MUTU WA MULONG WA KWILEJ WA 34
MUMINY 107 Nzamb Udi Chilakej cha Rukat
Mutapu wa Kumekesh Rukat ni Riy Kud Antu Asadina Yitil
“Ku ranaken rend, Nzamb ukimbin kukukwash kukarumuk.”—ROM 2:4.
YIDA MU MUTU WA MULONG WINOU
Tukuman mutapu ukutwishau amakurump kuyikwash antu asadina yitil yikash mu chikumangen.
1. Yom ik yikutwisha kushiken kupwa kwa muntu kusal chitil chikash?
MU MUTU wa mulong wasambelang, twamanang mutapu wapwishay kambuy Paul mulong wading utadina chitil chikash mu Korint. Muntu wasala chitil walika kukarumuk ni amudosha mu chikumangen. Pakwez, mud mulejena verse wa mutu wa mulong, Nzamb ukutwish kumukwash muntu kukarumuk. (Rom 2:4) Mutapu ik ukutwishau amakurump kumukwash chakwel akarumuka?
2-3. Yom ik tufanyidina kusal anch twijik anch mbay netu mwin Kristu wasalang chitil chikash, ni mulong wak?
2 Chakwel amakurump atwish kumukwash muntu, afanyidin kwijik mulong nawamp. Chawiy, yom ik tufanyidina kusal anch twijik anch mbay netu mwin Kristu wasadin chitil chikash—chom chikutwisha kumushikij ku kumudosh mu chikumangen? Tufanyidin kumukasikesh muntu wasalang chitil kuya kuyiman amakurump mulong wa kwit ukwash.—Isay 1:18; Mid. 20:28; 1 Pita 5:2.
3 Chad, chikwikal nchik anch muntu wasalang chitil walik kuyilejamu amakurump? Tufanyidin kuya ayinetu kuyilejamu amakurump mulong wa kwikal nich kashinsh anch muntu wasalang chitil ukutambul ukwash uswirikedinay. Chawiy chom cha rukat tufanyidina kusal, mulong tukatinap kumushadish mukadivar ap nambaz netu. Anch muntu wasalang chitil wadandamen mu chitil chend, ukuyipish urund wend ni Yehova. Ukutwish kand kuyipish kalimish ka chikumangen. Chawiy, rukat tukweta mulong wa Yehova ni mulong wa muntu wasalang chitil rikat kutwinkish kutakaman kwa kusal mwamu.—Kus. 27:14.
MUTAPU UKATAU AMAKURUMP KUYIKWASH ANTU AKATA KUSAL YITIL YIKASH
4. Chisu chitongijok cha amakurump anch atanijan ni muntu wasalang chitil chikash?
4 Anch muntu wasal chitil chikash mu chikumangen, chisak cha amakurump chikat kutond amakurump asatu akweta ukaliweny pakach pau mulong wa kusal komite.a Amakundj inay afanyidin kwijik mimbu yau ni kwikal ikepishina. Chisu chisadinau usu wa kumukwash muntu warumbukang chakwel akarumuka, ij anch kakutwishap kumushindin muntu chakwel aswimpa. (Kuv. 30:19) Amakurump ij anch kadap antu awonsu akata kusal yitil akata kushiken ku kukarumuk, mud mwasalay Mwant David. (2 Sam. 12:13) Antu amwing akata kusal yitil akutwish kwau kulik kutesh kubabesh kwa Yehova. (Dis. 4:6-8) Chikalap nchik mwamu, chitongijok cha amakurump chid cha kumukwash muntu wasalang chitil kukarumuk anch chitwishikin kusal mwamu. Mbil ik jikata kuyitakel anch atanijan ni muntu wasalang chitil?
5. Chiyul ik chifanyidinau amakurump kulam mu manang patanijadinau ni muntu wasalang chitil? (2 Timote 2:24-26) (Tal kand chipich.)
5 Amakurump amumening muntu wasalang chitil mud mukoku wa usey washadikana. (Luka 15:4, 6) Chawiy, anch atanijan ni muntu warumbukang, kakatap kumulond mazu mayimp, ap kumupipej; ni kakatap kutong anch chiyitin kwau kwipol yipul ni kwikal ni uman. Pakwez, akat kumekesh mikadil yida mu 2 Timote 2:24-26. (Tang.) Amakurump akat kushal antu itudishina ni awamp, mulong wa kusal usu wa kumukwash muntu wasalang chitil kuswimp yitongijok yend.
