Yom Tufanyidina Kusal Anch Twaman Kuburen Kutentam

1-2. Yom ik yisadinau antu avud mulong wa kuburen kutentam kumenau, ni yom ik tukushinshikina?

TUSHICH mu mangand mizwila too ni kuburen kutentam. Antu avud ayisadidin pakad kutentam mulong wa mayingishin mavud, mud uzwendj, chid chau cha mujimbu, muchid wau, ap ulombu wau wa chikit. Antu avud amen mar mulong antu ajim ni antakel a maguvernema akwet ris ra nfalang. Kuburen kutentam kwinoku ni kukwau kand kukat kutumeshikish etu awonsu mar mu chilik kanang.

² Chawiy chishimwokishinap kuman anch antu avud akwet ujim mulong wa kuburen kutentam kumenau mu mangand nlel. Etu awonsu tukatin kushakam mu mangand twiyovila anch tud mu diking ni mutusadidinau nich kutentam. Antu amwing akat kwandam mu yisak ya antu apakishining kutenchik yom. Akat kubwambwil maguvernema ni yijil yau, ap kuyivot antakel amwing a chipolitik ayikanina anch akupwish milong. Pakwez etu In Kristu atukasikeshin ‘kulik kwikal a mangand’ ni kuchingej anch ching kusu Want wa Nzamb wawiy ukupwisha kuburen kutentam kwawonsu. (Yoh. 17:16) Chikalap nchik mwamu, tukatap kusangar anch twaman antu akat kuyisadin akwau pakad kutentam. Tukutwish kwiyipul anch: ‘Ang yashiken, yom ik nikutwisha kusal? Ov, kud yom nikutwisha kusal pinap kamu piur pa kuburen kutentam?’ Mulong wa kwakul ku yipul yiney, el tushinshikinany mutapu ukatay kwiyov Yehova ni Yesu pantaliken ni kuburen kutentam.

YEHOVA NI YESU AKISIN KUBUREN KUTENTAM

3. Mulong wak tukatap kusangar anch twaman kuburen kutentam? (Isay 5:7)

³ Bibil ulejen mulong wak tukatap kusangar anch twaman kuburen kutentam. Urumburil anch Nzamb watutanga mu chifu chend ni anch ndiy “ukatil kutentam ni [uyakin].” (Kus. 33:5; Dis. 1:26) Kand kal amekeshangap kuburen kutentam, ni kakatinap anch muntu ap umwing asala mwamu! (Kuv. 32:3, 4; Mike 6:8; Zak. 7:9) Chilakej, pa chisu cha muprofet Isay, Yehova watesha “madil” ma In Isarel avud ameshangau mar kud anamakwau In Isarel. (Tang Isay 5:7.) Yehova wayipupa antu awonsu adandamenang kujip Chijil ni ayisadinang akwau pakad kutentam​—Isay 5:5, 13.

4. Mutapu ik wiyovilingay Yesu anch amusadin muntu pakad kutentam? (Tal kand chipich.)

⁴ Mud Yehova, Yesu niyend ukatin kutentam ni ukisin kuburen kutentam. Dichuku dimwing wamana ikundj umwing wading ukweta chikas cha kalip. Yesu wamwovila riy ni wamwoka. Pakwez pamanau antakel a chirelijon yom yiney, kasangarap. Ading imedin kwau ching kusu pa kulimish chijil cha Sabat pakwez kabanginap pa kumukwash muntu wading umena mar. Mutapu ik wiyovay Yesu pamanay chisal chau? “Wova ushon nakash mulong wa kuchinchik kwa michim yau.”​—Mar. 3:1-6.

5. Ap anch chiyipinap kujiman piur pa kuburen kutentam, pakwez yom ik tufanyidina kuvurik?

⁵ Yehova ni Yesu kakatap kusangar anch antu ayisadin akwau pakad kutentam. Chawiy chidap kwau chiyimp anch niyetu twiyov mwamu. (Ef. 4:26) Pakwez tufanyidin kuvurik anch, ap anch chiyipinap kwau kwov ujim, chinech chikutwishap kupwish kuburen kutentam tumena. Ni anch twalam ujim mu chisu chilemp, tukushiken ku kuyel mu manang ni ku mujimbu. (Kus. 37:1, 8; Yak. 1:20) Chawiy yom ik tufanyidina kusal anch twaman kuburen kutentam? Tukutwish kwilejin ku chilakej cha Yesu.

