MUTU WA MULONG WA KWILEJ WA 36
MUMINY 103 Atufung Adi Yipan Kudi Antu
‘Yitazuka Amakurump’
“Ayitazuk amakurump a chikumangen”—YAK. 5:14.
MU WISWIMP
Tukuman mulong wak chid cha usey kwit ukwash kud amakurump chisu tuuswirikedina.
1. Mutapu ik wamekeshay Yehova anch uyikwatin atushalapol end ni usey nakash?
YEHOVA uyikatin antu awonsu amusadidina ni uyibangidin mud mukatay kafung kuyibangin amikoku. Wayilanda ni mash ma Yesu ni watekin kal amakurump mu chikumangen mulong wa kuyibangin. (Mid. 20:28) Nzamb ukatin anch amakurump ayilam atushalapol end nawamp. Kusutin umutakel wa Kristu, amakurump akat kuyikasikesh amikoku ni kuyichidij ku ubaaj wa mu spiritu.—Isa 32:1, 2.
2. Anany akatay Yehova kubangin mu mutapu wa pakampwil? (Ezekiel 34:15, 16)
2 Yehova uyibangidin nakash atushalapol end awonsu, pakwez ayedina ukat kuyibangin kand mu mutapu wa pakampwil. Ukat kuyisadin amakurump mulong wa kuyikwash ayedina mu spiritu. (Tang Ezekiel 34:15, 16.) Chawiy utukasikeshin kukimb ukwash chisu tuuswirikedina. Mu yisu mud yiney, kudoshaku kwit ukwash wa Nzamb mu malembil, tufanyidin kand kwit ukwash wa “atufung ni alej” mu chikumangen.—Ef. 4:11, 12.
3. Mutapu ik tukutwisha etu awonsu kutaninamu kusutin kushinshikin chisend chikwetau amakurump?
3 Mu mutu wa mulong winou tukuman mutapu watenchikay kal Nzamb yom mulong wa kutukwash mu spiritu kusutin amakurump. Tukwakul ku yipul yilondwilaku ey: Chisu ik tufanyidina kwit ukwash wa amakurump? Mulong wak tufanyidin kusal mwamu? Ni mutapu ik ukutwishau kutukwash? Ap anch turishinap ni yikokujol katat, kutan yakul ku yipul yiney kukutukwash kuman usey wa ditenchik da Nzamb ni kukutwish kupandish mwom wetu dichuku dimwing.
CHISU IK TUFANYIDINA ‘KUYITAZUK AMAKURUMP’?
4. Mulong wak tulondina ni kashinsh anch Yakobu 5:14-16, 19, 20 wisambidin mayej ma mu spiritu? (Tal kand yipich.)
4 Kurutu kwa kusambish kwisambin ditenchik da Nzamb piur pa kutambul ukwash wa mu spiritu, Yakobu wipula anch: “Ov, pakach pen pad muntu uyedina? Ayitazuk amakurump a chikumangen” (Tang Yakobu 5:14-16, 19, 20.) Mayej misambidinay Yakobu mu mukand winou mad ma mu spiritu. Chilakej, kamulejinap muntu uyedina kumutazuk dokter, pakwez kuyitazuk amakurump. Kupwa Yakobu ulondin anch muntu winou uyedina ukuyerik anch amulikishin yitil yend. Mu chilik kampand, yom yifanyidinay kusal muntu uyedina mu spiritu yifanaken ni yom yikutwishay kusal muntu uyedina ku mujimbu. Chisu tuyedina ku mujimbu tukat kumumanang dokter, kumurumburil mutapu twiyovila, ni kusadin yom yikutulejay. Mutapu umwing kand, anch tuyedin mu spiritu, tufanyidin kumuman mukurump, kumurumburil yom nawamp, ni kusadin chiyul chimedina pa Bibil chikutwinkishay.
Anch tuyedin ku mujimbu, tukat kumumanang dokter; mutapu umwing kand, anch tuyedin mu spiritu, tufanyidin kuyiman amakurump (Tal paragraf wa 4)
