Antu Ada “mu Mwikadil Uwanyidina” Akwitiy

1. Yom ik yikutwishau kusal antu anch twayilej rusang ruwamp? (Midimu 13:47, 48; 16:14, 15)

MU MIVU chitot ya kusambish, antu avud itiya uyakin pakad kulab kupwa kwa kutesh uruu wa Want. (Tang Midimu 13:47, 48; 16:14, 15.) Mutapu umwing kand ni nlel, antu amwing akat kusangar nakash pakatau kutesh rusang ruwamp kapamp ka kusambish. Ap antu akata kulik kusanger uruu wa Want kapamp ka kusambish, akutwish kuwitiy mu kusut kwa chisu. Yom ik tufanyidina kusal anch twatan antu ada “mu mwikadil uwanyidina” mu mudimu wetu wa kulejan?

2. Mutapu ik ufanakena mudimu wetu wa kulejan ni mudimu wa ndim?

² Chilakej: Mudimu wetu wa kwikadish in kwilej ufanaken ni wa ndim. Anch mabuj ma mutond umwing maswa, ndim ukutwish kumangul ap anch mu chir chend muchid ndond yikwau yifanyidinay kudim ni kukun. Chilik chimwing kand, anch twatan muntu witiyina uruu wetu, tufanyidin kumukwash kwikal mwin kwilej wa Kristu pakad kulab. Ku mutambu ukwau, tufanyidin kudandamen kuyikwash antu akweta kuswir kwa kuyishil chisu mulong wa kuman usey wa yom yilejinau. (Yoh. 4:35, 36) Nkeu jikutwish kutukwash kuman mutapu uwamp wa kuyikwash in kututesh. Tumanany katat yom tukutwisha kusal mulong wa kuyikwash antu itiyina kwambamb nau kapamp ka kusambish. Tukuman kand mutapu tukutwisha kuyikwash antu inay kudandamen kumusejin Yehova ni kwikal atushalapol end.

ANCH ANTU ITIY KWAMBAMB NAU

3. Yom ik tufanyidina kusal anch twayitan antu asangaredina uruu wetu? (1 Korint 9:26)

³ Anch twatan mu mudimu wa kulejan antu asangaredina uruu wetu, tufanyidin kuyikwash kusambish kwilej piur pa Yehova ni kumusejin piswimp pakad kulab. Tufanyidinap kulab kuyit mulong wa kusambish kwilej nau Bibil ni kuyitazuk ku yikumangan yetu, ap anch kawiy kapamp ka kusambish kwambamb nau.​—Tang 1 Korint 9:26.

4. Let chilakej cha muntu wading ukatina kusambish kwilej Bibil pakad kulab.

⁴ Yita chakwel usambish nau dilejan da Bibil. Antu amwing tukata kwambamb nau akatining kusambish kwilej nau Bibil pakad kulab. Chilakej, Dakanying, changadim umwing wa mu Kanada waya ku prezantwar wasend broshir Sanger Mwom Chikupu! Nambaz wading ku prezantwar wamuleja anch ukutwish kwilej Bibil kusutin broshir winou pakad kufut nfalang. Changadim winou wasangera yom yamulejau ni apanijana manimero ma telefon. Dichuku dawiy dimwing, changadim winou wamufundina nambaz mulong wa kumwipul dichuku dafanyinau kwilej nend Bibil. Palonday nambaz anch ukwez kwinsuden kwa rubing, changadim winou wamwakula nambaz anch: “Ov, ukutwishap kwez damashik? Nishadidin kwam.” Asambisha kwilej Dakatan dinida. Rubing rawiy rinira, changadim wakumangana kapamp ka kusambish ku yikumangan ni wadandamena kuya kurutu.

5. Yom ik yikutwisha kutukwash kwijik mutapu uwamp wa kumwit muntu mulong wa kusambish kwilej nend Bibil? (Tal kand yipich.)

⁵ Chakin kamu, kadap antu awonsu akutwisha kukat kusambish kwilej Bibil kapamp ka kusambish mwamu, mud mwasalay changadim winou. Antu amwing chikwit kuyishil chisu chakwel amekesh anch asangaredin uruu. Cha kusambish, chikutwit kusambish mambamb kusutin mutu wa mulong umusangareshina muntu. Anch twikal ni chitongijok chiwamp ni twadandamen kumubangin muntu, mu chisu chikemp, chikutuswapel kusambish dilejan da Bibil. Yom ik tukutwisha kulond chisu tumwitina muntu mulong wa kusambish kwilej nend Bibil? Chipul chinech ayipulach akadivar nau anambaz avud akweta ukaliweny mu kusambish malejan ma Bibil.

