Yilimisha Antu Akwau

1. Mulong wak antu akatining anch ayilimish? (Jinswir 22:1)

OV, UKAT kusangar anch antu akwau akulimish? Tukutwish kwakul pakad kwidjidjek anch mwaning. Antu awonsu akatining anch ayilimish. Tukat kusangar anch antu atulimish. Chawiy, chovaken palondinay Bibil anch: ‘Kwikal ulimishinau kud kwa usey kupandakan utad wa argent ni or’!​—Tang Jinswir 22:1; NWT.

2-3. Mulong wak chiswapelingap chisu chawonsu kuyilimish antu akwau, ni yom ik tukushinshikina mu mutu wa mulong winou?

² Yisu yimwing chiswapelingap kuyilimish antu akwau. Diyingishin dimwing did anch tukat kuman ulim wau. Chikwau kand, tushich chirung chiburedinau antu avud kalimish. Pakwez etu tufanyidinap kwikal mwamu. Mulong wak? Mulong Yehova ukatin anch tuyilimish “antu a mitapu yawonsu.”​—1 Pi. 2:17.

³ Mu mutu wa mulong winou tukwilej chirumburikina kuyilimish antu akwau ni mutapu tukutwisha kuyilimish 1) antu a mu dijuku detu, 2) ambay netu In Kristu, ni 3) antu akad kwikal Atuman a Yehova. Tukushinshikin nakash mutapu tukutwisha kuyilimish antu akwau ap anch chiswapelap kusal mwamu.

CHIRUMBURIKIN IK KUYILIMISH ANTU AKWAU?

4. Chirumburikin ik kuyilimish antu akwau?

⁴ Kalimish karumburikin ik? Dizu ‘kalimish’ dimekeshin yom tutongina piur pa antu ni mutapu tuyisadidina. Anch twaman anch muntu ukwet mikadil yiwamp, ap twaman anch usadin yom yiwamp, ap kand anch ukwet ulabu kutusutamu etu, tukat kumekesh anch tumulimishin. Chid cha usey kusal mwamu, mulong niyetu tukatining anch antu akwau atusadin mwamu.​—Mat. 15:8.

5. Yom ik yikutwisha kutukwash kuyilimish antu akwau?

⁵ Yehova ukatin anch tuyilimish antu akwau, chilakej, utulejin kuyilimish “antakel a piur.” (Rom 13:1, 7) Pakwez antu amwing akutwish kulond anch: “Nikumulimish muntu ching anch uwanyidin kutambul kalimish kam.” Ov, chiwapin kutong mwamu? Etu atushalapol a Yehova twijing anch kalimish tukweta mulong wa antu kimedinap kwau ching pa yisal yau. Kimedin pa chom cha usey nakash—rukat mulong wa Yehova ni rusot ra kumusangaresh.​—Jos. 4:14; 1 Pi. 3:15.

6. Ov, chitwishikin kuyilimish antu akad kutulimish? Rumburil. (Tal kand chibur.)

⁶ Antu amwing akutwish kwiyipul anch: ‘Ov, chitwishikin kamu kumulimish muntu wakad kukulimish?’ Chakul chid anch mwaning. Shinshikin yilakej ey. Mwant Saul wamusaala mwanend Jonatan masaal kurutu kwa antu akwau. (1 Sam. 20:30-34) Chikalap nchik mwamu, Jonathan wadandamena kumulimish tatukwend wading mwant, ni wamukwasha kurish njit djat ni dichuku dafay. (Kub. 20:12; 2 Sam. 1:23) Mwin Kupesh Mujim Eli wamwela Ana anch walewang kal. (1 Sam. 1:12-14) Pakwez Ana wamwakula Eli ni kalimish, ap anch mu Isarel antu awonsu ading ij anch Eli wakanganyang kuyipup anend, yom yafanyinay kusal mulong wading tatukwau ni mwin kupesh mujim. (1 Sam. 1:15-18; 2:22-24) Ni antu amwing a mu Aten amuswingisha kambuy Paul, amutazukang anch “mwin kuchochok.” (Mid. 17:18) Ap mwamu, Paul wayambambishang kwa kalimish. (Mid. 17:22) Yilakej yiney yitufundishin anch rukat mulong wa Yehova ni rusot ra kumusangaresh yikutwish kutubachik kuyilimish antu akwau ap anch chiswapelap kusal mwamu. El tumanany antu tufanyidina kulimish ni mulong wak.

