Kumujingunin Mwin Kumukangesh Kristu

MUTAPU ik ukusala mulong wa kwiking anch wij anch kudi chipupu cha mayej chijipina antu nakash ndond ushicha? Chakin anch ukusal usu wey wawonsu mulong wa kulam mujimbu wey nawamp ni kwipuk kwikal piswimp ni antu akutwisha kukusamburishin mayej. Mwamu tufanyidina kand kusal mulong wa kuchidij mwom wetu wa mu spiritu. Bibil utulejin anch mwin kumukangesh Kristu “udi kal mu mangand.” (1 Yohan 4:3) Anch tusotin kwipuk ku “chipupu,” tufanyidin kujingunin “antu achikweta” ni kuyipuk. Cha musangar, Bibil urumburil kamu patok mulong winou.

“Mwin kumukangesh Kristu” udi “muntu umulikina Kristu.” Chawiy lel, mu kurumburik kujim kwa mazu minam, in kumukangesh Kristu adi antu awonsu alikina ap afila mu kan anch adi Kristu ap antimesh end. Yesu amwinend walonda anch: “Muntu mwawonsu wakad kubombakan ni yamam, wimpompatin am [ap udi mwin kumukangesh Kristu]. Muntu mwawonsu wakad kwinkwash kuyikumangej antu, ukat kuyipalangesh.”—Luka 11:23, Manswik Masu.

Chakin, Yohan wafunda ya mwin kumukangesh Kristu pasutil kal mivu 60 kupwa kwa kufa ni kuvumbuk kwa Yesu. Chawiy, chifanyidin kutesh mutapu midimu ya mwin kumukangesh Kristu uyikwatina in kwilej a Yesu ashinshamena pa divu.—Mateu 25:40, 45.

Mwin Kumukangesh Kristu Ukat Kuyipompat in Kwilej a Kristu

Yesu wayibabesha in kwilej end anch mangand makez kuyikis. Ndiy walonda anch: “Chawiy akez kanipanany ku mar ni kunijipany. Akez kanikisany kudi michid yawonsu mulong wa kwambat dijin diam. Kukez kalank aprofet a makasu, akez kayitakel avud ku kurumbuk.”—Mateu 24:9, 11.

Mulong in kwilej a Yesu akat kuyizengol “mulong wa kwambat dijin [dia Yesu],” in kuyizengol adi chakin kamu in kumukangesh Kristu, amupompatin Kristu. Amwing pakach pa “aprofet a makasu,” adinga in Kristu, adi niyawiy in kumukangesh Kristu. (2 Yohan 7) Yohan wafunda anch: “In kumukangesh Kristu avud, adiokil kudi etu, pakwez kadingap etwetu; mulong anch ading etwetu ing ashakama ni yetwetu.”—1 Yohan 2:18, 19.

Mazu ma Yesu ni ma Yohan mamekeshin patok anch mwin kumukangesh Kristu kadiap muntu kanang pakwez chidi chisak cha antu amukangeshina Kristu. Chikwau kand, mulong adi aprofet a makasu, rusot rau ra kusambish ridi ra kuyidimb antu mu milong ya relijon. Yom ik yimwing yikatau kusadil?

Ukat Kupalangesh Makasu ma Relijon

Kambuy Paul wamubabesha mbay nend Timoteu chakwel kubabel mafundish ma in kupumbok, mudi ma Himeney (Hemenaus) ni Filet (Filetus), anch “mazu mau makez kayidia mudi chitat cha makolong.” Paul wawejinaku anch: ‘Awiy antu arumbukina kal mwi njil yakin, end alond anch disanguk diasutil kal kwau. Ayirumbwil kal akwau ritiy rau.’ (2 Timoteu 2:16-18) Chimeken mudi, Himeney ni Filet adinga ni kufundish anch disanguk diadinga chifanikesh, anch in Kristu ading ayisangula kal mu spiritu. Pakwez, ku mes kwa Nzamb, muntu ukat kushiken ku mwom anch wikal mwin kwilej wa kashinsh wa Yesu, mudi mwalonday kamu Paul amwinend. (Efesus 2:1-5) Ap mwamu, mafundish ma Himeney ni Filet madinga ni kudiburil kushilamu kwa Yesu kwa disanguk dimekena dia antu afa kal mu winyikel wa Want wa Nzamb.—Yohan 5:28, 29.

