamb wafunda kal mutapu ukusalay mudimu. Pakwez, udi mupak wa Yehova wa kuwanyish yatongay kwisambishil mulong wa antu ni mulong wa divu. (Disambishil 1:28) Chakwel kutukwash kutesh anch rutong rend rikukanganyap, tushinshikinany uprofet wa kusambish wafundau mu Bibil.

9. Disambishil 3:15 ukwatin ku rusot ra Nzamb mutapu ik?

⁹ Kushilamu kudia ku Disambishil 3:15 kulejen anch kupwa kamu kwa Adam ni Eve kusal chitil, Yehova walejana anch mukajend wa chifanikesh ukez kuval mbut, ap anch mwan ikundj. Yehova wasambela kuman kand chibudikin cha ukankuny pakach pa mukajend ni Satan ni pakach pa mbut jau. Ap anch Yehova walikina Mbut ya mband wa Nzamb ayisuma ku kapolantundu, pa chisu chifanyidina cha Nzamb, Mbut ya mband yikez kumuchany nnak ku mutu, ap anch Satan Djabul. Pa chisu chawiy chimwing, rusot ra Yehova pakad kukangany raya kurutu mu yizaz yatonday djat ni pamekenay Yesu mud Mesia washilayimu.—Luka 3:15, 23-38; Galatia 4:4.

Chatonday Yehova Kurutu kwa Muten

10. Ov, Yehova wasambela kutenchik yom kurutu kwa muten anch Adam ni Eve akez kusal chitil? Rumburil.

¹⁰ Kambuy Pita pisambinay piur pa mwaz wa Yesu mu rusot ra Nzamb wafunda anch: “Ndiy [ Yesu] amutondila kal ku chinech padingau mangand kamatangilip kal, pakwez amumekesha kwinyim kwa machuku mulong wenen.” (1 Pita 1:20) Ov, Yehova wasambela kutenchik yom kurutu kwa muten anch Adam ni Eve akez kusal chitil ni anch Yesu Kristu ukez kuswiriken chakwel apana chakupesh cha difut? Bwat. Dizu dia Ugrek dikarumwinau ‘mufulandal’ dirumburikin dizu ku dizu “kukun [mbut].” Ov, kwikala “kukun mbut,” ap anch Adam ni Eve avala mwan kurutu kwa kusal chitil? Bwat. Adam ni Eve asambisha kuval kupwa kwa chisal chau cha kubwambwil. (Disambishil 4:1) Chawiy, kupwa kwa kubwambwil pakwez kurutu kwa Adam ni Eve avala mwan, Yehova wasambela kwisambin “mbut.” Rufu ni kuvumbuk kwa Yesu yatwishisha ditenchik dia rukat dia difut, chawiy chitil akez kuchijiyish ni usu usadinay Satan ukez kukangany.—Mateu 20:28; Hebereu 2:14; 1 Yohan 3:8.

11. Chom ik chatonday Yehova kurutu kwa muten piur pa rusot rend?

¹¹ Nzamb watonda kand kurutu kwa muten kuya kurutu kukwau mu kusadik kwa rusot rend. Chawiy chalejanay Paul payifundilay in Efes, anch Nzamb ukez “kukumangej yitang yawonsu ya mwiur ni ya pansh, chad ukez kumutek Kristu kwikal Mwant.” Kupwa, pisambinay “yitang yawonsu ya mwiur,” awiy antu atondau kwikal answan pamwing ni Kristu, Paul warumburila anch: “Pakur Nzamb watutonda kal etu kwikal answan end, mud mwadinga kutenchik kwend, ni kutond kwa rusot rend. Mwamu mukat kusalay yom yawonsu.” (Efes 1:10, 11, MM) Mwaning, Yehova wasambela kutond kurutu kwa muten anch uvud kanang wa antu akez kwikal chikunku cha Mbut ya mband wa Nzamb ni akez kusal pamwing ni Kristu mu kupan yiyukish ya difut. (Rom 8:28-30) Kambuy Pita wisambina antu inay mud “muchid utumbila.” (1 Pita 2:9) Kambuy Yohan witapila dilau dia kwijik mu chishimushimu uvud wa antu inay akeza kwikal answan pamwing ni Kristu antu—144 000. (Kujingunik 7:4-8; 14:1, 3) Pamwing ni Kristu mud Mwant, awiy asadil ‘mulong wa uyaj wa Nzamb.’—Efes 1:12-14.