6. Yom ik tukutwisha kulond mulong wa kumukwash muntu usangaredina uruu kukat kudandamen kwisamb netu?

⁶ In kulejan nau ayibol ipulau piur pa kusambish malejan ma Bibil arumburila anch, mu jingand jimwing chid cha usey kulik kusadin mazu mud “kwilej,” “dilejan da Bibil,” ap “kukufundish” chisu wisambidina piur pa dilejan da Bibil. Ajingunin kal anch mutapu uwamp ud wa kusadin mazu mud “mambamb,” “minsamb,” ni “kwijik Bibil.” Mulong wa kumukwash muntu akat kand kwisamb ney kapamp kakwau ukutwish kulond anch: “Chisangareshin kuman mutapu wakwilay Bibil ku yipul ya usey nakash ya mu mwom” ap kand anch: “Bibil kadap kusu kwend buku wa chirelijon; pakwez ukwet yiyul ya usey yikata kutukwash mu mwom wa dichuku dawonsu.” Ukutwish kuwejinap anch: “Chikatap kusend chisu chilemp; pakwez aminit 10 ap 15 awanyidin kwau mulong wa kwilej yom ya usey.” Ukutwish kulond yom yiney pakad kusadin mazu “kutenchik dichuku” ap “rubing ni rubing,” mulong mazu minam makutwish kumushikij muntu kutong anch ufanyidin kamu kutanijanang ney chisu chawonsu mulong wa kwilej.

7. Chisu ik chajinguninau antu amwing uyakin wa Bibil? (1 Korint 14:23-25)

⁷ Yitazuka ku yikumangan. Chimeken anch pa chirung cha kambuy Paul, antu amwing ajingunina uyakin wa Bibil kupwa kwa kukumangan ku yikumangan ya Win Kristu. (Tang 1 Korint 14:23-25.) Chid kand mwamu nlel. Antu avud akat kwikal swa mu urund wa piswimp ni Yehova, anch asambish kukumangan. Chisu ik ufanyidina kuyitazuk ku yikumangan? Buku Sanger Mwom Chikupu! ukwet diladikij mu dilejan da 10, pakwez ukwetap kuswir kwa kushik bil mu dilejan dined chad lel umutazuk muntu ku yikumangan. Mu mambamb ma kusambish, ukutwish kumutazuk ku yikumangan ya kwinsuden kwa rubing kusutin kumulej mutu wa mulong wa diskur, ap dinans dikwisambinau mu Dilejan da Chinong cha Kalam.

8. Yom ik tukutwisha kumulej muntu tutazukina ku yikumangan yetu? (Isay 54:13)

⁸ Anch wamutazuk muntu, murumburila mutapu ushalijadina yikumangan yetu ni maegliz makatay kuya. Kupwa kwa kukumangan ku yikumangan ni kwilej Chinong cha Kalam kapamp ka kusambish, mwin kwilej wa Bibil umwing wamwipula mulej wend anch: “Ntakel wij majin ma antu awonsu?” Nambaz wamuleja anch, etu awonsu tukat kusal usu wa kuyijik antu ada mu chikumangen chetu mud mutapu twijing majin ma antu a mu dijuku detu. Mwin kwilej wamana kushalijan pakach pa yom yiney ni yom yasadikang mu egliz wau. Chilik chimwing kand, antu avud kijingap rutong ra yikumangan yetu. (Tang Isay 54:13.) Tukat kukumanganang mulong wa kumwifukwil Yehova, kutufundish kud ndiy, ni kukasikeshijan umwing ni mukwau. (Heb. 2:12; 10:24, 25) Mud chibudikin, ku yikumangan yetu tukatap kulimish yom ya yishankur ni antu akat kutambul mafundish pakad kanrumbangesh. (1 Ko. 14:40) Yot yetu ya Want ayitungining pakad kutekolamu yom yivud mulong chituswapel kwilej nawamp. Mulong twiyandjikiningap mu milong ya politik, tukatap kand kuyisambin ni tukatap kutadikijan pa milong yitadina chitongijok cha muntu ni muntu. Chikutwish kwikal cha usey kusambel kumulej muntu video Ov, Yom ik Yisadikininga ku Chot cha Want? Mwamu ukwijik yom yikumanay.