5. Mutapu ik tukutwisha kwijik anch urund wetu ni Yehova wasambish kal kuyip?
5 Ditenchik disambidinau mu mukand wa Yakobu shapitre wa 5 ditukasikeshin kuyiman amakurump chisu twiyovila anch tukasikenap kamu mu spiritu. Chikwikal cha manang anch twakimb ukwash winou kurutu kwa kusal yom yikash yikutwisha kuyipish urund wetu ni Yehova! Chitwitin kwikal in kashinsh. Bibil utubabeshin anch tukutwish kwidimb ayinetu piur pa ukash wetu wa mu spiritu. (Yak. 1:22) In Kristu amwing a kusambish a mu Sardis asala yom ya mutapu winou, ni Yesu wayibabesha piur pa ukash wau wa mu spiritu. (Kuj. 3:1, 2) Chom chimwing chikutwisha kutukwash kuman mutapu tuda mu spiritu kud kwilakej mushiku tukweta katat mu mijikit ya mu spiritu ni mushiku twading nich chisu chatubatishau. (Kuj. 2:4, 5) Tukutwish kwiyipul anch: ‘Ov, nichikwet kand mushiku wa kutang Bibil ni kutongijokin? Ov, nikat kukumangan ku yikumangan yawonsu ni kuyitenchik nawamp? Ov, nichikwet kand mushiku wa kulejan? Ov, nisutishiningap chisu chivud mu kwipuwangej ni kutongijokin pa yom ya ku mujimbu?’ Anch twakul anch bwat, ap ku chipul chimwing pakach pa yipul yiney, chimeken anch urund wetu ni Yehova uwapinap kamu, ni ukutwish kuyip nakash anch twalik kutenchik yom swa. Anch tutwishinap kuwapish yom ayinetu, ap anch yom twasadina yajipin mbil ya Nzamb, tufanyidin kukimb ukwash wa amakurump.
6. Yom ik yifanyidinay kusal muntu wasadina chitil chikash?
6 Chakin kamu, anch muntu wasal chitil chikash chikutwisha kumushikij ku kumudosh mu chikumangen, ufanyidin kuyiman amakurump. (1 Ko. 5:11-13) Muntu winou ukwet kuswir kwa kumukwash kurijek urund wend ni Yehova. Tufanyidin “kusal yom yimekeshina kukarumuk” anch tukimbin anch Yehova atulikishin kusutin difut. (Mid. 26:20) Pakach pa yom yiney pad kuyiman amakurump anch twasadin chitil chikash.
7. Anany kand akweta kuswir kwa ukwash wa amakurump?
7 Amakurump kakatap kwau kuyikwash ching kusu antu asadina yitil yikash, pakwez akat kuyikwash kand aziyina mu spiritu. (Mid. 20:35) Chilakej, ukutwish kuman anch utwishinap kupandakan maku mayimp. Chikutwish kukukasiken, pakampwil anch kurutu kwa kwilej uyakin wading ni chaku cha kuna madrog, kutal pornografi, ap kusal masandj. Kangal widjidjek kwit ukwash. Ukutwish kwambamb ni mukurump ukutwisha kukutesh nawamp, kukwinkish yiyul yifanyidina, ni kukwinkish kashinsh anch ukutwish kumusangaresh Yehova kusutin kulik kuziyin ku maku mayimp. (Mul. 4:12) Anch waziy mulong utwishinap kupandakan chikokujol chinech, amakurump akutwish kukuvurish anch usu wasadina mulong wa kwit ukwash umekeshin anch ukwatin nich usey urund wey ni Yehova ni udap mwin kwichingejin amwiney.—1 Ko. 10:12.
8. Ov, tufanyidin kuyilej amakurump piur pa kurumbok kwetu kwawonsu? Rumburil.
8 Tukwetap kuswir kwa kuyilej amakurump piur pa kurumbuk kwawonsu kukata kutushiken mu spiritu. Chilakej, tong bil anch dichuku dimwing, wamulondin mukadivar ap nambaz umwing yom yiyimp, pamwing ap wayijimedin kand nakash. Pa ndond pa kumuman mukurump, ukutwish kusadin chiyul chapanay Yesu piur pa kwikal mu chisambu ni mukadivar ni nambaz ney. (Mat. 5:23, 24) Ukutwish kwilej mitu ya milong piur pa kwitudish, kushimpish muchim, ni kwilam, mulong wa kumekesh mikadil yiney mu machuku ma kurutu. Chakin, anch utwishinap kupwish mulong amwiney, ukutwish kukimb ukwash wa mukurump. Mu mukand wayituminay In Kristu a ku Filip, kambuy Paul wamwita mukadivar umwing mu chikumangen kumukwash Evodiy ni Sentish kupwish milong yau; mukurump umwing mu chikumangen chen ukutwish kukukwash niyey.—Flp. 4:2, 3.
MULONG WAK TUFANYIDIN KUYITAZUK AMAKURUMP?
9. Mulong wak tufanyidinap kulikidil usany utukangesh kukimb ukwash wa amakurump? (Jinswir 28:13)
9 Chitwitin ritiy rikash ni kwikal atakamena mulong wa kwit ukwash kud amakurump anch twasadin chitil chikash ap anch tutwishinap kupandakan maku mayimp. Tufanyidinap kulikidil usany utukangesh kukimb ukwash wa amakurump. Mulong wak? Mulong Yehova wayitekin kal amakurump mulong wa kutukwash kwikal ni urund uwamp ni ndiy. Chawiy anch twayitazuk amakurump, tukumekesh anch tumuchingejidin Yehova ni tumuziyidin. Twij anch tukwet kuswir kwa ukwash wend mulong wa kudandamen kusal yom yitentamina. (Kus. 94:18) Ni anch twasal chitil, Nzamb ukutwish kutwanaken anch twakarumuk ni twalik kuchirikinap.—Tang Jinswir 28:13.
