Ankwash’a Midimu Asadil Mudimu wa Usey
1 “Amekeshin ayinau anch ipanin kud Nzamb. Amekeshin kand ritiy rau mu kwinungin nich mushiku ku mudimu wa Want ni mu kukwash antu akwau kwikasikesh mu ritiy.” Mwamu mulondina buku Organisés pour bien remplir notre ministère, pa paj 56, piur pa ankwash’a midimu. Chakin, chilikej cha muspiritu chipaninau ankwash’a midimu chifanyidin kamu kulondul. Kusadil nau pamwing ni amakurump ‘kukat kuwejin ku kukul kwa mujimbu wawonsu ni kukasikan mu rukat.’—Efe. 4:16.
2 Ankwash’a midimu asadiling mudimu ujim mu chikumangen. Tutonginap midimu yawonsu ya usey yisadilingau! Alamining chipau, mikand, mamagazin, mabonema, ni materitwar; akat kusadil mud ankwash (in kutambul antu); kutal yisaj ya mazu; ni kukwash kukomb ni kurijek Chot cha Want. Akat kwinungin ku Shikol ya Mudimu ya Uteokras ni ku Chikumangan cha Mudimu. Amwing pakach pau akat kupanang madiskur ma pibur ap kutakel yikumangan ya chikumangen. Mud kamu yidi ya mujimbu, ankwash’a midimu asadiling midimu yituswiridina kamu.—1 Kor. 12:12-26.
3 Kuman ankwash’a midimu chisadidilau pamwing nawamp ni amakurump mud mujimbu umwing wa ushalapol, nich kalimish ni chovu kukasikeshining akwau kusal chilik chimwing. (Kol. 2:19) Chisadidilau mu kushishaman yisend yau pichuku pichuku ni chimekeshinau kutongin akwau, akat kuwejin kuyish chikumangen kurutu muspiritu.
4 Chom ik tukutwisha kusal chakwel kumekesh kujikitish kwetu mulong wa mudimu ukash usadilau ankwash’a midimu? Tufanyidin kwijik yisend yau kushalijan ni kumekesh kwitenchikin kusadil nau pamwing anch atwit ukwash wetu. Mu kulond ap mu yisalijok, tukutwish kuyilej anch tumen usey wa mudimu wau. (Jnsw. 15:23) Antu atusadidila mudimu ukash afanyidin kujikitish kwetu kwa muchim umwing.—1 Tes. 5:12, 13.
5 Dizu dia Nzamb dipanin mudimu ni yizwish ya ankwash’a midimu. (1 Tim. 3:8-10, 12, 13) Mudimu wau ujim utumbila udi wa usey ku chikumangen. Amakundj mud inay afanyidin dikasikesh dietu pakad kuziy, chikwetau awonsu “yivud ya kusal mu mudimu wa Mwant.”—1 Kor. 15:58, NW.