YILIMISHA ANTU A MU DIJUKU DEY

7. Yom ik yikutwisha kusal anch chitukasiken kuyilimish antu a mu dijuku detu?

⁷ Chikokujol. Tukat kusutish chisu chilemp nau antu a mu dijuku detu. Chawiy twij mikadil yau yiwamp ni ulim wau. Amwing akutwish kwikal ni mayej makutwisha kusal anch chitukasiken kuyibangin, ap akutwish kurish ni yakamish yikash. Akwau akutwish kulond ap kusal yom yikutwisha kutujimesh. Pa ndond pa kwiyov nawamp chisu chidau pamwing nau antu a mu dijuku dau, antu amwing akat kuyiburen akwau kalimish ni kuyijimen. Mud chibudikin, dijuku dikat kwaurok. Mud mutapu ukutwisha mayej kukangesh yid kushalijan ya mujimbu kusal pamwing, kuburen kalimish kukutwish kukangesh antu a mu dijuku kusal yom mu uumwing. Pakwez, mud mutapu ukutwishau kwok mayej mavud, antu a mu dijuku akutwish kwilej ni kumekeshijadin kalimish umwing ni mukwau.

8. Mulong wak chid cha usey kuyilimish antu a mu dijuku detu? (1 Timote 5:4, 8)

⁸ Mulong wak chid cha usey kuyilimish antu akwau? (Tang 1 Timote 5:4, 8.) Mu mukand wa kusambish wamufundinay Timote, Paul wamekesha mutapu ukutwishau antu a mu dijuku kubangin maswir ma umwing ni mukwau. Warumburila anch tufanyidinap kuwanyish maswir ma antu a mu dijuku detu mulong wa kwel anch chid chisend chetu, pakwez tufanyidin kusal mwamu mulong wa kumekesh anch ‘tulamatin kud Nzamb.’ Charumburik anch tusadining mwamu mulong tumukatin Yehova ni ud mutapu wa kumwifukwil. Yehova ndiy watanga dijuku. (Ef. 3:14, 15) Chawiy anch twayilimish antu a mu dijuku detu, tumulimishin Yehova, Ntakel wa dijuku detu. (1 Tm. 5:4.) Dined did chakin kamu diyingishin da usey difanyidina kutubachik kuyilimish antu a mu dijuku detu!

9. Mutapu ik ukutwishay ikundj ni mband kumekeshijadin kalimish? (Tal kand chipich.)

⁹ Mutapu wa kuyilimish antu akwau. Ikundj umulimishina mukajend ukat kumekesh anch ud wa usey chikala ku ujindj ap pakach pa antu. (Jnsw. 31:28; 1 Pi. 3:7) Kakatap kumubul, kumukwatish usany, ap kusal yom yimekeshina anch kakwetap usey. Mukadivar Ariela ushicha mu Arjantin ulondin anch: “Mulong wa mayej makwetay mukajam, yisu yimwing ukat kulond yom yikata kwinsal nayimp. Anch yom mud yiney yashiken, nikat kuvurik anch yom yilondinay yimekeshinap kamu yovil yend yakin. Mu yisu mud yiney, nikat kuvurik 1 Korint 13:5, ukata kwinkasikesh kulond mu mutapu wa kalimish pa ndond pa kulond kwa kapipej.” (Jnsw. 19:11) Mband umulimishina nfumwend ukat kulond yom yiwamp piur pend kud akwau. (Ef. 5:33) Kakatap kumupipej, ap kumuswimbul mu mutapu uyimp, ni kumusaal. Wijing anch, ang wasal mwamu ukutwish kuyipish uruw wend. (Jnsw. 14:1) Nambaz umwing uda mu Itali, ukweta ikuny urishina ni yakamish ulondin anch: “Yisu yimwing nikat kuman anch nfumwam upandakeshin chad. Kwinsambishin, mazu mam, ni chifu cham yamekeshang anch nimulimishinap. Pakwez najingunina anch kusutish chisu pamwing nau antu alondang kwa kalimish, kwankwasha niyam kumulimish nfumwam.”

