MUTU WA MULONG WA KWILEJ WA 47
MUMINY 103 Atufung Adi Yipan Kudi Antu
Akadivar—Ov, Usadinany Usu wa Kwikal Amakurump?
“Anch muntu usotil kwikal mukurump, . . . ndiy usotil mudimu uwamp.”—1 TIM. 3:1.
YIDA MU MUTU WA MULONG WINOU
Mu mutu wa mulong winou, tukuman mikadil yifanyidinay mukadivar kukudish mulong wa kwikal mukurump.
1-2. Wisu mudimu ukatau kusal amakurump?
ANCH ud nkwash a mudimu, chimeken anch usadin usu wa kuwanyish yitinau mulong wa kwikal mukurump. Ov, ukutwish kuyisadin akadivar nau anambaz ney kusutin kwikal mukurump?—1 Tim. 3:1.
2 Wisu mudimu ukatau kusal amakurump? Akat kulejan nich mushiku pamwing ni chikumangen, akat kusal mudimu wa ukafung, kuyifundish akadivar nau anambaz ni kukasikesh ritiy rau kusutin mazu mau ni yisal yau. Chawiy chilondinay Bibil anch amakurump ad yipan.—Efes 4:8.
3. Yom ik yifanyidinay mukadivar kusal mulong wa kwikal mukurump? (1 Timote 3:1-7; Titus 1:5-9)
3 Yom ik ufanyidina kusal mulong wa kwikal mukurump? Yom ufanyidina kusal yishalijadin nakash ni yom yikatay kusal muntu anch ukimbin mudimu. Mulong wa kupat mudimu, ufanyidin kwikal ni ukaliweny uswirikedinay mukurump wey wa mudimu. Pakwez, anch usotin kwikal mukurump, ufanyidinap kwey ching kusu kwikal ni ukaliweny mu mudimu wa kulejan ap kwikal mwin kufundish muwamp. Ufanyidin kukudish mikadil yilejenau mu 1 Timote 3:1-7 ni Titus 1:5-9. (Tang.) Mu mutu wa mulong winou, tukwisambin yom yilejenau mu maverse minam. Tukuman mutapu ukutwishay mukadivar kwikal ni katumb kawamp, kutakel nawamp dijuku dend ni yom yikutwisha kumukwash kwikal ni impu ya kuyisadin antu akwau mu chikumangen.
IKAL NI KATUMB KAWAMP
4. Chom ik chirumburikina kwikal muntu ‘wakadau kufish nich’?
4 Mulong wa kwikal mukurump, ufanyidin kwikal muntu ‘wakadau kufish nich,’ Charumburik anch, ufanyidin kwikal ni katumb kawamp mu chikumangen ni kwikil muntu ukutwisha kulond nayimp piur pey. Chikwau kand, ‘ufanyidin kand kwikal ni uman uwamp wa antu a pol.’ Chakin kamu antu akad kumusadin Yehova akutwish kulond nayimp piur pa yitiyij yey. Pakwez kafanyidinap ap pakemp kukuman mud muntu wakad kwikal mwin yakin ap mud muntu muyimp. (Dan. 6:4, 5) Iyipula anch: ‘Ov, nikwet katumb kawamp mu chikumangen ni pol pa chikumangen?’
5. Mutapu ik ukutwisha kumekesh anch ud “mwin kukat yom yiwamp”?
5 Anch ud “mwin kukat yom yiwamp,” ukuman mikadil yiwamp ya antu akwau ni kuyijikitish mulong wa mikadil yau. Ukusangar kand kusal yom yiwamp mulong wa antu akwau ap anch kakwitinap kwau kuyisadin chom. (1 Tes. 2:8) Mulong wak mwikadil winou ud wa usey kud amakurump? Mulong mwamu akwikal ni musangar wa kusadin chisu chau mulong wa kuyibangin akadivar nau anambaz. (1 Pita 5:1-3) Ap anch chiyitin kusal yom yivud nakash, pakwez akat kutaninamu musangar upandakena kusutin kuyikwash antu akwau.—Mid. 20:35.
