Ilamany Ayinen mu Rukat ra Nzamb
“En akarukat, . . . ilamany ayinen mu rukat ra Nzamb. . . ni ku mwom wa chikupu.”—YUDA 20, 21.
1, 2. Mutapu ik ukutwisha kwilamin mu rukat ra Nzamb?
YEHOVA wakata nakash mangand ma antu chawiy chapanay Mwanend kapokal chakwel anch antu akumwitiyija akutan mwom wa chikupu. (Yohan 3:16) Chipandiken kuwap mudi ik kutan rukat mudi riner! Anch udi kashalapol wa Yehova, ukusotin chakin kamu kutambul rukat riner chikupu.
2 Kambuy Yuda ulejen mutapu ukutwisha kwilamin mu rukat ra Nzamb. Yuda wafunda anch: “[Itunginany] ayinen pa ritiy ren ritumbila, lembilany mu [s]piritu [u]tumbila, ilamany ayinen mu rukat ra Nzamb, utalangany riy ra Nsalejetu Yesu Kristu kushik ni ku mwom wa chikupu.” (Yuda 20, 21) Kwilej Dizu dia Nzamb ni kulejan rusangu ruwamp kukwashin kwitung ayinen pa ‘ritiy ren ritumbila’—ra malejan ma Ukristu. Chakwel kwilamin mu rukat ra Nzamb, ufanyidin kulembil mu “spiritu utumbila,” ap mwishin mwa usu winou. Chakwel anch akuyukish nich mwom wa chikupu, ufanyidin kand kwitiyij chakupesh cha difut dia Yesu Kristu.—1 Yohan 4:10.
3. Ov, mulong wak antu amwing alika kwikal Atuman a Yehova?
3 Antu amwing itiyija alika kwilamin mu rukat ra Nzamb. Mulong atonda kwau mwom wa kusal yitil, kadingap kwau kand Atuman a Yehova. Ov, mutapu ik ukutwisha kwiyep chakwel yom mudi yiney kangal yeza yikushiken? Kutongijokin pa manans malondwila am kukukukwash kwiyep chitil ni kwilamin amwiney mu rukat ra Nzamb.
Mekesh Kumukat Kwey Nzamb
4. Kumuziyil Nzamb kukwet usey ik?
4 Mekesh kumukat kwey Nzamb kusutil ku kumuziyil. (Mateu 22:37) Kambuy Yohan wafunda anch: “Mulong rukat ra Nzamb rawiy er, chakwel tukulam yijidik yend; ni yijidik yend kiyikutukasikenip.” (1 Yohan 5:3) Chaku cha kumuziyil Nzamb chikutwish kukukasikesh kujijaman ku choziu ni kukusangaresh. Nfund-a-kuseng walonda anch: “Wayuk muntu wakad kulondul mpung ya antu ayimp, . . . Pakwez musangar wend udi mu yijil ya Nzamb.”—Kuseng 1:1, 2.
5. Kumukat kwey Yehova kukutwish kukubachik usala yom mu mutapu ik?
5 Kumukat kwey Yehova kukez kukwipwish kusal chitil chijim chikeza kuletish usany pa dijin diend. Agur walembila anch: “Kangal wanginkish uzwendj ap wimpich. Ndisha nich yakudia niswiridina, ap chamwamu nez nakutun pinikwikuta ni kulond anch: ‘Ov, [Yehova] udi nany?’ Ap kand nikal kazwendj chad am niy, ni kuyipish dijin dia Nzamb wam.” (Jinswir 30:1, 8, 9) Kwat mupak kangal ‘wez washing dijin dia Nzamb’ ku kudikwatish usany. Pakwez, ikasikesha chisu chin chawonsu kusal yom yitentamina yikutwisha kumutumbish.—Kuseng 86:12.