10. Yom ik yikutwisha kutushiken anch twapakish kujindjik yitil yetu?
10 Tukutwish kutaninamu anch twit ukwash kud amakurump chisu tuuswirikedina, pakwez tukutwish kuyipish yom nakash anch twapakish kujindjik yitil yetu. Pakimbay Mwant David kujindjik yitil yend, wayela mu spiritu, mu manang, ni pamwing ap kand ku mujimbu. (Kus. 32:3-5) Mud kand mayej ma ku mujimbu, mayej ma mu spiritu makat kuyip nakash anch kamwokinap nawamp. Yehova kakatinap anch chom chinech chitushiken, chawiy chitukasikeshinay ‘kurijek yom’ ni ndiy kusutin mutapu watenchikay kal mulong wa kutukwash mu spiritu.—Isay 1:5, 6, 18.
11. Mutapu ik tukutwisha kuyimeshikish antu akwau mar anch twajindjik yitil yikash?
11 Anch tuyilejinapamu amakurump piur pa chitil chetu chikash, antu akwau akutwish kumenaku mar. Tukutwish kukangesh spiritu wa Nzamb kusal mu chikumangen cha kabuj ni tukurumbangesh chisambu chikwetau akadivar nau anambaz netu. (Ef. 4:30) Ku mutambu ukwau kand, anch twajingunin anch muntu kampand mu chikumangen wasadin chitil chikash, tufanyidin kumukasikesh kuya kuyilejamu amakurump.a Anch twajindjik niyetu chitil chikash cha muntu mukwau, kom kakutwish kutufish nich. (Lev. 5:1) Anch tumukatin Yehova tufanyidin kuyilejamu amakurump. Anch twasal mwamu tukuyikwash akadivar nau anambaz netu a mu chikumangen ni kumukwash kand muntu wasadina chitil chikash kuchirish urund uwamp ni Yehova.
MUTAPU IK UKATAU KUTUKWASH KUD AMAKURUMP?
12. Mutapu ik ukatau amakurump kuyikwash antu aziyina mu spiritu?
12 Amakurump ayifumbin kal mulong wa kuyikwash antu awonsu aziyina mu spiritu. (1 Ts. 5:14) Anch wasadin chitil, amakurump akutwish kukwipul yipul mulong wa kujingunin mutapu wiyovila. (Jnsw. 20:5) Ukutwish kuyikwash kusutin kulond yom patok, ap anch chikukasikedin kusal mwamu mulong wa yishankur yey, wuntu wey ap mulong wa usany wovila piur pa yom wasadina. Kangal wiyakamish anch ukulond yom ya usup. (Job 6:3) Pa ndond pa kukurumburish kapamp kamwing, amakurump akwishil chisu cha kukutesh nawamp mulong wa kwikal ni uman wawonsu kurutu kwa kukwinkish chiyul chimedina pa Bibil. (Jnsw. 18:13) Ij anch chitin chisu mulong wa kumukwash muntu, chawiy kakutwishap kuchingej anch apwisha mulong kapamp ka kusambish kakwambambau ney.
13. Mutapu ik ukutwishau amakurump kutukwash kusutin malembil ni umutakel wa Bibil? (Tal kand yipich.)
13 Ang wayitazuk amakurump, akusal usu chakwel kangal wiyova nayimp kupandakan. Pakwez, akulembil mulong weyey. Ukutwish kushimwok pa ukumana anch malembil mau makwet “usu”. Mulong wa kukukwash kand, “[akukupan] many mu dijin da Yehova.” (Yak. 5:14-16) “Many” minam marumburikin uyakin wa Dizu da Nzamb. Kusutin ukaliweny wau wa kusadin Bibil, amakurump akutwish kukukasikesh ni kukwongoj, ni kukukwash kuwapish kand urund wey ni Yehova. (Isay 57:18) Umutakel wa Bibil ukukwinkishau ukutwish kukasikesh mupak wey wa kusal yom yitentamina. Kusutin amakurump, ukutwish kutesh dizu da Yehova dikat kukulej anch: “Njil ya kuya yawiy ey. [Yang] mwinimwa.”—Isay 30:21.