YOM YASALAY YESU PAMANANGAY KUBUREN KUTENTAM

6. Kuburen kutentam ik kwamanay Yesu padingay pa divu? (Tal kand chipich.)

⁶ Yesu wamana kuburen kutentam kuvud padingay pa divu. Wamana mutapu wayimeshangau antu mar kud antakel a marelijon. (Mat. 23:2-4) Wading kand wij mutapu wayisadinangau antu kwa chisum kud antakel In Rom. In Yuda ading akatin kudokal mu winyikel wa In Rom. Antu amwing ashikena ni kusal yisak mulong wa kurish nau In Rom. Pakwez Yesu kanungap chikas ku chisak ap chimwing chading chipakishina kuswimp guvernema. Pijikay anch antu ading akimbin kumwikadish mwant, Yesu wayichina.​—Yoh. 6:15.

7-8. Mulong wak Yesu kapakishap kupwish kuburen kutentam padingay pa divu? (Yohan 18:36)

⁷ Padingay pa divu, Yesu kapakishap kwiyandjik mu milong ya politik mulong wa kukimb kuswimp kuburen kutentam kwamanangay. Mulong wak? Wading wij anch an a antu kakwetap mbil ni kawanyidinap kwiyikel ayinau. (Kus. 146:3; Jer. 10:23) Ni kakutwishap kupwish milong yiletishining kuburen kutentam. Mangand amatakedin kud Satan Djabul, mwin chisum ni ukata kusadin usu wend mulong wa kukasikesh kuburen kutentam. (Yoh. 8:44; Ef. 2:2) Ap antu akweta rusot ra kutenchik yom akutwish kukangany mulong wa kuburen kuwanyin.​—Mul. 7:20.

⁸ Yesu wading wij anch ching kusu Want wa Nzamb wawiy ukutwisha kupwish milong yawonsu yiletishina kuburen kutentam. Mulong wa diyingishin dined, wasutisha chisu chend ni usu wend mu “kulejan ni kurumburil rusang ruwamp ra Want wa Nzamb.” (Luk. 8:1) Wapana kashinsh kud “antu ovila nzal ni impu ya kutentam” anch disuden da kukatulan kwa milamu ni kuburen kutentam did piswimp. (Mat. 5:6; Luk. 18:7, 8) Yom yiney yikuwanyin, kadap kusutin maguvernema ma an a antu, pakwez kusutin winyikel wa Want wa Nzamb; Want winou “udap wa mangand minam.”​—Tang Yohan 18:36.

MWIMBURIJA YESU CHISU UMENA KUBUREN KUTENTAM

9. Yom ik yikwinkishina kashinsh anch ching kusu Want wa Nzamb wawiy ukupwisha kuburen kutentam kwawonsu?

⁹ Nlel, kuburen kutentam kupandaken nakash kusutamu padingay Yesu pa divu. Satan nau antu akad kuwanyin ada mwinshin mwa umutakel wend awiy adandamedina kuletish kuburen kutentam mu “machuku ma nsuden.” (2 Tm. 3:1-5, 13; Kuj. 12:12) Mud Yesu, niyetu twij anch ching kusu Want wa Nzamb wawiy ukupwisha misul ya kuburen kutentam. Mulong tukat kunung chikas ku Want winou, tukatap kwiyandjik mu yisak ya antu akata kubwambwil maguvernema ap akata kumachingejin anch makupwish kuburen kutentam. Shinshikin chilakej cha nambaz Stacy.a Kurutu kwa kwilej uyakin, Stacy wabombakanang yisu yivud ni yisak ya antu endanganang mu jinjil mulong wa kukimb kupwish kuburen kutentam. Pakwez wasambisha kwidjidjek piur pa yom yasalangay. Ulondin anch: “Chisu twasalang yom yiney, niyipulang anch nading kamu nisadin yom yiwamp. Pakwez pinap nij anch nisadin yom yiwamp, mulong ninungin chikas ku Want wa Nzamb. Nij anch Yehova ukupwish mar mawonsu, chom nakad mutapu wa kusal.”​—Kus. 72:1, 4.

10. Kushalijan ik kuda pakach pa yom yikatau kusal antu apakishining kuwapish yom ni chiyul cha Yesu chida mu Mateu 5:43-48? (Tal kand chipich.)

