Ov, Wamusadidil Chitil Spiritu Utumbila?
“Kudi chitil chimwing chikata kushikijan ku rufu.”—1 YOHAN 5:16, Manswik Masu.
1, 2. Ov, mutapu ik twija anch chitwishikin kumusadil chitil spiritu utumbila wa Nzamb?
AP ANCH wading umusadidila Nzamb, mband umwing mu allemagne wafunda anch: “Nova wom wakwel anch namusadidil chitil spiritu utumbila.” Ov, katat mwin Kristu ukutwish kumusadil chitil spiritu utumbila wa Nzamb, ap usu wa kusadish wa Nzamb?
2 Mwaning, chitwishikin kusal chitil kudi spiritu utumbila wa Yehova. Yesu Kristu walonda anch: “Chitil chawonsu ni masal akez kayilikishil antu, pakwez masal ma [s]piritu kakez kamalikishilip.” (Mateu 12:31) Atubabeshin anch: “Anch twasal kand yitil pitwatambwila kal ronganyin ra uyakin, kwikil kand yakupesh ya yitil; pakwez twovany wom wa dirumburish.” (Hebreu 10:26, 27) Ni kambuy Yohan wafunda anch: “Kudi chitil chikushika ku rufu.” (1 Yohan 5:16) Pakwez, muntu win wasala chitil chikash ndiy ufanyidina kwijik anch wasadin “chitil chikushika ku rufu”?
Kukarumuk Kuletining Dilikishin
3. Ov, chom ik chidia chakin anch tukwet rineng rikash mulong wa chitil twasala?
3 Yehova udi Nzuj wa nsudiel wa antu ayimp. Chikwau kand, etu awonsu tufanyidin kupan kuchind kudi Nzamb, ni ndiy usadining ching yom yitentamina. (Disambishil 18:25; Rom 14:12) Yehova amwinend ukutwish kulond anch twasadin chitil chakad dilikishin, ni ndiy ukutwisha kutudiosh spiritu wend. (Kuseng 51:11) Pakwez, anch tukwet rineng rikash mulong wa chitil twasala, chimeken anch tudi in kukarumuk chakin kamu. Pa chinech, ov, kukarumuk kwakin chom ik?
4. (a) Ov, mutapu ik ukutwisha kurumburil kukarumuk? (b) Ov, mulong wak mazu ma nfund-a-kuseng madia mu Kuseng 103:10-14 makasikeshin nakash?
4 Kukarumuk kurumburikin kuswimp ngikadil yetu yikur ap chisal chiyimp twasala pasak kurutu kwa kukarumuk. Chirumburikin anch tukat kwov runeng ni kulik chitil. Anch twasala chitil chikash, pakwez twalondula nzau jifanyidina mulong wa kumekesh anch twakarumukin kal chakin kamu, tukutwish kutambul dikasikesh mu mazu ma nfund-a-kuseng malondila anch: “Ndiy [Yehova] kakusalangip mudi mudia yitil yetu, kakutuchirishangip mudi mudia kuyip kwetu. Mudi chidizambukina diur piur pa divu, mwawiy mudia ranaken rend ruvud kudi awiy akata kumwov wom. Mudi kwingangel chikudia kulemp ni kurand, chawiy chashemuninau kal kubwambul kwetu. Mudi tatuku ukat kuyovil anend riy, chawiy kand [Yehova] ukat kuyovil awiy riy akata kumwov Ndiy wom. Ndiy wij mwatutangilay, ukata kuvurik anch tudi kwetu rufunfut.”—Kuseng 103:10-14.
5, 6. Let dinans dijim didia mu 1 Yohan 3:19-22, ni rumburil kurumburik kwa mazu ma kambuy.
5 Mazu ma kambuy Yohan madi kand ma kukasikesh: “Kwawiy kukutwijikinau anch tudi mu yakin, ni kuwanyish michim yetu kurutu kwend: anch michim yetu yatufish nich; mulong Nzamb upandiken michim yetu kujimb, ndiy wij kal yom yawonsu. Akarukat, anch michim yetu kiyifishilip, tukwikal ni kwisum mwi Nzamb; ni chawonsu chitukwita, tukuchak kudiay ndiy, mulong tulamin yijidik yend ni kusal yom yikata kumusangarish ku mes kwend.”—1 Yohan 3:19-22.
