Itiyij Dipup dia Yehova Chisu Chawonsu
“Kangal wadiwol kubabesh kwa [Yehova].”—JINSWIR 3:11.
1. Ov, mulong wak ufanyidina kwitiyij Nzamb akupupa?
MWANT SALOMON wa Isarel umwinkishin umwing ni umwing wetu diyingish diwamp dia kwitiyij dipup dia Nzamb. Salomon ulondil anch: “Mwanam ikundj, kangal wadiwol kubabesh kwa [Yehova], ap kangal waziy mulong wa malejan mend. [Yehova] ukat kumubabesh mwawonsu ukatilay, mudi tatuku umukatina mwanend.” (Jinswir 3:11, 12) Inge, Tatukwey wa mwiur ukat kukupup mulong ukukatin.
2. Mutapu ik urumburilau “kupup”, mutapu ik ukutwishau kumupup muntu?
2 Dizu “kupup” dikwet chitong cha kubul, kukand, kulej, ni kufumb. Kambuy Paul wafunda anch: “Kupup kwawonsu kuchidi kwaku [kukatap kumwinkish] muntu musangar, ching ushon kusu; pakwez kwinyim kwau kukat kusongish mabuj ma chisambu kudi awiy akata kwifumbiliku, mawiy kamu mabuj ma kutentam.” (Hebreu 12:11) Kwitiyij ni kusadil dipup dia Nzamb kukutwish kukukwash kwikal nich mashakamin matentamina ni kukushejish piswimp ni Yehova Nzamb utumbila. (Kuseng 99:5) Ambay netu akaritiy akutwish kutukand, nich kusadil yom yitwilejina ku yikumangan ya Ukristu, ni kusutil ku dilejan diey dia Dizu dia Nzamb ni mikand ya “mwin kulam yom ubabela.” (Luka 12:42-44) Ukutwish kujikitish mudi ik anch chom wadia uswiridina anch achitenchikang wachiman achitenchik! Chad, dipup dia mutapu ik difanyidina anch kudi chitil chijim chasadikina?
Ov, Mulong wak Antu Amwing Akat Kuyopatang
3. Chisu ik chimwopatiningau muntu mu chikumangen?
3 Atushalapol a Nzamb akat kwilej Bibil ni mikand ya Ukristu. Akat kwilej yany ya Yehova ku yikumangan yau, ni ku yitentam. Chawiy in Kristu ijing yiyisotilau kusal kudi Yehova. Muntu akat kumwopatang mu chikumangen ching anch wasal chitil chijim ni walik kwit dilikishin.—Midimu 20:28.
4, 5. Chilakej ik chidia mu Bibil cha muntu wopatau chisambidinau pinap, ni mulong wak wakasikeshau chikumangen kumuchirish ikundj winou?
4 Tushinshikinany chilakej chimwing chidia mu Bibil cha muntu wopatau mu chikumangen. Chikumangen cha in Korint chalika “makaj [mamwing] kimadip mudi madia pakach pa in mangand, anch umwing wenen ushich ni mband wa tatukwend.” Paul wayikasikesha in Korint anch: “Mupanany muntu winau kudi Satan ashesha mujimbu wend, chakwel mupim wend wez upanda.” (1 Korint 5:1-5) Pamwopatau muntu winiwa ni kumupan kudi Satan, mukayitil wikala kand chid cha mangand ma Djabul. (1 Yohan 5:19) Kwopatiu kwend kwadiosha usu uyimp mu chikumangen ni kwalama “spiritu” wa Nzamb, chakwel chikumangen chidandamena kumekesh spiritu wa Nzamb.—2 Timoteu 4:22; 1 Korint 5:11-13.
5 Kurutu kusuta chisu chilemp, Paul wayikasikesha in Korint kumuchirish mwin kurumbuk. Mulong wak? Kambuy walonda anch mulong kangal “Satan [eza] kuman ndond ya [kutwisak].” Chimeken patok anch mukayitil wakarumuka ni mwom wend wikala wishitwila. (2 Korint 2:8-11) Anch in Korint alika kumuchirish ikundj winou wakarumuka, Satan wela kuyisak mulong ela kwikal akad yovil ni akad kulikishin mudi mwadinga musotilay Djabul anch ikal. Chawiy chimwing, en “wamulikishilangany ni kumwongoj” ikundj winou wakarumuka.—2 Korint 2:5-7.
