Ankwash a Mudimu Asadina Mudimu wa Usey

KU CHIKUMANGEN cha ku Filip, kambuy Paul wafunda anch: ‘Paul ni Timote, atushalapol a Kristu Yesu, kudi atumbila awonsu mu umwing ni Kristu Yesu adia ku Filip, ni kudi atulam ni ankwash a mudimu.’ (Fil. 1:1) Umen anch pinap wayijimbula ankwash a mudimu. Amakundj inay ading kuwanyish chisend chijim nakash mulong wa kuyikwash amakurump mu chikumangen cha pasak. Chidi kand mwamu nlel unou. Ankwash a mudimu akat kusal midimu mulong wa kuyikwash atulam ni kusal anch chikumangen chikala chakad kanvundangesh.

² Ov, uyij ankwash a mudimu adia mu chikumangen chen? Ov, umen mudimu usadinau mulong wa uwamp wey ni mulong wa chikumangen chawonsu? Yehova ukat kusanger usu usadinau amakundj inay. Paul wafunda anch: “In kukwash anch asal mudimu wau nawamp akwikal ni ndond ya kalimish pakach pa antu chad akutwish kulond patok wakad wom ya ritiy rikwetau mu Kristu Yesu.”—1 Tim. 3:13.

YOM YITINAU MU BIBIL MULONG WA ANKWASH A MUDIMU

³ Ankwash a mudimu ayichingejin anch ikala nich mwikadil uwamp, ikala in kutakel yom nawamp ni kuwanyish nawamp yisend yau. Chinech chimeken patok mu yom yalonday Paul piur pa yom yitinau yidia mu mukand wend wamufundinay Timote anch: ‘Ankwash a mudimu niyau afanyidin kwikal antu a kashinsh, kangal ikal in ndim jaad, ap in kukwachik maar, ap in ris ra nfalang. Afanyidin kulam ujindj utumbila wa ritiy nich kom kawamp. Chifanyidin ayipaka bil cha kusambish, chad anch kayifishilap nich asala lel mudimu wa ankwash a mudimu. Chifanyidin ankwash a mudimu ikala amakundj atina mband umwing, afanyidin kwikal amakundj ija kulam anau ni majuku mau nawamp.’ (1 Tim. 3:8-10, 12) Anch ankwash a mudimu alimish mbil jishitwila, chinech chikat kuchidij chikumangen ku yom yikutwishau antu kulond piur pa amakundj a mu chikumangen atondau mulong wa kwikal ni yisend.

⁴ Ankwash a mudimu ikala ansand ap apamina kal, afanyidin kwipan mu mudimu wa kulejan. Mulong amwimburijin Yesu, akat kumekesh mushiku wau mu mudimu wa kulejan. Kusutin mushiku wau, akat kumekesh kubangin kwa Yehova mulong wa dipandish dia antu.—Isay 9:7.

⁵ Amakundj asadina mudi ankwash a mudimu afanyidin kwikal yilakej mu mutapu wau wa kudjal, wa kukil nsuch, wa kulond ni wa mashakamin ni yaku yau. Afanyidin kwikal ni yitongijok yiwamp, chinech chawiy chikusala anch ayilimisha kudi antu akwau. Chikwau kand, afanyidin kulam urund uwamp ni Yehova ni kuwanyish yisend yau nawamp mu chikumangen.—Titus 2:2, 6-8.

⁶ Amakundj inay “ayipaka bil.” Kurutu ayitonda amekesha anch ipana chakin kamu. Amekesha anch atekin yisakin ya Want pa ndond ya kusambish mu mwom wau ni anch akuwanyish yisend yawonsu yikuyinkishau. Adi yilakej yiwamp ya kwimburij kudi antu akwau mu chikumangen.—1 Tim. 3:10.

MIDIMU YIKATAU KUSAL MU CHIKUMANGEN

⁷ Ankwash a mudimu akat kusal midimu kushalijan mulong wa uwamp wa akadivar nau anambaz, ni chinech chikat kuyikwash atulam asutisha chisu chijim mu kufundish ni kuwanyish yisend yau ya ukafung. Anch ayinkish yisend ya kuwanyish, chisak cha amakurump chikat kusal mwamu kukwatijan ni ukaliweny wau ni maswir ma chikumangen.

⁸ Tushinshikinany midimu yimwing yikatau kusal: Nkwash wa mudimu akutwish kumwinkish chisend cha kulam mikand chakwel muntu atambulang mikand yend ni ya kusadin mu mudimu wa kulejan. Mukwau ukutwish kulam magazet. Mukwau niyend ukutwish kulam chipau cha chikumangen ap madosiye ma teritwar. Akwau akutwish kusal mulong wa kulam mikro, yom ya kujimbish nich mazu, in kwakan ni kuyikwash amakurump mu mitapu yikwau. Kudi midimu yivud ya kusal mulong wa kulam nawamp Chot cha Want, chawiy akat kuyit ankwash a mudimu chisu ni chisu mulong wa kuwanyish yisend yiney.