6 Etu “tukutwish kwijik anch tudi in yakin” mulong tukat kumekesh rukat ra ukadivar ni tukatap kusal chitil. (Kuseng 119:11) Anch muchim wetu utufishin nich mulong wa diyingish dimwing, tufanyidin kusal usu wa kuvurik anch “Nzamb upandiken michim yetu kujimb.” Yehova utwovidil riy mulong wij anch tukwet “rukat kudi akadivar,” wij njit ja chitil turishina nich, ni usu tusadina chakwel tusala rusot rend. (1 Pita 1:22) Michim yetu yikez “katufishilap nich” anch twamuchingejin Yehova, twamekesh rukat ra ukadivar, ni tufilap nich chisal cha kwisotil cha chitil. Tukwikal ni “kwisum mwi Nzamb” mu malembil, ni ukez kutwakul mulong tulamin yijidik yend.
Antu Asala Chitil Kudi Spiritu
7. Ov, chom ik chimekeshining anch chitil chidi cha kulikishin ap bwat?
7 Ov, yitil ik yidia yakad kulikishin? Pa kwakul ku chipul chinech, tushinshikinany bil yilakej yimwing yidia mu Bibil. Yiney yikutukasikesh anch twakarumuk ap anch tuchidi ni runeng rikash mulong wa yitil yetu yijim. Tukez kuman anch chidiap cha usey kwijik chitil ik chasalay muntu; pakwez, chiwapidil kwijik yamubachika kuchisal, mwikadil wa muchim, ni chilik cha kusot kuchisal yawiy yikata kumekesh anch chitil chinech chidi cha kulikishin ap bwat.
8. Ov, mutapu ik antakel a relijon wa in Yuda wa mu mivu chitot ya kusambish wasalau chitil kudi spiritu utumbila?
8 Antakel a relijon wa in Yuda wa mu mivu chitot ya kusambish pamupompatau Yesu Kristu nayimp asala chitil kudi spiritu utumbila. Amana mutapu spiritu wa Nzamb wadinga usadinay mudimu mudiay Yesu pasalay yilay yamuletina Yehova kalimish. Chikwau kand, akankuny inay a Kristu amwela anch usu winou udi wa Satan Djabul. Kukwatijan nich yalonday Yesu, antu amupepa spiritu utumbila masal mwamu mwasalau chitil chakad kulikishin mu “mangand minam ap mwi ngand yikweza.”—Mateu 12:22-32.
9. Ov, masal chom ik, ni chom ik Yesu chalonday piur pa masal?
9 Masal mading ma kafukej, mayimp, ap kulond kuyimp. Mulong Nzamb udi musul wa spiritu utumbila, kumwel spiritu winou chidi chilik chimwing ni kumwel Yehova. Kulond pakad usany kwa mutapu winou kudi kwakad dilikishin. Mazu ma Yesu piur pa chitil chinech mamekeshin anch Yesu wisambina piur pa in kubwambwil kwa kwisotil ku mudimu wa spiritu utumbila wa Nzamb. Mulong spiritu wa Yehova wading usadil mudiay Yesu pakwez in kubwambwil end amwela anch usu winou udi wa Djabul, awiy asala chitil mu kumusal spiritu. Chawiy lel, Yesu walonda anch: “Pakwez wawonsu ukez kamusal [s]piritu [u]tumbila kakez kamulikishilip, pakwez chikez kikal chitil cha kufa nich kwa chikupu.”—Marko 3:20-29.
10. Ov, mulong wak Yesu wamutazuka Yudas anch “mwan wa kusheshik”?
10 Shinshikin kand yamushikena Yudas Isakariyot. Ndiy walondula mwikadil wa makasu, wading kwiy nfalang mu chipau chalamangay. (Yohan 12:5, 6) Kupwa Yudas waya kudi antakel a in Yuda ni warijeka yom chakwel amupana Yesu ku ampat makum masatu ma utad utok. Chakin, Yudas wova rineng kupwa kwa kumupan, pakwez kakarumukap ku chitil chend cha kwisotil. Chimeken anch, Yudas kakutwishap kuvumbuk, chawiy lel Yesu wamutazuka ndiy anch “mwan wa kusheshik.”—Yohan 17:12; Mateu 26:14-16.
Yilakej ya Antu Alika Kusal Chitil Kudi Spiritu
11-13. Ov, mutapu ik Mwant David wasalay chitil ni Batisheba, ni dikasikesh ik tukutwisha kutaninamu mu mutapu Nzamb wapwisha milong yau?
11 Yisu yimwing, in Kristu itiyina yitil yau yijim atambula ukwash wa mu spiritu kudi amakurump akutwish kand kusambish kunenganen mulong wa kubangin kujiril kwau kwa chijidik cha Nzamb pasak. (Yakob 5:14) Anch twiyovil kuyip ayinetu mu mutapu winou, tukez kutaninamu anch twa shinshikin yilondinay Bibil piur pa antu atambula dilikishin ku yitil yau.