12. Ov, mutapu ik twija anch muntu ni muntu wa antu 144 000 kamutenchikinap yom kurutu kwa muten?

¹² Kusambel kuyitond antu 144 000 kurumburikinap anch antu akwau ayitenchikina yom kurutu kwa muten chakwel kumusadil Nzamb mu kushinshaman mu mutapu winou. Chakin kamu, chiyul chidia mu Mifund ya Ukristu ya Ugrek achifunda cha kusambish mulong wa kuyitakel nich ni kuyikasikesh azizidilau many chakwel alama kushinshaman ni kwilam afanyidina kutazuk kwa mwiur kwayitazukau. (Filip 2:12; 2 Tesalonik 1:5, 11; 2 Pita 1:10, 11) Yehova wading wij kurutu kwa muten anch, antu inay 144 000 akez kuwanyish yitinay mulong wa rusot rend. Chikezau kwikal antu inay atazukinau chimedin pa mulad wa mwom wa muntu ni muntu, ni pa mupak ukwatinay muntu ni muntu amwinend.—Mateu 24:13.

Chijay Yehova Kurutu kwa Muten

13, 14. Ukaliweny wa Yehova wa kwijik ya kurutu ukwatijadin ni chom ik, ni mulong wak?

¹³ Mulong Yehova udi Nzamb wa uprofet ni rutong, ov, mutapu ik ukatay kusadil ukaliweny wend wa kwijik yom ya kurutu? Cha kusambish, atushinshikidin anch jinjil jawonsu ja Nzamb jidi jakin, jitentamina ni ja rukat. Payifundilay in Kristu in Hebereu mu mivu chitot ya kusambish, kambuy Paul washinshikisha anch kuchip ni kushilamu kwa Nzamb “yom yiney yaad, chikangen kudi Nzamb kudimban.” (Hebereu 6:17, 18) Mu mukand wend wamufundilay Titus, Paul wamekesha kand chitongijok chinech, pafunday anch Nzamb “wakad kutwish kudimban.”—Titus 1:2.

¹⁴ Chikwau kand, ap anch Yehova ukwet dikand dipandikena, kakatap kusal yom yakad kutentam. Moses warumburila anch Yehova udi “Nzamb ujijamena, kakwetap kuyip, udi mwin kutentam ni mwin kuying.” (Kuvurik Yijil 32:4) Chom chin chawonsu chikatay Yehova kusal chikwatijadin ni untu wend ushimokishina. Yisal yend yilejen kuwanyin kukwatijadina ni ngikadil yend yijim yinying: rukat, manangu, kutentam ni dikand.

15, 16. Kutond ik kwatekay Yehova kurutu kwa Adam mu chir cha Eden?

¹⁵ Tushinshikinany mutapu wamekeshay ngikadil yiney yijim mu yom yashikena mu chir cha Eden. Mud Tatuku mwin rukat, Yehova wayinkisha antu yom yin yawonsu yadingau nich kuswir. Wamwinkisha Adam ukaliweny wa kutong, kutongijok mutapu uwamp pa yom, ni kukwat mupak. Chinyim nau annam, akad manangu, Adam wadinga nich ukaliweny wa kutond. Chibudikin cha yom yiney chadinga anch patalay Nzamb pansh kudiokal mwi nkwas yend ya mwiur, ndiy wamana anch “yom yawonsu yatangay, ni kuyital yading yiwamp kamu.”—Disambishil 1:26-31; 2 Pita 2:12.

¹⁶ Yehova wamwinkisha Adam mbil ya kulik kudia “dibuj dia mutond ou wa ronganyin ra kuwap ni kuyip,” Nzamb wamwinkisha yijil yifanyidina chakwel Adam atwisha kukwat mupak wa yom ya kusal. Wamuleja Adam kudia “mabuj ma mitond yawonsu ya mu chir” ni wamujidika umwing kusu ni wamubabesha piur pa yibudikin ya rufu anch wadia dibuj dia mutond wamujidikau. (Disambishil 2:16, 17) Wamuleja Adam patok yibudikin ya yisal yend. Ov, chom ik chelay kusal Adam?