Mud atufung a pakur, amakurump akat kusal usu wau wawonsu mulong wa kumukwash mukoku washadikina kal (Tal paragraf wa 5)
6. Mutapu ik ukatau amakurump kurijek muchim wau kurutu kwa kutanijan ni muntu wasadina chitil? (Rom 2:4)
6 Amakurump akat kurijek muchim wau. Akat kusal usu wa kumwimburij Yehova mu yom yawonsu yisadinau piur pa muntu wasalang chitil ni kuvurik mazu ma Paul malondina anch: “Ku ranaken rend, Nzamb ukimbin kukukwash kukarumuk.” (Tang Rom 2:4.) Amakurump afanyidin kuvurik anch ad cha kusambish atufung asadina mwinshin mwa umutakel wa Kristu. (Isay 11:3, 4; Mat. 18:18-20) Kurutu kwa kutanijan ni muntu wasalang chitil, komite wa amakurump ukushinshikin mu malembil chitongijok chend: kumukwash muntu wasalang chitil chakwel akarumuka. Akat kukimbijol mu Mifund ni mu mikand yetu, ni kulembil chakwel Yehova ayinkish ukaliweny wa kumutesh muntu ni kutesh mutapu uda mulong. Akat kushinshikin yom yikwetau kuswir kwa kwijik piur pa muntu, ni yamushikijina ku kutong ni kusal yom yasadinay.—Jnsw. 20:5.
7-8. Mutapu ik ukutwishau amakurump kwimburij kushimpish muchim kwa Yehova chisu chitanijadinau ni muntu wasalang chitil?
7 Amakurump akat kwimburij kushimpish muchim kwa Yehova. Akat kuvurik mutapu wasalay Yehova usu wa kuyikwash antu asala yitil pasak. Chilakej, Yehova wamutongisha Kayin nich kushimpish muchim, wamubabesha piur pa yibudikin ya chitil ni wamuleja anch ukumuyukish anch waziyin. (Dis. 4:6, 7) Yehova wamubabesha David kusutin muprofet Natan, wasadina chilakej chamupukuna mwant ku muchim. (2 Sam. 12:1-7) Ni Yehova ‘wadandamena kutum’ aprofet end ‘tupamp ni tupamp’ kud in Isarel chisu chamubwambwilau. (Jer. 7:24, 25) Kachingelap anch antu end akarumuka bil kurutu ayikwasha. Pakwez, wasala rizau ra kusambish mulong wa kuyikasikesh kukarumuk.
8 Amakurump akat kulondul chilakej cha Yehova pasadinau usu wa kuyikwash antu asadina yitil yikash. Mud mulejenay 2 Timote 4:2, akat kutong ‘nich kushimpish muchim kwawonsu’ chisu chimukwashinau mbay nau wasadina chitil. Chawiy, mukurump ufanyidin chisu chawonsu kwitudish ni kushimpish muchim chakwel amukwash muntu wasalang chitil kukat kusal yom yiwamp. Anch mukurump wajiman ap wasul ku muchim, muntu ukwashinay ukutwish kulik kutesh yiyul ap ukutwish kwend walik kukarumuk.
9-10. Mutapu ik ukutwishau amakurump kumukwash muntu wasadina chitil kutongijokin pa yom yasadinay?
9 Amakurump akat kusal usu wa kwijik yom yamushikijang muntu kusal chitil. Chilakej, ov, mwin Kristu wasalang chitil wading wasambishin kal pakemp pakemp kudiul dilejan da pakampwil ap mudimu wa kulejan? Ov, wading kwend kumulembilang Yehova pa chipatu ap piur piur kwau? Ov, walikididin maku mayimp chakwel mamutakela? Ov, watondin arund ayimp ap kwipuwangej kuyimp? Kutond kwinoku kwikadin ni usu ik pa yitongijok ni yovil yend? Ov, wij mutapu mipak ni yisal yend yamusadina nayimp Tatukwend Yehova?
10 Amakurump akutwish kumwipul muntu yipul yikutwisha kumukwash kutongijokin pa yom yaziyishina urund wend ni Yehova ni kumushikij ku kusal chitil. Akutwish kusal mwamu mu mutapu uwamp pakad kumwipul piur pa yom ya mwom wend wa pakampwil yakadau amakurump kuswir kwa kwijik. (Jnsw. 20:5) Chikwau kand, akutwish kusadin yilakej mulong wa kumukwash muntu kutongijok ni kuman uyimp wa yisal yend, mud mwasalay Natan kud David. Pamwing ap kapamp ka kusambish kakutanijanau nend, muntu ukusambish kwov ushon piur pa mupak wakwatinay ni piur pa yitongijok yend. Ukutwish pamwing ap kukarumuk.
