Yijikitisha Antu Atonday Yehova ni Yesu Mulong wa Kutakel Chikumangen

1. Yisu yipan yimwing yatwinkishinay kal Yesu?

KWIKIL muntu ap umwing wamekeshap kal muchim wa kupan mud Yesu. Padingay pa divu, Yesu wayikwasha antu akwau kwa kwikatil kusutin yilay yasalay. (Luka 9:12-17) Wapana chipan chipandakena kujimb nakash kusutin kupan mwom wend mulong wetwetu. (Yoh. 15:13) Ap kupwa kwa kuvumbuk, Yesu wadandamena kumekesh muchim wa kupan. Mud mwashilayamu, wamwita Yehova kutufundish ni kutukasikesh kusutin spiritu wend utumbila. (Yoh. 14:16, 17; 16:13) Ni kusutin yikumangan yetu, Yesu udandamedin kand kutwinkish yom tuswirikedina chakwel tutwish kuyifundish antu a pa mangand mawonsu piur pa Bibil ni kwikadish in kwilej.​—Mat. 28:18-20.

2. Anany ada ‘mud yipan’ yilejenau mu Efes 4:7, 8?

² Ech chawiy chipan chikwau chatwinkishau kal kud Yesu. Kambuy Paul wafunda anch kupwa kwa Yesu kuya mwiur, ‘wayipana antu mud yipan.’ (Tang Efes 4:7, 8.) Paul warumburila anch Yesu wapana amakundj inay mulong wa kukasikesh chikumangen mu mitapu kushalijan. (Efes 1:22, 23; 4:11-13) Nlel, pakach pa antu inay apanau ‘mud yipan’ pad ankwash a mudimu, amakurump a chikumangen ni atulam a munyingumuku.a Chakin kamu, amakundj inay ad antu akad kuwanyin, chawiy akat kurumbok. (Jak. 3:2) Pakwez Nsalejetu Yesu Kristu ukat kuyisadin mulong wa kutukwash. Chakin kamu amakundj inay ad kamu yipan kud etu.

3. Let chilakej chimekeshina mutapu tukutwisha etu awonsu kukwash mudimu usadiningau antu ada ‘mud yipan.’

³ Yesu wayinkisha amakundj inay ada ‘mud yipan’ chisend cha kukasikesh chikumangen. (Efes 4:12) Pakwez, etu awonsu tukutwish kuyikwash kuwanyish chisend chinech nawamp. Mudimu winou tukutwish kuufanikesh ni mudimu wa kutung Chot cha Want. Amwing akat kutung, akwau akat kukwash mudimu kusutin kwisuk yakuda, kutwut yom ya mudimu ni kusal midimu yikwau kand. Chilik chimwing, etu awonsu tukutwish kuyikwash ankwash a mudimu, amakurump ni atulam a munyingumuku kusutin yisal yetu ni mazu metu. El tumanany mutapu tukata etu awonsu kutaninamu mu mudimu wau ukash, ni mutapu tukutwisha kumekesh kujikitish kud awiy ni kud Yesu watwinkisha antu inay ‘mud yipan.’

ANKWASH A MUDIMU ADING “IN KUYIKWASH AKWAU”

4. Wisu mutapu wayikwashau antu akwau kud ankwash a mudimu mu mivu chitot ya kusambish?

⁴ Mu mivu chitot ya kusambish, akadivar amwing ayitonda kwikal ankwash a mudimu. (1 Tim. 3:8) Chimeken anch antu inay asalang mudimu wa “kuyikwash akwau” mud mwafunday Paul. (1 Kor. 12:28) Chawiy chimeken anch ankwash a mudimu asalang midimu ya usey nakash mulong wa kuyikwash amakurump kushinshikin pa mudimu wa kufundish ni wa ukafung. Chilakej, pamwing ap ankwash a mudimu akwashang kufundiril makopi ma Mivungur ap kulandol yom yading yiswirikedinau mulong wa kufund nich.