10. Mutapu ik ukutwishau ansand nau ayangadim kumekesh anch ayilimishin anvaj au?

¹⁰ Ansand nau ayangadim, limishany mbil jikutekidinanyau kud anvaj en mu dijuku. (Ef. 6:1-3) Londany kwa kalimish chisu wambambinanya nau anvaj en. (Kub. 21:17) Anch anvaj en ananap, mekeshany kalimish kusutin kuyikwash nich yom yiswirikedinau. Salany usu wen wawonsu mulong wa kuyibangin. Tushinshikinany chilakej cha María ukweta tatukwend wakad kwikal Kaman wa Yehova. Payelay tatukwend, chamukasikena María kumubangin mulong wa yom yasalangay. Ulondin anch: “Namulembila Yehova chakwel ankwash kumulimish tatuku. Natonga anch, ang Yehova wingitin kuyilimish anvaj, chid mulong ukutwish kwinkwash kand kusal mwamu. Mu kusut kwa chisu, najingunina anch nifanyidin kudandamen kumulimish tatuku ap anch kaswimpinap mwikadil wend.” Anch twayilimish antu a mu dijuku detu chikalap nchik kurumbok kwau, tukumekesh anch tumulimishin Yehova wasala dijuku.

YILIMISHA AMBAY NEY IN KRISTU

11. Mulong wak chikutwish kutukasiken kuyilimish ambay netu In Kristu?

¹¹ Chikokujol. Ambay netu In Kristu akat kusadin mbil ja Bibil mu mwom wau, pakwez yisu yimwing akutwish kutusadin pakad kutentam, kuturumburish nayimp, ap kusal yom yikutwisha kututap ku muchim. Anch mbay netu mwin Kristu wasal yom yikutwisha kusal anch twikal ni “diyingishin da kwinan,” chikutwish kutukasiken kudandamen kumulimish. (Kol. 3:13) Yom ik yikutwisha kutukwash kudandamen kumulimish?

12. Mulong wak chid cha usey kuyilimish ambay netu In Kristu? (2 Pita 2:9-12)

¹² Mulong wak chid cha usey kuyilimish antu akwau? (Tang 2 Pita 2:9-12.) Mu mukand wend wa kaad, Pita walejana anch antu amwing mu chikumangen cha Win Kristu mu mivu chitot ya kusambish alondang pakad kalimish piur pa “in uyaj,” charumburik anch amakurump In Kristu. Yom ik yasalau angel ashinshamena pamanangau yom yiney? “Mulong wa kumulimish Yehova,” kalondap dizu diyimp ap dimwing piur pa antu inay. Chisangareshin kutesh mwamu! Angel awanyidina asala usu wa kulik kulond yom yiyimp piur pa antu inay ayimp. Pakwez amulikina Yehova chakwel ayirumburish ni kuyipup. (Rom 14:10-12; ilakej ni Yud 9.) Yom ik twilejidina ku chilakej cha angel? Anch tufanyidin kuyilimish antu atupompatina, tufanyidin kand kuyilimish nakash ambay netu In Kristu. Tufanyidin kamu kusal usu wa kwikal “a kusambish” kuyilimish. (Rom 12:10) Anch twasal mwamu tukumekesh anch tumulimishin Yehova.

13-14. Mutapu ik tukutwisha kuyilimish antu awonsu mu chikumangen? Let yilakej. (Tal kand yipich.)

¹³ Mutapu wa kuyilimish antu akwau. Amakurump, salany usu wa kuyifundish antu akwau nich rukat. (Flm 8, 9) Anch ukimbinany kumuyul muntu, salany mwamu nich rukat kadap chisu ujimenanya. Anambaz, ukutwishany kusal yom yivud mulong wa kukasikesh kalimish mu chikumangen kusutin kwipuk mboj, ni tulondol. (Tit. 2:3-5) Etu awonsu tukutwish kumekesh anch tuyilimishin amakurump mu chikumangen, kusutin kusal nau pamwing ni kuyijikitish mulong wa mudimu ukash usadinau wa kutakel yikumangan, mudimu wa kulejan, ni kuyikwash antu ‘ayila kuns.’​—Gal. 6:1; 1 Tm. 5:17.

¹⁴ Chamukasikena nambaz Rocío kumulimish mukurump wamwinkisha chiyul. Ulondin anch: “Namana anch kalondap mu mutapu umekeshina rukat. Ku chikumbu nalonda yom yiyimp piur pend. Ap anch namekeshap patok, pakwez nidjidjekaku piur pa yibachikin yend ni nasadinap chiyul chend.” Yom ik yamukwasha Rocío? Urumburil anch: “Mu program wam wa kutang Bibil nawila pa mukand wa 1 Tesalonik 5:12, 13. Najingunina anch nadingap nimulimishina mukadivar winou, kom kam kasambisha kwinfish nich. Namulembila Yehova ni nasambisha kukimbijol mu mikand yetu mulong wa kutan nsang jafanyina kwinkwash kuswimp mwikadil wam. Najingunina anch mukadivar wayen kadingap kwend ni mulong, pakwez mulong wading kud am, nadingap nikepishina. Katat nij anch chingitin kwikepish mulong wa kutwish kuyilimish antu akwau. Nichikwet kuswir kwa kuswimp, pakwez pinisadina usu wa kuyilimish antu akwau, niyovil anch nid mu chisambu ni Yehova.”