Chisak cha antu apidilau anch Ankaliweny a mayikiyik ma milong ya relijon chakudisha yitongijok ya disanguk dia chifanikesh. Chikatau kwitiyij anch ronganyin (gnoʹsis mu Grek) rikutwish kwijiken mu mutapu umwing wa mayikiyik, Ankaliweny inay asenda mafundish ma kupumbok ma Ukristu wa mu kan amabomb nich filozofi wa Agrek ni mayikiyik ma Kwingangel. Chilakej, itiyinanga anch yom yawonsu yidiaku yidi yiyimp, pa chinech, Yesu kezap nich mujimbu wa mbij pakwez wamekana kusu mudi ukwet mujimbu wa muntu. Mudi mutapu twamana kal, yiney yawiy yom yababeshinay kambuy Yohan.—1 Yohan 4:2, 3; 2 Yohan 7.

Makasu makwau, mezau kupalangesh mu kusut kwa yitot ya mivu, madi mafundish matazukinau anch Usatu utumbila, mulejenau anch Yesu udi Nzamb Mwin Dikand Diawonsu ni Mwan a Nzamb. Mu buku wend The Church of the First Three Centuries, (Chikumbu cha Nzamb cha mu Mivu Yitot Yisatu ya Kusambish), Alvan Lamson ulondin anch mafundish ma Usatu “madiokil ku musul umwing wakad kwijikan mu Mifund ya Ayuda ni ya Ukristu; mafundish minam amakasikeshina ni kumawejin ku mafundish ma Ukristu, kudi antu asambisha malejan ma Platon.” Ov, ‘antu inay asambisha malejan ma Platon’ ading anany? Adinga abishop in kupumbok adinga akwachika kal nich mafundish ma upagan ma yitongijok ya mwin Grek Platon.

Kuwejin kwa mafundish ma Usatu chadinga chisal chimwing chikash cha mwin kumukangesh Kristu, mulong mafundish minam mamumekesha Nzamb mu mutapu umwing wa mayikiyik ni mafuwalesha urund wend nend Mwanend. (Yohan 14:28; 15:10; Kolosai 1:15) Tongap bil, mutapu ik ukutwishay muntu ‘kusej piswimp kudi Nzamb,’ mudi mukasikeshinay Bibil, anch Nzamb amumekeshin mu mutapu wa mayikiyik?—Yakob 4:8.

Kuwejin ku kanvundangesh kinak, in kukarumun avud a Bibil adioshin dijin dia Nzamb, Yehova, mu mikand yau, ap anch dijin dined dimeken tupamp 7 000 ni kusut mu mifund ya kusambish! Chidi patok anch, kupakish kumukarumun Mwin Dikand Diawonsu mu chom chimwing cha mayikiyik ni wakad dijin chidi chisal chimwing cha kuburen kalimish mulong wa Sakatang wetu ni Dizu diend diafundau nich ukwash wa spiritu utumbila. (Kuburik 22:18, 19) Chikwau kand, kudiosh dijin dia Nzamb ni kudiswinkesh nich yijiken mudi Mwant ni Nzamb kudi kujiril malembil ma sampul ma Yesu, malondila anch: “Dijin diey aditumbish.”—Mateu 6:9.

In Kumukangesh Kristu Alikin Want wa Nzamb

In kumukangesh Kristu avulijadin kamu nakash mu “machuku ma kwisudiel,” pa chirung tushicha katat. (2 Timoteu 3:1) Rutong ra kusambish ra akamakasu inay a katat ridi ra kuyidimb antu piur pa mudimu ukwetay Yesu mudi Mwant wa Want wa Nzamb, winyikel wa mwiur ukweza kuyikel katat kamu pa divu diawonsu.—Daniel 7:13, 14; Kuburik 11:15.