6. Chom ik chikutwisha kukushiken anch wasal chitil kwa kwisotil?
6 Mulembila chisu chawonsu Tatukwey wa mwiur mwin rukat mulong akwinkisha usu wa kujijaman ku choziu cha kusal chitil. (Mateu 6:13; Rome 12:12) Dandamen kulondul chiyul cha Nzamb chakwel malembil mey kangal makangany. (1 Pita 3:7) Anch wasal chitil cha kwisotil, kukutwish kwikal yibudikin yiyimp nakash, mulong mu mutapu wa chifanikesh Yehova ukat kufung yis mulong antombuj kangal atwisha kumusejin mudi nich didj dilimina chakwel malembil mau kangal mashik kudiay ndiy. (Kudil kwa Jeremiy 3:42-44) Chawiy mekesh spiritu wa kwitudish, ni lembil chakwel kangal watwish kusal chom ap chimwing chikutwisha kukukangesh kumusejin Nzamb mu malembil.—2 Korint 13:7.
Mekesh Kumukat Kwey Mwan a Nzamb
7, 8. Mutapu ik kutesh chiyul cha Yesu kukutwisha kumukwash muntu kulik njil ya chitil?
7 Mukata Yesu Kristu kusutil ku kuziyil kwi mbil yend, mulong chom chinech chikez kukukwash kulik mwom wa kusal yitil. Yesu walonda anch: “Anch walamany yijidik yam ukez kashakamany mu rukat ram, mudi chinalama am yijidik ya Tatuku ni kushakam mu rukat rend.” (Yohan 15:10) Ov, mutapu ik kusadil mazu ma Yesu kukukwashina kushakam mu rukat ra Nzamb?
8 Kuta matu ku mazu ma Yesu kukutwish kukukwash kulam kushinshaman kwey mu mashakamin. Chijil cha Nzamb chapanay kudi Isarel chilondil anch: “Kangal wimik dis.” (Kubudik 20:14) Pakwez Yesu walejana chijidik chadinga chijingamina kwinyim kwa chijil chinech palonday anch: “Muntu mwawonsu ukumutala mband wamwovil ris ra kulal nend, muntu mwinou wasal kal chitil cha kulal nend mu muchim wend.” (Mateu 5:27, 28, MM) Kambuy Pita walonda anch antu amwing adinga mu chikumangen cha mu mivu chitot ya kusambish adinga nich “mes mizwila sens ni kusotan” ni ‘ayoza antu adinga nich michim yiziyila.’ (2 Pita 2:14) Pakwez, chinyim ni antu a mutapu winou, ukutwish kwiyep yitil ya masandj anch umukatin ni kumuziyil Nzamb ni Kristu ni ukwatin mupak wa kuchidij urund wey ni Nzamb ni Kristu.
Lik Spiritu wa Yehova Akutakel
9. Piur pa spiritu utumbila, chom ik chikusadika anch muntu wadandamen mu yitil?
9 Mulembila Nzamb akwinkisha spiritu wend utumbila, ni mulika akutakel. (Luka 11:13; Galatia 5:19-25) Anch wadandamen mu yitil, Nzamb ukukupwit spiritu wend. Pasalay David chitil ni Batisheba, ndiy wamulembila Nzamb anch: “Kangal wandjibul kulemp ku mes mey, kangal wandioshil spiritu utumbila.” (Kuseng 51:11) Mwant Saul washadisha spiritu wa Nzamb, mulong walika kukarumuk kulik yitil yend. Saul wasala chitil papeshay mulambu wa kwosh ni papandishay amikoku ni ampemb, yivam, ni mwant wa in Amalek. Chawiy Yehova wamupwita Saul spiritu wend utumbila.—1 Samwel 13:1-14; 15:1-35; 16:14-23.
10. Ov, mulong wak ufanyidin kudjibwil kwa yitongijok yawonsu ya kusal yitil?
10 Djibul yitongijok ya kusal yitil. Kambuy Paul wafunda anch: “Anch twasal kand yitil pitwatambwila kal ronganyin ra uyakin, kwikil kand yakupesh ya yitil.” (Hebreu 10:26-31) Chikez kwikal riyind mudi ik anch ukat kusal yitil kwa kwisotil!
Yimekeshina Antu Akwau Rukat Rakin
11, 12. Mu jinjil ik rukat ni kalimish yikutwisha kumukangesh muntu kwiyandjik mu masandj?