12 Mwant David wasala chitil chikash ni Batisheba, mband wa Uriy. Pamumanay mband muwamp ukat kowal padingay ni kutal mwishin piswimp ni chikumbu chalalela piur, David watumana chakwel amuleta mu chikumbu chend ni kulal nend. Pamulejay anch wimish kal, wasala usu chakwel ikala pamwing ni nfumwend, Uriy, alala nend mulong wa kujindjik makaj. Pakanganay chakusal, mwant warijeka yom chakwel amujipa Uriy kwi njit. Kupwa, Batisheba wikala mukajend a David ni wamuvadina mwan umwing wafa.—2 Samwel 11:1-27.
13 Yehova wapwisha milong ya David ni Batisheba. Nzamb wa mulikishina David, mulong wa kukarumuk kwend ni manswik ma Want masalay nend. (2 Samwel 7:11-16; 12:7-14) Batisheba wading chakin kamu ni mwikadil wa kukarumuk, mulong witapila dilau dia kwikal makwend a Mwant Salomon ni nshakur wa Yesu Kristu. (Mateu 1:1, 6, 16) Anch twasal chitil, chiwapin kuvurik anch Yehova umen mwikadil wetu wa kukarumuk.
14. Ov, mutapu ik chilik cha dilikishin dia Yehova achilejen kand ku yamushikena Mwant Manase wa in Yuda?
14 Chilik cha dilikishin dia Yehova achilejen kand ku yamushikena Mwant Manase wa in Yuda. Ndiy wasala yom yiyimp ku mes ma Yehova. Manase wimika yintamb ya mukish Baal, wifukwila “atutumbu, ni ngond, ni muten,” ni wayitungina anzamb a makasu yintamb mu tumabur twaad twa mu chipang cha tempel. Ndiy wayosha anend mu kasu, wakasikesha yisal ya yitiyij ya aspiritu ayimp, ni wasala anch in Yuda ni antu ading ashicha mu Yerusalem “asala nayimp kupandakan michid yasheshay [Yehova] kurutu kwa in Isarel.” Yibabesh yaletau kudi aprofet a Nzamb kayiteshap. Kupwa, mwant wa in Asiri wamukwata Manase. Padingay mu uswik, Manase wakarumuka ni wamulembila Nzamb nich kwitudish, Nzamb wamulikishina ni wamuchirisha kand mu want wend ku Yerusalem, kwa chirishay difukwil diakin.—2 Jinsangu 33:2-17.
15. Ov, mulong ik washikena mu mwom wa kambuy Pita umekeshina anch Yehova ukat kulikishinang “swa”?
15 Kupwa kwa yitot ya mivu, kambuy Pita wasala chitil chijim pamutunay Yesu. (Marko 14:30, 66-72) Pakwez, Yehova wamulikishina Pita “swa”. (Isay 55:7) Ov, mulong wak? Mulong Pita wamekesha kukarumuk kwakin. (Luka 22:62) Dilikishin dia Nzamb diamekana patok mu machuku 50 malondula, chisu cha Pentekot, pikalay Pita nich chisend cha pakampwil cha kupan uman ukash piur pa Yesu. (Midimu 2:14-36) Ov, kudi diyingish diawonsu dia kwitiyijin anch Nzamb kakezap kuyilikishin in Kristu akarumukina chakin kamu nlel unou? Nfund-a-Kuseng wa wanga anch: “Anch Ey wading ni kuvurik yisalijok yawonsu yiyimp, ing nany lel ukwiman kurutu kwey, A [Yehova]? Pakwez dilikishil didi kudi Ey.”—Kuseng 130:3, 4.
Kukepish Wom Wakwel Anch Twasala Chitil Kudi Spiritu Utumbila
16. Ov, mu mikadil ik Nzamb yikatay kulikishinang?
16 Yilakej yiney yifanyidin kutukwash kukepish wom wetu wakwel anch twasala chitil kudi spiritu utumbila. Yimekeshin anch Yehova ukat kuyilikishin akayitil akarumukina. Malembil ma kashinsh kudi Nzamb mawiy madia ma usey cha kusambish. Anch Twasal chitil tukutwish kwit dilikishin kusutin difut dia chakupesh cha Yesu, riy ra Yehova, kuburen kwetu kuwanyin kwatwaswana, ni jinsangu jetu ja mudimu ushinshamena. Anch twij ranaken rudimukina ra Yehova, tukutwish kukimb dilikishin, nich ruchingej rakwel anch ukez kwitiyij.—Efes 1:7.