9-10. Anch wamutazuk muntu ku yikumangan, yom ik ukutwisha kusal mulong wa kumwinkish kashinsh anch umushindidinap kusal ap kulond chom kanang? (Tal kand chipich.)

⁹ Antu amwing akat kwidjidjek kukumangan netu mulong oviling wom anch tukuyipwit chakwel ikal Atuman a Yehova. Mwinkisha muntu kashinsh anch tukatining antu kwez ku yikumangan ni tukatap kuyishindin kusal ap kulond chom kanang. Tukat kutazuk majuku, ap muda anikanch. Ku yikumangan yetu, kwikiling kwauril mafundish ma anikanch ni ma amakurump. Pakwez, anvaj nau an ashiching awonsu pamwing ni kwilej pamwing. Mu mutapu winou, anvaj ijing kudau anau ni yom yiyifundishinau. (Kub. 31:12) Tukatap kusutamu mulong wa kutambul milambu. Pakwez tukat kulondul mbil yapanay Yesu anch: “En watambulanya chamwamu, panany chamwamu.” (Mat. 10:8) Tufanyidin kand kumurumburil muntu anch kakwetap kwend kuswir kwa kudjal masun ma usey mulong wa kwez ku chikumangan. Nzamb ukat kushinshikinang muchim kadap wuntu wa pol.​—1 Sam. 16:7.

¹⁰ Anch muntu wez ku yikumangan, sal usu wa kumukwash iyova nawamp. Mwijikisha kud amakurump ni kud antu akwau. Anch wiyov anch amwakang ni chirungul, chikutwish kumuswapel kukumangan kand kapamp kakwau. Chisu cha yikumangan, anch kakwetap Bibil mwinkisha weyey, ni mukwasha kutesh nawamp diskur ni mutapu tukata kwilej pamwing.

ANCH WASAMBISH DILEJAN DA BIBIL

11. Mutapu ik ukutwisha kumekesh anch ulimishin chisu ni program wa muntu wilejina nend?

¹¹ Yom ik tufanyidina kulam mu manang chisu twilejina ni muntu? Limish program ni chisu cha muntu. Chilakej, anch watanijanany ni muntu piur pa dichuku ni chisu, sal usu wa kulimish program ap anch kwi ndond uda antu kakulimishangap kwau chisu. Chikwau kand, kapamp ka kusambish wilejina ni muntu, chikutwish kwikal cha usey kulik kulab. In kulejan amwing akweta ukaliweny alondin anch, chid chiwamp kupwish dilejan swa ap anch muntu wovil jakwilej yom yivud. Kangal wikal mwin kulond nakash. Mushila muntu wilejina nend chisu cha kulond.​—Jnsw. 10:19.

12. Mupak ik tufanyidina kwikal nich anch twasambish kwilej ni muntu?

¹² Anch wasambish kwilej ni muntu, mupak wey ufanyidin kwikal wa kumukwash kumwijik nawamp Yehova ni Yesu ni kuyikat nakash. Ukutwish kusal mwamu kusutin kupwitin nkeu jend pa Dizu da Nzamb kulik kwimen pa ukaliweny wey. (Mid. 10:25, 26) Kambuy Paul wakasikeshina mafundish mend paday Yesu Kristu, muntu watumau kud Yehova mulong wa kutukwash kumwijik Ndiy nawamp ni kumukat . (1 Ko. 2:1, 2) Kupwa, Paul wayikwasha akadivar nend kuman usey wa kuyikwash in kwilej asu kukudish mikadil yiwamp yifanakeshinau nich or, utad wa argent ni mayal ma usey. (1 Ko. 3:11-15) Mu mikadil mud yiney ya usey mud ritiy, manang, ukaliweny wa kujingunin, ni kumulimish Nzamb. (Kus. 19:9, 10; Jnsw. 3:13-15; 1 Pi. 1:7) Imburij mutapu wa kufundish wa Paul kusutin kuyikwash in kwilej ey kukudish ritiy rikash ni kwikal ni urund wa piswimp ni Tatukwau wa rukat uda mwiur.​—2 Ko. 1:24.