6. Chom ik chirumburikina kwikal ‘mwin kwakan’? (Hebereu 13:2, 16; tal kand chipich.)
6 Ukumekesh anch ud ‘mwin kwakan’ anch wayisadin antu akwau yom yiwamp, kuwejaku ni antu akad kwikal aruney. (1 Pita 4:9) Ndinguril umwing wa Bibil ulondin anch muntu mwin kwakan ukat kuyibangin ap antu akaday kwijik ni ukweting musangar wa kuyitazuk kwol kwend. Iyipula anch: ‘Ov, antu akwau angij mud muntu ukata kuyak antu akata kwez mu chikumangen cham?’ (Tang Hebereu 13:2, 16.) Ikundj mwin kwakan ukat kuyak antu awonsu. Chilakej, ukat kuyak atuzwendj, antu ezina kusal madiskur mu chikumangen chau ni antu akwau asadina usu wa kuyikasikesh akadivar nau anambaz mud atulam a munyingumuku.—Dis. 18:2-8; Jnsw. 3:27; Luka 14:13, 14; Mid. 16:15; Rom 12:13.
Ambay a uruw amwakin kalam wa munyingumuku ni mukajend (Tal paragraf 6)
7. Mukurump ukutwish kumekesh mutapu ik anch kadap ‘mwin ris ra nfalang’?
7 “Wakad ris ra nfalang.” Chirumburikin anch nfalang ni yom ya ku mujimbu yawiyap yida pa ndond ya kusambish mu mwom wey. Wikal mpich ap kazwendj ukat kutek Want wa Nzamb pa ndond ya kusambish mu mwom wey. (Mat. 6:33) Ukat kusadin usu wey, chisu chey ni yom yey ya ku mujimbu mulong wa kumwifukwil Yehova, kubangin dijuku dey ni kukwash chikumangen. (Mat. 6:24; 1 Yoh. 2:15-17) Iyipula anch: ‘Mutapu ik nimening nfalang? Ov, nikat kusanger yom yida ya usey mulong wa kwikal ni mwom? Ov, nikat kushinshikin nakash pa kwikal ni nfalang jivud ap kwikal ni yom ya ku mujimbu yivud?’—1 Tim. 6:6, 17-19.
8. Mu mitapu ik yimwing ukutwisha kumekesh anch ud ‘mwin kuyikel yaku yey’ ni “mwin kwilam”?
8 Anch ud ‘mwin kuyikel yaku yey,’ ni “mwin kwilam,” ukwitekin mipak yisikena mu mwom wey. Chinech chirumburikin kulik kupandakesh kuda, kuna, kudjal, kwileng ni kwipuwangej. Ufanyidinap kwimburij mwom wa antu akad kumwifukwil Yehova. (Luka 21:34; Jak. 4:4) Witudishin, charumburik anch ukat kuninet ap anch antu akwau akusarumun. Udap “mwin kuleu maar” ni wijikenap mud muntu uniling maar nakash. Iyipula anch: ‘Ov, mashakamin mam mamekeshin anch nid mwin kuyikel yaku yam ni mwin kwilam?’
9. Chirumburikin ik kwikal ni ‘manang mawamp’ ni ‘wakad kanvundangesh’?
9 Anch ‘ukwet manang mawamp,’ ukat kutongijokin pa yom yilondinay Bibil piur pa milong kushalijan mu mwom wey. Ukat kutongijokin chikurikina piur pa mutapu ukutwisha kusadin mbil ja Bibil mulong wa kupwish mulong wey ni chinech chikat kukukwash kwikal ni chitongijok chiwamp ni kukwat mipak ya manang. Ukatap kukwat mupak wa mau mau. Pakwez, ukat kwikal ni kashinsh anch ukwet uman wawonsu uswirikedina. (Jnsw. 18:13) Chawiy, ukat kukwat mipak yisikena ni yimedina pa yitongijok ya Yehova. Anch ud ‘wakad kanvundangesh’ ukat kwitenchik nawamp ni kulimish chisu. Wijiken mud muntu wa kuchingejin ni ukata kulondul umutakel. Anch wakudish mikadil yiney, ukwikal ni katumb kawamp mu chikumangen. El katat tushinshikinany mikadil yifanyidinay mukurump kukudish mulong wa kwikal ntakel wa dijuku muwamp.