5. Wisu mutapu ukatau ankwash a mudimu kuyikwash antu akwau nlel?

⁵ El tushinshikinany midimu yimwing ya usey yisadinau ankwash a mudimu mu chikumangen chen. (1 Pita 4:10) Akutwish kuyinkish chisend cha kulam chipau cha chikumangen ap madosiye ma teritwar, kulam mikand ni kuyipan kud akadivar nau anambaz, kusutish mikro ni kusadin yingambangamb ya kasu, kwakan ap kulam nawamp Chot cha Want. Midimu yiney yawonsu yid ya usey chakwel chikumangen chisal nawamp. (1 Kor. 14:40) Chikwau kand, ankwash a mudimu amwing asadining madiskur ni yikunku yikwau yida mu Mudimu ni Mashakamin ma in Kristu​—Mukand wa Chikumangan. Akutwish kand kumwit nkwash wa mudimu mulong wa kumukwash ntakel wa chisak cha mudimu wa kulejan. Yisu yimwing, ankwash a mudimu awanyishina yitinau akutwish kuyit chakwel asala pamwing ni amakurump mu mudimu wa ukafung.

6. Mulong wak tusangaredin mudimu ukash usadinau ankwash a mudimu mu yikumangen yetu?

⁶ Midimu yikatau kusal ankwash a mudimu yikat kukwash chikumangen mutapu ik? Nambaz Beberlyb wa mu Bolivi ulondin anch: “Kusutin mudimu ukatau kusal ankwash a mudimu, nikat kulondul yikumangan nawamp. Mulong wa mudimu wau, nikutwish kuwang, kwakul, kulondul nawamp madiskur, kulondul nawamp mavideo ni yipich. Asadining usu wa kwikal ni kashinsh anch yikumangan yisutin mu diking ni akat kuyikwash kand antu alondwila yikumangan kusutin videokonferans. Kupwa kwa yikumangan, akat kutakel mudimu wa kukomb, kuchind nfalang, ni kwikal ni kashinsh anch tukwet mikand tuswirikedina. Niyijikitishin nakash!” Nambaz Leslie, ushicha mu Kolombi ni ukweta ikundj uda mukurump ulondin anch: “Nfumwam ukweting kuswir kwa ukwash wa ankwash a mudimu mulong wa kuwanyish yisend kushalijan. Pakad awiy, wafanyinang kukwatikan nakash, chawiy niyijikitishin nakash mulong wa mushiku wau ni mulong akat kukwash kwa kwikatin.” Chakin kamu etu awonsu tukat kujikitish nakash mulong wa mudimu ukatau kusal ankwash a mudimu.​—1 Tim. 3:13.

7. Mutapu ik tukutwisha kuyijikitish ankwash a mudimu? (Tal kand chipich.)

⁷ Ap anch tukutwish kuyijikitish ankwash a mudimu, Bibil utulejin anch: ‘Mekeshany kujikitish.’ (Kol. 3:15) Kristofer, mukurump umwing uda mu Finland, ukat kumekesh kujikitish kusutin kusal yom yiney. Ulondin anch: “Nikat kutum mukand ap uruu ni kufundamu chom chimwing chalondinay ap chasadinay nkwash wa mudimu chankasikeshina, ap mayingishin nimujikitishidina mulong wa mudimu usadinay.” Pascal ni Jael, ashicha mu Nouvelle-Calédonie, akat kulembil pakampwil mulong wa ankwash a mudimu. Pascal ulondin anch: “Machuku ma kwinyim am, twalembil nakash mulong wa ankwash a mudimu etu, twamujikitishin Yehova mulong wa antu inay ni twamwitin chakwel ayikwash ni chakwel ikal nau.” Yehova ukat kutesh malembil ma mutapu winou ni chikumangen chawonsu chikat kutaninamu nakash.​—2 Kor. 1:11.