Amakurump akat kusadinang Bibil mulong wa kutukasikesh ni kutwongoj (Tal paragraf wa 13-14)
14. Kukwatijan ni Galatiya 6:1, mutapu ik ukatau amakurump kumukwash muntu ukata “kuya kuns”? (Tal kand yipich.)
14 Tang Galatiya 6:1. Mwin Kristu ukata “kuya kuns” kakatap kand kusal yom yimuchingejidinay Yehova anch asala. Kuya kuns kulejenau mwinomu kukutwish kurumburik kukwat mupak uyimp, ap kusal chitil chikash. Rukat rikat kuyibachik amakurump In Kristu kukimb “mutapu wa kumuchirish muntu winou mwi njil nich muchim wa kwitudish.” Dizu da Grek dikarumwinau anch “kumuchirish” dikutwish kumekesh kuchirish difup dasinikang kal pa ndond yad chakwel mujimbu wikal nawamp. Mud mutapu ukatay dokter ukweta ukaliweny kusal usu wa kunung difup dabukukang kal, pamwing ap nich kusansan, amakurump niyau akat kusal usu wa kutwok mu spiritu pakad kutunenganesh nakash. Ayikasikeshining kand ‘kubabal ayinau.’ Pakatau kutukwash kuwapish njil yetu, akat kuvurik anch niyau ad antu akad kuwanyin ni akat kurumbwokang. Akat kumekesh anch amwanakedin muntu ukwashinau, pa ndond pa kumekesh anch awiy ad antu a piur nakash, atentamina nakash, ap in kurumburishan.—1 Pi. 3:8.
15. Yom ik tufanyidina kusal anch turishin ni chikokujol?
15 Tufanyidin kuyichingejin amakurump a chikumangen. Ayifumbin kal kulam ujindj wetu, kupan ching yiyul yimedina pa Bibil pa ndond pa kulet yitongijok yau ayinau ni kudandamen kutukwash kurish ni yikokujol yetu. (Jnsw. 11:13; Gal. 6:2) Yisend ni ukaliweny wau ushalijadin umwing ni mukwau, pakwez tukutwish kumusejin mukurump win mwawonsu mulong wa kumulej chikokujol turishina nich. Chakin kamu, tufanyidinap kuya kud mukurump ou, twasut kand kud mukwau mulong wa kwit chiyul, ni kuchingej anch kud umwing ukutuleja yom tukatina kutesh. Anch twasal mwamu tukwikal mud antu akatining kutesh yom “mulong wa kusangaresh matu mau” pa ndond pa “kusanger mafundish mawamp” mada mu Dizu da Nzamb. (2 Tm. 4:3) Anch twamusejin mukurump mulong wa kumulej mulong wetu, ukutwish kutwipul anch twamulejinamu kand mukurump mukwau ni kwijik yom yatulejinay. Kwikepish kukumubachik kwit chiyul kud mukurump mukwau.—Jnsw. 13:10.
CHISEND TUKWETA ETU AWONSU
16. Chisend ik tukweta?
16 Ap anch amakurump adandamedin kutubangin mud amikoku a Nzamb, kakatap kutulej yom tufanyidina kusal. Tukwet chisend cha kwikal ni mashakamin mamekeshina anch twipanin kal kud Nzamb. Muntu ni muntu ukupan kuchind mulong wa mazu mend ni yisal yend. Nich ukwash wend, tukutwish kukwat mipak yiwamp ni kushal ashinshamena kud ndiy. (Rom 14:12) Chawiy pa ndond pa kutulej yom tufanyidina kusal, amakurump akat kusadin Bibil mulong wa kutukwash kusadin mbil ja Nzamb. Kusutin kulondul yiyul yau yimedina pa Bibil, tukutwish kufumb “usu [wetu] wa kujingunin” mulong wa kukwat mipak ya manang.—Heb. 5:14.
17. Mupak ik tufanyidina kukwat?
17 Tukwet dilau dijim da kwikal atushalapol a Yehova! Yehova wamutuma Yesu, “kafung muwamp,” kupan mwom wend mulong wa kwikal ni dilau da kushakam chikupu. (Yoh. 10:11) Kusutin amakurump ada mu chikumangen cha Win Kristu, Yehova wawanyishin kal kushilamu kwend palonday anch: “Nikez kakwinkishany in kutakel akata kwinziyil am. Awiy akez kakutakelany nich ronganyin ni manangu.” (Jer. 3:15) Anch tuziyin ap tuyedin mu spiritu, tufanyidinap kwidjidjek kwit ukwash kud amakurump. El tukwatany mupak wa kutaninamu nakash mu ditenchik da Yehova da kutek amakurump mu chikumangen.
MUMINY 31 Endany ni Nzamb!
a Anch muntu wasalang chitil walik kuyiman amakurump mu chisu kanang, kushinshaman kwey kukubachik kuyilej amakurump yom wija.