¹⁰ Antu avud nlel akat kwandam mu yisak yipakishina kuswimp maguvernema. Pakwez avud pakach pau akat kwikal in ujim, kubwambwil ku yijil ni kuyisal akwau nayimp. Yiney yawiyap yom yatufundishay Yesu kusal. (Ef. 4:31) Mukadivar Jeffrey ulondin anch: “ Nij anch antu akata kwendangan mu jinjil mulong wa kupakish kuwapish yom akutwish kujiman swa, kusambish kusheshol ni kwiy yom, ap kand kuyisal antu akwau nayimp.” Pakwez Yesu watufundisha kuyikat antu awonsu, chikupu ni antu atukisina ap atupompatina. (Tang Mateu 5:43-48.) Mulong tud In Kristu, tusadin usu wa kwipuk chom chin chawonsu chakad kukwatijan ni chilakej chatushilay Yesu.

11. Mulong wak chikutwish kutukasiken kumwimburij Yesu?

¹¹ Ap anch twij anch ching kusu Want wa Nzamb wawiy ukupwisha kuburen kutentam rawonsu, chikutwish kutukasiken kumwimburij Yesu anch atusadin nayimp. Shinshikin yom yamushikena Janiya, wasadinau nayimp mulong wa ulombu wend wa chikit. Ulondin anch: “Yom yalondangau antu yangovishang nayimp nakash, najimana ni nakata anch ayipup. Chawiy, natonga anch chid chiwamp kwandam mu chisak cha antu arishikishina kasolikany ka ulomb wa chikit. Namana anch winou wawiy wading mutapu uwamp wa kumekesh ujim wam.” Pakwez mu kusut kwa chisu Janiya wajingunina anch wading ukwet kuswir kwa kuswimp. Ulondin anch: “Pa ndond pa kumuchingejin Yehova, nasambisha kwitiy yom yalondangau antu ni kuyichingejin. Nadokala mu yisak yiney ni kulik kwiyandjik kand mu yom ya mutapu winou.” Tufanyidin kubabal chakwel kangal twalikidil ujim utubachika kwikal ku mutambu kanang mu yom ya politik ap mu yisak ya antu akata kwendangan mu jinjil mulong wa kupakish kuwapish yom.​—Yoh. 15:19.

12. Mulong wak chid cha usey kutond nawamp nsang tutangina, tutadina, ap tuteshina?

¹² Yom ik yikutwisha kutukwash kuyikel ujim wetu pantaliken ni kuburen kutentam? Antu avud ajingunin kal anch chid cha usey kutond nawamp yom tutangina, yom tuteshina, ni yom tutadina. Yom yimwing yitekinau pa internet yikat kuyibachik antu kwikal ni yovil yikash pantaliken ni kuburen kutentam ni yikat kuyishikij kulond yom yiyimp piur pa maguvernema. Yisu yivud, nsang tukata kutesh jikwatijadiningap kamu ni yom yasadikang. Ap anch rusang twateshang piur pa kuburen kutentam rid rakin, ov, tukutaninamu anch twadandamen kuritesh? Anch twasutish chisu chivud mu kulondul nsang ja mutapu winou, tukutwish kujiman ap kuziy chamwamu. (Jnsw. 24:10) Cha ubaj kupandakan, tukutwish kuvuramen anch Want wa Nzamb wawiy ukupwisha kuburen kutentam kwawonsu.

13. Kwikal ni chaku chiwamp cha kutang Bibil kukutwish kutukwash mutapu ik anch twaman kuburen kutentam?

¹³ Kwikal ni chaku chiwamp cha kutang Bibil ni kutongijokin kukutwish kutukwash kwijik yom yiwamp tufanyidina kusal anch twaman kuburen kutentam. Nambaz Alia wiyova nayimp nakash pamanangay antu akat kuyimesh akwau mar kwi ndond kwading kushichay. Chading chimeken anch antu asalang yom yiney yiyimp kayipupangap kwau. Ulondin anch: “Niyipulang amwinam anch: ‘Ov, nikwet kamu kashinsh anch Yehova ukupwish milong yiney?’ Chisu chinicha chawiy natanga mukand wa Job 34:22-29. Maverse minam manvurisha anch kwikil muntu ujingamina ku mes ma Yehova. Ndiy kusu wija mutapu uwamp wa kuyirumburish antu, ni ndiy kand ukutwisha kupwish milong yawonsu ya muntu ni muntu.” Pituchingedina anch Want wa Nzamb ulet chisambu chakin, yom ik tufanyidina kusal katat?