AMAKURUMP A CHIKUMANGEN ‘AKAT KUSAL MUDIMU UKASH PAKACH PEN’

8. Mulong wak Paul walonda anch amakurump a mu mivu chitot ya kusambish ‘asalang mudimu ukash’? (1 Tesalonik 5:12, 13)

⁸ Amakurump a mu mivu chitot ya kusambish asalang mudimu ukash mu chikumangen. (Tang 1 Tesalonik 5:12, 13; 1 Tim. 5:17) Atakelang chikumangen kusutin kutakel yikumangan ni kukwat mipak yijim pamwing mu chisak cha amakurump. Ayibabeshang akadivar nau anambaz kusutin kuyinkish yiyul ya rukat mulong wa kuyikwash kwikal ni ritiy rikash. (1 Tes. 2:11, 12; 2 Tim. 4:2) Chakin kamu, asalang kand mudimu ukash mulong wa kulam majuku mau ni kukasikesh urund wau ni Yehova.​—1 Tim. 3:2, 4; Tit. 1:6-9.

9. Yisend ik yimwing yikwetau amakurump nlel?

⁹ Nlel amakurump akwatiken nakash. Ad in kulejan rusang ruwamp. (2 Tim. 4:5) Akat kutushil chilakej chiwamp kusutin kulejan nich mushiku, kutenchik mudimu wa kulejan mu teritwar wetu ni akat kutufumb chakwel tutwish kulejan ni kufundish nawamp. Ading kand anzuj akweta ranaken ni akad kasolikany. Anch Mwin Kristu wasal chitil chijim, amakurump akat kusal usu wa kumukwash kuchirish urund wend ni Yehova. Pa chisu chawiy chimwing, akat kusal usu wa kulam chikumangen chishitwila. (1 Kor. 5:12, 13; Gal. 6:1) Yisu yivud, amakurump ijikening mud atufung. (1 Pita 5:1-3) Akat kusal madiskur mawamp mimedina pa Bibil, kusal usu wa kumwijik muntu mwawonsu uda mu chikumangen ni kuyendin antu mu mudimu wa ukafung. Kudoshaku yom yiney, amakurump amwing akat kukwash kand mudimu wa kutung ni kurijek Yot ya Want, kutenchik yitentam ya rejon, amwing akat kusal kand mu chisak cha Komite wa Kupan Ukwash ku Milong ya Opital ap a mu Yisak ya Kutal Ayej. Chakin kamu, amakurump akat kusal mudimu ukash mulong wetwetu!

10. Mulong wak tusangaredin mudimu ukash usadinau amakurump mu yikumangen yetu?

¹⁰ Yehova wasambela kulejan anch atufung akez kutubangin nawamp ni tukez “kovap kand wom ap kuzal.” (Jer. 23:4) Winou wawiy kamu mutapu wiyovay nambaz Johanna uda mu Finland payelay makwend nakash. Ulondin anch: “Ap anch chading chinkasikedin kuyilej antu akwau mutapu nading niyovila, mukurump umwing nading nakad kwijik nawamp wanshimpishina muchim, twalembila nend pamwing ni wankwasha kwikal ni kashinsh anch Yehova winkatin. Nivurikinap kamu nawamp yom yalonday, pakwez nivurikin anch pa chisu chinicha niyova anch nading mu diking. Nikwet kashinsh anch Yehova wamutuma mulong wa kwinkwash pa chisu nading niswirikedina ukwash.” Mutapu ik wakukwashinau kal amakurump a mu chikumangen chey?