6. Kwopatiu kukutwish kuwanyish chom ik?
6 Kwopatiu kukat kuwanyishang chom ik? Kukat kushitwish dijin ditumbila dia Yehova ni kulam ntumb yiwamp ya antu end. (1 Pita 1:14-16) Kumudiosh mwin kurumbuk mu chikumangen kukat kuchidij yany ya piur ya Nzamb ni kukat kulam chikumangen chishitwila mu spiritu. Kukat kumushikij kand muntu wakad kukarumuk ku kujingunin kujimb kwa chitil chend.
Kukarumuk Kudi kwa Usey Ujim Chakwel Kuchirishiu
7. Chom ik chamushikena David palikay kusal konfes mulong wa yitil yend?
7 Antu avud akata kusal yitil yijim nakash chakin kamu akat kukarumukang ni kakatap kuyopatang mu chikumangen. Chakin kamu, kukarumuk kwakin kuswapelingap bwat. Tumushinshikinany Mwant David, wa Isarel wafunda Kuseng wa 32. Muminy winou ulejen anch David walika kusal konfes wa yitil yend yijim ni Batisheba mu kachisu kanang. Mudi chibudikin, runeng piur pa yitil yend ramuziyisha likit, mudi kamu mudinga chang chikata kuumish mem ma mutond. David wamana mar ku mujimbu ni mu manangu, pakwez chisu ‘chitiyinay yitil yend, Yehova wamulikishina.’ (Kuseng 32:3-5) Kupwa David wawanga anch: “Wayuk muntu wakad kuchindilau jinshid kudi [Yehova].” (Kuseng 32:1, 2) Chadinga chipandiken kuwap mudi ik kutan ranaken ra Nzamb!
8, 9. Kukarumuk kumekening nchik, ni kukwet usey ik mulong wa kuchirishiu kwa muntu wopatau mu chikumangen?
8 Choviken patok, anch mukayitil ufanyidin kukarumuk anch usotil kutan ranaken. Pakwez, kukarumuk kudiap kwov usany ap wom anch chitil chikwijikan. “Kukarumuk” kurumburikin “kukarumun yitongijok [ya muntu]” piur pa mwikadil uyimp, mulong wa runeng piur pa chitil. Muntu ukarumukina ukweting “muchim ubukukina ni [unenganena]” ni usotil “kwikand” anch chitwishikin.—Kuseng 51:17; 2 Korint 7:11.
9 Kukarumuk kudi kwa usey ujim chakwel kuchirishiu mu chikumangen cha Ukristu. Muntu wopatinau kakatap kumuchirish kapamp kamwing mu chikumangen mu kusut kwa chisu kanang. Kurutu kwa kumuchirish, chimufanyidin kuswimp nakash kamu ngikadil ya muchim wend. Chimufanyidin kujingunin kujimb kwa chitil chend ni kusaal kwamusadishay Yehova ni chikumangen. Mukayitil ufanyidin kukarumuk, ita chakin kamu dilikishin mu malembil, ni kulondul yom yitentamina yisotilay Nzamb. Chisu chitinay anch amuchirisha, chimufanyidin kwikal utwishina kupan uman anch wakarumukin kal ni “kusal midimu yifanyidina dikarumwish dia michim.”—Midimu 26:20.
Ov, Mulong wak Kusal Konfes wa Yitil?
10, 11. Ov, mulong wak chidingap chiwamp kujindjik chitil?
10 Antu amwing asala yitil akutwish atong anch: ‘Anch namulej muntu kanang chitil cham, akwingit kwakul ku yipul yikwatishena usany ap akutwish angopat. Pakwez anch naninet nich, nikwiyep kwingovish usany ni kwikil muntu ap umwing ukwijika mu chikumangen.’ Chitong chinech chikat kusal avuramen yom yimwing ya usey. Yom yiney, yom ik?