11 Kuyikat ambay netu kukez kutukangesh kwiyandjik mu mashakamin ma masandj. (Mateu 22:39) Rukat riner rikez kukubachik kulam muchim wey chakwel kangal wez wiya rukat ra ambay a uruw. Kusal mwamu kukutwish kukushikij ku chitil cha masandj. (Jinswir 4:23; Yeremiy 4:14; 17:9, 10) Ikal utentamina mudi Yob, ndiy kalikap yitongijok yimubachika kushinshikin mband windjing pa ndond ya mukajend.—Yob 31:1.
12 Kulimish kutumb kwa uruw kukutwish kukwipwish kusal yitil yijim. Nzamb watenchika anch uruw ulimishinau ni kumanijan kwa ikundj ni mband kulimishinau yifanyidin kwikal njil ya kusamburish mwom. (Disambishil 1:26-28) Vurik anch yid ya ukundj ap ya wimband yidi mulong wa kusambish mwom, mwom utumbila. (In Levi 17:11) In usund ni in kwimik dis awonsu amubwambwidila Nzamb, akat kupipesh chisal cha kwijikijan kwa ikundj ni mband, kalimishiningap kutumb kwa uruw, ni akat kusadil mijimbu yau chitil. (1 Korint 6:18) Pakwez kumukat Nzamb ni amutej netu atijadina ni kumuziyil Nzamb kukez kumukangesh muntu alika kwiyandjik mu mashakamin makutwisha kumushikij ku kumwopat mu chikumangen cha Ukristu.
13. Mwi njil ik mukatay muntu usadila masandj “kushesh dipit diend”?
13 Tufanyidin kupandikan yitongijok ya yitil chakwel kangal twayinenganesh akarukat netu. Jinswir 29:3 jilondil anch: “Muntu ukatijadina nau amband a kusotan ukat kushesh dipit diend.” Mwin kusotan wakad kukarumuk usheshin urund wend ni Nzamb pamwing ni dijuku diend. Mukajend ukwet diyingish dia kujip uruw. (Mateu 19:9) Ikala ikundj ap mband usadila chitil, kufa kwa uruw kukutwish kumusal mbay a uruw udia mwer, an, ni antu akwau ova kusansan nakash. Ov, wijap anch kwijik kurutu kwa chisu yibudikin yiney yiyimp ya kusal masandj kukutwish kutubachik ku kujijaman ku choziu cha kusal masandj?
14. Dilejan ik piur pa masandj tukutwisha kutan mu Jinswir 6:30-35?
14 Kwijik anch kwikil mutapu wa kuwapish chisal cha masandj kukutwish kumukwash muntu iyepa ku chisal chinech chiyimp. Jinswir 6:30-35 jilejen anch ap anch antu akutwish kumwanaken mwij wiyina anch mulong wovil nzal, amukisining mwin kwimik dis mulong wa yitongijok yiyimp yikwetay. Ndiy “ukat kwishesh amwinend.” Mu Chijil cha Moses, chadinga chimufanyidin kufa. (In Levi 20:10) Muntu usadila masandj ukat kuyovish antu akwau kusansan mulong wa kusangaresh maku mend mijondila, ni mwin kwimik dis wakad kukarumuk kashichingap mu rukat ra Nzamb pakwez akumwopat mu chikumangen cha Ukristu chishitwila.
Lam Kom Kishitwila
15. Kom “koshilau kal nich kasu” kadi mu mwikadil ik?
15 Chakwel kushakam mu rukat ra Nzamb, kangal twalikin kom ketu kikal kachinchikina pa yitil. Chimeken patok anch, kitufanyidinap kwitiyij yitongijok ya mangand piur pa yany ya mashakamin, ni tuswiridin kubabal mu milong mudi arund netu tutondina, yitutangina, ni kwipuwangesh. Paul wababeshana anch: “Mu machuku ma kurutu amwing akez kawa kudiokal ku ritiy, akez kutesh ku jinsangu jamwamu ja washankuru, akez kwitiy dilejan dia Satan, ku kubabek kwa antu akata kulond ya makasu, akweta kom kau koshilau kal nich kasu.” (1 Timoteu 4:1, 2) Kom “koshilau kal nich kasu” kadi mudi mbij jitemina jikweta yikit yitemina ni kaburedina kwov kuswan. Kom mudi kinak kakutwishap kand kutudimwish mulong wa kuchin kupumbok ni ku ngikadil yikutwisha kutuwish mu ritiy.