11. Mutapu ik tukutwisha kuyijikitish amakurump? (Tal kand chipich.)

¹¹ Yehova ukatin anch tuyijikitish amakurump “mulong wa midimu yau.” (1 Tes. 5:12, 13) Henrietta, ushicha niyend mu Finland, ulondin anch: “Amakurump ayikwashining antu akwau kwa kwisotin, pakwez chinech chirumburikinap anch akweting chisu chivud ap usu wa kusal yom yivud kuyisutamu akwau, ap kand anch kakwetingap yikokujol mu mwom yau. Yisu yimwing nikat kuyilejang anch: ‘Nikatin wijikany anch udany kamu amakurump awamp.’” Nambaz Sera uda mu Tirki ulondin anch: “Amakurump akwet kuswir kwa dikasikesh chakwel adandamen kusal mudimu wau nawamp. Chawiy tukutwish kuyifundin mukand mulong wa kuyikasikesh, kuyitazuk mulong wa kuda nau pamwing ap kuya nau mu mudimu wa kulejan.” Ov, wijaku mukurump kanang ukutwisha kujikitish pakampwil mulong wa mudimu ukash usadinay mu chikumangen? Kimb mitapu ukutwisha kumujikitish mu yisal mulong wa midimu yisadinay.​—1 Kor. 16:18.

ATULAM A MUNYINGUMUKU AKAT KUTUKASIKESH

12. Antu ik akwau apanay Yesu mulong wa kukasikesh chikumangen mu mivu chitot ya kusambish? (1 Tesalonik 2:7, 8)

¹² Yesu Kristu wapana antu akwau ‘mud yipan’ mulong wa kukwash chikumangen mu mutapu ukwau. Wasadina amakurump ading mu Yerusalem mulong wa kumutum Paul, Barnabas nau antu akwau mud atulam a munyingumuku. (Mid. 11:22) Mulong wak? Mulong wa diyingishin dimwing datondinangau akwash a mudimu ni amakurump: mulong wa kukasikesh yikumangen. (Mid. 15:40, 41) Akadivar inay ipana nakash mulong wa kusal mudimu winou. Yisu yimwing, atekang mwom yau mu ubaj mulong wa kufundish ni kuyikasikesh antu akwau.​—Tang 1 Tesalonik 2:7, 8.

13. Yisend ik yimwing yikwetau atulam a munyingumuku?

¹³ Atulam a munyingumuku akat kwendangan nakash. Amwing asadining weny wa yitot ya makilometre mulong wa kushik ku chikumangen chikwau. Rubing ni rubing, kalam wa munyingumuku usadining madiskur, mudimu wa ukafung, kutakel chikumangan cha ayibol, chikumangan cha amakurump ni yikumangan ya mudimu wa kulejan. Ukat kurijek madiskur, yitentam ya munyingumuku ni yitentam ya rejon. Ukat kufundish ku shikol ya ayibol, kurijek chikumangan cha pakampwil cha ayibol a mu munyingumuku. Kudoshaku yom yiney, ukat kusal kand yom yikwau ya usey ni yisu yimwing biro wa mutiy ukat kumwit kusal yom kanang pakad kulab.

14. Mulong wak tusangaredin mudimu ukash usadinau atulam a munyingumuku?

¹⁴ Yikumangen yikat kutaninamu mutapu ik mu mudimu wa atulam a munyingumuku? Pisambidinay piur pa mudimu usadiningau atulam a munyingumuku, mukadivar umwing wa mu Tirki ulondin anch: “Chisu chawonsu chikatau kutwendin atulam a munyingumuku, akat kwinkasikesh kusutish chisu chivud mu kuyikwash akadivar nau anambaz. Nijikijadin nau atulam a munyingumuku avud; pakwez, kwikil ap umwing wa pakach pau wamekeshinap kal anch ukwatiken nakash ap anch kakatiningap kwambamb ni yamam.” Johanna, twajimbulang kwiur oku, walejana pamwing ni kalam wa munyingumuku pakwez katanap muntu ap umwing ku chikumbu. Ulondin anch: “Ap mwamu, nikezap kuvuramen dichuku dinida. Anamakwam abukina kwi ndond yindj, ni nading niyitongin nakash. Kalam wa munyingumuku wankasikesha nakash ni wankwasha kwijik anch mu mangand minam tukutwishap kamu kwikal chisu chawonsu piswimp ni dijuku detu ap arunetu, pakwez mwi ngand yisu, tukwikal nau piswimp chikupu ni chikupu.” Avud pakach petu avurikin nawamp mutapu wayikwashinau kal kud atulam a munyingumuku.​—Mid. 20:37–21:1.