11. Mutapu ik Yesu wayikwashay antu ading asadina yitil?
11 Amakurump akat kusal usu wa kumwimburij Yesu. Pading pamukwashinay Saul wa ku Tarisis kukarumuk, Yesu wamwipula chipul cha manang anch: “Saul, Saul! Ov, mulong wak ey ukat kwinzengol am?” Kusutin chipul chinech, Yesu wamukwasha kutongijokin pa uyimp wading usadinay. (Mid. 9:3-6) Ni piur pa ‘mband Jezabel,’ Yesu walonda anch: “Namwinkishin kal chisu cha kukarumuk.”—Kuj. 2:20, 21.
12-13. Mutapu ik ukutwishau amakurump kumushil muntu wasalang chitil chisu cha kukarumuk? (Tal kand chipich.)
12 Pamwimburijinau Yesu, amakurump kafanyidinap kulond kapamp kamwing anch muntu wasalang chitil kakukarumukap. Antu amwing akutwish kukarumuk kapamp ka kusambish katanijadinau ni komite wa amakurump, pakwez akwau akwet kuswir kwa chisu chilemp. Chawiy amakurump akutwish kwirijek mulong wa kutanijan kand ni muntu wasalang chitil tupamp tuvud. Pamwing ap kupwa kwa kutanijan kapamp ka kusambish, mwin Kristu warumbukang ukutwish kusambish kutongijokin chikurikina piur pa yom yalondangay. Ukutwish pamwing ap kumusejin Yehova mu malembil nich kwikepish ni kumwit dilikishin. (Kus. 32:5; 38:18) Mwamu, pakutanijanau nend kapamp kakwau, muntu wasadina chitil ukutwish kwikal ni yitongijok yindj yishalijadina ni yadingay nich patanijanangau kapamp ka kusambish.
13 Mulong wa kumukwash muntu wasalang chitil chakwel akarumuka, amakurump akat kwitek pa ndond yend ni kwikal antu awamp. Akat kumulembil Yehova chakwel ayukisha usu wau ni kuchingej anch mukadivar nau wasadina chitil ukuchirish manang ni kukarumuk.—2 Tim. 2:25, 26.
Amakurump akutwish kutanijan ni muntu wasadina chitil tupamp tuvud mulong wa kumushil chisu cha kukarumuk (Tal paragraf wa 12)
14. Nany ukata chakin kumukwash muntu kukarumuk, ni mulong wak?
14 Anch muntu wasalang chitil wakarumuk, chinech chikat kulet musangar nakash! (Luka 15:7, 10) Nany ukata kumukwash chakin muntu kukarumuk? Ov, ad amakurump? Vurik yom yafunday Paul piur antu akata kusal yitil. Wafunda anch: ‘Ukuman ap Nzamb wayinkish mutapu wa kukarumuk.’ (2 Tim. 2:25) Chawiy, Yehova, ndiy ukata kumukwash mwin Kristu kuswimp yitongijok ni yisal yend, kadap muntu. Paul warumburila yom yiwamp yikata kushiken anch muntu wakarumuk. Muntu winou ukutwish kwikal nich ronganyin rakin ra uyakin, ukat kuchirish manang mend mawamp, ni ukutwish kukwasinik mu mupit wa Satan.
15. Mutapu ik ukutwishau amakurump kudandamen kumukwash muntu wakarumukina?
15 Anch muntu wasalang chitil wakarumuk, komite wa amakurump ukurijek mulong wa kumwendin muntu winou mu ukafung chakwel adandamen kutambul ukwash uswirikedinay mulong wa kurish ni mipit ya Satan ni kwonin jinjil mwendidina yijdjatil yend. (Heb. 12:12, 13) Chakin kamu, amakurump kakatap kuyilejamu antu akwau yom yasalangay muntu wasalang chitil. Pakwez, yom ik yiswirikedina chikumangen kwijik?
“ANCH ANTU AKAT KUSAL YITIL, YIKANDILA PAKACH PA ANTU AWONSU”
16. Kukwatijan ni 1 Timote 5:20, “antu awonsu” ik isambinay Paul?
16 Tang 1 Timote 5:20. Paul wafunda mazu minam kud mbay nend Timote wading niyend mukurump, piur pa mutapu wa kuyikwash “antu [akata] kusal yitil.” Yom ik yading yifidinay kulond? Kadingap kafidina kamu kulond anch chikumangen cha kabuj chawiy chading “antu awonsu.” Pakwez, wading wisambidin piur pa antu akemp asambedina kal pamwing ap kwijik piur pa yitil yasadinay muntu. Pamwing ap ayinau amumanang muntu mutapu usadinay chitil, ap muntu amwinend wasalang chitil ndiy wayilejang. Amakurump afanyidin kuyijikish ku ujindj anch mulong aushinshikinang kal ni muntu wasalang chitil amukandang.