Chilakej, amakurump amwing a chirelijon akat kulejan anch Want wa Nzamb udi mwikadil wa muchim wa antu, yitongijok yakad kwikal mu Bibil. (Daniel 2:44) Akwau akat kulond anch Kristu ukat kusal mudimu kusutil ku maguvernema ni yirijek ya antu. Pakwez, Yesu walonda anch: “Want wam udip wa mangand minam.” (Yohan 18:36) Chakin, Satan, ndiy “nyikel wa mangand minam” ni ‘nzamb wa mangand minam,’ kadiap Yesu bwat. (Yohan 14:30; 2 Korint 4:4) Chawiy chikudioshinay Yesu katat kamu ak maguvernema mawonsu ma chiuntu ni ukwikal Nyikel umwing kusu wa divu. (Kuseng 2:2, 6-9; Kuburik 19:11-21) Antu akat kwitang kwez kwa want winou pakatau kuchirikin Malembil ma Nsalejetu, pakatau kulembil anch: “Want wey weza.”—Mateu 6:10.

Chipaninau ukwash wau ku yitenchik ya politik ya mangand, amakurump avud a marelijon akat kuyipompat ni kuyizengol, antu alejena uyakin wa Want wa Nzamb. Mukand wa Bibil wa Kuburik umujimbwil mband wa usund wa chifanikesh—“Babilon mujim”— “ukwachikin ku kuzel kwa mash ma antu a Nzamb ni mash ma atuman a Yesu.” (Kuburik 17:4-6) Mband winou usadil kand masandj ma mu spiritu payikwashinay “ant,” a pa divu, ap anyikel a politik, wend watambul lel kwitiyik kwau. Mband winou wa chifanikesh mawiy kamu marelijon ma makasu ma mangand. Ndiy chikunku chijim cha mwin kumukangesh Kristu.—Kuburik 18:2, 3; Yakob 4:4.

Mwin Kumukangesh Kristu ‘Ukat Kuyobakesh Matu’

Kuwejin pa kudiburil kwa uyakin wa Bibil, antu avud afila mu kan anch adi in Kristu alikin yijil ya Bibil piur pa ngikadil mulong wa kulondul yisotinau antu avud. Dizu dia Nzamb diasambela kwisambin mwikadil winou anch: “Mulong muten ukez kez anch antu kakuteship ku malejan makin, mulong wa matu mau makez kuyobakan, akez kisotil alej akatila michim yau.” (2 Timoteu 4:3) Antu inay afila mu kan anch adi alej a dizu dia Nzamb ayitazukin kand anch “apostol a makasu, akat kuyidimb antu, akat kwikarumun mudi apostol a Kristu.” Bibil udandamedin kulond anch: “Kwisudiel kwau kukez kwikal mudi mudia midimu yau.”—2 Korint 11:13-15.

Midimu yau yidi “midimu ya ris,” midimu yidiburila kamu nakash yijidik ya ngikadil. (2 Pita 2:1-3, 12-14) Ov, tumenap anch kuvulijan kwa amakurump a yikumbu ya nzamb ni in kwilej au chilondwilau—ap kwitiyij—yisalijok yakad kwambatan ni Ukristu, mudi utum wa amakundj nau amakundj ni makaj? Itekinap amboku chisu kanang chakwel kwisikej yitongijok yiney yipalangena kwawonsu ni mulad wa mwom nich yilondilay Bibil ku In Levi 18:22; Rome 1:26, 27; 1 Korint 6:9, 10; Hebreu 13:4; ni Yuda 7.