IKAL NTAKEL WA DIJUKU MUWAMP
10. Mutapu ik ukutwishay muntu ikundj ‘kutakel dijuku dend nawamp’?
10 Anch ud ngatan ni ukatin kwikal mukurump wa chikumangen, dijuku dey difanyidin kwikal chilakej chiwamp. Chawiy, ‘ufanyidin kwikal ikundj utakedina dijuku dend nawamp.’ Ufanyidin kwijikan mud muntu ukatining dijuku dend ni ukata kukwat mipak yiwamp. Chinech chirumburikin kutakel difukwil da mu dijuku, kukwash dijuku dey kukumangan ni kwipan mu mudimu wa kulejan. Mulong wak chid cha usey? Kambuy Paul wipula anch: ‘Anch muntu kijap kutakel dijuku dend, mutapu ik ukubanginay chikumangen cha Nzamb?’—1 Tim. 3:5.
11-12. Mikadil ya antu a mu dijuku yikutwish kwikal ni yibudikin ik pa yisend ya mukadivar? (Tal kand chipich.)
11 Anch ud tatuku, aney achida akemp afanyidin kwikal ‘aziyidina ni ilimishina.’ Ufanyidin kuyifundish ni kuyifumb nich rukat. Chakin kamu, mud an awonsu, aney niyau akwet kuswir kwa kuyisangaresh kusutin kuswimbul nau ap kusengan nau pamwing. Pakwez anch wayifumb nawamp, akutwish kwikal an aziyidina, akweta kalimish ni dilij diwamp. Chikwau kand, ufanyidin kusal usu wawonsu mulong wa kuyikwash aney kwikal ni urund wa piswimp ni Yehova, kushakam kukwatijan ni mbil ja Bibil ni kushiken ku dibatish.
12 ‘Ukweta an in kwitiyij akadau kufish nich mu milong ya wimbwambol ap ya kubwambwil.’ Anch mwan wabatishinau kal ap ukimbina kushiken ku dibatish uchida kal ku chikumbu wasal chitil chijim, chinech chikutwish kwikal ni yibudikin ik paday tatuku? Anch tatuku wad ni kadiu ka kuyifumb ni kuyikand anend, kakutwishap pamwing ap kuwanyish yitinau mulong wa kwikal mukurump.—Tal Chinong cha Kalam cha 15 Ngond wa 10, 1996 p. 21, par. 6-7, mu Français.
Antakel a majuku akat kuyifumb anau chakwel amusadin Yehova ni chikumangen (Tal paragraf 11)
KWASH CHIKUMANGEN
13. Mutapu ik ukutwisha kumekesh anch ud ‘wisikena’ ni wakad “mutu ukash”?
13 Akadivar akweta mikadil yiwamp ya mu spiritu, akutwish kukwash chikumangen nakash. Ikundj ‘wisikena’ uding mwin kulet chisambu. Anch ukimbin kwijikan mud muntu wisikena, yitesha antu akwau ni kulimish yitongijok yau. Chilakej, anch amakurump avud akwat mupak kanang ukwatijadina ni mbil ja Bibil, ufanyidin kuwitiyij ap anch ukwet chitongijok chindj. Kulik kwikal ni “mutu ukash” chirumburikin anch ukatap kuyishindin antu akwau kusal yom mud muukatina ey. Pakwez ukat kusanger yitongijok ya antu akwau. (Dis. 13:8, 9; Jnsw. 15:22) Udap ‘mwin matend’ ap “mwin kujiman swa.” Pa ndond pa kwikal muntu mukash, ud muntu witudishina ni ukweta nkeu. Ikundj mwin chisambu, ukat kusal usu nakash wa kulet chisambu ap mu yishiken yikash. (Jak. 3:17, 18) Ukat kulond mu mutapu wa kalimish ap kud antu akad kwitiyij yitongijok yend.—Ank. 8:1-3; Jnsw. 20:3; 25:15; Mat. 5:23, 24.
14. Chom ik chirumburikina kulik ‘kwikal muntu udokidinap pa kwitiyij’ ni ‘ushinshamena’?
14 Mukadivar ukimbina kwikal mukurump ‘kafanyidinap kwikal muntu udokidinap pa kwitiyij.’ Ap anch ukwetap kuswir kwa kusal mivu yivud kupwa kwa kukubatish, ukwet kuswir kwa chisu mulong wa kwikal Mwin Kristu uswila. Kurutu kwa kwikal mukurump, ufanyidin kumekesh anch mud Yesu, wikepishin ni ukat kumuchingel Yehova mulong wa kutambul yisend kanang mu chikumangen. (Mat. 20:23; Fil. 2:5-8) Ukutwish kumekesh anch ‘ushinshamen’ kusutin kushal ushinshamena kud Yehova, kushakam kukwatijan ni mbil jend jitentamina ni kusutin kulondul umutakel udokila ku dirijek dend.—1 Tim. 4:15.