17. Ov, chom ik chifanyidina kusal anch twasala chitil ni tuswiridin ukwash wa mu spiritu?
17 Ov, tukusal nchik anch twasala chitil pakwez tutwishinap kulembil mulong chitil chayipish kal urund wetu ni Yehova? Pa chinech, mwin kwilej Yakob wafunda anch: “Lik [muntu winou] ayitazuk amakurump a chikumbu cha Nzamb, awiy alembil padiay ndiy, amuzizila many mu dijin dia Mwant; kulembil kwa ritiy kukez kumupandish muyej, ni Mwant ukez kamulangwish ndiy; anch ndiy wasala kal chitil akez kamulikishil.”—Yakob 5:14, 15.
18. Ov, mulong wak chitil cha muntu chidap chakad dilikishin ap anch amwopat mu chikumangen?
18 Ap anch pa chisu chinech mpongarik ulikin kukarumuk ni amwopat mu chikumangan, chitil chend chidap chakad dilikishin. Mulong wa muntu umwing uzizidilau many wopatau mu Korint, Paul wafunda anch: “Kudi muntu udia mwamu mar miwamumeshilanya mawanyin kal; chawiy en ing wamulikishilangany ni kumwongoj, chamwamu akez kamuminy kudi ushon ukash.” (2 Korint 2:6-8; 1 Korint 5:1-5) Chakwel awapisha urund wau pamwing ni Nzamb, antu ashadikina afanyidin kwitiyij ukwash wa amakurump in Kristu wimedina pa Bibil ni kumekesh kukarumuk kwakin. Afanyidin “[kusong] mabuj mafanyidina ma kukarumuk.”—Luka 3:8.
19. Ov, chom ik chikutwisha kutukwash kwikal “akasiken[a] mu ritiy”?
19 Ov, chom ik chikutwisha kutushikij ku kutong anch twasalang chitil kudi spiritu utumbila? Kutentam kupandikena ap mayej ap kutong kuyimp. Chisu chinech, malembil ni kupim nakash kukutwish kwikal kwa ukwash. Pakampwil, tufanyidinap kumulikidil Satan atuziyisha, chakwel tulika kumusadil Nzamb. Mulong Yehova kakatap kusanger rufu ra muntu muyimp, kasangaredinap chakin kamu mu kushadik kwa atushalapol end. Chawiy lel, anch tukwet wom wakwel anch twasala chitil kudi spiritu utumbila, tufanyidin kudandamen kwilej Dizu dia Nzamb, kuwejaku ni yikunku yikasikeshina ya Kuseng. Tufanyidin kudandamen kukumangan ni kwipan mu mudimu wa kulejan Want. Anch twasal mwamu, yikez katukwash kwikal “akasiken[a] mu ritiy” ni kwipuk wom wakwel anch twasala chitil chakad kulikishin.—Titus 2:2.
20. Ov, chitongijok ik chikutwisha kumukwash muntu chakwel amana anch kasalap chitil kudi spiritu utumbila?
20 Mwawonsu wakamina anch wasala chitil kudi spiritu utumbila ufanyidin kwiyipul amwinend anch: ‘Ov, namusala spiritu utumbila? Ov, nakarumukin kal chakin kamu ku yitil yam? Ov, nitiyijin dilikishin dia Nzamb? Ov, nidi mwin kupumbwok walikina chitokish cha mu spiritu?’ Chakin pamwing ap, antu inay akutwish kuman anch kamusalap spiritu utumbila wa Nzamb, ap kikalap in kupumbok. Adi in kukarumuk, ni adandamedin kutek ritiy rau mu dilikishin dia Yehova. Anch chidi mwamu, kasalap chitil kudi spiritu utumbila wa Yehova.
21. Mutu wa mulong wambakedinap ukez kwisambin yipul ik?
21 Chidi cha ukwash mudi ik pa kwikal nich ruchingej rakwel anch kitwasalap chitil kudi spiritu utumbila! Pakwez, kudi yipul yikezau kushinshikin piur pa spiritu utumbila, mu mutu wa mulong wambakedinap. Chilikej, tukutwish kwiyipul ayinetu anch: ‘Ov, spiritu utumbila wa Nzamb ukat kwintakel chakin kamu? Ov, dibuj diend dimeken mu mwom wam?’
Ov, Ukwakul Mutapu Ik?
• Ov, mutapu ik tukutwisha kulond anch chitwishikin kusal chitil kudi spiritu utumbila?
• Kukarumuk kurumburikin ik?
• Nany wasala chitil kudi spiritu padingay Yesu pa divu?
• Ov, mutapu ik chitwishikina kupandakan wom wa kusal chitil chakad dilikishin?
[Chipich chidia pa paj wa 8]
Ap anch wamutuna Yesu, Pita kasalap chitil chakad dilikishin