Itudishila Akez Kuswan Divu

“Nitongidin ndond yimwing yikezau kukarumun ni kurijek nawamp. . . . Chidiap diamashik pamanch bwat, pakwez pa chisu chichidia kamu kulemp chikeza kwez, pitukeza kwikal nich diur disu ni divu disu.”—Jean-Marie Pelt, nsil mu milong ya kulam kwa yom yatangau, wa mu France.

CHIYAKAMISHINAU nich mikadil ya yitang ni ya chisak cha muntu, avud asotin kamu kuman kukarumuk kwa divu kwikal paradis. Pakwez, rusot riner ridiap kusu kwau chilat cha mu chirung cha mivu ya 21. Kudiosh kamu pakur, Bibil washilamu kuchirish kwa Paradis pa divu. Mazu malonday Yesu anch, “Itudishila akez kuswan ngand” ni “Rukat rey arusala pansh mudi mwiur,” mijiken kamu nakash mu Bibil. (Mateu 5:5; 6:10) Pakwez, nlel, antu avud kitiyijinap anch antu itudishila akez kushakam mu paradis panap pansh. Ku mutambu wa antu afila mu kan anch adi in Kristu, Paradis kakwikalakwap kand.

Jurnal La Vie ukata kubudik rubing ni rubing, urumburil mulong wak mafundish ma paradis—wa panap pansh ap wa mwiur— kakumisambinangap kand mu Katolik: “Kupwa kwa kwikal ni usu nakash pa mafundish ma Katolik mu chirung cha mivu 1900, [chitongijok cha] paradis chashadikin kal mu kukumangan kwa muspiritu, mu Mafundish ma Diarubing, mu malejan ma teoloji, ni mu mafundish ma kateshisim.” Dizu paradis adibwikidin kal mu ‘mididim yikash’ ya “mayik-yik ni kanvundangesh.” In kulejan amwing alikining kwau kudijimbul anch mulong “difanikeshin yom yivud nakash ya musangar wa panap pansh.”

Kudiay Frédéric Lenoir, nsil wa milong ya chisak wija nawamp milong ya relijon, yitongijok ya paradis yikala kal kwau “yijingidij ya kufanikesh nich.” Chilik chimwing, Jean Delumeau, mwin kwilej milong ya jinsangu ja pasak ni mwin kufund wa mikand yivud piur pa paradis, utongin anch kushilamu kwa Bibil kukezap kuwanyin mu mutapu umekena ku mes. Ufundin anch: “Ku chipul cha kwijik, ‘Yom ik yashala kal ku Paradis?’ Yitiyij ya in Kristu yiletin chakul chilondwila ech: Mulong wa divumbuk dia Mupandish, dichuku dimwing etu awonsu tukez kukwatijan ku makas ni kwimenap ayinetu chikuwanyina ruchingej retu.”

Ov, uruu wa paradis wa panap pansh uchifanyidin ni katat? Yom ik tuchingejina chakin mulong wa divu? Ov, chishimushimu cha machuku ma kurutu chifuwalel bil anch chikutwish kamu kumekan patok? Mutu wa mulong ulondwilaku ou ukez kwakul ku yipul yiney.