11 Yehova udi “Nzamb wa ranaken ni mwin riy, wakad kwovang ujim swa, wizwila sens nich rukat ni uyakin, ukat kumekesh rukat rend ku tunan ni tunan twa antu, ukat kulikishin kurumbuk, ni kuyip, ni yitil.” Chikalap nchik mwamu ndiy ukat kuyikand antu end “mudi mudia yisalijok [yau].” (Kubudik 34:6, 7; Yeremiy 30:11) Anch wasal chitil chijim, ov, ukutan nchik ranaken ra Nzamb anch ujindjikin chitil chey? Yehova uchij, ni kakatap kuvuramenang chitil.—Jinswir 15:3; Abakuk 1:13.
12, 13. Chibudikin ik chidingaku ku kusot kujindjik chitil?
12 Anch wasal chitil chijim, kusal konfes kukutwish kukukwash kwak kom katok. (1 Timoteu 1:18-20) Kulik kusal konfes kukutwish kulet kom kafila nich kakutwisha kukushikij ku kusal yitil yikwau. Vurik anch umusadidilap muntu windjing ap chikumangen chitil. Pakwez umusadidil Nzamb. Nfund-a-kuseng wawanga anch: “[Yehova] ukwet nkwas yend mwiur. Mes mend matadil pansh, mpal yend yikat kuyipapat an a antu. [Yehova] ukat kuyipapat antu atentamina, pakwez mupim wend uyikisil antu ayimp ni awiy akatila kubwambul.”—Kuseng 11:4, 5.
13 Yehova kakezap kumuyukish muntu win mwawonsu ujindjikina chitil chijim ni usotila kushakam mu chikumangen chishitwila. (Yakob 4:6) Chawiy lel, anch wawidil mu chitil ni usotil kusal yom yitentamina, kangal widjidjek kusal konfes wakin. Chamwamu, ukez kikal nich kom kafila nich, pakampwil pa chisu ukutanga ni kutesh yiyul piur pa milong yiney yikash. Ov, chikwikal nchik anch Yehova wakupwit spiritu wend mudi mwasalay padiay Mwant Saul? (1 Samwel 16:14) Anch spiritu wa Nzamb wakudiokal, ukutwish kuwil jimu mu yitil yikash.
Yichingejina Akadivar Ney Ashinshamena
14. Ov, mulong wak chimufanyidina mwin kurumbuk kulondul chiyul chidia mu Yakob 5:14, 15?
14 Chawiy lel, chom ik chifanyidinay kusal mukayitil? “Lik ayitazuk amakurump a chikumbu cha Nzamb, awiy alembil padiay ndiy, amuzizil many mu dijin dia Mwant; kulembil kwa ritiy kukez kumupandish muyej, ni Mwant ukez kamulangwish ndiy; anch ndiy wasala kal chitil akez kamulikishin.” (Yakob 5:14, 15) Kuya kuyilej amakurump yidi njil yimwing yikutwishay muntu kusong “mabuj ma kukarumuk.” (Mateu 3:8) Amakundj inay ashinshamena ni in rukat akez ‘kulembil mulong wendendiy ni kumupan many mu dijin dia Yehova.’ Mudi many matudishina, chiyul chau chidiokila mu Bibil chikez kwikal cha kukasikesh kudi muntu win mwawonsu ukarumukina chakin kamu.—Yeremiy 8:22.
15, 16. Mutapu ik ulondwilau amakurump in Kristu chilakej cha Nzamb chidia mu Ezekiel 34:15, 16?
15 Chilakej cha rukat chipandikena kuwap mudi ik chashay Kafung wetu, Yehova, chisu chayikolay in Yuda kudiokal mu usuk wa in Babilon mu muvu wa 537 K.C.C. ni payikolay in Isarel a mu spiritu kudiokal mu “Babilon mujim” mu muvu wa 1919 C.C.! (Kuburik 17:3-5; Galatia 6:16) Chawiy wawanyisha kushilamu kwend anch: “Am amwinam nikez kwikal kafung wa amikoku am. Nikez kuyisotil ndond yiwamp ya kwiswedishil. . . . ‘Nikez kuyisurab ashadikina, ni kuyichirish aya kulemp, ni kuyikas pa yitat, ni kuyok ayedila.’”—Ezekiel 34:15, 16.