15. Ov, mukurump ufanyidin kwikal mwin kufundish wa pakampwil? Rumburil.
15 Mifund yilondin patok anch atulam afanyidin ‘kwijik kufundish.’ Ov, mwamu chirumburikin anch ufanyidin kwikal mwin kufundish wa pakampwil? Bwat kwau. Ap anch amakurump avud kadingap in kufundish a pakampwil, akat kufundish nawamp mu mudimu wa kulejan ni kusal mudimu wa ukafung. (Ilikej ni 1 Korint 12:28, 29 ni Efes 4:11.) Ap mwamu, chisu chawonsu ufanyidin kukudish ukaliweny wey wa kufundish. Yom ik ukutwisha kusal mulong wa kwikal mwin kufundish muwamp?
16. Mutapu ik ukutwisha kwikal mwin kufundish muwamp? (Tal kand chipich.)
16 Ufanyidin ‘kulamat ba ku dizu dishinshamena.’ Mulong wa kwikal mwin kufundish muwamp, mafundish ni yiyul uyinkishina antu akwau, yifanyidin kwimen pa Dizu da Nzamb. Ikal mwin kwilej muwamp wa Bibil ni mikand ya kashalapol ushinshamena ni ubabela. (Jnsw. 15:28; 16:23) Chisu wilejina, shinshikin nawamp mutapu urumburilau maverse ma Bibil mu mikand yetu ni mutapu ukutwisha kumasadin mu mwom wey. Ni chisu ufundishina, ikasikesha kupukun michim ya antu akuteshina. Ukutwish kwikal ni ukaliweny wa kufundish anch wit ukwash kud amakurump akweta ukaliweny ni kusadin yiyul yau. (1 Tim. 5:17) Amakurump afanyidin ‘kutwish . . . kuyikasikesh’ akadivar ni anambaz nau; pakwez yisu yimwing, akutwish kuyinkish yiyul ap kand “kuyikand.” Ku mutambu wau, amakurump afanyidin kumekesh kudimuk. Anch ud muntu udimukina ni ukweta rukat, mafundish mey ma kwimen pa Dizu da Nzamb ni ukwikal mwin kufundish muwamp mulong ukumwimburij Yesu uda Mulej Mujim.—Mat. 11:28-30; 2 Tim. 2:24.
Mukurump umwing ukweta ukaliweny umukwashin nkwash a mudimu kuwapish mutapu wend wa kufundish kusutin Bibil. Nkwash a mudimu wadau ufumbinau ukat kwiyijidish kurutu kwa dikalash (Tal paragraf 16)
DANDAMEN KUYA KURUTU
17. a) Yom ik yikutwisha kuyikwash ankwash a mudimu kudandamen kuya kurutu? b) Yom ik yifanyidinau amakurump kuvurik chisu chimushinshikidinau mukadivar? (Tal mushet “Ikal Wisikena Chisu Uyishinshikidina Antu Akwau.”)
17 Kupwa kwa kushinshikin yom yitinau mulong wa kwikal mukurump, ankwash a mudimu amwing akutwish kuman anch kakutwishap ap pakemp kwikal amakurump. Pakwez vurik anch Yehova ni dirijek dend kachingejinap anch wikal muntu uwanyidina. (1 Pita 2:21) Ni spiritu wa Yehova ukweta usu ndiy ukukwashina kukudish mikadil yiney. (Fil. 2:13) Ov, kud mwikadil ufanyidina kukudish pakampwil? Mulembila Yehova piur pa mulong winou. Kimbijol piur pa mwikadil winou ni mwipulap mukurump umwing chakwel akulej mutapu ukutwisha kukudish mwikadil winou.
18. Yom ik yiyikasikeshinau ankwash a mudimu awonsu kusal?
18 El etu awonsu, kuwejaku ni amakurump, tudandamenany kukudish mikadil twisambina kal mu mutu wa mulong winou. (Fil. 3:16) Ov, ud nkwash a mudimu? Dandamen kuya kurutu! Mwita Yehova akufumba chakwel umusadin nakash mu chikumangen. (Isay 64:8) El Yehova ayukish usu usadina mulong wa kuwanyish yitinau mulong wa kwikal mukurump.
MUMINY 101 Kusal Mudimu Pamwing mu Uumwing