⁹ Mu yikumangen yimwing, chikutwish kuswapal kudi nkwash wa mudimu kwikal ni chisend chimwing. Mu yikumangen yikwau, nkwash wa mudimu umwing ukutwish kwikal ni yisend yivud. Yisu yimwing, ankwash a mudimu avud akutwish kusal chisend chimwing. Anch kwikil ankwash a mudimu avud mulong wa kuwanyish yisend, chisak cha amakurump chikutwish kutond akadivar akweta chilakej chiwamp abatishinau kal mulong wa kusal mudimu winou. Chinech chikutwish kuyikwash antu akwau kwikal ni ukaliweny ukuyikwasha machuku ma kurutu chakwel ayitonda kwikal ankwash a mudimu. Anch kwikil akadivar ishadidina, akutwish kumwit nambaz ukweta chilakej chiwamp mulong wa kusal yom yimwing, ap anch kakutwishap kumutond kwikal nkwash wa mudimu. Mwin Kristu ukweta chilakej chiwamp udi muntu ukweta mikadil ni mutapu wa difukwil yikutwishau antu akwau kwimburij. Udi chilakej chiwamp kudi antu akwau mu yom yitadina kukumangan, mudimu wa kulejan, mwom wa dijuku, kwipuwangej, kudjal ap kukil nsuch ap kwileng.

¹⁰ Mu yikumangen mudia amakurump akemp, akutwish kuyit ankwash a mudimu awanyidina mulong wa kushinshikin nau antu akutambula dibatish mafundish ma pa dishin. Mafundish minam madi mu mazu ma kwinsudiel, Chikunku cha 1, “Mafundish ma pa Dishin ma Bibil”; ni Chikunku cha 3, “Mutapu Utenchikinay Yehova Yom,”. Mu Chikunku cha 2, “Mbil Jitentamina ja Yehova,” mudi milong yikash yitina ching kuyishinshikin kudi mukurump.

¹¹ Anch kudi diyingishin diwamp, chisak cha amakurump chikutwish kuman anch chidi chiwamp yisu yimwing kuswimp yisend ya ankwash a mudimu. Pakwez, chidi cha usey kulik akadivar awanyisha yisend yiney mu chisu kanang mulong wa kwikal ni ukaliweny.

¹² Kukwatijan ni maswir ma pol pen, kukutwish kwikal yisend yikwau ya kuyinkish ankwash a mudimu amekeshina anch kukul kwau “kumeken ku mes kwa antu awonsu.” (1 Tim. 4:15) Anch kudi amakurump akemp, akutwish kumwit nkwash wa mudimu mulong wa kumukwash ntakel wa chisak cha mudimu wa kulejan, ap yisu yikwau kusal mudi nkwash wa chisak, ukusala mwinshin mwa umutakel wa amakurump. Akutwish kuyinkish ankwash a mudimu yikunku ya kusal ku chikumangan Mudimu ni Mashakamin, kutakel Dilejan dia Bibil dia Chikumangen ni kusal madiskur ma antu awonsu. Akutwish kuyinkish ankwash a mudimu yisend yikwau anch kudi maswir ni anch awanyishin yom yitinau. (1 Pita 4:10) Ankwash a mudimu akutwish kuyikwash amakurump mu kwipan kwau ayinau.

¹³ Ap anch mudimu wau ushalijadin ni wa amakurump, udi mudimu utumbila kudi Nzamb ni chidi cha usey mulong wa kwend kuwamp kwa chikumangen. Mu kusut kwa chisu, anch ankwash a mudimu awanyish yisend yau nawamp ni kwikal awanyidina kusal mudi atufung ni alej, akutwish kuyitond mulong wa kwikal amakurump.

¹⁴ Anch udi mukadivar nsand watambwila dibatish katat, ov, ukat kusal usu wa kuwanyish yom yitinau mulong wa kwikal nkwash wa mudimu? (1 Tim. 3:1) Mulong antu avud ezin mu uyakin muvu ni muvu, kudi maswir ma amakundj awanyishina yom yitinau mulong wa kwikal ni yisend mu chikumangen. Ukutwish kuwanyish yom yitinau pa kukudish maswir ma kuyikwash antu akwau. Anch chidi mwamu, tongijokin pa chilakej chiwamp cha Yesu. (Mat. 20:28; Yoh. 4:6, 7; 13:4, 5) Maswir mey makukul piudandamedina kwikal ni musangar wa kupan. (Mid. 20:35) Chawiy lel, ikasikesha mulong wa kuyikwash antu akwau, kukwash mulong wa kurijek ni kulam Chot cha Want ap kusal yikunku mu Chikumangan Mudimu ni Mashakamin. Kuwanyish kand yom yitinau kwitin kukudish mikadil ya mu spiritu kusutil dilejan dia muntu panrend. (Kus. 1:1, 2; Gal. 5:22, 23) Chikwau kand, mukadivar ukimbina kwikal ni yisend ukat kumekesh anch udi muntu wa kuchingejin ni ushinshamena anch amwinkish yom ya kusal mu chikumangen.—1 Kor. 4:2.

¹⁵ Ankwash a mudimu akat kuyitond kudi spiritu utumbila mulong wa uwamp wa chikumangen. Antu a mu chikumangen akutwish kumekesh kujikitish kwau mulong wa mudimu ukash usadinau ankwash a mudimu kusutil ku kwovijan nau nawamp pawanyishinau yisend yau. Mu mutapu winou, chikumangen chikumekesh kujikitish mulong wa ditenchik dia Yehova dia kulam chikumbu chend pakad kanvundangesh.—Gal. 6:10.