Mulong wak Kumujingunin Mwin Kumukangesh Kristu?

Kambuy Yohan wafunda nich ukwash wa spiritu wa Nzamb anch: ‘Wovilany kal anch mwin kumukangesh Kristu ukwez.’ (1 Yohan 2:18) Mazu minam madi kamu ma kushimok nakash! Pasutil kal yitot ya mivu antu akat kwiyipul chakwel kwijik chirumburikina mazu minam. Nany mwin kumukangesh Kristu? Chisu ik chikezay kumekan? Yom ik yikezay kusal anch washik?

DIPANG dia antu akatau kwel anch adi in kumukangesh Kristu didi dilemp nakash. Pasak, mu antu adingau ni kutazuk anch in kumukangesh Kristu mwading Ayuda, pap wa Katolik, ni ant a in Rome. Chilakej, palikay Mwant Frederick II (1194-1250) kusal kampany wa njit ja chikumbu cha nzamb, Pap Grégoire IX wamupila anch mwin kumukangesh Kristu ni kumwopat mu chikumbu cha nzamb. Pap, Innocent IV wamuswinkana Grégoire, ni ndiy wamwopata kand kapamp kakwau mu chikumbu cha nzamb. Frederick wakula anch pap Innocent ndiy mwin kumukangesh Kristu.

Kambuy Yohan ndiy kusu mwin kufund wa Bibil usadidina dizu “mwin kumukangesh Kristu.” Mu mikand yaad yikweta dijin diend, dizu dined dimekenamu tupamp tutan, mu kwisambin muntu umwing ap antu avud. Maverse mudia dizu dined madi mu dipang didia mu mushet udia pamwing ni rusangu riner. Anch twasadin maverse minam, tukutwish kuman anch mwin kumukangesh Kristu udi mwin kulond makasu ap mwin kudimban, ufanyidina kamu kushesh urund ukwetay muntu ni Kristu ni Nzamb. Chawiy lel, kambuy wayikasikesha ambay nend in Kristu anch: “Akarukat, kangal witiyijany aspiritu awonsu, pakwez yipakany aspiritu anch adi a Nzamb; mulong aprofet a makasu apalangedin kal mu mangand.”—1 Yohan 4:1.

Yesu ni yend wayibabesha piur pa akamakasu, ap aprofet a makasu, palonday anch: “Akwez kudi en ibwikil yikit ya amikoku, pakwez mukach adi atwingol ayidiany. Ukez kayijikinany ku mabuj mau [ap, midimu].” (Mateu 7:15, 16) Ov, Yesu wadinga ni kuyibabesh kand in kwilej end piur pa mwin kumukangesh Kristu wa mu chifanikesh? Tushinshikinany mutapu tukutwisha kumujingunin mukamakasu winou muyimp.