17. Ov, mulong wak tukutwisha kulond anch Yehova ukat kutond yisotinay kwijik kurutu kwa muten?

¹⁷ Chimeken patok anch Yehova katondap chakwel asambela bil kuman chikusalay Adam ni Eve, ap anch Ndiy ukwet ukaliweny wa kwijik kachom ni kachom kurutu kwa muten. Chawiy chipul, chidiap anch Yehova ukutwish kwijik yikusadika ku muten wa kurutu, pakwez chidi cha kwijik anch utondin kusal mwamu. Chikwau kand, tukutwish kutong anch Yehova, chidiay Nzamb wa rukat, kelap kwel ndiy wij kupwa ndiy watenchik wimbwambol winou wa chisum pamwing ni yibudikin yau yiyimp yela kushikenaku. (Mateu 7:11; 1 Yohan 4:8) Yehova, ukat kutond yisotilay kwijik kurutu kwa muten.

18. Ov, mulong wak kutond kwa Yehova yisotinay kwijik kurutu kwa muten udiap uman wa kuburen dikand ku mutambu wend?

¹⁸ Ov, kutond kwa Yehova yisotinay kwijik kurutu kwa muten kurumburikin anch kudi kuburen dikand? Bwat. Moses wamurumburil Yehova mud “diyal,” kupwa wawejinaku anch: “Mudimu wend uwanyidin.” Kadingap ni chisend mu yibudikin ya chitil cha muntu. Yibudikin yiyimp ya chitil yiturishina nich etu awonsu ilel unou yadiokala ku chisal chinech cha kubwambwil chakad kutentam. Kambuy Paul walonda patok anch: “Chawiy mudi chitil chandama mu mangand mulong wa muntu umwing, ni rufu randama mulong wa chitil, chawiy rufu rashika kudi antu awonsu mulong antu awonsu asala chitil.”—Kuvurik Yijil 32:4, 5; Rom 5:12; Jeremiy 10:23.

19. Yipul ik tukushinshikina mu mutu wa mulong wambakedinap ou?

¹⁹ Kukwatijan nich yom twisamba kal ey, twaman kal anch kwikil kuburen kutentam ku mutambu wa Yehova. (Kuseng 33:5) Pakwez, ukaliweny wa Yehova, ngikadil yend, ni yijil yend uyisadidin kukwatijan ni rusot rend. (Rom 8:28) Chidiay Nzamb wa uprofet, Yehova ukat kulejan: ‘Kudiokal pa kusambish yom yikeza kez; ni pakur yom yakad kal kusadik.’ (Isay 46:9, 10) Twilej kal kand anch ukat kutond yisotinay kwijik kurutu kwa muten. Ov, mutapu ik yitukwatina lel unou? Ov, mutapu ik tukutwisha kushinshikin mipak yetu anch yikwatijadin nich rusot ra Nzamb? Yiyukish ik tukutaninamu? Mutu wa mulong wambakedinap ou ukez kwisambin yipul yiney.

[Mazu madia kwishin kwa paj]

Ov, Ukutwish Kurumburil?

• Yilakej ik ya pakur yimekeshina uyakin wa kwel anch “dizu” dia Nzamb dikat yisu “yawonsu [kusadik] mudi” mwalonday?

• Chom ik chasambelay Yehova kulond piur pa ‘chitongijok chend cha chikupu’?

• Mutapu ik mukatay Yehova kusadil ronganyin rend ra kwijik ya muten wa kurutu?

[Chipich chidia pa paj wa 20]

Josafat wamuchingejina Yehova

[Chipich chidia pa paj wa 21]

Nzamb wasambela kulond ya rufu ni divumbuk dia Yesu

[Chipich chidia pa paj wa 22]

Ov, Yehova wasambela kutenchik kurutu kwa muten yikezau kusal Adam ni Eve?