16. Ov, mulong wak chidi cha usey ujim kwikal nich kom kishitwila?
16 Kupand kwetu kwengamidin pa kom ketu kishitwila. (1 Pita 3:21) Kusutil ku ritiy retu mu mash ma Yesu, kom ketu akatokishin kal ku midimu yifila chakwel, “kumusadil Nzamb mwom.” (Hebreu 9:13, 14) Anch twasal yitil kwa kwisotil, kom ketu kakez kwijond ni tukezap kwikal antu ishitwila afanyidina kusal mudimu wa Nzamb. (Titus 1:15) Pakwez nich ukwash wa Yehova, tukutwish kwikal nich kom kishitwila.
Njil Jikwau ja Kwiyepin Mashakamin ma Yitil
17. ‘Kumulondul kamu Yehova’ kukwet usey ik?
17 Mudi mwasalay Kaleb, ‘mulondula kamu Yehova.’ (Kuvurik Yijil 1:34-36) Sal yikusotilay Nzamb anch usal, ni kangal wasot kudia ku “mes ma ayilembil.” (1 Korint 10:21) Lik kupumbok. Sanger kudia yakudia ya mu spiritu yidia ching kusu ku mes ma Yehova, ni kakezap kukudimb nich malejan ma makasu ap kudi ayilembil akweta usu. (Efesus 6:12; Yuda 3, 4) Asin pa yom ya mu spiritu, mudi dilejan dia Bibil, kukumangan ku yikumangan, ni mujikit wa chingand. Ukutwish kwikal nich kashinsh ka kwikal nich musangar anch wamulondul ching kamu Yehova ni kwikal nich yivud ya kusal mu mudimu wa Nsalejetu.—1 Korint 15:58.
18. Kumwov Yehova wom kukwet usu ik pa mashakamin mey?
18 Kwat mupak wa “kusadil mudimu wa kumusangarish Nzamb nich wom ni kulimish mudi musotilay.” (Hebreu 12:28) Kumwov Yehova wom kukez kukubachik kulik mashakamin ma kupumbok. Kukez kukukwash ushakam mu kukwatijan nich chiyul cha Pita cha kuyilondul azizidilau many: “Anch watazukany padiay ndiy mudi Tatuku, ndiy wakad kasolikany, ukat kurumburish mudi mudia mudimu wa muntu, endany ni wom piuchidianya mu weny.”—1 Pita 1:17.
19. Ov, mulong wak ufanyidina kusadil chisu chawonsu yom yiwilejina kudiokal mu Dizu dia Nzamb?
19 Sadinang chisu chawonsu yiwilejina mu Dizu dia Nzamb. Chom chinech chikez kukukwash kwipuk yitil yijim mulong ukez kwimekesh kwikal ufanyidina kwikal mukach mwa “antu akudila kal, mulong ifumbil kal manangu mau mu kusal kwa pichuku-pichuku ku kujingunin kuwap ni kuyip.” (Hebreu 5:14) Pa ndond pa kuburen kudimuk mu kulond ni mu mashakamin, dimuk chakwel wenda mudi muntu mwin manangu, “lamany chisu cha muten” mu machuku minam mayimp. “Ijikany mudi mudia rusot ra Mwant,” ni dandamenany kurisal.—Efesus 5:15-17; 2 Pita 3:17.
20. Ov, mulong wak chifanyidin kwiyep ris?
20 Kangal washilany ris ndond—ris ripandakena mulong wa mapit ma antu akwau. Chimwing cha Yijil Dikum chilondil anch: “Kangal wikal ni ris ku chikumbu cha mukwen. Kangal wikal ni ris kwi mband wa mukwen, ap ku kashalapol wend, ap ku mwilomb wend, ap kwi ngomb wend, ap ku chimbur wend, ap ku yom yawonsu yidia ya mukwen.” (Kubudik 20:17) Chijil chinech chadinga ni kuchidij chikumbu cha muntu, mukajend, atushalapol, annam, ni yom yikwau. Pakwez Yesu walonda mazu ma usey anch ris rikat kumwijondish muntu.—Mako 7:20-23.
21, 22. Mipak ik ya kwichidij nich yifanyidinay mwin Kristu kukwat chakwel kwipuk kusal chitil?