YILIMISHA ANTU AKAD KWIKAL ATUMAN A YEHOVA

15. Mulong wak chikutwish kutukasiken kuyilimish antu akad kwikal Atuman a Yehova?

¹⁵ Chikokujol. Mu mudimu wa kulejan, yisu yivud tukat kutan antu amekeshina anch kasangaredinap uyakin uda mu Bibil. (Ef. 4:18) Antu amwing akat kulik kutesh uruw wetu mulong akatin kwau kushal mutapu udau. Tukutwish kutanijan ni alej a ku shikol akasikena kusangaresh, ambay netu a shikol ap ambay netu a mudimu akweta mikadil yiyimp. Mu kusut kwa chisu, kalimish ketu mulong wa awiy kakutwish kusambish kukep ni tukutwish kusambish kuyisadin mu mutapu uyimp.

16. Mulong wak chid cha usey kuyilimish antu akad kumusadin Yehova ? (1 Pita 2:12; 3:15)

¹⁶ Mulong wak chid cha usey kuyilimish antu akwau? Vurik anch Yehova ukat kushinshikin mutapu tukata kuyisadin antu akad kumusadin. Kambuy Pita wayivurisha In Kristu anch mikadil yau yiwamp yikutwish kuyibachik antu amwing ‘kumutumbish Nzamb.’ Mulong wa diyingishin dined, wayikasikesha kulondin yitiyij yau “nich kwitudish ni kalimish kakurikina.” (Tang 1 Pita 2:12; 3:15.) Ap anch chiyitin In Kristu kulondin yitiyij yau kurutu kwa anzuj ap antu akwau, afanyidin kusal mwamu nich kalimish yisu yawonsu. Mulong Yehova umening ni uteshining yom tukata kulond ni mutapu tukata kuyilond. Dined did kamu diyingishin da usey difanyidina kutubachik kuyisadin antu akad kwikal Atuman a Yehova nich kalimish!

17. Mutapu ik tukutwisha kuyilimish antu akad kwikal Atuman a Yehova?

¹⁷ Mutapu wa kuyilimish antu akwau. Pituda mu mudimu wa kulejan, tufanyidinap kumekesh anch tuyipipejin antu akweta ronganyin rikemp piur pa Bibil ap akad kwijik chom ap chimwing. Pakwez tufanyidin kuyiman mud a usey nakash kud Nzamb ni anch atusutinamu mu yom kanang. (Age 2:7; Flp. 2:3) Anch muntu wakusaal mulong wa yitiyij yey, kangal wamuchirishin masaal, chilakej kusutin kusadin mazu makutwisha kumujimesh. (1 Pi. 2:23) Anch walond mazu mayimp, ufanyidin kwit dilikishin pakad kulab. Mutapu ik ukutwisha kuyilimish antu ada ku mudimu? Ikal nsalamudimu mwin kashinsh ni sal usu wa kukudish mikadil yiwamp pantaliken ni antu usadina nau mudimu ni antu usadidina. (Tit. 2:9, 10) Anch ud nsalamudimu mwin kashinsh, ukweta mushiku, ni wija kusal mudimu nawamp, ukutwishap pamwing ap yisu yawonsu kuyisangaresh antu, pakwez ukumusangaresh Nzamb.​—Kol. 3:22, 23.

18. Mulong wak chid cha usey kuyilimish antu akwau?

¹⁸ Tukwet mayingishin ma usey nakash ma kuyilimish antu akwau. Twaman kal anch, ang twayilimish antu a mu dijuku detu, tukumekesh anch tumulimishin Ntakel wetu wa dijuku, Yehova. Chilik chimwing kand, anch twayilimish akadivar nau anambaz netu, tukumekesh anch tumulimishin Tatukwetu wa mwiur. Ni anch twayilimish antu akad kwikal Atuman a Yehova, chikuyiswapel kumutumbish ni kumulimish Nzamb wetu mujim. Ap anch antu amwing katulimishinap kwau, etu tufanyidin kusal usu wa kuyilimish. Mulong wak? Mulong Yehova ukutuyukish. Ukanin anch: “Akwinlimisha am niyam nikuyilimish.”​—1 Sam. 2:30.