15. a) Kukwatijan ni 3 Yohan 5-8, mutapu ik tukutwisha kuyijikitish atulam a munyingumuku? (Tal kand chipich.) b) Mulong wak tufanyidin kuyijikitish amband a akadivar asadina mudimu ukash mu chikumangen, ni mutapu ik tukutwisha kusal mwamu? (Tal mushet “Yivurikany Akajau.”)

¹⁵ Kambuy Yohan wamukasikesha Gayus kuyak akadivar ezang kukasikesh yikumangen ni wamuleja anch: “Yikwasha chakwel adandamen weny wau nawamp mudi mudia rusot ra Nzamb.” (Tang 3 Yohan 5-8.) Tukutwish kusal mwamu kusutin kuyitazuk kuda nau pamwing kwol kwetu. Tukutwish kand kusal mwamu kusutin kwipan mu mudimu wa kulejan chisu chezinau kutwendin. Leslie, twisambinang kwiur oku, umekeshin kujikitish kwend mu mutapu ukwau kand. Ulondin anch: “Nikat kumulembil Yehova chakwel ayiwanyishin maswir mau. Am ni nfumwam twayifundina kand mikand mulong wa kuyilej mutapu tusangaredining ukwash wau chisu chikatau kutwendin.” Vurik anch atulam a munyingumuku niyau akweting yikokujol ni akat kuziy mud antu in awonsu. Yisu yimwing, akat kuyel, kwiyakamish ap kuziy. Pamwing ap mazu mey masangareshina ap chipan chey chikemp chikutwish kwikal chakul ku malembil ma kalam wa munyingumuku wey!​—Jnsw. 12:25.

TUKWET KUSWIR KWA ANTU ADA ‘MUD YIPAN’

16. Kukwatijan ni Jinswir 3:27, yipul ik yifanyidinau akadivar kwiyipul?

¹⁶ Pa mangand mawonsu, tukwet kuswir kwa akadivar akutwisha kwikal ‘mud yipan.’ Anch ud mukadivar wabatishinau kal, ov, ukutwish kumusadin Yehova mu mutapu winou? (Tang Jinswir 3:27.) Ov, ukutwish kwitekin mupak wa kwikal nkwash wa mudimu? Ov, ukutwish kuwanyish yitinau mulong wa kwikal mukurump wa chikumangen?c Ov, ukutwish kuswimp yom kanang mu mwom wey mulong wa kwikal ni mutapu wa kuya ku Shikol ya in Kulejan a Want? Shikol yiney yikukufumb ni kukukwash chakwel akusadin nakash kud Yesu. Anch umen mud ukutwishap kusal yom yiney, mulembila Yehova. Mwita chakwel akwinkish spiritu wend utumbila mulong wikal ni mutapu wa kuwanyish chisend chin chawonsu chikukwinkishau.​—Luka 11:13; Mid. 20:28.

17. Antu ada ‘mud yipan’ atufundishin ik piur pa Mwant wetu, Yesu Kristu?

¹⁷ Akadivar atondau kud Yesu mulong wa kwikal ‘mud yipan’ amekeshin patok anch Yesu ukat kututakel mu machuku minam ma nsuden. (Mat. 28:20) Tujikitishin nakash pa kwikal ni Mwant wa rukat, mwin kupan, wija maswir metu ni utwinkishina akadivar mulong wa kutukwash. Chawiy kimb mitapu ukutwisha kuyijikitish akadivar inay asadina mudimu ukash. Ni kangal amboku wavuramen kumujikitish Yehova uda Musul wa ‘chipan chin chawonsu chiwamp ni chiwanyidina.’​—Jak. 1:17.