“Pakany Mazu Anch Madiokil ku Spiritu wa Nzamb”

Pa kuman yitwisambina kal ey, tufanyidin kutesh mazu ma kambuy Yohan ma kulik kuman yitiyij ya relijon nich kapipej. Ndiy ufundin anch: “Akarukat nam, kangal wayitiyany antu awonsu afila mu kan anch, akwet [m]wiku [u]tumbila. Pakwez yipakany bil, ushinshikany anch, chakin, mwiku ukwetau udiokil kudi Nzamb. Mulong aruu a makasu avud apalangen kal mu mangand.”—1 Yohan 4:1.

Tushinshikinany chilakej chiwamp cha antu amwing akweta “michim ya kutesh” adinga ni kushakam mu musumb wa Berey mu mivu chitot ya kusambish. Awiy “patambulau dizu nich michim yitentamina ading ni kutang mukand wa Nzamb pichuku pichuku, ni kutal anch yom yiney [yalonday Paul ni Silas] mwamu, muyidia.” (Midimu 17:10, 11) Chakin, ap anch awiy asota kamu nakash kwilej, in Berey atala anch yom yateshau ni kwitiyij yadinga yijikin mij mu Bibil.

Nlel kand, in Kristu a kashinsh kakatap kupwichik nich yitongijok yipalangena kwawonsu pakwez alamatining ba ku uyakin wa Bibil. Kambuy Paul wafunda anch: “Chawiy chinech chinikata kulembil, chakwel rukat renen rukujimbijadil mu ronganyin [rakin] ni mu kujingunin kwawonsu.”—Filipoi 1:9.

Anch kand kal waka ronganyin rakin, itekina rutong ra kwak “ronganyin [rakin] ni kujingunin kwawonsu” kusutil ku kwilej yifundishinay chakin kamu Bibil. Antu akata kuyimburij in Berey kadingap adimbinau nich “mazu ma kudimban” ma in kumukangesh Kristu. (2 Pita 2:3) Pakwez, akwet want ipau wa uyakin wa mu spiritu wa Kristu wakin ni in kwilej end akin.—Yohan 8:32, 36.

[Kamushet/Chipich chidia pa paj wa 4]

Yilondinay Bibil Piur pa Mwin Kumukangesh Kristu

“An akemp, chinech chidi chisu cha kwisudiel; mudi en chiwovilany kal chakwel mwin kumukangesh Kristu ukwez, ni katat kwalankin kal in kumukangesh Kristu avud; kwawiy kutwijikidina anch chinech chawiy chisu cha kwisudiel.”​—1 Yohan 2:18.

“Nany mukamakasu ching ndiy ukat kumutun Yesu Kristu anchi? Mwinou ndiy kamu mwin kumukangesh Kristu, ndiy kamu ukat kumutun Tatuku ni Mwan.”—1 Yohan 2:22.

“Ni [s]piritu wawonsu wakad kumwitiyil Yesu kadip wa Nzamb; winou ndiy spiritu wa mwin kumukangesh Kristu, ndiy wovilanya anch ukwez; ni katat udi kal mu mangand.”—1 Yohan 4:​3.

“Mulong akamakasu avud apalangen kal ku mangand, awiy kamu akad kumwitiyil Yesu Kristu wezila mu mujimbu wa mbij. Mwinou ndiy mukamakasu ni mwin kumukangesh Kristu.”—2 Yohan 7.

[Kamushet/Yipich chidia pa paj wa 5]

Mukamakasu Ukata Kukarumwok

Dizu “mwin kumukangesh Kristu” akat kudisadil padi antu awonsu alikina yilondinay Bibil piur pa Yesu Kristu, antu awonsu abwambwidila ku Want wend, ni awonsu ayizengodila in kwilej end. Akat kudisadil kand piur pa antu, yirijek, ni michid yikata kulond makasu anch adi antimesh a Kristu ap akata kwitek pakad kufanyin pa ndond ya Mesia end ashilamu kwa makasu anch akulet chisambu ni zoong—yom yikutwishau kusal ching kusu kudi Kristu.

[Dizu dirumburila]

Augustin: ©SuperStock/age fotostock

[Chipich chidia pa paj wa 7]

Mudi in Berey, tufanyidin ‘kushinshikin Bibil dichuku ni dichuku’