17. Anch chitil chikash chijikan kud antu avud mu chikumangen ap anch akushiken kuchijik, chijikish ik chikusalau, ni mulong wak?
17 Yisu yimwing, antu avud mu chikumangen akutwish kwijik anch muntu kanang wasadin chitil chikash, ap akutwish pamwing ap kushiken kwijik yom yiney. Anch chid mwamu, “antu awonsu” akutwish kwikal chikumangen cha kabuj. Chawiy mukurump ukutwish kwijikish chikumangen anch mukadivar ap nambaz kanang amupupin. Mulong wak? Paul wakwil anch: ‘Mulong wa kuyibabesh ashadinaku’ chakwel kangal asal yitil yikash.
18. Mutapu ik ukutwishau amakurump kupwish milong yitadina an akemp abatishinau kal? (Tal kand chipich.)
18 Chikwikal nchik anch mwan mukemp wabatishinau kal—uda mwinshin mwa mivu 18—wasal chitil chikash? Chisak cha amakurump chikutond amakurump aad chakwel atanijan ni mwan mukemp wasadina chitil pamwing ni anvaj end in Kristu.b Amakurump akuyipul anvaj yom yasadinau kal mulong wa kumukwash mwanau kuswimp ni kukarumuk. Anch mwan winou wateshin yiyul ya anvajend ni anvaj apukwin muchim wend, amakurump aad inay akutwish kukwat mupak wa kuyilik anvaj chakwel adandamen kumukwash mwanau. Amakurump ij anch Yehova wayinkishin kal anvaj chisend cha kuyikand anau nich rukat. (Kuv. 6:6, 7; Jnsw. 6:20; 22:6; Efes 6:2-4) Chawiy amakurump akusambish kushinshikin pachipatu pamwing ni anvaj mulong wa kwikal nich kashinsh anch mwan winou utambwil ukwash uswirikedinay. Pakwez, chikwikal nchik anch mwan winou wabatishinau kal walik kukarumuk ni wadandamen kusal yom yiyimp? Anch chikal mwamu, amakurump asatu akutanijan nend pamwing nau anvaj end in Kristu.
Anch mwan mukemp wabatishinau kal wasal chitil chikash, amakurump aad akutanijan ni mwan winou pamwing ni anvajend in Kristu (Tal paragraf wa 18)
‘YEHOVA UD MWIN RIY NI MWIN RANAKEN NAKASH’
19. Mutapu ik ukatau amakurump kusal usu wa kumwimburij Yehova chisu chiyikwashinau antu akata kusal yitil?
19 Akadivar asadina komite wa amakurump akwet chisend kurutu kwa Yehova cha kulam chikumangen chishitwila. (1 Kor. 5:7) Akat kusot kand anch antu asadina yitil ashiken ku kukarumuk anch chitwishikin. Mulong wa kusal mwamu, amakurump akat kulam chitongijok chiwamp ni kuchingej anch muntu ukukarumuk. Mulong wak? Mulong akatin kumwimburij Yehova, uda “mwin riy ni mwin ranaken nakash.” (Jak. 5:11) Tal mutapu wamekeshay kambuy Yohan wading wananapina kal chitongijok chinech. Wafunda anch: “Anam, akarukat mu Yesu, nikufundidilany yom yiney chakwel kangal wez wasalany yitil. Pakwez anch muntu wasal chitil tukwet kal mwin kutulondilap, ndiy kamu Yesu Kristu, utentamina, udia piswimp nend Tatuku Nzamb.”—1 Yoh. 2:1.
20. Yom ik tukwisambina mu mutu wa mulong wa nsuden?
20 Cha ushon, yisu yimwing mwin Kristu ukutwish kulik kukarumuk. Anch chikal mwamu, chifanyidin kumudosh mu chikumangen. Mutapu ik ukatau amakurump kupwish mulong ujim mud winou? Tukwisambin yom yiney mu mutu wa mulong wa nsuden wisambidina yom yiney.
MUMINY 103 Atufung Adi Yipan Kudi Antu
a Pakur, chisak chinech achitazukang anch komite wa dirumburish. Pakwez mulong kurumburish chid kwau chisend chimwing pakach pa yisend yikweta chisak chinech, tukusadinap kand mazu minam. Pakwez, tukutazuk kwetu chisak chinech anch komite wa amakurump.
b Anch anvaj a mwan wakad kal kuwanyish mivu 18 kadap Atuman a Yehova, mwan winou akutwish kumutwalaku kud mwanamakwend wa ku mujimbu wapamina kal uda Kaman wa Yehova, ap mulej wend wa Bibil, ap muntu mukwau mukurump uda Kaman wa Yehova uchingejidinay.