16 Yehova wadisha amikoku end a chifanikesh, wayiladika zong, ni wayisuraba ashadika. Chawiy chimwing, atufung in Kristu akat kushinshikin anch amikoku a Nzamb adil nawamp mu spiritu ni adi mu chisambu. Amakurump akat kuyisurab amikoku apumbukina kudiokal ku chikumangen. Mudi kamu Nzamb ‘mwayikasay akweta yitat,’ amakurump niyawiy akat “kuyikas” amikoku atapau yitat ku mazu ap ku yisal ya antu. Ni mudi Nzamb ‘uyokin ayedila,’ amakurump ayikwashining antu ayedila mu spiritu, mulong wa yitil yau ayinau.
Mutapu Upaniningau Atufung Ukwash
17. Ov, mulong wak kitufanyidinap kwidjidjek kukimb ukwash wa mu spiritu wa amakurump?
17 Cha musangar mulong amakurump akat kuziyil ku chiyul ech: “Iyovilany amwing riy nich wom.” (Yuda 23) In Kristu amwing asala yitil yijim pawilau mu masandj. Pakwez anch akarumuk chakin kamu, akuyovil riy, kuyisadil nich rukat kudi amakurump kukuyikwash mu spiritu. Paul walonda piur pa amakundj inay, ni witekamu amwinend anch: “Kichidip mulong etu tudi ant piur pa ritiy ren; pakwez tudi in mudimu nen ku musangar wen.” (2 Korint 1:24) Chawiy lel, kangal widjidjek kuyit amakurump ukwash wau wa mu spiritu.
18. Mutapu ik ukatau amakurump kuyisadil ambay nau akaritiy arumbukina?
18 Anch wasal chitil chijim, ov, mulong wak ufanyidina kuyichingejin amakurump? Mulong cha kusambish adi atufung a amikoku a Nzamb. (1 Pita 5:1-4) Kwikiling kafung mwin rukat ukata kumubulang mwan a mukoku uziyila, udidila mulong anch witapang chitat. Pakatau amakurump kwisamb ni ambay nau akaritiy arumbukina, chawiy, udiap mulong wa kukimb dipup difanyidina chitil chasadikanga, pakwez chiding mulong wa kutal chitil ni mutapu wa kumwok mu spiritu, anch chitwishikin. (Yakob 5:13-20) Chiyifanyidin amakurump kurumburish nich kutentam ni ‘kuyisadil amikoku ni riy.’ (Midimu 20:29, 30; Isay 32:1, 2) Mudi in Kristu awonsu, amakurump niyawiy chiyifanyidin ‘kusadil kutentam, rukat, riy, ni kushakam ni Nzamb nich kwitudish.’ (Mike 6:8) Ngikadil yiney yidi ya usey pakampwil pa chisu cha kukwat mipak yikwatina ku mwom ni ku mudimu utumbila wa “amikoku a madil [ma Yehova].”—Kuseng 100:3.
19. Nich ngikadil ik ya manangu yikatau amakurump kupakish kumuchirish muntu warumbukina?
19 Atufung in Kristu ayitonda kudi mwiku utumbila ni asotining anch uyitakela. Anch “muntu umwing amupadikan kudi kuyip”—mudi anch wakwachik pakad kuchingejin—amakundj awanyishinau mu spiritu akupakish ‘kumuchirish udia mwamu au mu muchim wa kwitudish.’ (Galatia 6:1; Midimu 20:28) Nich kwitudish pakwez ni kujijaman mulong wa yijil ya Nzamb, amakurump akat kupakish kuchirish yitongijok yend, mudi mutapu mukatay dokiter kuchirish difup dibukukina pa ndond yad chakwel dinunga nawamp, nich kwipuk kumwovish kuswan chamwamu ni oku ashinshikin musul wa mulong. (Kolosai 3:12) Amakurump akat kwengamin pa malembil ni pa Bibil chakwel kutal anch chifanyidin kwikal ranaken, mupak wau ufanyidin kumekesh chitong cha Nzamb pa milong yiney.—Mateu 18:18.