21 Babalany chakwel ris kangal rikushikijany ku kusal chitil. Kambuy Yakob wafunda anch: “Pakwez wawonsu ukat kwoziu pakat kwikakilay ku upwepu wend amwinend. Chawiy upwepu, anch wimish, ukuval chitil, ni chitil, anch chakul, chikulet rufu.” (Yakob 1:14, 15) Chilakej, muntu wadinga pasak nich milong ya kuna kwakad kupep pa chopu, ukutwish wakwat mupak wa kulik kwikal nich maar makata kuleushan ku chikumbu chend. Chakwel kwipuk choziu ni muntu wa mujimbu windjing, mwin Kristu ukutwish kuswimp ndond yend ya mudimu ap kuswimp mudimu wend.—Jinswir 6:23-28.
22 Kangal wikal wa kusambish kutampul rizau ritwadila ku chitil. Kwendijadin kwa rukat ni muntu wakad kwikal mbay a uruw ni kwikal nich yitongijok ya masandj kukutwish kushikij ku masandj. Kulond tumakasu tukemp kukutwish kumushikij muntu ku kulond makasu majim ni kukutwish kumushikij ku chaku cha kusal chitil cha kudimbanang. Kwiyol tuyom tukemp-tukemp kukutwish kuziyish kom ka muntu mu chilik cha kumushikij ku kusambish kwiy yom yijim-yijim. Ap karusis ka chitong cha kupumbok kakutwish kumushikij muntu ku kupumbuk rawonsu.—Jinswir 11:9; Kuburik 21:8.
Ov, Chikwikal Nchik Anch Wasadil kal Chitil?
23, 24. Rongoj ik tukutwisha kutan mu 2 Jinsangu 6:29, 30 ni Jinswir 28:13?
23 Antu in awonsu adi akayitil. (Mulej 7:20) Chad anch wasadil chitil chijim, ukutwish kutan rongoj mu malembil masalay Mwant Salomon pashikijay tempel wa Yehova. Salomon wamulembila Nzamb anch: “Chad anch muntu umwing, ap antwey awonsu in Isarel alembil, ni kwit, ni kunenganan muntu ni muntu mulong wa kuyip kwa muchim wend, ni kutandjek makas mend ku chikumbu chinech, Chad ey ushicha mwiur, mutesha. Mulikishina ni kusal kudi muntu ni muntu mudi mudia yaku ya muchim wend, mulong ey wij muchim wa muntu ni muntu, yey amwiney wija kwey michim ya antu awonsu.”—2 Jinsangu 6:29, 30.
24 Inge, Nzamb wij muchim ni ukat kulikishin. Jinswir 28:13 jilondil anch: “Muntu mwin kujindjik kurumbuk kwend kakukulip nawamp, pakwez mwin kwitiyil kurumbuk ni kukulik, ukez katan ranaken.” Chitwishikin kutan ranaken ra Nzamb, kusutil ku kukarumuk ni kulik kusal yitil. Chawiy, anch uziyil mu spiritu, chom ik chikwau chikutwisha kukukwash kushakam mu rukat ra Nzamb?
Ov, Ukwakul Nchik?
• Mutapu ik tukutwisha kushakam mu rukat ra Nzamb?
• Mutapu ik kumukat Yehova ni Kristu kutukwashina kulik mwom wa yitil?
• Ov, mulong wak kuyikat chakin kamu antu akwau kukat kutukangesh kwiyandjik mu chisal chiyimp cha masandj?
• Jisu jinjil jimwing ja kwiyep kwiyandjik mu chisal chiyimp?
[Chipich chidia pa paj wa 8]
Yuda utulejin mutapu tukutwisha kushakam mu rukat ra Nzamb
[Chipich chidia pa paj wa 9]
Kujiril kutumb kwa uruw kukutwish kumuletin mbay a uruw mwer ni an kusansan kujim
[Chipich chidia pa paj wa 10]
Mudi Kaleb, ov, wakwatin kal mupak wa ‘kumulondul ching kamu Yehova’?
[Chipich chidia pa paj wa 11]
Lembil chisu chawonsu mulong wa kutan ukwash wa kujijaman ku choziu