YOM TUKUTWISHA KUSAL ANCH TWAMAN KUBUREN KUTENTAM

14. Yom ik tukutwisha kusal mulong wa kulik kunung chikas ku kuburen kutentam kuda mu mangand minam? (Kolosay 3:10, 11)

¹⁴ Tukutwishap kuyikangesh antu akwau kusal yom yiyimp, pakwez tukutwish kuyikel yom tusadina ayinetu. Mud mutapu twisambinang kwiur oku, tukutwish kumwimburij Yesu kusutin kumekesh rukat. Mwikadil winou ukutwish kutukwash kuyisadin antu akwau nich kalimish, ap antu atupompatina. (Mat. 7:12; Rom 12:17) Yehova ukat kusangar anch twayisadin antu akwau yom yiwamp, nich kutentam.​—Tang Kolosay 3:10, 11.

15. Kuyilej antu akwau uyakin uda mu Bibil kukwet usu ik pa milong ya kuburen kutentam?

¹⁵ Mutapu uwamp wa kurish ni kuburen kutentam ud wa kulejan uyakin wa Bibil. Mulong wak tulondina mwamu? Mulong “ronganyin ra [Yehova]” rikutwish kumuswimp muntu wadinga muyimp kwinsambishin kwikal muntu muwamp, ukasikeshina chisambu ni ukweta rukat. (Isay 11:6, 7, 9) Kurutu kwa kwilej uyakin, ikundj utazukinau anch Jemal wandama mu chisak cha ampopol mulong wa kurishikish guvernema wading umenay anch uyimeshikishin antu mar. Ulondin anch: “Ukutwishap kuyiswimp antu ku usu. Niyam naswimpap ku usu, pakwez naswimpa kusutin uyakin wa Bibil nileja.” Yom yilejay Jemal yamubachika kulikap kurish. Chawiy anch twayifundish antu uyakin uda mu Bibil, tukutwish kuyikwash kulikap kusal yom yiyimp yikata kuyimesh antu akwau mar.

16. Mulong wak ukatina kuyilej antu akwau piur pa Want wa Nzamb?

¹⁶ Mud Yesu, tukwet musangar wa kuyilej antu anch ching kusu Want wa Nzamb wawiy ukupwisha kuburen kutentam kwawonsu. Ruchingej riner rikutwish kuyikasikesh antu ameshinau kal mar. (Jer. 29:11) Stacy, twajimbulang kwiur oku, urumburil anch: “kwilej uyakin kwankwashin kal kushimpish muchim anch ansadin am ap antu akwau pakad kutentam. Yehova ukat kusadin uruu uda mu Bibil mulong wa kutwongoj.” Tufanyidin kwirijek mulong wa kuyongoj antu akwau nich kushilamu kuda mu Bibil piur pa mutapu ukupwishau kuburen kutentam. Anch wikal ni kashinsh ka uyakin uda mu Bibil twisambina kal mu mutu wa mulong winou, chikukuswapel kuwisambin nau antu akwau nich nkeu, ku shikol ap ku mudimu.b

17. Mutapu ik utukwashinay Yehova kurish ni kuburen kutentam?

¹⁷ Twij anch tukudandamen kurish ni kuburen kutentam padandamedinay Satan kwikal “nyikel wa mangand minam.” Pakwez tukwet ukwash wa Yehova ni tuchingejin anch piswimp ap “akumudjubwil pol.” (Yoh. 12:31) Kusutin Bibil, Yehova ulejen mulong wak kud kuburen kutentam mwamu, ulejen kand mutapu ukatay kwiyov piur pa runeng ridokiling ku kuburen kutentam. (Kus. 34:18-20) Kusutin Mwanend, Yehova utufundishin yom tufanyidina kusal pitumena kuburen kutentam ni mutapu Want wend ukupwisha kuburen kutentam kapamp kamwing rawonsu. (2 Pi. 3:13) El tudandamenany kulejan rusang ruwamp ra Want nich mushiku pituchingedina chisu chikwizula “kutentam” pa divu dawonsu.​—Isay 9:7.