20. Mu ngikadil ik yifanyidina kumurumburish muntu?
20 Anch chitil chijiken ap anch chikwijikan, chifanyidin kupan chijikish ku chikumangen mulong wa kuchidij ntumb yach. Chifanyidin kand kwijikish chikumangen mulong wa diyingishin kanang anch kudi kuswir kwa kuchibabesh. Pa chirung chiyerikinay mu spiritu muntu warumburishinau, ukwikal ufanikena ni muntu uyerikina chitat, chikutwisha kumukangesh mu kachisu kanang kusal mijikit yend. Mu chirung kanang, chikez kwikal chipandikena kuwap anch muntu ukarumukina atesha pa ndond pa kupan yirumburil ku yikumangen. Amakurump akutwish kutenchik anch umwing wau ileja nend Bibil mulong wa kumukasikesh pachidiay uziyila chakwel “akasiken mu ritiy” kand. (Titus 2:2) Yom yiney yawonsu yisadikin mu rukat ni yidiap mulong wa kumupup mwin kurumbuk.
21. Mutapu ik ukutwishau kutadil yisal yimwing ya yitil?
21 Amakurump akutwish kupan ukwash wa mu spiritu mu jinjil kushalijan. Chilakej, mukadivar wadinga pakur nich milong ya kuna pakad kupep pa chopu, wana nakash kapamp kamwing ap twaad padiay kwol kwend amwinend. Ap muntu walika kal kuna ruwand ukat kunang ku ujindj kapamp kamwing ap twaad mu yisu yiziyinay mu spiritu. Ap anch walembil ni witiyijin anch Nzamb wamulikishidin, chimufanyidin kukimb ukwash kudi amakurump chakwel anch kusal chitil kangal kwez kwikala chaku. Mukurump umwing ap aad akutwish atadil mulong winou. Pakwez, mukurump winou ufanyidin kumwijikishamu kalam ntakel, anch kudi yom yikwau yikwachikinaku.
Dandamen Kwitiyij Kupup kwa Nzamb
22, 23. Ov, mulong wak ufanyidina kudandamen kwitiyij kupup kwa Nzamb?
22 Chakwel kwitiyik kudi Nzamb, mwin Kristu mwawonsu chimufanyidin kuta muchim ku dipup dia Yehova. (1 Timoteu 5:20) Chawiy tang muchim ku kukand kwin kwawonsu piwilejina Bibil ni mikand ya Ukristu amwiney ap anch watesh chiyul ku yikumangan ni ku yitentam ya antu a Yehova. Dimuk usal kukwatijan nich rusot ra Yehova. Chawiy kupup kwa Nzamb kukez kukukwash kushal dipat mu spiritu—dipat dikash pantaliken ni chitil.
23 Kwitiyij kupup kwa Nzamb kukez kukukwash kushal mu rukat ra Nzamb. Chakin, amwing ayopata mu chikumangen cha Ukristu, pakwez chom chinech chikezap kukushiken anch walam “muchim wey” ni ‘kwend mudi mbabej.’ (Jinswir 4:23; Efesus 5:15) Pakwez, anch akwopatin kal, ov, mulong wak ulikina kutampul jinzau ja kuchirik? Nzamb uyisotil antu awonsu ipana kudi ndiy amwifukwila mu kushinshaman ni “[muchim wa] musangar.” (Kuvurik Yijil 28:47) Ukutwish kusal mwamu chikupu anch ukat kwitiyij kupup kwa Yehova.—Kuseng 100:2.
Ov, Ukwakul Nchik?
• Ov, mulong wak ukatau kuyopat antu amwing mu chikumangen cha Ukristu?
• Kukarumuk kwakin kwitin chom ik?
• Ov, mulong wak chifanyidin kusal konfes mulong wa yitil yijim?
• Mu jinjil ik mukatau amakurump in Kristu kuyikwash in kusal yitil akarumukina?
[Chipich chidia pa paj wa 13]
Ov, mulong wak kambuy Paul wayitumina
in Korint yany piur pa kwopatiu mu chikumangen?
[Chipich chidia pa paj wa 16]
Mudi atufung a pasak, amakurump in Kristu akat “kuyikas” amikoku a Nzamb akweta yitat