13. Mutapu ik tukutwisha kushimpish muchim ni kwikal isikena chisu tuyikwashina antu asangaredina uruu wetu? (2 Korint 10:4, 5) (Tal kand chipich.)

¹³ Imburij mutapu wa kufundish wa Yesu kusutin kushimpish muchim ni kwikal wisikena. Ipuk yipul yakad kumusangaresh muntu. Anch waman anch yom kanang yimukasikedin kutesh nawamp, kangal walabinap nakash. Ukutwish kusut ni kwez kwisambin yom yiney dichuku dindj. Anch kud yom yakaday kwitiy katat, mushila chisu chakwel uyakin ukuna mij mu muchim wend. (Yoh. 16:12; Kol. 2:6, 7) Bibil ufanakeshin mafundish ma makasu tusadina usu wa kupandakan nich mpwembu. (Tang 2 Korint 10:4, 5) Pa ndond pa kukindul mpwembu muchiday kal mwin kwilej wey, mukwasha bil kusal anch Yehova ikala mpwembu yend.​—Kus. 91:9.

ANCH AKUMANGAN

14. Mutapu ik tufanyidina kuyisadin antu asu ezina ku yikumangan yetu?

¹⁴ Yehova ukatin anch tuyisadin antu asu pakad kasolikany chikalap nchik ndond yidokilau, yaku yau, ikala ampich ap atuzwendj. (Yak. 2:1-4, 9) Chawiy, mutapu ik tukutwisha kuyimekeshin rukat antu asu ezina ku yikumangan?

15-16. Mutapu ik tukutwisha kuyikwash antu asu kwiyov nawamp chisu chezinau ku yikumangan yetu?

¹⁵ Antu amwing akutwish kwez ku yikumangan yetu mulong wa kumanap kwau muyisadikining ap kukutwish kwikal muntu uda ndond yikwau ndiy wayilejang kusal mwamu. Chawiy, chifanyidinap kwidjidjek kuyisejin antu mud inay piswimp. Yezishaku ni chirungul, pakad kusal yom yikutwisha kuyovish usany. Yitazuka ushakam nau pamwing. Yinkisha Bibil ni mikand ya chikumangen. Chikwau kand, bangin yovil yau. Ikundj umwing waya ku Chot cha Want wamuleja mukadivar wamwaka anch wading wovil usany mulong kadingap udjit nawamp mud antu awonsu. Mukadivar wamukwasha kwiyov nawamp, wamuleja kand anch Atuman a Yehova ading kwau mud antu awonsu. Ikundj winou waya kurutu ni watambula dibatish. Kakuvuramenangap mutapu wamukwashau kud mukadivar winou. Komb chid chiwamp kwambamb nau antu ezang ku yikumangan kwinsambishin ap kwinsuden kwa yikumangan. Pakwez tufanyidinap kwiyandjik mu milong yau.​—1 Pi. 4:15.

¹⁶ Tukutwish kand kuyikwash antu ezina ku yikumangan kwiyov nawamp kusutin kusadin mazu ma kalimish mu mambamb metu, mu yakul yetu ni mu yikunku tusutishina, pakampwil anch twisambidin piur pa antu akad kwikal Atuman ap piur pa yitiyij yau. Tufanyidin kwipuk kusadin mazu makutwisha kuyijimesh antu asu ap makutwisha kuyopat rawonsu. (Tit. 2:8; 3:2) Chilakej, tufanyidinap kuyipish yitiyij yau. (2 Ko. 6:3) Pa mulong winou akadivar akata kusal madiskur afanyidin niyau kubabal nakash. Akutwish kumekesh kand anch ayibangidin antu akad kwikal Atuman kusutin kurumburil mazu makutwishau kulik kutesh nawamp.

17. Wisu mupak tukweta mu mudimu wetu wa kulejan anch twayitan antu ada “mu mwikadil uwanyidina”?

¹⁷ Dichuku dawonsu disutina, mudimu wetu wa kwikadish in kwilej ukat kwikal wa kuswapej nakash, ni tudandamedin kutan antu ada “mu mwikadil uwanyidina mulong wa kutambul mwom wa chikupu.” (Mid. 13:48) Chawiy, kangal twidjidjek kuyit antu mulong wa kusambish kwilej nau Bibil ap kuyitazuk ku yikumangan yetu. Anch twasal mwamu tukuyikwash kwendin mwi ‘njil yitwadina ku mwom.’​—Mat. 7:14.